1 Nayan, neinang labi pa medaet se bitil doton te Canaan. 2 Pegkeamin te kedakel te trigo inabat dan doton te Ehipto, minikagi si Jacob diyà te menge batà din, “Likò kaw den amon beyadan niyo se mekaen tadon.”

3 Timaba si Juda, “Migpunù se otaw doton te eked kay pekelikò doton kandin singed aw tomaking se kedowa day temanan adi. 4 Aw ipetaking no sikandin, lomikò kay doton amon mayad kay te kànen nikaw. 5 Meneng aw eked no sikandin petekingi, eked kay likò, so minikagi se otaw doton te eked kay pekelikò doton kandin singed aw tomaking se kedowa day temanan adi.”

6 Minikagi si Jacob doma ngadan din si Israel, “Nengà lay mig-inang kaw kanak te medaet pineokit te peg-indan niyo kandin te doen pa kedowa niyo?”

7 Timaba dan, “Gayed sikandin mig-insà tepad kenitadon aw tepad te pamilya tadon. Mig-insà sikandin, ‘Wedà lay pa kematay se amay niyo? Doen lay pa doma kedowa niyo?’ Olò kay timaba te menge insà din. Wedà kay palos peg-aneng-aneng te tomogon sikandin te keilangan ibingen day doton se kedowa day.”

8 Minikagi si Juda diyà te amay din, “Seligi si Benjamin diyà kanak, aw mesayo kay den seini amon eked kematay se kedita tadon te bitil sipat te menge mengisù dini kenitadon. 9 Megsapà a den kamno te siaken se megbantay kandin amon wedad megpeeleg kandin. Aw eked ko sikandin keolì dini kamno, yan se salà ko kamno te wedad temanan. 10 Aw wedà kay nikaw keanggà, mekedowa kay den peden likò.”

11 Minikagi se amay dan, “Aw yan se keilangan inangen, mèpiya aw ibingen niyo heman se menge mèpiya pongo lekat dini amon doen ibowang niyo diyà te gobirnador, deitek alay aw teneb, menge enagay, aw pongo te kayo pistasio aw almendras. 12 Doblihi se kwarta ibingen niyo, so keilangan ilikò niyo se kwarta insawol diyà te sako niyo. Kemalì besi iyan. 13 Petekingi niyo heman se kedowa niyo, aw kegaen kaw likò. 14 Ibeg ko tebangan kaw te Timanem amon keidowan kaw te otaw doton aw ipeolì din si Benjamin aw si Simeon. Nayan tepad kanak, aw keilangan kemetayan a te menge batà ko, aw den iyan.”

15 Penga niyan, inibing dan se menge ibowang, aw dobli se kwarta dan, aw dimoton dan te Ehipto sipat si Benjamin. Pegdateng dan, dimoton dan ki Jose. 16 Pegkità i Jose te timaking si Benjamin kandan, minikagi sikandin diyà te sineligan din, “Ibingi se menge otaw sìyan doton te balay ko. Pengiyaw ka te ayam-ayam aw peg-elomo ka te kànen, so komaen dan doma ko te alas dosi.”

17 Timolò se sineligan aw inibing din dan doton te balay i Jose. 18 Pegketaga-taga dan te balay i Jose se ibingan kandan, nelemitan dan, aw migpebelaw-belaway dan, “Ibingen kidon doton tandà te kwarta in-olì diyà te sako tadon kedengan. Dekepen kidon besi kwani, aw egawen se menge asno tadon, aw inangen kidon allang din.”

19 Yan pegdateng dan doton te lelebangan te balay, minikagi dan diyà te sineligan, 20 “Sir, penenalan ka kenami. Dimini kay kedengan amon mayad kay te kànen. 21 Meneng peg-idegà day diyà te dalan te peg-olì day, mig-okal kay te sako day, aw kinità day se kwarta imbayad te tegsebad-sebad kenami te kànen doton te lanto te trigo didalem te sako. Kidoen se kedakel niyan. Todà day heman inibing amon iolì day. 22 Inibing day den heman se doma kwarta ibayad te kànen. Wedà day ketegahi aw sinu se migsawol te kwarta diyà te sako day kedengan.”

23 Minikagi se sineligan, “Ikà niyo egketetana. Ikà niyo egkelemitan. Se Timanem egseligan niyo aw egseligan te amay niyo, yan besi se migsawol te kwarta diyà te sako niyo. Kininawà ko se imbayad niyo.”

Penga niyan, inibing din si Simeon doton kandan. 24 Impeawop din dan doton te balay i Jose, aw inibing din se wayeg ionaw te benis dan. Impekaen din heman se menge asno dan. 25 Inokal dan se bowang ibegay dan ki Jose te pegdateng din te alas dosi, so inikegiyan dan te komaen dan doma kandin. 26 Peg-olì i Jose, imbegay dan kandin se bowang inibing dan, aw limongken dan lamig minapet se olo dan diyà te tanà. 27 Mig-insà sikandin tepad te pegkesawol dan. Mig-insà heman sikandin, “Mèpiya lay se pegkesawol te amay niyo, sìyan temoay in-indan niyo kanak kedengan? Wedà lay pa sikandin kematay?”

28 Timaba dan, “Sir, wedà pa kematay se amay day, meneng mèpiya pa se pegkesawol din.”

Penga niyan, limongken dan aw migsagman dan kandin.

29 Pegkità i Jose te kedowa din adi si Benjamin, minikagi sikandin, “Sìyan lebò se kedowa niyo temanan adi in-indan niyo kanak kedengan.”

Minikagi heman si Jose diyà ki Benjamin, “Atò, ibeg ko keidowan ka te Timanem.”

30 Penga niyan, agpet migkelag si Jose, so dakel se pedowan din diyà te adi din, aw yan tigkan sikandin nesayo. Dimoton sikandin te tambì din aw migkelag kidoen. 31 Pegkenamay-namay, migdàpog sikandin aw limikò doton te menge kedowa din. Tinemengan din se pedowan din, aw migpelamak te kànen. 32 Tinani se kènanan dan, so sebad se lemisa i Jose, aw sebad se lemisa te menge kedowa din, aw sebad heman se lemisa te menge tege Ehipto kimaen kidoen, so eked keibeg se menge tege Ehipto komaen doma te menge Hebreo, so eglindoan te menge tege Ehipto se menge Hebreo. 33 Impepenenoo i Jose se tegsebad-sebad kedowa din, lekat te kakay dan taman te adi. Pegkità dan te pegtapid din kandan, migpetengtengay dan tandà te kepela dan. 34 Impeibing i Jose se kànen lekat te lemisa din doton te menge kedowa din, meneng lima dobli se kedakel te kànen impeibing din diyà ki Benjamin. Dakel heman se ininem dan, aw neluba dan.