1 Te wedà pa dateng se aldaw te Pista te Pegpelowà, tapay netegahan i Jesus te agpet den se pegkesayo din lekat te keneyonan amon molì doton te Amay din. Gayed dakel se pedowan din diyà te menge tinoledaan din dini te keneyonan, aw nedekelan din dan te pedowan lamig te pegkematay din.

2 Kimaen dan te iyambong. Kidoen heman si Judas Iscariote, batà i Simon, tapay binoyo i Satanas amon megtolok ki Jesus. 3 Meneng si Jesus, tapay netegahan din te insalig diyà kandin se pegpengibing te kedita. Netegahan din heman te Timanem se migsogò kandin aw sikandin se olian din heman. 4 Yan dalem pa te peg-iyambong dan, timindeg si Jesus, aw miglowas te saol din, aw nemagkes te towalya diyà te pawak din. 5 Penga niyan, nenoyong sikandin te wayeg diyà te pelenggana, aw mig-onaw te benis te menge tinoledaan din teg sebad-sebad. Miglegalis heman sikandin te benis dan te towalya diyà te pawak din. 6 Pegdateng din doton ki Simon, iningedanan din ki Pedro, nepela si Pedro aw minikagi, “Pengolo ko, eked kepakay aw sikona se meg-onaw te benis ko.”

7 Timaba si Jesus, “Wedà no pa kelebeti aw eden se inangen ko seini. Meneng kelebetan no te modi aldaw.”

8 Minikagi si Pedro, “Eked ka palos peg-onaw te benis ko.”

Minikagi si Jesus, “Aw eked ta onawi, wedad labut no kanak.”

9 Meneng wedà pekelabet si Pedro, aw yan se doun te minikagi sikandin, “Pengolo, kenà olò benis ko se onawan no, meneng belad ko heman aw olo ko.”

10 Minikagi si Jesus, “Se otaw nemedigos den, olò benis din se keilangan onawan amon melinis se kedakel te lawa din. Melinis kaw den, meneng kenà melinis se kedita niyo.”

11 Netegahan i Jesus aw sinu se megtolok kandin, aw yan se doun te peg-ikagi din te kenà melinis se kedita dan.

12 Penga te peg-onaw din te benis dan, nenaol sikandin aw limikò kidoen te lemisa. Penga niyan, minikagi sikandin, “Wedà niyo besi kelebeti aw eden se ininang ko gina diyà kenyo. 13 Eg-ikagi kaw te siak se Menenoladà, aw egtewalen a niyo Pengolo. Neketotok iyan, so ontò a Pengolo niyo, aw egtoladà a kenyo. 14 Nayan, pengkey siak se Menenoladà aw Pengolo niyo, meneng migpedanà a te kanak pegkeotawun aw mig-onaw a te kenyo benis. Yan keilangan megpedanà kaw heman te kenyo pegkeotawun aw megpeonaway kaw te benis niyo. 15 Yan se ininang ko amon meg-iling kaw kanak. 16 Eneng-enengi niyo se kagi ko kenyo. Se sineligan, kenà melangkaw diyà te amo din. Se sogounun, kenà heman melangkaw diyà te otaw simogò kandin. 17 Aw kelebetan niyo se kebenalan intoladà ko den kenyo seini, yan ontò kaw meluba aw tomolò kaw kenyan. 18 Meneng kenà kedita niyo se pinunuan ko kani. Netegahan ko aw eden se awop te pedowan te kedita niyo pinemallì ko, aw keilangan metoman se kagi te Timanem insolat,

21 Penga te peg-ikagi i Jesus kenyan, ontò nelidò se pedowan din, aw minikagi, “Eneng-enengi niyo se kagi ko kenyo. Doen sebad kenyo megtolok kanak.”

22 Pegdineg te menge tinoledaan din kenyan, nepela dan aw migpetengtengay dan, so wedà dan ketegahi aw sinu se nepeselowan te inikagi din sìyan. 23 Se timangkil ki Jesus, yan se tinoledaan ontò nedekelan i Jesus te pedowan. 24 Kimapay si Pedro kandin, aw minikagi, “Insai si Jesus aw sinu otawi se nepeselowan te inikagi din.”

25 Yan minonsalig sikandin ki Jesus aw mig-insà, “Pengolo, sinu lay otawi diyà kenami se megtolok kamno?”

26 Timaba si Jesus, “Yan se otaw begayan ko te pan tapay imbawog diyà te lipong.”

Penga niyan, migbawog si Jesus te pan, aw imbegay din ki Judas, batà i Simon Iscariote. 27 Penga te pegkinawà i Judas te pan, dimateng si Satanas diyà kandin. Minikagi si Jesus, “Eyasi se inangen nikaw.”

28 Meneng se menge doma tinoledaan kidoen te lemisa, wedà dan ketegahi aw eden se tod te inikagi i Jesus diyà ki Judas. 29 Si Judas se egtonggò te kwarta te kedita dan, aw yan se doun te mig-aneng-aneng dan te insogò sikandin amon mayad te menge kelidoan dan tepad te pista. Mig-aneng-aneng se doma te insogò sikandin amon memegay te kwarta diyà te menge otaw sagkep. 30 Na, penga te pegkaen i Judas te pan imbegay i Jesus kandin, limowà te balay, aw delem den.

31 Penga te pegkesayo i Judas, minikagi si Jesus, “Ipekità den te siak se Timanem Migpekeotaw, aw pineokit kanak ipekità heman te melangkaw se Timanem. 32 Aw ipekità te melangkaw se Timanem pineokit kanak, sikandin heman se megpekità te melangkaw a, aw yan se ipekità din te eked den kenamay.

33 “Menge batà ko, eked den kenamay se pegdoma ko kenyo. Penga niyan, pengkey pemehaen a niyo, meneng onawa se kagi ko kenyo te inikagi ko kedengan diyà te menge obanen te Judiyo, te eked kaw pa pekedoton te dotonan ko. 34 Doen den kaling punù ko kenyo seini. Pegpedekelay kaw te pedowan. Keilangan megpedekelay kaw te pedowan iling te kedakel te pedowan ko kenyo. 35 Aw megpedekelay kaw te pedowan, yan se pengilala amon metaga-taga se kedita te otaw te menge tinoledaan ko sikiyo.”

36 Mig-insà si Pedro, “Pengolo, kenan ka lay doton?”

Timaba si Jesus, “Eked ka pa pekedoma kanak doton te dotonan ko. Meneng tomelokon ka kanak te modi aldaw.”

37 Minikagi si Pedro, “Pengolo, nengà lay eked a den pekedoma kamno? Neketagad a den pengkey imetayan a tandà te pegtaking ko kamno.”

38 Timaba si Jesus, “Eden no aw neketagad ka den imetayan tandà te pegtaking no kanak. Eneng-enengi se kagi ko kamno. Te eked pa pegkolaak se manok te iselem, ibolon a nikaw te meketelo.”