37
Ê-li-hu Padèch Cwìang Itai Rahù da Boc Plình
1 “Joq 'nàng, plì nòih au tadroq wa tarìt taiq bìac aih,
haq enh plôh loh khoi enh nòi haq.
2 Tamàng bàu Haq tìah ca plình cađah,
wa atêh tagrùang tagràt loh enh hacùng Haq!
3 Haq broq tadroq enh 'neq ca 'bài lòp plình,
camlet Haq xreo trùh nòi lùch taneh.
4 Atìq ca aih i bàu Haq grùang grùang,
Haq broq atêh rahù wa cađah,
wa jò i bàu Haq,
èh ùh jah padràng hlài camlet.
5 Boc Plình broq atêh cađah loh ca hadròt;
Haq broq bìac dìq jaq càn caiq bèn ùh nui loq dìq?
6 Haq doi ca twiac: Clìh ta taneh beq!
Hadai doi ca mè: Mè càn dêh beq!
7 Haq clenh tin tì da rìm ngai,
đòiq rìm ngai jah loq ca bìac da Haq.
8 Jò aih ngè rôm lam mot ŏi dèh ta còp wa ŏi hloi ta còp.
9 Bahùt trùh enh pah 'ma ca mat mahì loh,
plình hangeo trùh enh pah 'ngeo ca mat mahì loh.
10 Hihèm da Boc Plình broq loh diac hmu;
diac cròng rùng rai loh wìa dìq diac hmu.
11 Haq tŏng đòiq hòi diac ta yùc,
hi khoi camlet xreo enh yùc.
12 Yùc pan jàp jìa tiaq manoh Boc Plình,
đòiq broq gêh bìac Haq ma thê broq jàp ta crŏng taneh.
13 Haq broq loh dìq bìac cô đòiq baxa hnài mangai, broq lem ca đùng taneh, loq đòiq patô can xa-ŏch xam manoh loq waq ca mangai.
14 “Ôi Jop, halang don tamàng bàu beq, yòng hatenh,
haboq hlài bìac halac da Boc Plình beq.
15 Ìh i loq ca trong Boc Plình ta'mroq bìac aih ùh?
'Màng leq Haq am camlet xreo yùc Haq ùh?
16 Ìh i loq 'màng leq yùc jah atua dađeh ŏi 'ne plình ùh?
Ìh i loq ca bìac broq halac da Boc Plình i can rabiaq dìq dŏng ùh?
17 Ìh i loq hagleq eo cwàn ìh tôq,
jò Haq yŏc cayeo pah 'ma ca mat mahì loh broq ca plì taneh jah hatenh wa tôq ùh?
18 Ìh i jah wiang hlìa plình ti Boc Plình
wa broq plình hagao 'màng ca capiac gùang habàu ùh?
19 “Xìn hnài nhèn loq ca trong leq nhèn phai doi ca Haq,
taiq nhèn blùng; nhèn ùh 'nì capoch bàu leq ca Haq.
20 Mangai leq nhet doi ca Boc Plình, au enh anoi ca Haq ùh?
Tàng haq capoch, haq 'bìq raliang đac ùh?
21 Mangai ùh jah ngan jang ta mat mahì taiq haq xreo camla jò cayeo khoi hlôi dìq ca yùc lam đac.
22 'Ngah ngèq trùh enh pah 'ngeo ca mat mahì loh;
dudan Boc Plình i can rahù đang ca crè joq 'nàng!
23 Chuaq I Cwìang Itai Dìq Dŏng, bèn ùh nui 'nì loq ca Haq;
cwìang itai càn dìq jaq Haq khoi jah padèch ti 'nhèq; Haq broq tiaq trong ta-atoq, ùh padit padiang cabô.
24 Taiq 'màng aih con mangai crè yùq ca Haq;
Haq ùh ngan mangai leq xoh dađeh i manoh khôn rabiaq.”