22
Ê-li-pha Khìn Jop
1 Èh Ê-li-pha, mangai Têman, tèo:
2 “Mangai tadêh i ca lòiq cleq ca Boc Plình ùh?
Mangai rabiaq i lòiq dèh toq ca cla ùh?
3 'Nhac ca ìh ta-atoq, Chuaq I Cwìang Itai Dìq Dŏng ji ùh i bùi cleq?
Manoh ìh gêh tôm jah lòiq ca haq 'mòh?
4 “I joq taiq ìh iu crè ca Haq,
dài Haq lech ca ìh wa hadrah ìh?
5 Ajoq taiq bìac ngang dù da ìh càn dìq jaq wa tôiq lôi da ìh bàc dìq jaq ùh nui rèn 'mòh?
6 Taiq ìh khoi ùh enh am wai 'bac ca bua ma nhet tàng wì haq ùh am ca ìh eo cwàn đòiq broq ngè baxon; 'màng aih ìh khoi lêh eo cwàn haq loh ca rahòng.
7 Ìh ùh am diac ôq ca mangai croh ranŏng,
ùh am 'benh ca mangai pangot.
8 Ìh khoi am đùng taneh ca mangai i cwìang
wa mangai đang ca loq iu.
9 Ìh hnan đac mangai hadrô loh lam tì dech,
wa raliang đac bìac ngèh enh da mangai lac.
10 Taiq nen aih, manet hloi hloi dudan ca ìh,
wa bìac ramòt da'ngàc broq ca ìh yùq crè dìq jaq.
11 Can clam clôiq tàt khech broq ca ìh ùh xao hnoq,
diac càn làp cram ca ìh.
12 “Boc Plình ma ùh yi ha'nhèq ca 'bài lòp plình 'mòh?
Ngan 'bài halŏng ha'nhèq beq, aih ha'nhèq dàng leq!
13 Ìh doi: Boc Plình loq cleq?
Haq ŏi enh 'nhèq ca yùc gam habàu habùt jah hadrah 'mòh?
14 Yùc gam glom Haq taiq nen aih Haq ùh xao hnoq;
Haq cadiang lam ta ca'nàm plình.
15 Ìh xôq enh lam tiaq trong calah nèh,
trong da 'bài mangai ngang dù khoi lam 'mòh?
16 Can rìh wì haq 'bìq yŏc 'noh jò wì ŏi 'yoh hanam;
xèm can rìh wì haq 'bìq cròng diac bahìu đac.
17 Wì haq doi ca Boc Plình: Ìh wia ma hangai ca nhèn beq!
Chuaq I Cwìang Itai Dìq Dŏng jah broq cleq ca nhèn?
18 'Nhac ca 'màng aih, Haq broq ca hnem wì bàc dahwèq lem.
Ngèh ca 'bài trong 'mèq da mangai dù hangai ca au!
19 “Mangai ta-atoq lem bùi jò hnoq mangai dù 'bìq baxa;
mangai ùh i ca tôiq do lê wì haq,
20 doi: ‘Joq 'nàng mangai yòng tajraq hlài ca nhèn ùh claih ca cachìt;
ùnh cheo đac hloi mangai ma ŏi xrong.’
21 “ 'Màng aih ìh hatroq hlài ca Boc Plình beq.
Ŏi catèm beq, nhò aih èh ìh jah xôq ramŏt.
22 Ìh phai nhàn yŏc bàu hnài enh nòi hacùng Haq beq,
wa đòiq bàu Haq ŏi ta manoh ìh beq.
23 Tàng ìh wìh hlài ta Chuaq I Cwìang Itai Dìq Dŏng, ìh jah ha'naoq hlài.
Tàng ìh cađac bìac dù loh khoi ca traiq ìh,
24 Tàng ìh hwenh đac bìac ham wang canaq ta blo taneh,
wa hwenh dèh wang Ôphia ta'ne hmu ta hŏc diac,
25 èh Chuaq I Cwìang Itai Dìq Dŏng jah wìa ngè canaq da ìh;
Haq jah wìa 'bac canaq am ca ìh.
26 Jò aih èh ìh jah bùi lem nòi Chuaq I Cwìang Itai Dìq Dŏng,
wa ìh jah dèch gàu ngoi ngan Boc Plình.
27 Ìh waiq khàn ca Haq, Haq tamàng bàu ìh,
wa ìh jah broq gêh dèh bàu ìh pachac ca Haq.
28 Ìh hatình broq bìac leq, èh jah gêh bìac aih;
can 'ngah xreo ti 'bài trong da ìh.
29 Boc Plình ca'nìh đac mangai loq padèch dađeh,
mahaq dŏih dèch mangai loq paha'neq dađeh.
30 Haq dŏih dèch mangai i tôiq;
ìh hadai jah dèch tàng tì ìh lem hreo.”