1 Èh Đawit hèm ta manoh: “I mòiq hì leq au cô èh xôq mùt ta tì Saulò, 'màng aih yi lem au cadàu mot ta gùng da mangai Phi-li-tin, 'màng aih haq jah hèm ta manoh, pi ngèh ca chaq hnoq au ta gùng da mangai Is-ra-ên hòm, au jah claih khoi ca haq.”

2 Khoi ca aih Đawit yòng, 'nong 600 lình lam tiaq haq trùh ta Akich con calô Ma-oc, bùa da Gat. 3 'Màng aih Đawit ŏi ti Akich ta Gat. Đawit wa wì ma tiaq haq dìq 'ràng dèh mai wa con lam tiaq. Đawit hadai 'ràng dèh baiq ngai mai aih A-hi-nô-am mangai Jê-rê-ên, wa A-bi-ga-in mangai Catmên. 4 Jò wì doi ca Saulò, Đawit khoi cadàu mot ta Gat, 'màng aih Saulò pi chaq haq hòm.

5 Đawit doi ca Akich: “Tàng au jah lem manoh ìh, xìn ìh am ca au mòiq phôq leq ŏi ta gùng cô, đòiq au jah ŏi ta aih, taiq gleq au cô jah ŏi pajùm ta nòi ìh, aih phôq da bùa?”

6 Akich am ca Đawit phôq Xiclac, 'màng aih Xiclac jah wìa phôq da 'bài bùa da Juđa trùh hì cô. 7 'Màng aih Đawit ŏi ta gùng aih jah mòiq hanam pôn khê.

8 Đawit wa wì ma tiaq haq trùh blah yŏc gùng da mangai Gê-su-rit, mangai Gòxit, wa mangai A-ma-lec. Aih wì mangai jàn calah nèh rìh ŏi ti 'bài gùng enh Sura trùh ta Aicàp. 9 Jò Đawit trùh jêh gùng leq aih, haq ùh rong đòiq mòiq ngai cadrì loq mangai calô leq jah rìh, haq jêh dìq. Haq yŏc dìq trìu, 'bo, lùa, lŏcđa, wa cwàn eo. Hi khoi haq hlài trùh ta Akich.

10 Akich bòch: “Hì cô ìh lam blah yŏc ta leq?” Đawit tèo: “Au blah yŏc ta gùng pah 'ngeo ca mat mahì loh da Juđa,” wa “gùng pah 'ngeo ca mat mahì loh da Jê-ra-mê-ên” wa “blah yŏc pah 'ngeo ca mat mahì loh ca mangai Kênit.” 11 Đawit ùh đòiq rìh mòiq ngai leq 'nhac ca gù calô loq gù cadrì, đòiq 'ràng mangai ŏi rìh hlài ta phôq Gat. Haq doi: “Ma jah 'màng aih haq yùq wì loq doi nhèn khoi broq cleq.” Aih bìac Đawit khoi broq dìq ca jò haq ŏi ta gùng Phi-li-tin. 12 'Màng aih Akich dìq jaq lùi Đawit. Akich doi: “Đawit khoi broq ca jàn Is-ra-ên, aih jàn haq, ramòt ca haq. Haq jah broq hapŏng ca au lùch ca'nhòng haq.”