1 Saŋkaŋa nwa ka naꞌab Herod da wum Yesu labaar, 2 ka yeli o samanzinꞌidib ye, “Oŋa ane Joon one daa suud nidib kuꞌom la, vuꞌug kumin. Dinzug ka o mor paŋ n tum tuum kaŋa.”

3-4 O yel neꞌeŋa bozugo Joon daa yel Herod ye, “Li pu nar ye fu di fu baꞌabiig poꞌa Herodiase.” Ka Herodias yela ka o gbanꞌe Joon n loo more keŋ kpar sarega ni, 5 ka bood ye o kuu o ka giꞌig nidib la bozugo ba tenꞌes ye o ane Winaꞌam nodiꞌes.

6 Ka Herod duꞌam tienr daar diꞌema paae ka Herodias poꞌayua waꞌ nidib tuon ka Herod sunf maꞌae hale, 7 ka o po yel bipuŋ la ye, “Fun n bood siꞌel wusa m na tis uf.” 8 Ka o ma paꞌal o suer ka o yel naꞌab Herod ye, “Tisim man Joon zug laa nwa ni nannanna.” 9 Ka naꞌab la sunf saꞌam, ka amaa on po saam tuon la zug ka o tis noor ye ba tisim bipuŋ la on bood siꞌel. 10 Ka tum soꞌ sarega ni ka o fiꞌig Joon zug. 11 Ka ba niŋ zug la laan na tis bipuŋ la, ka o zaŋi li tis o ma. 12 Ka o nyaꞌandolib kena zaŋ o niŋgbina la mum ka keŋ yel Yesu.

13 Ka Yesu wum labaar la ka kpenꞌ aaruŋin yi teŋkan la, n toom zinꞌi kane ka nidib kaeꞌ. Ka nidib bedego n baŋ li la ka ba yi teensin la benn o ne noba. 14 Ka on yi aaruŋin la na o nye nidib bedego ka ba nimbaanlig mor o ka o tiꞌeb bane benꞌed la.

15 Ka zaami maꞌae la ka o nyaꞌandolib la kena ka yel o ye, “Kpela ane moogin, ka saŋa la me toogid, dinzugo basim nidib la ka ba keŋ teensin n daꞌ diibi di.”

16 Ka Yesu yeli ba ye, “Keli ka ba kpelim ka tisini ba diib ka ba di.”

17 Ka ba lebis o ye, “Ti more bodobodo gbila anu ne zimi ayi maꞌaa.”

18 Ka Yesu yeli ba ye, “More li na tisi m.” 19 Ka o yel nidib la ye ba zinꞌinim mood la zug. Ka o nok bodobodo gbila anu la ne zimi ayi la gosi agol n puꞌus Winaꞌam bareka ka gbenꞌes bodobodo la n tis o nyaꞌandolib la, ka ba tis nidib la. 20 Ka soꞌ mekama dii tig. Ka nyaꞌandolib la vaae line kpelim la, ka li peꞌel peed piinayiŋa. 21 Ka bane di diib la kal da a wuu dap tusanu hale ka poꞌab ne biis kal pu paꞌase.

22 Ka Yesu ke ka o nyaꞌandolib kpenꞌ aaruŋin la gaad tuoni loꞌoŋ beuŋ la gbeug sa, ka on kpelim ye o keꞌes nidib la, ka ba kul. 23 Ka on keꞌesi ba naae la, ka du zuer zug ye o sos Winaꞌam. Ka zaam ti maꞌae ka o konꞌo konꞌ be anina. 24 Aaruŋ la daa bene beuŋ la teŋsuk, ka kuꞌopila nweꞌedi li, ka sisiꞌem tuꞌusidi li.

25 Ka bekenkeung asubaa ka Yesu kenne kuꞌom zug n waꞌae o nyaꞌandolib saꞌan. 26 Ka ban nye ka o ken kuꞌom zug la dabiem kpenꞌe ba hale. Ka ba yet ne dabiem ye, “Lina ane silinsiug.”

27 Ka Yesu kpen kpemisi ba ye, “Kpeꞌeŋimi ya sunya ka li ane man. Da zoti dabiem.”

28 Ka Piita yel ye, “Zugsoba, li yaꞌa sid ane fun, tisimi m noor ka m tuꞌus uf kuꞌomin la.”

29 Ka o yel ye, “Kem na.” Ka Piita yi aaruŋin la ken kuꞌom la zug tuꞌusid Yesu. 30 Ka on nye sisiꞌem la daꞌad la, ka dabiem kpenꞌ o, ka o pinꞌili sim ka tansid ye, “Zugsoba faanmi m bas.”

31 Ka Yesu tieli gbanꞌ o nuꞌug toꞌoto ka yel o ye, “Dau kane yadda niŋir pu zuꞌe la, bo ka fu biꞌesida?”

32 Ka ba kpenꞌ aaruŋin la ka sisiꞌem la guꞌe. 33 Ka o nyaꞌandolib la naꞌas o n yet ye, “Asida oŋa a Winaꞌam Biig la.”

34 Ka ba loꞌoŋ beuŋ la n kenn Gennesaret teŋin na. 35 Ka nidib la nye Yesu ka baŋ o la, ka tum buol teŋbane kpiꞌe anina nidib, bane benꞌed wusa, ka ba more ba kenn o saꞌan na, 36 ka sos o ye o kudim kel ka banꞌadnam la siꞌisi o fuug noor. Ka nidib bane wusa daa siꞌisi li la, nye laafe.