8
Lepoogh to yes tau titaghon pooz to Maaron Avuvu
1-2 Saveeŋ naol tau nasavia ila wa, ene puughu tauvene: Iit tau tapaak Yesu Krisi ne, aazne leen puughu eta to Maaron ighur atuya pait mako. Pasaa, Maaron Avuvu tau taghamgham lepoogh poia ila tooni na, tapiri ipas ghiit pa ŋgar saghati ve mateegh tapiri wa. * Yo 8:36; Ro 6:18, 8:33+
3 Tutuuŋ, ene irau ipas ghiit tavot pa ŋgar saghati ve mateegh tapiri, ve igham ghiit taduduuŋ ila Maaron maata ne mako. Pasaa, loloon muŋgaana, ene iravrav matin tapiriin. Eemon gabua tau tutuuŋ irau ighamu mako, tauta Maaron tauu ighamu. Pasaa, i imbaaŋ tauu Naatu izilam taan, gha igham lepoogh imin iit tamtamon sasaghatiin, ve tiini igham yavyavuuŋ, ve imaat imin watooŋrau to ireu sosor toit. * Mbaŋ 13:38+; Ro 7:18; 2Kor 5:21; Hib 10:1+
4 Leso tagham ŋgar duduuŋa tau tutuuŋ isavia na. Ene yau nasavia iit tamtamon tau tataghon ŋgar to loloon muŋgaana mako, ve tataghon pooz to Maaron Avuvu. * Ro 3:31, 13:10; Ga 5:16, 25
5 Tamtamon tau titaghon lolozi muŋgaana na, matazi iŋgalŋgal ŋgar sasaghati to lolozi muŋgaana mon. Eemon yes tau titaghon pooz to Maaron Avuvu na, matazi iŋgalŋgal gabua ve ŋgar to Maaron Avuvu. * Yo 3:6; 1Kor 2:14+; Ga 5:19+
6 Yes tau matazi ilala pa ŋgar to lolozi muŋgaana na, titaghon eez to mateegh. Ve yes tau matazi ilala pa gabua ve ŋgar to Maaron Avuvu na, tigham lepoogh poia ila to Maaron, ve tileep toman lolozi luuma. * Ro 5:1, 6:21+; Ga 6:8
7 Isaav ighe tamtamon eta ŋgar tooni iyaryaaŋ ighe itaghon loolo muŋgaana, ene i ighur koi pa Maaron. Tamtamon tauvene loolo pa ileep ila tutuuŋ to Maaron saamba mako. Isaav ighe itoova to itaghoni, ene aat irao mako. * Kol 1:21; Yems 4:4
8 Tauvene yes tau titaghon lolozi muŋgaana, ene irau tigham Maaron loolo poia ne mako. Mako le mako kat.
9 Eemon yam ataghon ŋgar to lolomim muŋgaana muul mako. Pa isaav ighe onoon Maaron Avuvu ileep ila lolomim, i pale igham pooz payam. Ve tamtamon tau ighe Krisi Avuvu ileep ila loolo mako, ene i tamtamon to Krisi mako. * 1Kor 3:16, 6:19; Ga 5:22+
10 Onoon, sosor toit ta imin puughu pa iit tasov tamatmaat. Eemon isaav ighe Krisi ileep ila lolomim, yam aat agham lepoogh poia ila to Avuvu Patabuyaaŋ. Pasaa, Krisi igham gham aduduuŋ ila Maaron maata wa. 11 Ve isaav ighe Maaron toit tau ipaburigin Yesu Krisi pa mateegh na, Avuvu ileep ila lolomim, i pale ipaburigin gham paam pa mateegh ila Avuvu tawe tapiri, ve aleep matamim yaryaare toman anoŋamim paaghu. * Ro 6:5; 1Kor 6:14; 2Kor 4:14
Avuvu Patabuyaaŋ igham ghiit taghilaal taghe tamin Maaron natŋa
12 Tauvene yam toŋvetaz to Krisi, yam lemim puughu eta to ataghon ŋgar to lolomim muŋgaana muul mako. Yam aat ataghon ŋgar to Avuvu Patabuyaaŋ. * Ro 6:14
13 Pa ighe ataghon ŋgar to lolomim muŋgaana, ene pale amatmaat gha alalemim. Ve isaav ighe agham tapirimim ila to Avuvu Patabuyaaŋ ve aravrav matin ŋgar sasaghati to lolomim muŋgaana, ene pale agham lepoogh poia ila to Maaron. * Ro 6:23; Ga 5:24, 6:8; Kol 3:5+
14 Pasaa, tamtamon tisov tau titaghon pooz to Maaron Avuvu, ta timin Maaron natŋa. 15 Avuvu tau Maaron igham payam na, i irau igham gham amin yes besooŋa sorok tau tiroiroi pa daaba toozi ne mako. I Avuvu tau igham ghiit tamin Maaron natŋa. Ve i ta igham ghiit tapoi Maaron taghe: “Abba! * Yes Israela natuzŋa geegeu tipoipoi tamazŋa tighe: ‘Abba’, imin iit natuunŋa tipoipoi tamazŋa tighe ‘Ama.’ Yesu paam ipoi Taama Maaron ighe ‘Abba.’ Ughita Mk 14:36.
Tamaŋ!” * Ga 4:6; 2Tim 1:7; 1Yo 4:18
16 Tauvene Avuvu Patabuyaaŋ tauu isavsaav pait ila loloon, ve ipariaaŋ ghiit to taghur ila taghe iit Maaron natŋa. * Yo 1:12; 2Kor 1:22
Murei pale tala taleep tomania Maaron ila mbonari loolo
17 Isaav ighe iit Maaron natŋa, ene ezaan pa ghamuuŋ gabua popoiazi naol tau Tamaan Maaron ighe irei zi pa tamtamon tooni. Ve iit mon mako. Itiŋa Krisi pale tagham gabua tawe. Eemon iit aat tabaad pataŋani pa Krisi eeza, o murei itiŋa Krisi taleep poia ila mbonari loolo izi nugh sambam. * Ga 3:29, 4:7; Pil 1:29; Syg 21:7
18 Pataŋani naol tau aazne tivotvot ne, yau naghit zi naghe ene kaut sorok. Pasaa, saawe tau Maaron itotoi mbonari tomania tapiri ve poia tooni pait izi nugh sambam, gabua tawe pale iliiv kat pa pataŋani toit naol isov. * 2Kor 4:17
19 Aazne, gabua naol isov tau Maaron ighur zi na, tipasawal ve tighurghur matazi pa Maaron tighe le rekia mon ve tighit katin saawe to i ipavotvotin natŋa tivot mataghare. * Kol 3:4; 1Yo 3:2
20-21 Aazne taghita gabua naol tau Maaron ighur zi na, tileep poi mako. Tisasaghat rekia, ve uraat toozi ilaan duduuŋ itaghon Maaron ŋgar tooni mako. Gabua tawe titaghon tauzi lolozi ve tigham tauvene mako. Maaron tauu ipul zi tila saghati niima, tauta saghatiiŋ ivot pazi. Eemon i igham ŋgar pazi paam ighe murei, i pale igham mulin zi, ve ipas zi tivot pa saghati tapiri. Leso timin paghpaaghu, ve tileep poia ila mbonari loolo imin iit tau tamin i natŋa. * Gnp 3:17+; 2Pe 3:13; Syg 21:1
22 Iit tawatagh: Muuŋ ve ilam aazne, gabua naol isov tau Maaron ighur zi na, tiyamaan yavyavuuŋ ve tiyakyak imin livaa tau ighe ipoop. 23 Ve yes mon mako. Iit paam. Onoon, Maaron igham tauu Avuvu pait wa. Ene imin puughu pa gabua popoia naol tau murei pale tagham zi na. Eemon aazne, taleep toman pataŋani ve tataŋtaŋ, ve tasaŋan saawe to Maaron ipas ghiit pa saghati tapiri, ve igham leen anoŋaan paaghu. Saawe tana ighe ivot, mako i ipavotvotin ghiit ighe: “Ene yau natugŋa.” * 2Kor 5:2+; Pil 1:23, 3:21
24 Onoon, Maaron igham mulin ghiit wa. Eemon taghit katin anooŋa soone. Tauta aazne, taghurghur mataan pani ve talepleep. Ve imin ta anooŋa ivot wa, kanaŋ irau taghur mataan pani muul mako. Pa ighe gabua eta ivot, sei pale ighur maata pani muul? * 2Kor 5:7
25 Lepoogh poia tau taghurghur mataan pani ne, iit taghit katini soone. Eemon iit tawatagh: Maaron pale igham pait. Tauta tayooz ariaaŋ, ve tasasaŋan mon. * Hib 11:1
Maaron Avuvu ipaduduuŋ suŋuuŋ toit
26 Onoon, iit tamtamon to taan, tapiriin imbool. Ve saawe naol, takankaan: Pale tasuŋ mindai, leso suŋuuŋ toit iduduuŋ pa Maaron ŋgar tooni. Ve ŋgar siriv tau igheen ila loloon ne, ene ipataŋan pa tasavia ila suŋuuŋ toit. Eemon Avuvu Patabuyaaŋ iuluul ghiit, ve ipapaduduuŋ suŋuuŋ toit iŋaŋarui Tamaan Maaron. * Yo 14:16; Ep 6:18
27 Maaron itirtiir iit tasov loloon, ve iwatagh Avuvu Patabuyaaŋ ŋgar tooni paam. I iwatagh: Saawe tau Avuvu Patabuyaaŋ ighur iit tamtamon to Maaron ila suŋuuŋ tooni, i isuŋsuŋ itaghon Maaron loolo.
Gabua eta irau ivaghamun ghiit kat ne mako
28 Iit tawatagh: Gabua naol isov tau tivotvot ne, Maaron itortoor zi timin gabua popoia pa yes tau lolozi igheen tooni. Ene yes tau i ipoi zi timin le itaghon tauu ŋgar tooni. * Gnp 50:20; 2Tim 1:9
29 Pasaa, yes ta i tauu isiigh zi pataghaaŋ, tauta ŋgar tooni iyaryaaŋ pazi ighe igham uratoi zi, lee tigham katin ŋgar to Naatu Yesu Krisi. Leso i imin aidaaba, ve imuuŋ pa tazŋa ve livŋa katini tawe. * 2Kor 3:18; Ep 1:5; Kol 1:15+; 1Pe 1:2
30 Ve yes ta Maaron ŋgar tooni iyaryaaŋ pazi, tauta ipoi zi timin le. Ve yes tau ipoi zi timin le, tauta igham zi tiduduuŋ ila i maata. Ve yes tau igham zi tiduduuŋ ila maata na, i aat ikis zi tileep tuŋia ila tooni ila ila le igham zi tila tileep tomania ila mbonari loolo izi nugh sambam. * Yo 10:28+; 1Kor 6:11
Gabua eta irau irav motin ghiit pa Maaron mako
31 Laak, isaav ighe Maaron igham tauvene pait, pale tasaav mindai? Ighe i tauu ivool toit, sei irau ivaghamun ghiit? Mako. * Mbo 56:4; Hib 13:6
32 Aghita. Maaron iŋguruut tauu Naatu pait mako. I ipuli izilam taan, ve igham niaan gha imaat pait. Ighe tauvene, Maaron pale igham leen gabua tooni popoia ta naol ne, raraate imin igham Naatu pait. * Yo 3:16
33 Ve iit tamtamon tau Maaron isiigh ghiit tamin i le na, sei pale ipayooz ghiit pa savsaveeŋ? Mako. Pasaa, Maaron tauu igham ghiit taduduuŋ ila i maata wa. * Is 50:8+
34 Ve sei pale ighur atuya pait pa sosor toit? Mako. Pasaa, Yesu Krisi imaat pa sosor toit, ve Maaron ipaburigini pa mateegh wa. Ve aazne, i ilepleep ila Maaron niima tapir, ve suŋuuŋ tooni iŋaŋarui Taama pait. * Mbo 110:1; Ro 8:1; Hib 7:24+; 1Yo 2:1
35 Aghita. Krisi loolo igheen toit kat. Tauvene saa gabua irau irav motin ghiit pani? Mako. Pataŋani maata maata tau tivotvot pait imin taleep saghat, ma tamtamon tighur pataŋani pait pasaa tataghon Krisi, ma pitool ghiit, ma mbolaaŋ igham ghiit, ma tirav ghiit pa mbuzaagh, ma saghatiiŋ ite paam, gabua eta tauvene irau irav motin ghiit pa Krisi mako. 36 Onoon, pataŋani naol tane tivotvot pait. Saveeŋa tiboode pataghaaŋ tauvene:
“Yei nimin lem wa. Tauta saawe isov, tiravrav sorokin ghei gha nimatmaat.
Yes tighit ghei nimin sipsip tau timbit zi pa ravuuŋ zi.” * Mbo 44:22; 1Kor 4:9, 15:30+
37 Eemon pataŋani naol tane irau tivaghamun ghiit mako. Pasaa, Krisi loolo igheen toit kat, ve igham ghiit taliiv zi. * Yo 16:33; 1Kor 15:57; 2Kor 2:14; 1Yo 4:4; Syg 12:11
38-39 Tauvene yau naghur ila kat tauvene: Iit tau tapaak Tiina toit Yesu Krisi ne, Maaron loolo igheen toit kat, ve gabua eta irau irav motin ghiit pani mako. Mateegh, ma lepoghaan to taan, aŋela eta, avuvu saghati eta, gabua tau lezi tapirizi tiina, ŋgar tau aazne ivotvot ne, ŋgar tau murei pale ivot na, gabua tau tileep saaŋa, ma gabua tau tileep siiŋa kat, gabua tisov tau Maaron ighur zi na, eta irau irav motin ghiit pa Maaron toit tau ighur loolo pait kat ne mako. Mako le mako kat.
*8:1-2: Yo 8:36; Ro 6:18, 8:33+
*8:3: Mbaŋ 13:38+; Ro 7:18; 2Kor 5:21; Hib 10:1+
*8:4: Ro 3:31, 13:10; Ga 5:16, 25
*8:5: Yo 3:6; 1Kor 2:14+; Ga 5:19+
*8:9: 1Kor 3:16, 6:19; Ga 5:22+
*8:11: Ro 6:5; 1Kor 6:14; 2Kor 4:14
*8:13: Ro 6:23; Ga 5:24, 6:8; Kol 3:5+
*8:15: Yes Israela natuzŋa geegeu tipoipoi tamazŋa tighe: ‘Abba’, imin iit natuunŋa tipoipoi tamazŋa tighe ‘Ama.’ Yesu paam ipoi Taama Maaron ighe ‘Abba.’ Ughita Mk 14:36.
*8:15: Ga 4:6; 2Tim 1:7; 1Yo 4:18
*8:17: Ga 3:29, 4:7; Pil 1:29; Syg 21:7
*8:20-21: Gnp 3:17+; 2Pe 3:13; Syg 21:1
*8:23: 2Kor 5:2+; Pil 1:23, 3:21
*8:29: 2Kor 3:18; Ep 1:5; Kol 1:15+; 1Pe 1:2
*8:33: Is 50:8+
*8:34: Mbo 110:1; Ro 8:1; Hib 7:24+; 1Yo 2:1
*8:36: Mbo 44:22; 1Kor 4:9, 15:30+
*8:37: Yo 16:33; 1Kor 15:57; 2Kor 2:14; 1Yo 4:4; Syg 12:11