23
Jop Doi Haq Ngèh Enh Boc Plình
1 Èh Jop tèo:
2 “Trùh manàiq, au xôq ŏi tajraq hlài ca bìac pagau pagùa;
tì Haq padit au trap 'nhac ca au hmoi rayoih.
3 Ôi! Au ùac chaq hnoq Chuaq,
đòiq lam trùh jang ngìa nòi hadrah da Haq!
4 Au jah pa'noh dèh bìac au jang ngìa Chuaq;
hacùng au jah bòch ma geo rìm trong.
5 Au jah loq ca bàu Haq tèo hlài au,
wa loq 'nì ca bìac Haq enh doi ca au.
6 Chuaq yŏc dèh cwìang itai càn caiq Haq rahen ca au ùh?
Ùh đòh! Haq tamàng au.
7 Ti aih mangai lem jang jah capoch dŏih dađeh jang ngìa Haq,
èh au jah hloi hloi claih ca Haq ma hadrah au.
8 “Cô, au lam trùh nòi enh ngìa, mahaq ùh i ca Haq ta aih;
au wìh hlài enh cloh, xôq ùh hnoq Haq.
9 Jò Haq broq bìac ŏi pah 'ma, au ùh jah glàm Haq;
jò Haq loh pah 'ngeo, au hadai ùh hnoq Haq.
10 Mahaq Chuaq loq ca trong au lam;
jò Haq khoi baxa thù au, au jah wìa tìah ca wang.
11 Jènh au cadiang tiaq trong Chuaq;
au khoi lam tiaq trong Haq ùh tawìh toq xìt.
12 Au 'nhòq lah cađac bàu thê loh enh hacùng Haq;
au khoi iu tiaq bàu da hacùng Haq yi hnao ca loq enh caq dèh dahwèq caq rìm hì.
13 “Mahaq jò Chuaq khoi dì ca broq, cabô èh ma jah broq ca Haq tablòq?
Trong leq Haq enh, Haq broq trong aih.
14 Trong Haq khoi dì broq ca au, èh Haq broq waq ca gêh;
ta manoh Haq ŏi i bàc trong 'màng aih.
15 Taiq nen aih, au loq manhài ŏi jang ngìa Haq;
jò au hèm trùh, tajòi 'mòi au crè yùq ca Haq.
16 Ma jah 'màng aih Boc Plình broq ca manoh au loh ca tagah tagôi;
Chuaq I Cwìang Itai Dìq Dŏng broq ca au yùq crè dìq jaq.
17 'Nhac ca 'màng aih au ŏi hatenh jò can clam clôiq glom au,
hadai jò yùc gam glàp hlèp hadrò au.