1 Ka Farisee dim sieba ne gbauŋmiꞌidib la yi Jerusalem n kena buꞌos Yesu ye, 2 “Bo ke ka fu nyaꞌandolib la zanꞌas ti yaanam malima la? Ba pu piesidi ba nuꞌus suꞌuŋa ka nan dita.”

3 Ka o lebisi buꞌosi ba ye, “Bo ke ka ya zanꞌas Winaꞌam noyelug la ka doli ya meŋ malima? 4 Winaꞌam noyelug la ye, ‘Naꞌasimi fu baꞌ ne fu ma.’ Ka lem yel ye, ‘Nid yaꞌa poꞌogi o baꞌ bee o ma, o suꞌum ye ba kuu o.’ 5 Amaa yanam lee paꞌan ye, soꞌ yaꞌa mor siꞌel ka na suŋ o baꞌ bee o ma, ka yele ba ye bun la ane Winaꞌam din, li pu mugus ye o noki li n tis o baꞌ laa. 6 Lina ke ka ya zanꞌas Winaꞌam noyelug ka doli ya meŋ malima. 7 Yanam zam dima, Azaya da mor sida on da diꞌe Winaꞌam noyelug tisi ya ka li yel ye,

10 Ka Yesu buol nidib ka yeli ba ye, “Kelisimi ka baŋi li gbin. 11 Kaꞌa line kpenꞌed ninsaal noorin la ket ka o a dianꞌade, amaa line yit ninsaal noorin la ket ka o a dianꞌad daan.”

12 Ka o nyaꞌandolib la buꞌos o ye, “Fu miꞌ ye Farisee dim la sunya peligne ne fun yel siꞌem laa?”

13 Ka Yesu lebis ye, “Bunbutir mekama wusa ka m Baꞌ one be arazana ni la pu bud la, ba na voonn li bas. 14 Keli ba sa. Ba wenne zunzoŋ naani veꞌed zunzoŋ ne. Ka zunzoŋ yaꞌa ti veꞌed zunzoŋ asee ka ba wusa lu bumbokin.”

15 Ka Piita yel o ye, “Paꞌalimi ti siiliŋ kaŋa gbin a siꞌem.”

16 Ka o buꞌosi ba ye, “Yanam pu tunꞌe baŋida? 17 Ya pu baŋ ye line ka soꞌ dit la sigidne poorin ka lem yit o niŋgbina nii? 18 Amaa line yit ninsaal noorin la yit ne o suunrin ka neꞌeŋa ket ka o a dianꞌad daan. 19 Ka potenꞌer beꞌed yitne suunrin na. Line ket ka o a ninkuud, ka saꞌamid poꞌab, ka tum dianꞌad tuuma, ka faand nidib, ka maꞌad damaꞌam, ne yuꞌur saꞌaŋ. 20 Neꞌeŋa a dianꞌad nidibin ka kaꞌane a dit ka pu pied nuꞌusi a dianꞌade.”

21 Ka Yesu toomi anina n keŋ teens bane kpiꞌe Taya ne Sidon la. 22 Ka Keinan dim poꞌa yi teŋ ban na n kenn o saꞌan na sos o ye, “David yaaŋa, zomi m nimbaanlig, ka m poꞌayuꞌa ka kikirig dol o ka li namisid o hale.”

23 Ka Yesu sin. Ka o nyaꞌandolib la sos o ye, “Kadim poꞌa la ka o keŋ sa; ka o maan tukpeedug.”

24 Ka o yeli ba ye, “Winaꞌam tum man ne Israel dim saꞌan gullim, bane wenne konbid bane bodig la.”

25 Ka poꞌa la kena igin o tuon ka yel ye, “Zugsoba suŋimi m.”

26 Ka o lebis ye, “Li pu nar ye soꞌ zaŋ biis diibi lobi tis baase.”

27 Ka poꞌa la lebis ye, “Zugsoba, li a sida. Ka baa daan yaꞌa dit ka dizora lut teŋin, baas la na piꞌisi li.”

28 Ka o lebis ye, “Poꞌaa, fu mor yadda niŋir bedego. Ka fun bood siꞌel la, li na a ala n tis uf.” Ka anina yim ka o poꞌayuꞌa la nye laafe.

29 Ka Yesu yi anina denꞌed Galilee beuŋ la noorin, ka keŋ du zuer zug zinꞌin anina. 30 Ka nidib bedego kenn o saꞌan na, n mor wabis, ne zunzoos, ne ponda, ne gigis, ne wiim sieba bedego kena digili ba o tuon. Ka o tiꞌebi ba. 31 Ka li lidig nidib la, ban nye ka gigis pianꞌad, ka ponda tiake a suꞌuŋa, ka wabis ken, ka zunzoos nyet, ka ba naꞌasid Winaꞌam on ka Israel dim puꞌusid la.

32 Ka Yesu buol o nyaꞌandolib la, ka yele ba ye, “M zot nidib nwa nimbaanlig bozugo li paae daba atanꞌ ka ba be m saꞌan ka me pu mor diib na dii. Ka m pu bood ye m basi ba ka ba kul ne koꞌom. Li yaꞌa kaꞌ ala ba na ti vip sueren.”

33 Ka o nyaꞌandolib la buꞌos o ye, “Ka ti ye ti nye diib yaani moogin nwa diis nidib bedego bama nwa?”

34 Ka Yesu buꞌosi ba ye, “Ya mor bodobodo gbila ala?”

Ka ba lebis ye, “Ayopoi ne zimbibis biꞌela.”

35 Ka Yesu yel nidib la ye ba zinꞌinim teŋin. 36 Ka o zaŋ bodobodo gbila ayopoi la ne zimi la, ka puꞌus Winaꞌam, ka gbenꞌes diib la n tis o nyaꞌandolib la. Ka ba zaŋi pudug tis nidib la. 37 Ka ba wusa dii tig. Ka ba vaae dikane kpelim la laꞌas ka li peꞌel peed ayopoi. 38 Ka bane di diib la kal a tusa anaasi, hale ka poꞌab ne biis kal pu paꞌase. 39 Ka o bas nidib la, ka kpenꞌ aaruŋin keŋ Magadan teŋin.