1 Bénnea' dxuxrén lazre̱' Xránadxu Dios chee̱ guxúe̱' le̱',

ne dxuzúe̱' Dios, Bénnea' nape̱' dute̱ xel-la' waca,

2 waca xe̱'e̱ Dios: Nacu' Bénnea' dxebeza lazra',

ne Bénnea' dxucache chawe̱' neda'.

Nacu' Dios chia', na' dxuxrén lazra' Lue'.

3 Dios gucache chawe̱' lue' lu xúgute̱ da ste̱be da quebe zaj nalá',

ne lu xúgute̱ xízrawe̱' da dxelute na bénneache.

4 Gucache chawe̱' lue' ca dxun tu bedxuj dxé̱zreba' biadu chee̱ba' zran xrílaba', na' chu'u chawu' lu na' Le̱'.

Xel-la' li lazre' chee̱' gácale̱ na lue', ne gucache chawe na lue'.

5 Quebe bi guchebe lue' chizrela, ne quebe bi da ste̱be te zra,

6 ne quebe bi xízrawe̱' chee̱ da chul-la,

ne quebe bi da cale̱la ca' da dxelute na bénneache te zra.

7 Welate chi gaxúa bénneache cuitu' lue',

ne gaxúa gaxúa bénneache gáguze naga zu',

8 Wanna'u, na' walé'enu'

ca ba xa' xeledé benne' ca' dxelune̱' da cale̱la.

9 Nuzú' Xránadxu Dios ca Benne' dxebeza lazru', ne Dios,

Bénnea' nape̱' dute̱ xel-la' waca, chee̱ gucache chawe̱' lue'.

10 Chee̱ le̱ na' quebe bi da cale̱la gaca na chiu',

ne quebe bi xízrawe̱' chu'u na lizru'.

11 Dios gusebague̱' gubáz chee̱ xabáa chee̱' ca' chee̱ xelácale̱ne̱' lue',

na' xuluxúe̱' lue' gátete̱ze chéaju'.

12 Xeluxre̱' lue' lu ne̱'e̱ chee̱ quebe ga'a xiaj ni'u.

13 Guléajquezu' be̱zre xixre' ca', ne be̱la' ca',

be̱zre xixre' schanní' ca', ne be̱ snia ca'.

14 Dxenná Dios: “Guselá' xúgute̱ benne' ca' zaj

ne gucache chawa' benne' ca' dxelexeche̱be̱' naca' Xrane̱'.

15 Gate xelenné̱' neda', na' xeche̱ba' chee̱'.

Gate zaj xu'e̱ lu da ste̱be, súale̱queza' le̱'.

Guselá' le̱', ne guna' le̱' ba lá'ana.

16 Guna' xelaca bane̱' zánete̱ iza, ne guselá' le̱'.”