3
1 Wo hu vandeŋe Giya Loi ghalɨŋaeke, ghemi Isirel gharɨgharɨniye, ghemi iyava i vaŋgu raŋgiyaŋgana Ijipt e tɨne.
2 Giya Loi iŋa,
“E vanautumake wolaghɨye e tɨnenji mbe ghen eŋge vara va ya tuthiŋge,
iya kaiwae len tharɨna wolaghɨye
kaiwanji ne ya lithɨ e ghen.”
Ghalɨŋae gharautu gha kaiwo
3 Emos i gotubwe, iŋa,
“Thare ghɨmoghɨmoru theghewo
thɨ loŋga na regha thoŋgo ma methɨ worawa lenji renuwaŋa regha?
4 Thare laiyon i volenjaŋaŋa e njamnjamɨko thoŋgo ma i vaidiya thae/borogi?
Thare ne i volenjaŋaŋa e ghambaeko thoŋgo ma i yalawe mun ghae/gha borogi?
5 Thare maa i yonja e manɨvanjako thoŋgo ma ghanɨŋga ina e ighathɨko vuruvurumara?
Thare ighathɨko i tagavairɨ thoŋgo ma bigi regha i tagavu?
6 Thare gaithɨ gha mema ne i randa/thɨ wiya gaithɨ mema i ghembako tɨne na mane i vakatha ŋgiya gharɨgharɨ thiye mararu?
Thare thɨ vatharɨ regha ne i yomara e ghembako tɨne thoŋgo ma Giya Loi i vakatha na i yomara?
7 Giya Loi ma mbaŋa regha i vakatha bigi regha, i viva wo i woraŋgiya le renuwaŋako weŋgiya le rakakaiwo, ghalɨŋae gharautu.
8 Mbaŋa laiyon i volenjaŋaŋa thela mane i mararu?
Mbaŋa Giya ne i utu thela ne i utu raŋgiya ghalɨŋaeko?
9 Hu utu weŋgiya thavala thiya yaku e ŋgoloŋgolo vurɨvurɨghegheniye Asɨdod na Ijipt e tɨnenji, huŋa:
‘Hu mevathavatha e ouou vwatanji Sameriya ghadidiye na wo hu ghewo mevatharɨ laghɨye e tɨnenjiko na gharɨgharɨko mbe lenji vakatha raraitharɨ e tɨnenjiko.’ ”
10 Giya Loi iŋa, “Gharɨgharɨke thiyake ma thɨ ghareghare mun ŋgoroŋga thɨŋa na thɨ vakatha thovuye;
Iya thɨ vathuwole ŋgiya bigibigi e lenji ŋgoloŋgolo vurɨvurɨghegheniye tɨnenji iyava thɨ mbanɨŋgi e gabo na e thɨvatharɨko.”
11 Iya kaiwae Giya Loi tembe iŋava ŋgoreiyake:
“Ghan thɨghɨya ne i wo len ghamba yakuyakuna
na i mukuwo len ghamba vurɨvurɨghegheŋgi na thɨ bigivao lemi ŋgoloŋgolo vurɨvurɨghegheniye bigibiginiye.”
12 Giya Loi iŋa:
“Ŋgoreiya sip gharanjimbunjimbu i mban njogha sip gheghe gɨgɨiwo, o mbe yanawae eŋge laiyon me ghanɨvare.
Isirel gharɨgharɨniye nevole thɨ vamoruŋgi tembe ŋgoreiyevako; na ma tembene bigi reghava inawe, mbe ghamba ghena ŋginauye na gheghe ghethɨra eŋge.
13 Wo u vandeŋe, na u vanuwovɨrɨŋgiya Jeikob orumburumbuye,”
Giya Loi Vurɨvurɨghegheniye iŋa.
14 “Ne mbaŋa ya lithɨ weŋgiya Isirel gharɨgharɨniye lenji tharɨko kaiwae,
ne ya mukuwo ghamba vowo Betel e tɨne, ghamba vowoko ghadighadiye ne thɨ mamabebe na thɨ dobu bode.
15 Ne ya rake vawowona lenji ŋgoloŋgolo thotho na yoŋathowathowa ŋgoloŋgolo thɨ vatadɨŋgi na i ndalandala ne thɨ marakerake,
na ŋgoloŋgolo laghɨlaghɨye ne thɨko moli.”
Giya Loi iŋa.