38
Boc Plình Tèo Jop
1 Èh, enh nòi cayeo wawenh dêh, Chuaq tèo hlài bàu Jop 'màng cô:
2 “Mangai cô cabô ma hùa goh bàu khôn rabiaq da Au,
tiaq trong yŏc bàu ùh 'nì loq?
3 Ep yŏc dèh manoh hèm cajap cajình beq;
Au bòch ìh,
ìh jah tèo bàu Au!
4 “Jò au broq xèm da plì taneh, ìh ŏi ta leq?
Tàng ìh loq dìq dŏng, ìh pa'noh beq.
5 Cabô ma pajaq maneh ca haq,
wa tang caxi wêh haq, ìh loq ùh?
6 Xèm haq ŏi enh 'nhèq ca cah cleq?
Cabô ta'ngùi pliang hmu jang mùm haq,
7 jò 'bài halŏng calêu pajùm ti dabau,
wa 'bài 'bình plình da Boc Plình dêh bàu lem bùi?
8 “Jò diac raxìq tapŏt,
plôh loh enh taneh, cabô nui tàt diac aih,
9 jò aih Au am ca haq yùc đòiq broq eo yôh,
am ca haq can clam clôiq đòiq broq mù cabàn,
10 wa Au pajaq đòiq acang ca haq,
broq long clòng wa 'mang,
11 doi ca haq 'màng cô: ‘Gè trùh pàng cô raq, pi jah lam yi hangai hòm,
'bài cato lai laq ep yòng pàng cô raq’?
12 “Enh jò xa-ông ca ìh, ìh i jah thê plình loh 'ngah daxroq,
wa pajaq jò ca 'ngah tŏc daxroq,
13 đòiq haq xreo jàp ca plì taneh,
wa da'rù đac mangai dù loh khoi ùh?
14 Jò can ngah baxèm xreo daxroq,
'mù plì taneh pa'noh loh tìah ca taneh nhin khoi jah padit xam teo wa khoi pa'noh loh bàc nhum.
15 Can 'ngah daxroq trùh broq ca mangai dù 'bìq manhài manhèp,
tì wì haq ùh jah broq bìac ngang dù.
16 “I jò leq ìh chaq hnoq gŏi diac raxìq,
loq loh trùh ta driah diac raxìq jrùq ùh?
17 I cabô patô ca ìh hnoq 'mang ngo can cachìt?
Ìh khoi hnoq 'mang ngo nòi clam clôiq dìq jaq ùh?
18 Ìh i hèm loq ca can rùng rai da plì taneh ùh?
Tàng loq ca 'bài bìac aih, doi beq.
19 “Trong leq 'nong trùh nòi can 'ngah ŏi?
Nòi clam clôiq èh ŏi ta leq,
20 ìh jah ajèn haq hlài dèh ta nòi haq ŏi ùh,
loq ìh loq ca trong haq hlài dèh ta hnem ùh?
21 Ìh loq, ma jah 'màng aih jò aih khoi xa-ông ca ìh;
sôq hì da 'nhòng rìh ìh joq 'nàng bàc!
22 “Ìh i mùt ngan ta kho twiac wa hnoq nòi đòiq mè preo,
23 Au ma khoi padon đòiq ca jò ranàc,
ca hì tajêh poh wa jò tac mac ùh?
24 Can ngah jah talah tiaq trong leq,
wa cayeo pah mat mahì loh tiaq trong leq hlôi loh ta crŏng taneh?
25 Cabô khoi choh mùang ca diac làn,
loq patô trong ca camlet,
26 am mè clìh ta nòi đùng wang wê, wa nòi braih càn ùh i ca mangai ŏi;
27 đòiq hi pùc taneh croh crenh,
wa broq ca nhat long hon lem?
28 Mè i baq 'mòh?
Cabô xa-ông ca 'bài diac ngom?
29 Diac hmu xa-ông loh enh cliac bô?
Cabô xa-ông loh diac ngom taboc hangeo da plình?
30 Diac wìa côq hlài tìah ca hmu,
riang diac nòi jrùq loh ca cadoq.
31 “Ìh jah càt padràng Halŏng Gu Adrùh,
wa jah dŏih caxi ma càt Halŏng Cadrong Ia 'mòh?
32 Ìh jah broq ca 'bài halŏng loh tiaq troq jò khê,
wa 'nong trong ca Halŏng Higàu wa halŏng ma tiaq haq aih 'mòh?
33 Ìh loq ca trong broq troq da 'bài halŏng ta plình
wa ìh jah loq 'màng leq halŏng aih wèq bìac tabròc da crŏng taneh 'mòh?
34 “Ìh jah hloh bàu lech ca yùc,
broq mè pêh chac ìh 'mòh?
35 Ìh i cwìang broq loh camlet 'mòh?
Èh haq trùh ta nòi ìh khoi thê ùh?
36 Cabô tah am can khôn rabiaq ta manoh,
wa am can 'nì loq ca manoh hèm?
37 Cabô nhò can rabiaq rèn yùc,
glinh ùc 'bài abôq diac da 'bài lòp plình,
38 wa thê mè loh broq 'bài cato taneh hatop hlài ca dabau?
39 “Ma i axan hanùm am ca baco hlari can,
wa broq ca baco con jah panàc,
40 Ìh i loq jò baco 'na'nup ti nòi còp,
loq jò achop hanùm ta rôm?
41 Cabô ma ban ac jò
con ac creo dang Boc Plình,
wa pan ta cô pan ta tau taiq haq pangot?