1 परमप्रभु यावेमी आं कली लोव़ पाप्‍तु। 2 परमप्रभु, परमप्रभु यावेमी मार लोव़ पाप्‍तु देंशा हना “ए मुर, आं लोव़ पावो। मेको नाक्‍त आ पर्बम रोंका पावो। 3 मारदे हना मेको नाक्‍त नेक्‍थान जाक्‍ना जाक्‍न बाक्‍‍ब। परमप्रभु यावे आ नाक्‍त नेक्‍थान जाक्‍शो बाक्‍ब। मेको गोस्‍सुम सुम्‍शो नाक्‍त बाक्‍ब। मेको रागी रागी ङा मुर आन कली हिंचा ङा नाक्‍त दुम्‍ब। योएल १:१५; सेफन्‍याह १:१४ 4 इजीप्‍त रागी तार तरवार का जाक्‍ब। मिनु एथीयोपीया रागीम यो श्‍येत दुम्‍ब। इजीप्‍त रागीम साइक्‍चा पुंइसीशो मुरपुकी खपीम गोल्‍नीम। मिनु मेको रागी ङा शोंप लाइक्‍नीम। मिनु मेको आ जग प्रेत्‍नीम। 5 एथीयोपीया, पूत, लूद नु अराब रागी नेल्‍ल नु लिबीया नु अर्को आ नेक्‍था ङा रागी ङा मुर तरवारम साइक्‍चा पुंइसीनीम” देंत। येरमीया ४६:९

6 मिनु परमप्रभु यावेमी “मेको इजीप्‍त रागी कली वारच पतीके क्‍याम्‍चा पुंइ‍सीनीम। मेको आ ठेयब लेश्‍शो जाम्‍ब। मिग्‍दोल रे स्‍येने सम्‍म बाक्‍ब मुर नेल्‍ल तरवारम साइक्‍चा पुंइसीनीम। इजीकीएल २९:१० 7 मेकोपुकी मुर मबाक्‍शो रागी आन दातेम मुर मबाक्‍तीके दुम्‍नीम। मिनु मेको आन सहर ब्रेश्‍शा, मुर मबाक्‍तीक सहर आन दा‍तेम ब्रेश्‍शो सहर दुम्‍नीम। 8 गो इजीप्‍त रागीम मी सुइश्‍शा, मेको आ वारच नेल्‍ल फस सेल्‍नुङ। मेना मेकोपुकीम गोन परमप्रभु यावे नङ, दे तुइक्‍नीम। 9 मेको नाक्‍ती लोव़ कुरब मुर जहाजम ङोइक्‍पा सोइक्‍नुङ। मेको आन थुं नाइश्‍शा बाक्‍शो एथीयोपीया ङा मुर आन कली हिंच कोंइचा कली लोव़ सोइक्‍नुङ। इजीप्‍त रागी आ नुप्‍ची नाक्‍ती मेकोपुकी शुश हिंनीम। मेको नाक्‍त थमा पा जाक्‍ब” देंत। यसैया २०:३-४

10 परमप्रभु, परमप्रभु यावेमी “गो बेबीलोन ङा पिप नेबुकदरेसर आ गुइ रे पा इजीप्‍त रागी ङा लडाइ पाइब आन कली साइक्‍नुङमी। 11 नेबुकदनेसर नु आ लडाइ पाइब रागी ङा नेल्‍ल क्‍येङा मरिम्‍शो पाइब बाक्‍नीम। मेको आन कली खतम सेल्‍चा कली चाक्‍नुङमी। मेकोम आन तरवार इजीप्‍त रागी आ पर्बम शोइक्‍नीम। मिनु साइश्‍शो मुरपुकीम रागी ब्रीनीम। इजीकीएल २८:७ 12 गो नील खोला ङा ब्राशो ब्‍वाक्‍कु सोव़पाइक्‍नुङ। मेको रागी कली मरिम्‍शो पाइब आन गुइम लेयनुङ। गो मेको रागी नु मेकेर बाक्‍शो मारेइ मारेइ आन कली अर्को रागी ङा मुर आन गुइ रे खतम पोक्‍नुङ। गो, परमप्रभु यावेमी एको लोव़ पाता” देंत। यसैया १९:५

13 मिनु परमप्रभु, परमप्रभु यावेमी “गो देवी देवता आन कली खतम पोक्‍नुङमी। मिनु मेम्‍फीसम बाक्‍शो देवी देवता आन कली खतम पोक्‍नुङमी। इजीप्‍त रागीम गेनायो सासन पाइब मदुम्‍नीम। मोपा गो इजीप्‍त रागी ङा मुर आन कली हिंतीक थुं गेनुङमी। मेम्‍फीस सहर कली नोफ यो देंनीम 14 गो पथ्रोस कली मुर मबाक्‍तीके सेल्‍नुङ। सोआन सहरम मी सुइक्‍नुङ। गो थेबेस सहर कली निसाफ पा सजाइ गेनुङ। नहुम ३:८-९ 15 गो इजीप्‍त रागी ङा बोल्‍यो दरवार पेलुसीयम तार आं गाइश्‍शो मोइक्‍नुङ। मिनु थेबेस सहर ङा शोंप नेल्‍ल खतम पोक्‍नुङ। 16 गो इजीप्‍त रागी कली मी सुइक्‍नुङ। मिनु पेलुसीयम श्‍येत जशा ग्‍येत्‍थ लुक्‍च दुम्‍ब। थेबेस सहर ङा गारो ब्रेत्‍नीम। मेम्‍फीस सहरम चहिं नाक्‍ती लडाइ दुम्‍‍ब। 17 ओन नु पी-बेसेथ ङा ठिटापुकी तरवारम साइक्‍चा पुंइसीनीम। मिनु मेको सहर ङा मुर ग्‍याइश्‍शा लाइक्‍चा पुंइसीनीम। 18 मेको नाक्‍त तेहाफ-नेहेस सहर छिङछिङ दुम्‍ब। गो मेकेर इजीप्‍त रागी आ जुवा जिक्‍नुङ। मिनु मेको आ ठेयब लेश्‍शो क्‍याम्‍नुङ। गोस्‍सुमी मेको सहर कली सुम्‍ब। मिनु मेको आ एर ओंथ ङा सहर ङा मुर ग्‍याइश्‍शा लाइक्‍चा पुंइसीनीम। येरमीया ४३:९ 19 मोपा गो इजीप्‍त रागी कली निसाफ पा सजाइ गेनुङ। मिनु मेकोपुकीम गोन परमप्रभु यावे नङ, दे तुइक्‍नीम” देंत।

20 मिनु ग्‍याइश्‍शा लाइक्‍चा पुंइसीशो ११ बर्स ङा ङोंइती ङा महिना ङा ७ नाक्‍ती परमप्रभु यावेमी आं कली लोव़ पाप्‍तु। 21 मार लोव़ पाप्‍तु देंशा हना “ए मुर, गो इजीप्‍त रागी ङा पिप फाराओ आ गुइ जिक्‍शा गेता। मेको साचा कली मारेइ मफ्रेंसीशो बाक्‍ब। मोपा बोल्‍यो मदुम्‍ब। तरवार चलेने मचाप्‍ब। 22 मोपतीके परमप्रभु, परमप्रभु यावेमी गो इजीप्‍त रागी ङा पिप फाराओ कली लोव़ का पाइनुङ। गो मेको आ गुइ निम्‍फा जिक्‍नुङ। आ बोल्‍यो गुइ नु आ ङोंइती जिक्‍शो गुइ जिक्‍नुङ। आ गुइ रे तरवार तोक्‍नुङ। 23 गो इजीप्‍त ङा मुर आन कली रागी रागी ङा मुर आन दातेम फ्राइ‍नुङमी। मिनु मेको आन कली रागी रागीम ब्रपाइक्‍नुङमी। 24 गो बेबीलोन ङा पिप आ गुइ सक्ति पाइश्‍शो सेल्‍नुङ। मिनु आं तरवार मेको कली गेनुङ। तन्‍न गो फाराओ आ गुइ जिक्‍नुङ। मिनु मेको, मेको आ ङोंइती बेक्‍चा ङा पा गार दुम्‍शो मुर खोदेंशो पा, नक्‍सुर पाइब। इजीकीएल २९:२० 25 गो बेबीलोन ङा पिप आ गुइ सक्ति पाइश्‍शो सेल्‍नुङ। तन्‍न फाराओ आ गुइ सक्ति मपाइश्‍शो दुम्‍ब। गो बेबीलोन ङा पिप कली आं तरवार गेनुङ। मिनु मेकोमी इजीप्‍त रागी आ पर्बम हिरब। मेना मेकोपुकीम गोन परमप्रभु यावे नङ, दे तुइक्‍नीम। 26 गो इजीप्‍ती आन कली रागी रागी ङा मुर आन दातेम फ्राइ‍नुङमी। मिनु मेको आन कली रागी रागीम ब्रपाइक्‍नुङमी। मेना मेकोपुकीम गोन परमप्रभु यावे नङ, दे तुइक्‍नीम” देंत।