1 Ta 'nhòng aih, mangai Phi-li-tin tagop dìq ca lình da wì haq đòiq padon tajêh poh, đòiq tajêh ca mangai Is-ra-ên. Akich doi ca Đawit: “Ìh wa dìq ca lình ìh phai tiaq au đòiq lam tajêh beq.”

2 Đawit tèo Akich: “Joq hai, 'màng aih, ìh jah loq manàiq cô au jah broq bìac cleq.”

Akich tèo: “Lem dìq jaq! Au jah dèch ìh broq mangai wèq au dìq ca 'nhòng au.”

3 Jò aih Sa-mu-ên khoi cachìt. Dìq ca mangai Is-ra-ên khoi hmoi ca haq, catùh haq ta Rama phôq haq. Saulò hadai khoi hnan cađac loh khoi ca Taneh Diac Is-ra-ên dìq ca mangai creo ca mahua mangai cachìt wa mangai anoi ca yiang dù.

4 Jò aih lình Phi-li-tin tagop dabau trùh đòiq traiq ta Sunem. Saulò hadai tagop dìq ca lình da Is-ra-ên trùh đòiq traiq ta Gin-bô-a. 5 Jò Saulò hnoq lình Phi-li-tin, haq yùq crè, èh manoh haq dìq jaq tarìt. 6 Saulò waiq bòch manoh Chuaq, mahaq Chuaq ùh tèo haq, xam bìac apô, loq xam Urim, loq xam mangai capoch thai Boc Plình. 7 Bùa Saulò doi ca wì mangai hapŏng haq: “Chaq ca au mòiq ngai mangai cadrì jah creo ca mahua mangai cachìt đòiq au bòch haq.”

Wì hapŏng haq tèo: “Nhèn khoi chaq hnoq mòiq ngai, mangai cadrì creo ca mahua mangai cachìt ŏi ta Ên-đô-rò.”

8 Saulò caxùnh eo cwàn patìah ca mangai 'noiq, hi khoi lam ti baiq ngai lình haq. Daxèq wì haq trùh ta hnem mangai cadrì aih. Saulò doi: “Xìn ìh creo wa atŏc ca au mangai au am hiniq haq ca ìh.”

9 Mangai cadrì aih tèo: “Mahaq ìh loq bùa Saulò khoi jêh cađac dìq ca mangai ma jah creo ca mahua mangai cachìt, wa mangai anoi ca can kiac ta gùng cô. Ìh enh bahlac au, broq ca au ep cachìt 'mòh?”

10 Saulò canòm ca hiniq Chuaq pachac ca mangai aih: “I Chuaq ma rìh yôt ngan hnoq, ìh ùh hìaq ep baxa cleq ta bìac cô.”

11 Jò mangai cadrì aih bòch: “Ìh enh au creo cabô tŏc ca ìh?”

Saulò tèo: “Creo Sa-mu-ên ca au.”

12 Jò mangai cadrì aih bu hnoq Sa-mu-ên, haq cachech bàu dêh doi ca Saulò: “Gleq ìh ma 'nùt au? Ìh cô raq Saulò.”

13 Bùa Saulò doi ca mangai cadrì aih: “Paq yùq. Ìh khoi jah hnoq cleq?”

Mangai cadrì aih doi ca Saulò: “Au khoi hnoq mòiq toq yiang tŏc enh taneh.”

14 Saulò bòch haq: “Chac hamac mangai aih 'màng leq?”

Mangai cadrì tèo: “Mòiq ngai mangai craq caxùnh eo yôh 'nang tŏc.”

Bùa Saulò loq aih raq Sa-mu-ên. Saulò cùp mat ta taneh đòiq padèch haq.

15 Hi khoi Sa-mu-ên doi ca Saulò: “Gleq ìh ma baxa au creo ca au tŏc?”

Saulò doi: “Au 'nang i bìac ranàc trùh ca au, taiq mangai Phi-li-tin 'nang enh tajêh poh ca au. Boc Plình khoi cađac au. Haq ùh tèo bàu au hòm, ùh doi ca au cwa wì mangai capoch thai Boc Plình loq bìac apô. Taiq 'màng aih au jah creo ca ìh, đòiq ìh jah doi ca au loq, au phai broq 'màng leq cô.”

16 Sa-mu-ên bòch: “Gleq ìh ŏi bòch au broq cleq, taiq nen Chuaq khoi cađac ìh wa khoi tajraq hlài ca ìh? 17 Chuaq khoi broq bìac da Haq cwa bàu au khoi doi. Chuaq khoi yŏc taneh Diac khoi ca tì ìh đòiq am ca Đawit mangai haten hatìa da ìh. 18 Taiq ìh khoi ùh dì tiaq bàu Boc Plình, hadai ùh broq tiaq bàu Haq thê broq loh can nòih baxa da Haq ca mangai A-ma-lec, taiq 'màng aih hì cô Chuaq khoi broq bìac cô ca ìh. 19 'Màng aih, Chuaq jao am Is-ra-ên pajùm ìh ta tì mangai Phi-li-tin. Hì da èh ìh wa dìq ca con calô da ìh jah ŏi pajùm ca au. Joq 'nàng, èh Chuaq jao am ca lình Is-ra-ên mùt ta tì mangai Phi-li-tin!”

20 Saulò tàng bàu aih, tajòi 'mòi haq cro bla-op ta taneh. Haq dìq jaq yùq crè ca bàu Sa-mu-ên khoi doi. Haq pi i ca padren hòm taiq haq ùh caq, ùh ôq cleq ta dahì damang aih.

21 Mangai cadrì aih trùh haten ca Saulò hnoq haq dìq jaq yùq crè. Haq doi: “Au cô hapŏng ìh, khoi tamàng bàu ìh, khoi tamùa ca cachìt broq tiaq bàu thê da ìh. 22 Manàiq cô xìn ìh hadai tamàng bàu au, đòiq au am ca ìh caq mòiq hachêh 'benh, èh ìh jah hlài padren lam trong.”

23 Mahaq Saulò doi: “Au ùh caq.”

Mahaq wì ma tiaq haq wa mangai cadrì aih xôq xìn yôt, 'màng aih haq ran yòng, ha'ngui ta jùang.

24 Mangai cadrì cô i mòiq toq 'bo bech, haq drah rùp broq jam. Haq hadai yŏc dàc đòiq broq 'benh ùh tah blo. 25 Èh haq don 'noh ca Saulò wa dìq ca wì ma tiaq haq caq, hi khoi wì caq ôq. Khoi gêh, wì hlài damang aih.