1 Ndamu kuere ɔwi ne, Ɣaa isɔrɛ mmara ɔwe, fiɛ kasɔrɛkɔ̃ ana ɔwe. 2 Mapɛ sikati ikpayo fiɛ maɣɛ ne ame aka anyɔ ala ɔkati. Masɛ makpere kaɖeakatɔkɔ̃ sɔ Kasekelekɔ̃. Ngbe masɛ sikaniɛdziri gu ɔpɔrɔ̃ gu isɔrɛ aɖera ne. 3 I ɔkati gɔ loɣɛ ikpayo kama ne, iyo nɛ mpia i kame masɛ marɔ sɔ Kasekelekɔ̃ ame Kasekelekɔ̃. 4 Mmɔ i sikãrɛtɛa isɔrɛkasege ga iso masɛ matsuedza kua kɔrɔ̃kɔrɔ̃a gu Ndamu aɖaka wa mafere sikãrɛtɛa iso se ne. Sikãrɛtɛa irɔi nɛ ame i Ɣaa aɖera wa marɔ sɔ mana pia i aɖaka wagbe ame. Ana ne, Aaron ɔsɛdziri gɔ lofere aɣɔ̃la gu ata wa iso matsɛrɛ Ɣaa mmara masia pia i aɖaka wagbe ame. 5 Aɖaka wagbe itititɛ̃ ne, mabara ma Kerubi ma nto maɖi Ɣaa ikpawaĩ mate masia. Mawarɛ ma abue mafu ngbegɔ i maturi sɛ mana nnyainyɔ. Iiɖe ɔwi gɔgbe ame boafafarɛ ara wamɔ ame pelepele.

6 Kumɛgɔgbe masɛ ara wagbe i mmɔ ne. Masɔrɛdze sɛ mabo i ikpayo nɛ i katɔ̃ ame maabara ma isɔrɛ karabara iyi biara. 7 Ɣɛɛ iyo nɛ i kame ame ne, sɔrɛdzekpakpa pelepele ɔnɔwɛ̃ pɛ nsɛ ɔbo i mmɔ fiɛ ɔkpɛ ɔwɛ̃ saã ɔsɛ ɔbo mmɔ i ikɔ ame. Si ɔ̃abo i mmɔ ne, inya sɔ ɔ̃asu ima ɔla, nnɛ ɔ̃asu ɔsɔrɛ Ɣaa i ɔ̃ gu maturi mama ma lobara aɣɛrɛ i idaatsue ame iti. 8 Siwarã Bielea ɔte sekelee sikigu i ara wagbe ame sɔ ayi kumɛgɔ i sikati ikpayo ɖeakatɔ̃ ɔnya iɣɛ ne, ɔri iibusi sɔ kuwɛ̃ aabo i Kasekelekɔ̃ ame Kasekelekɔ̃. 9 Nnɛgbe nto ite ara i kiniɔ ɔwi gɔgbe iso ne. Atoa sɔ masɛ matã karatã gagbe, masɔrɛ Ɣaa i ɔri gɔgbe iso ne, maisɛ mawo maturi situ ɔbara sɔ siase bɔlɔlɔ. 10 Alasɔ ara wagbe ɔɖuɖu ne, ɔɖe gu ɔne gu kubarara agbãagbã wa loasekelera siturina iso kere aɖe. Masɛ kubarara gɔgbe ɔɖuɖu matã maturi awune gbɔgbɔɔgbɔ ɔwi gɔ maaba maaledza ira biara aaɣo.

11 Ɣɛɛ Kristo ɔɔba lɛ sɔrɛdzekpakpa pelepele awe ɔtã ara sɛɛ wa loɔba. Ɔɖe sɔrɛdzekpakpa pelepele i ikpayo nɛ lofɔ kuɣa fiɛ ikote iɖo iɖeakatɔ̃ ame. Ikpayo nɛgbe ne, iiɖe ɔturi lopɛ, gɔ karɔ̃ nɖe sɔ iiɖe karɔ̃ iso ngbe ire iɖe. 12 Kristo ɔbo i Kasekelekɔ̃ ame Kasekelekɔ̃ ɔkpɛ ɔwɛ̃ saã i ɔwi ɔɖuɖu kanya. Iiɖe kutepuĩ ɣee manantsuĩ ima iɖe ɔsu ɔkɛlɛgu, ɣɛɛ ɔ̃ mɔmɔ ire iɖe! Ne ɔso ɔtã sɔ Ɣaa aafɔ bo ɔwi ɔɖuɖu.

13 Si kutepuĩ gu manantsuĩ ima gu inantsuĩbi nɛ matsuedza ndɔ̃ masɛ masu mawɛwɛ̃ i makpibaradze iso masekelera ma fiɛ ma iso aakpa ne, 14 iyɔ Kristo gɔ loki i Ɣaa Siwarã iso ɔsu so ɔsɔrɛ ɔtã Ɣaa fiɛ iɣɛrɛ kuiwɛ̃ na iso ɣɛɛ? Nda iabara fiɛ ɔ̃ ima iibawo bo kaɣere ɔfore ɔɖi i kurabara gɔ nna kusia kukuwɛ̃ ame sɔ boawo Ɣaa gɔ mba ngbã ɔsumu ɔbua?

15 Nwagbe ɔso ne, Kristo nɖe ngɔ losu kanya inyi ɣɛtɛ ɔfere bo gu Ɣaa kanya ndu sɔ mma i Ɣaa ɔkpere aafɔ kusɛkusɛ gɔ i Ɣaa ɔɣɛ ɔsɛ fiɛ kuna katui. Nnɛgbe ɔba ngbɔ alasɔ ɔturi lokpi fiɛ ɔki i ɔ̃ kukpi ame ɔɖi aɣɛrɛ wa lowe i kanya inyi kuere ame.

16 Si ɔturi iikpi ne, maisɛ mabara ɔ̃ ɔko gɔ ɔbara ɔsɛ ɔtã ɔ̃ karana iɣɛ karabara. 17 Ayi kumɛgɔ i ngɔ lobara ɔko ɔtã ɔ̃ ara iɣɛ si ngbã ne, maibawo ɔko gɔmɔ karabara ɔbara. 18 Nnɛgbe ɔso fiɛ ima iɖe masu masia kanya inyi kuere kɔra ita ne.

19 Gɔ Mose ɔɔpɛ mmara ɔɖuɖu imomo ɔtã maturi ɔɖuɖu ɔro ne, ɔsu manantsuĩ ima gu kutepuĩ nɛ masakanya ku ndu gu sɛrɛ siwɛrɛ̃ rɛtɛa gu iɣatati iwɛ̃ ɔwɛ̃ ima ɔfere i mmara ɔko gu maturi ɔɖuɖu iso. 20 Ɔɣɛ sɔ, “Ima nɛgbe losia ita i kanya inyi nɛ i Ɣaa ɔnyi sɔ mibara i kã iso ne.” 21 Ngbɔ ame i Mose ɔwɛwɛ̃ ima ɔfere i ikpayo sekelea gu ne ame ara ɔɖuɖu wa masɛ masu masɔrɛ Ɣaa iso ne. 22 I ɔnukuare ame i mmara kanya ne, ima masɛ masu masekelera ala ira biara fiɛ akpi isu itsɛ iisɛ iba si ima iifere i karɔ̃.

23 Ne ɔso masɛ mabara kubarara gɔgbe masu masekelera ara wa lore kato are. Ɣɛɛ kato kasumu ara ne, ara wa nlɛ aɖo masɛ masu masekelera wã. 24 Alasɔ Kristo Kasekelekɔ̃ ga ɔbo ne, iiɖe nga masu nrɔɔ̃ matsue ala fiɛ kare kato kare kaɖe. Ɣɛɛ ne, ɔkɛlɛ Ɣaa iyotɛ̃ ngbegɔ ɔsi i Ɣaa anɔ i bo kanya. 25 Ma Yudase sɔrɛdzekpakpa pelepele sɛ ɔkɛlɛ iyo nɛ losekele iɖo ame ɔkpɛ ɔwɛ̃ i ikɔ biara ame ku mabɔi ima. Ɣɛɛ Kristo iisɛ ɔ̃asu so ɔsɔrɛ ikpɛ gbodzoo. 26 Si ise ngbɔ ne, iyɔ inya sɔ Kristo aasu so ɔsɔrɛ ikpɛ gbodzoo ita i kayi karɔ̃kasɛkɔ̃. Ɣɛɛ Ɣaa ɔɖi wũ ɔte ɔkpɛ ɔwɛ̃ saã ku kayi kawirikɔ̃ gagbe sɔ iaki i ɔ̃ isu so isɔrɛ ame ne, ɔ̃aɖi ikpi biara.

27 Ipia sɔ ɔbiara aakpi ɔkpɛ ɔwɛ̃ saã, ne kama ne, Ɣaa aaɣɛgu wũ atɔ̃me. 28 Ne ɔso Kristo ɔ̃ wũ ne, ɔsu so ɔsɔrɛ ɔkpɛ ɔwɛ̃ saã sɔ ɔ̃aɖi maturi gbodzoo. Ɔto ɔ̃aledza ikpese iba, iisiɖe akpi isu itsɛ ɔso, ɣɛɛ ɔba ɔ̃aɖi mma nsi masia wũ.