4
1 Wo hu vandeŋe iyake, ghemi Sameriya wanakauniye, iya ghami tabona vondɨvondɨ ŋgoreiya burumwaka i ghan wagiyawe na gha tabo vondɨvondɨ.
Basan e tɨne, iya hu vuruvaululeŋgiya ranjavovo na hu ghɨmararaweŋgiya mbinyembinyeŋgu na hu dage weŋgiya lemi ghɨmoghɨmoru thɨ giyagiya waen weŋga hu munumu.
2 Giya Loi Memevoroniye, ele boboma tɨne, i dagerawe iŋa, “Mbaŋa emunjoru ne i mena
ne mbaŋaniye thɨ momodɨŋgi e uku, taulaghɨna ghemi ne ŋgoramiya borogi, ina e uku.
3 Na ghemi regha na regha ne i raŋgiya the goga i maviya e (ghembana gha) ganana
na thɨ duŋge na i ghemba Hemon.”
Giya Loi iŋa.
Isirel ma i vandeŋe Loi le renuwaŋa
4 Giya Loi iŋa,
“Isirel gharɨgharɨniye hu raka e ghemba boboma Betel na hu vakatha tharɨ,
hu raka Gilgal na tembe vohu vakathava tharɨ.
Hu bigimena lemi vowo mbaŋambaŋa regha na regha,
lemi vivathana wabwi yaworona iya hu bigimena wabwi regha Loi kaiwae,
mbaŋa theghetoninji iya e tɨne.
5 Hu ŋamwo bred na lemi vata ago vowoniye (weya Loi),
weiye lemi nemo hu bigimena lemi vata ago mwaewoniye,
hu utu raŋgiya na hu wovoreŋaŋga vakathako iyako ghamɨnamina kaero i ghaŋgowe.”
Giya Loi ghalɨŋa.
6 “Ya vakathaŋga hu ghae e ghembaghemba regha na regha,
na ma ghanɨŋga e lemi valɨvaŋgana laghɨye,
iyemaeŋge ma hu raka njoghama e ghino.”
Giya Loi iŋa.
7
“Na tembe ya vakathava na uye ma i nja e ghemi
mbaŋa uloulo gha mbaŋa amba manjala umboto i nawe.
Ya vakatha uye i nja e ghamba regha ko iyemaeŋge e ghemba reghava ya laweghathɨ.
Uma regha uye i njawe,
ko iyemaeŋge uma reghava na uye i njawe ghanɨŋga thiya mare. 8
Gharɨgharɨ e ghembaghemba vavana thɨ thɨmbun na ŋgela mbwa kaiwae
ko iyemaeŋge ma i ghanagha na valɨkaiwae i ndewoŋgi.
Iyemaeŋge na hu raka njoghama e ghino.”
Giya Loi iŋa.
9 “Ya vakatha ndewendewe dayadayaghaniye na mwatamwata thɨ vakowana lemi umauma/ghami na vaen ghanji umauma,
na bibita thɨ raka raŋgi thɨ ghanɨŋgiya ghami manjemanje fig na olivɨ.
Iyemaeŋge ma hu raka njoghama e ghino.”
Giya Loi iŋa.
10 “Ya vakatha vuyowo laghɨye i yomara e ghemi ŋgoreiya va ya vakatha Ijipt e tɨne.
Ya gaboŋgiya lemi ragagaithɨ tabogha e gaithɨ gha ghalithɨ,
weiye lemi hosɨŋgi va hu mbanɨŋgi gaithɨ e tɨne.
Ya vakatha lemi kiyamuna butiye i mboŋa thiriya mbothɨmi yathiyathiye.
Iyemaeŋge ma hu raka njoghama e ghino.”
Giya Loi iŋa.
11 “Ya mukuwoŋgiya ghemi vavana ŋgoreiye va ya mukuwoŋgiya Sodoma na Gomora.
Ghemi va ŋgoramiya umbwa i rara na thɨ woraŋgiya e ndɨghe une.
Iyemaeŋge ma hu raka njoghama e ghino.”
Giya Loi iŋa.
12 “Iya kaiwae ne ya vakatha iyake, Isirel,
na kaiwae ne ya vakatha iyake e ghen,
u vivatha na ne u vaidiya Loi le lithɨ, O Isirel.
13 Iye va i monja ouou,
na i vakatha ŋgiya ndewendewe
na i woraŋgiya le renuwaŋa weŋgiya gharɨgharɨ.
Iye i vɨva mbaŋambaŋa i wa e gougou,
iye i mbaroŋa yambaneke laghɨye
Giya Loi Vurɨvurɨghegheniye amalaghɨniye idae.”