8
Yesu Nɖe Bo Sɔrɛdzekpakpa Pelepele
1 Itɔ̃me nɛ boto boɣɛ ɔdziri kere nɖe sɔ, boba Sɔrɛdzekpakpa gɔgbe. Ɔsi i Ɔlesate sigaraiyara kuɖearɔ̃ iso i kato. 2 Sɔrɛdzekpakpa pelepele gɔgbe sɛ ɔbara ɔ̃ kasumu karabara i kasekelekɔ̃ ga nɖe sikati ikpayo mɔmɔ ame. Bosate mɔmɔ lopɛ ikpayo nɛgbe ne iiɖe maturi.
3 Masɛ masɛra sɔrɛdzekpakpa pelepele biara sɔ ɔ̃asu karatã gu ara fɛ̃a, ɔtã Ɣaa. Ne ɔso ikote sɔ sɔrɛdze gɔgbe ana ne, ɔ̃awe nnɛ ɔ̃asu ɔtã Ɣaa. 4 Si karɔ̃ iso ngbe iɖe ɔpia ne, ɔ̃ibana ɔri ɔbara sɔrɛdze karabara, alasɔ masɔrɛdze ma nsɛ masu karatã mabɔ i mmara kanya pia koko. 5 Masɔrɛdze karabara ga masɛ mabara ne, kare nga mpia i kato i ɔri ɔwɛ̃ iso fiɛ iɖe ira nɛ mato masore.
Alasɔ gɔ Mose to ɔba ɔ̃apɛ sikati ikpayo ne, Ɣaa ɔɣere wũ sɔ, “Nyɔ sɔ aabara ira biara i kumɛgɔ maɖi mate-ɔ i kube iso pɛpɛɛpɛ.” 6 Ɣɛɛ masɔrɛdze karabara ga i Ɣaa ɔsu ɔpia Yesu nrɔɔ̃ ame lɛ kaɖo kakuere kokooko lɛ kumɛgɔ ame i ndamu ɣɛtɛ mɛ ɔkã i Ɣaa gu ɔ̃ maturi ndɛ̃ lɛ miɖo mikuere alasɔ matsue kã masia i kaɣɛkasɛ ga nlɛ kaɖo iso.
7 Si kuira iinina i ndamu ɖeakatɔ̃ iso ne, tee iisibanya sɔ maakã minyɔare. 8 Ɣɛɛ Ɣaa ɔnya iɣɛrɛ i ɔ̃ maturi iso gɔ ɔɣɛ sɔ,
“Bosate sɔ,
ɔwi to ɔba gɔ loanyi kanya ɣɛtɛ
ku Israel kaɖe
gu Yuda kaɖe.
9 Fiɛ kaibase lɛ kanya inyi ɖeakatɔ̃
ga lonyigu ma mawa
ku ɔwi gɔ lomɔɛ̃ ma i kɔrɔ̃
lokɔ ma lobɔrɛgu i Egipte karɔ̃ iso.
Gɔ maibara i kanya ga lonyigu ma iso ɔso ne,
mme wũ loikpa ma.
10 Bosate ɔledza iɣɛ sɔ kanya ɣɛtɛ ga loanyigu Israel kaɖe i ngbe ne,
ɔwi gɔmɔ ame ne,
Loasu wũ mmara lopia i ma adzuni ame
fiɛ loatsɛrɛ me losia i ma situ iso.
loaɖe ma Ɣaa
fiɛ ma wũ maaɖe wũ maturi.
11 Kuwɛ̃ iisibate ɔ̃ ɔlaa
ɣee ɔte ɔ̃ ɔnyiibi sɔ ɔtsue Ɣaa.
Alasɔ ma ɔɖuɖu to maatsue me
ita i ɔbiɛtɛ kosoi tsɔra isɛ iabo makpakpa pelepele iso.
12 Loanyɔ ma nnya losu ma akpi lotsɛ ma
fiɛ loisibanyigi wã lonya.”
13 Gɔ Ɣaa ɔɖe ika i kanya inyi ɣɛtɛ iso ne, ite sɔ kaɖeakatɔ̃ ɔɔkpese kakuere, fiɛ ira biara nɛ nsɛ ikuere ne, isɛ inina iwɔ pelepele.