1 Enem pa se aldaw te wedà pa dateng se aldaw te Pista te Pegpelowà, dimoton si Jesus te Bitanya. Yan se lonsod eg-ogpaan i Lazaro, sìyan otaw inantay i Jesus lekat te nematay. 2 Pegdateng din doton, mig-inang dan te kànen te pegsagman dan ki Jesus. Pegpengaen dan, migtelaban si Marta miglamak, aw si Lazaro se sebad diyà te menge otaw kimaen doma ki Jesus. 3 Si Maria, sìyan adi i Lazaro, inibing din se sebad sopa te lana metinadeg iningedanan nardo ontò meelagà. Yan se intoyong din diyà te benis i Jesus, aw logay din se inggalis din te benis i Jesus. Nelegeb se kedakel te balay te nadeg niyan. 4 Minikagi se sebad tinoledaan i Jesus, sìyan migtolok kandin si Judas Iscariote, kagi din, 5 “Tay law. Ontò iyan meelagà. Mèpiya peden aw ibeligyà iyan amon doen kwarta ibegay diyà te menge otaw sagkep.”

6 Yan se inikagi din kenà so egkeidowan din se otaw sagkep, meneng menenakaw sikandin, so gayed din eg-ebaten se kwarta insalig diyà kandin, so sikandin se egtonggò te kwarta te kedita dan. 7 Minikagi si Jesus, “Pebeyai sikandin. Yan se ininang din amon ipetagad a din te peglebeng kanak. 8 Gayed doen otaw sagkep mebatog niyo tebangan. Meneng eked a gayed peg-ogpà dini kenyo.”

9 Medita se Judiyo dimineg te kidoen si Jesus te Bitanya, aw dimoton dan. Pengkey nengemahà dan ki Jesus, meibeg dan heman komità ki Lazaro inantay din lekat te nematay. 10 Yan se doun te miglalang se menge pengolo te simbahan te imetayan dan heman si Lazaro, 11 so peg-antay kandin lekat te nematay, medita se Judiyo limengà te pegtaking kandan, so nemenal den dan ki Jesus.

12 Keeldawan niyan, dimineg se medita otaw timanod te pista te agpet den domateng si Jesus kidoen te Jerusalem. 13 Simongon dan kandin, aw inibing dan se menge pelapà te palmera sinagpì dan, so yan se ketanem dan te pegsongon dan te selotan. Migpegais dan, “Iduyun se Timanem. Iduyun heman se insogò din dimateng den. Iduyun sikandin Selotan te kedita tadon bowad-bowad i Israel.”

14 Impeangay i Jesus se nati te kodà egtewalen asno, aw yan se sinekayan din. Pineokit kenyan, tinoman din se pakang tapay insolat kidoen te kagi te Timanem,

16 Pegdateng i Jesus doton te Jerusalem, wedà pa ketaga-taga se menge tinoledaan din te yan se pegketoman te pakang tapay insolat. Meneng penga te pegkeantay din lekat te nematay, aw pegpeengat din doton te langit, mig-aneng-aneng den dan te yan se impakang tepad kandin gebii, aw netoman den iyan.

17 Medita se otaw kimità te pegtawal i Jesus ki Lazaro kidoen te lebeng aw peg-antay din kandin lekat te nematay. Mig-indan dan te menge doma otaw, 18 aw yan se doun te medita se otaw simongon ki Jesus te pegdateng din doton te Jerusalem, so dinineg dan tepad te kepelahan ininang din. 19 Pegkità te menge Parisiyo te medita se otaw timaking ki Jesus, migpebelaw-belaway dan, “Dinaeg kidon den, so timaking kandin se kedita te otaw te keneyonan.”

20 Doen heman menge otaw Griego timaking te menge Judiyo dimoton te Jerusalem amon megsimba dan kidoen dalem te pista. 21 Nengemahà dan ki Felipe tege Bitsayda, sakop te Galiliya. Minikagi dan, “Sir, meibeg kay komità ki Jesus.”

22 Mig-indan si Felipe diyà ki Andres te ibeg dan, aw didowa dan se dimoton ki Jesus amon meg-indan kandin. 23 Minikagi si Jesus, “Agpet den se aldaw ipekità te Amay ko te melangkaw a. 24 Eneng-enengi niyo se kagi ko kenyo. Wedad ontong te benì singed aw onà itanem diyà te tanà aw ilebeng. Aw ilebeng aw tomobò, dakel se pongo niyan. 25 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey eked keleyati se omol din dini te keneyonan, begayan sikandin te kaling pedowan wedad temanan. 26 Aw meibeg se otaw meinang sogounun ko, keilangan tomaking kanak, so pengkey kenan a pesalo, doton heman se sogounun ko. Iduyun te Amay ko se sogounun ko.”

27 Minikagi si Jesus, “Ontò den nepuluk se pedowan ko. Megmeno a? Eked a pemoyò diyà te Amay ko te ipelowà a din lekat te kelimahan domateng diyà kanak, so yan se doun te dimini a te keneyonan amon tomayod a kenyan.”

28 Penga niyan, migtawal-tawal si Jesus, “Amà, pekitai diyà te menge otaw dini te ontò ka melangkaw.”

Peg-ikagi din kenyan, dinineg dan se kagi te Timanem lekat te langit, kagi din, “Tapay ko den iyan impekità, aw todà ko heman ipekità.”

29 Medita se otaw kidoen dimineg kenyan, meneng eden dan aw kilat. Minikagi se menge doma otaw, “Doen anghil minikagi diyà kandin.”

30 Minikagi si Jesus, “Kenà siak se tod te peg-ikagi te Timanem kenyan, meneng sikiyo, amon memenal kaw. 31 Lekat seini, ipelumun te Timanem se kedita te poon din dini te keneyonan. Dàgen din heman se pengolo te medaet dini te keneyonan si Satanas. 32 Meneng penga te pegsawol kanak kidoen te kayo intollok, ipetaking ko se kedita te otaw kanak lekat te kebelad te keneyonan.”

33 Yan se inikagi i Jesus amon ketegahan dan aw eden se keokit te pegkematay din. 34 Meneng minikagi se menge otaw, “Doen intoladà kenami kidoen te kagi te Timanem insolat, te wedad palos temanan te peglowan te Misiyas megpelowà kenitadon. Meneng minikagi ka te keilangan isawol se Timanem Migpekeotaw kidoen te kayo intollok. Nengà lay iyan? Sinu lay se sìyan Timanem Migpekeotaw?”

35 Minikagi si Jesus, “Domaan kaw pa te kelowahan te eked kenamay. Yan keilangan tomaking kaw te kelowahan amon eked kaw kesàbi te kengitngit. Se otaw mipanaw te kengitngit, yan se eked ketaga-taga aw kenan pesalo. 36 Meneng dalem te doen pa kelowahan dini kenyo, keilangan tomaking kaw te kelowahan, amon meinang kaw sakop te kelowahan.”

Penga te peg-ikagi i Jesus kenyan, nesayo kidoen aw mineles. 37 Pengkey kimità dan te ontò medita kepelahan ininang din, meneng wedà dan pa pemenal kandin. 38 Pineokit kenyan, netoman den se impakang te telekeliwat te kagi te Timanem gebii si Isaias, kagi din,

39 Doen anggà kidoen te pedowan dan, aw yan se doun te wedà dan pemenal, so minikagi heman si Isaias,

41 Yan se inikagi i Isaias gebii, so tapay din netegahan te melangkaw se isogò te Timanem, aw yan se intoladà din.

42 Medita se otaw nemenal te si Jesus se insogò te Timanem, aw doen heman menge obanen te Judiyo nemenal. Meneng migbolon dan kenyan so nelemitan dan te eked dan peopi te menge Parisiyo kidoen te simbahan. 43 Migbolon dan te pegpemenal dan, so pengkey doen ibeg dan iduyun te Timanem, meneng labi dan pa meibeg iduyun te doma otaw.

44 Timawal si Jesus aw dakel se kagi din, “Aw memenal se otaw kanak, kenà olò siak se pemenalen din, meneng pemenalen din heman se Amay ko simogò kanak. 45 Se otaw kimità kanak, yan se kimità heman te Amay ko simogò kanak. 46 Siak se lowa dimini te keneyonan amon mekelowà lekat te kengitngitan se otaw memenal kanak. 47 Aw doen otaw dimineg te kebenalan intoladà ko meneng eked tolò kenyan, kenà ko se eglekatan te pelumun kandin. Insogò a dini kenà amon megpelumun a te otaw, meneng amon megpelowà a te otaw lekat te pelumun. 48 Meneng se otaw eked pemenal kanak aw eked heman tolò te kebenalan intoladà ko, yan se metoman ipelumun te temanan aldaw pineokit te kagi intoladà ko wedà din toloi. 49 Wedà ko teboki se pegtoladà ko, meneng insogò a te Amay ko, aw sikandin se migpunù kanak aw eden se ikegiyen ko aw itoladà ko. 50 Netegahan ko te punù te Timanem se kelekatan te kaling pedowan wedad temanan. Yan se doun te gayed ko ipegkeliwat se kagi impunù din kanak.”