1 मिनु ग्‍याइश्‍शा लाइक्‍चा पुंइसीशो १० बर्स ङा १० महिना ङा १२ नाक्‍त परमप्रभु यावेमी आं कली लोव़ पाप्‍तु। 2 मार लोव़ पाप्‍तु देंशा हना “ए मुर, गे इजीप्‍त ङा पिप फाराओ गे कोव़ङो। मेको आ पर्बम नु इजीप्‍त रागी नेल्‍ल आन पर्बम आं लोव़ पावो। 3 मिनु परमप्रभु, परमप्रभु यावेमी मेको कली ‘ए इजीप्‍त ङा पिप फाराओ, गो इ कली सजाइ गे‍नुङ। गे खोला आन दातेम बाक्‍ब समुन्‍द्र ङा ठेयब जन्‍तु खोदेंशो बाक्‍नेवे। मिनु नील खोला आं केन बाक्‍ब। मेको आं सेल्‍शो बाक्‍ब’ देंते। इजीकीएल ३२:२ 4 गो इ शांपेम बोल्‍सी ब्‍वेक्‍नुङ। मिनु गो इ खोला ङा ङांइ इ कत्‍लापुकीमीन क्‍येप्‍पाइक्‍नुङमी। गो खोला ङा ङांइ इ कत्‍लाम क्‍येप्‍पाइश्‍शा, इ कली खोला रे कीशा ग्रुंइनन। 5 मिनु गो इ कली नु इ खोला ङा ङांइ नेल्‍ल आन कली गोरशो रागीम ताइक्‍नन्‍नी। मिनु गे दिंमम गोल्‍नेवे। इन कली सुइम खुप्‍शा मथिम्‍नीम। गो इ कली रागी ङा जन्‍तु नु सरीङ ङा चिक्‍ब आन कली ब्‍वचा कली गेनुङ। 6 मेना इजीप्‍त रागीम बाक्‍ब नेल्‍लेम गोन परमप्रभु यावे नङ, दे तुइक्‍नीम। गे इस्राएल आ खिं ङा मुर आन कली बुदी मीलु के कोक्‍के खोदेंशो दुम्‍शो बाक्‍नेवे। २राजा १८:२१ 7 मिनु मेकोपुकीम इ कली गुइम ग्‍याइक्‍तमेनु, गे जिक्‍बाक्‍ते। मिनु मेकोपुकीमी इ कली तिक्‍सीमानु, गे जिक्‍शा, मेको आन खोइल रोप्‍पाइक्‍बाक्‍ते” देंत।

8 मोपतीके परमप्रभु, परमप्रभु यावेमी “गो इ पर्बम तरवार सोइक्‍नुङ। गो इ मुर नु इ बी ब्‍यफ, क्‍यारश भेडा नेल्‍ल आन कली साइक्‍नुङमी। 9 मिनु इजीप्‍त रागी मुर मबाक्‍तीके नु गोरशो रागी दुम्‍ब। मेना मेकोपुकीम गोन परमप्रभु यावे नङ, दे तुइक्‍नीम। गे ‘नील खोला आं केन बाक्‍ब। गो मेको सेल्‍ता’ देंते। 10 मोपतीके गो इ पर्बम नु इ खोला आन पर्बम बोक्‍नुङ। मिनु गो मिग्‍दोल रे स्‍येने सम्‍म नु एथीयोपीया रागी आ सांद सम्‍म इजीप्‍त रागी कली गोरशो नु मुर मबाक्‍तीके सेल्‍नुङ। इजीकीएल ३०:६ 11 मेकेर सुइ मुर नु जन्‍तु मगाक्‍नीम। मेकेर ४० बर्स सम्‍म सुइ मबाक्‍नीम। गन्‍ती १४:३३-३४ 12 गो इजीप्‍त रागी कली मुर मबाक्‍शो रागी आन दातेमी मेको क्‍येङा मुर मबाक्‍शो रागी सेल्‍नुङ। मिनु मेको आ सहरपुकीम ४० बर्स सम्‍म मुर मबाक्‍नीम। मिनु गो इजीप्‍त रागी ङा मुर आन कली रागी रागी नु राज्‍य राज्‍य ङा मुर आन दातेम ब्रपाइक्‍नुङमी” देंत।

13 मो हना यो परमप्रभु, परमप्रभु यावेमी “मेको ४० बर्स नोले गो इजीप्‍त ङा मुर आन कली मेको आन ब्रशा बाक्‍तीक रागी रागी ङा मुर आन दाते रे खुप्‍नुङमी। 14 गो मेको आन कली लेंशा रिम्‍शो पाइनुङ। मिनु मेको आन कली आन किकी पिपी आन रागी पथ्रोसम चाक्‍नुङमी। मिनु मेको मेकेर महिक्‍सीशो आइक्‍च राज्‍य का दुम्‍शा बाक्ब। पथ्रोस रागी इजीप्‍त ङा दक्‍खिन बाक्‍त। 15 मेको राज्‍य नेल्‍ल आन दातेमी नेल्‍ल क्‍येङा आइक्‍च राज्‍य दुम्‍ब। मेको अर्को रागी आन क्‍येङा गेनायो ठेयब मदुम्‍ब। गो मेको कली थम आइक्‍च सेल्‍नुङ। मिनु मेकोम गेनायो अर्को रागी रागी आन कली सासन मपाइब। 16 मिनु इस्राएल आ खिं ङा मुरपुकीमी इजीप्‍त रागी कली लेंशा गेनायो थमा मसुइक्‍नीम। तन्‍न इस्राएलम इजीप्‍त कली ‘वारच पाइक्‍की’ दे पुंइथ लशा आन पाप मिम्‍पाइक्‍नीम। मेना मेकोपुकीम गोन परमप्रभु, परमप्रभु यावे नङ, दे तुइक्‍नीम” देंशो बाक्‍ब।

17 मिनु ग्‍याइश्‍शा लाइक्‍चा पुंइसीशो २७ बर्स ङा ङोंइती ङा महिना ङा ङोंइती ङा नाक्‍ती परमप्रभु यावेमी आं कली लोव़ पाप्‍तु। 18 मार लोव़ पाप्‍तु देंशा हना “ए मुर, बेबीलोन ङा पिप नेबुकदरेसरम टायर कली लडाइ पाइब आन कली शुश श्‍येत पपाइक्‍तु। मिनु मुर नेल्‍ल आन पिया ङा चां दुल्‍त। आन बला खोरसीशा, गार दुम्‍त। मो हना यो टायर आ पर्बम पशो गेय आ पर्बम मेको नु मेको आ लडाइ पाइबम मारेइ मतामे। 19 मोपतीके परमप्रभु, परमप्रभु यावेमी ‘गो इजीप्‍त रागी कली बेबीलोन ङा पिप नेबुकदरेसर आ गुइम गेनुङ’ देंत। मिनु मेकोम मेको आ शोंप नेल्‍ल लाइक्‍ब। मेकोम मारेइ मारेइ रोइश्‍शा, मेको रागी कली श्‍येत्‍थ पोक्‍ब। मिनु मेको आ रोइश्‍शो शोंप मेको आ लडाइ पाइब आन गाल्‍च दुम्‍ब। 20 गो मेको आ पशो गेय आ पर्बम इजीप्‍त रागी कली मेको आ गाल्‍च सेल्‍शा गेता। मारदे हना मेकोपुकीम आं पर्बम शुश गेय पाम्‍तेक्‍म। इजीकीएल ३०:२४ 21 मेको नाक्‍ती गो इस्राएल आ खिं ङा मुर रे ग्रोव़ का वापाइक्‍नुङ। मिनु गो इ कली मेको आन दातेमी ब्‍वाक्‍पाइक्नन। मेना मेकोपुकीम गोन परमप्रभु यावे नङ, दे तुइक्‍नीम” देंत।