1 Nayan, pegketaga-taga i Jacob te doen kànen doton te Ehipto, minikagi sikandin diyà te menge batà din, “Nengà lay olò kaw eg-ogpà? 2 Doen ekon kànen doton te Ehipto. Doton kaw bayad amon eked kidon kematay te bitil.”

3 Yan nesayo se sempolò kedowa i Jose, menge kakay din, aw dimoton dan te Ehipto amon mayad dan te trigo. 4 Meneng se ontò kedowa i Jose si Benjamin, yan se wedà petekingi i Jacob te menge kedowa din, so nelemitan si Jacob te medaet se kegemakan i Benjamin.

5 Dimoton se menge batà i Jacob te Ehipto sipat te menge doma otaw nengemahà te kànen kidoen, so nebitilan heman se menge tege Canaan. 6 Si Jose se gobirnador kidoen te Ehipto, aw sikandin se nemeligyà te kànen diyà te kedita te otaw lekat te menge doma ogpeanan. Yan pegdateng te menge kedowa i Jose doton te Ehipto, dimoton dan kandin aw limongken dan lamig minapet se olo dan diyà te tanà. 7 Pegkità i Jose te menge kedowa din, pengkey kinilala din dan, meneng migpelingo-lingo sikandin te wedà din dan kilelai. Minikagi sikandin te dakel se kagi din, “Kenan kaw lekat?”

Timaba dan, “Dimini kay lekat te Canaan amon mayad kay te kànen.”

8 Pengkey kinilala i Jose se menge kedowa din, meneng wedà dan kilala te sikandin se kedowa dan adi. 9 Neeneng-enengan din se tegeinep din tepad kandan, aw minikagi sikandin, “Kenà. Dimini kaw amon megsimà kaw te kelomayan day amon domaeg kaw kenami.”

10 Timaba dan, “Sir, kenà iyan benal. Dimini kay amon mayad kay te kànen. 11 Telekedowa se kedita day. Sir, kenà kay egsimà dini, so ontò kay metinuud.”

12 Minikagi si Jose, “Kenà. Dimini kaw amon megsimà kaw te kelomayan day amon domaeg kaw kenami.”

13 Minikagi dan, “Sir, sempolò teg dowa se kedita day telekedowa, aw sebad olò se amay day eg-ogpà doton te Canaan. Nematay se sebad kedowa day, aw mig-ogpà pa se temanan adi doton te amay day.”

14 Meneng minikagi si Jose, “Benal se inikagi ko gina. Dimini kaw amon megsimà kaw kenami. 15 Meneng seini se inangen ko amon ketegahan ko aw benal se inikagi niyo. Pineokit te ngadan te selotan, ipunù ko den te eked kaw palos pekeolì lekat dini singed aw domini se adi niyo. 16 Ipeolì ko se sebad kenyo amon mangay kandin, meneng kelebosowen ko se kedita te doma niyo lamig ketegahan ko aw benal se inikagi niyo. Aw kenà benal se inikagi niyo, yan ketegahan ko te dimini kaw amon megsimà kaw kenami.”

17 Penga niyan, impekeleboso din dan te telo se aldaw. 18 Pegketagkas te telo se aldaw, minikagi si Jose diyà te menge kedowa din, “Egsagman a te Timanem, aw yan eked kaw imetayi aw seini se inangen niyo. 19 Aw ontò kaw metinuud, sebad kenyo se kelebosowen pa dini dalem te peg-olì te menge doma mengibing te kànen doton te menge pamilya niyo nebitilan. 20 Meneng keilangan ibingen niyo dini kanak se kedowa niyo temanan adi amon ketegahan ko te benal se inikagi niyo, aw yan eked kaw imetayi.”

Yan timandù dan kandin. 21 Penga niyan, migpebelaw-belaway dan, “Na, dinetengan kidon den te kelimahan seini tandà te medaet ininang tadon diyà te kedowa tadon kedengan. Pegpengenganay din kenitadon, pengkey kinità tadon se kelimahan din, meneng wedà tadon sikandin penenelani. Yan se doun te dinetengan kidon te kelimahan seini.”

22 Minikagi si Ruben, “Minikagi a diyà kenyo te eked niyo sikandin peelegi, meneng wedà a niyo penenelani. Yan se doun te nelimahan kidon seini tandà te pegkematay din.”

23 Nekelabet si Jose te kedita te inikagi dan, meneng wedà dan iyan ketegahi, so doen telesogpat mig-obad te kagi dan Hebreo diyà ki Jose, aw mig-obad heman te kagi din Ehipto diyà kandan. 24 Penga niyan, nesayo si Jose lekat kandan te wedà kenamay, so migkelag sikandin. Penga niyan, limikò sikandin doton kandan, aw minikagi diyà kandan. Pinemallì din si Simeon, aw impebakwì din sikandin kinità te kedita dan.

25 Doen sineligan insogò i Jose meg-ipenò te sako te kedowa din te trigo. Migpunù heman si Jose kandin te ieles din se kwarta imbayad dan diyà te sako te tegsebad-sebad kandan. Impebegay din heman kandan se kànen dan diyà te dalan. Yan se ininang din diyà kandan. 26 Penga niyan, miglolan dan te sako te trigo diyà te menge ayam-ayam dan asno, aw nesayo dan. 27 Pegkedelem, minapit dan amon midegà. Doen sebad kandan mig-okal te sako din amon ipekaen se asno din, aw kinità din se kwarta diyà didalem te sako imbayad din te trigo. 28 Timawal sikandin diyà te menge kedowa din, “Dini kedì didalem te sako se kwarta imbayad ko te trigo. In-olì besi iyan diyà kanak.”

Pegdineg dan kenyan, ontò migpeso se pedowan dan, aw migpeinsaay dan, “Eden lebò se pelumun te Timanem kenitadon seini?”

29 Peg-olì dan doton te amay dan kidoen te Canaan, in-indan dan diyà kandin se kedita te negemakan dan. 30 Minikagi dan, “Nenompelà se gobirnador te Ehipto kenami, aw minikagi sikandin te dimoton kay amon megsimà aw domaeg kay kandan. 31 Timaba kay te kenà iyan benal, so metinuud kay. 32 Mig-indan kay kandin te sempolò teg dowa se kedita day telekedowa aw sebad olò se amay day. Nematay son day se sebad kedowa day, aw mig-ogpà pa se temanan adi doton te amay day kidoen te Canaan. 33 Meneng minikagi se gobirnador diyà kenami, ‘Seini se inangen ko amon ketegahan ko aw metinuud kaw. Sebad kenyo se kelebosowen pa dini, dalem te peg-olì te menge doma niyo amon mengibing te kànen doton te menge pamilya niyo nebitilan. 34 Ibingi niyo dini kanak se kedowa niyo temanan adi amon ketegahan ko te kenà kaw egsimà, meneng metinuud kaw. Yan ipelowà ko se kedowa niyo, aw mepakay kaw mayad dini te Ehipto.’ ”

35 Penga niyan te peg-awak dan te trigo lekat te menge sako dan, kinità te tegsebad-sebad kandan se kwarta imbayad dan kenyan. Pegkità dan te kwarta, nelemitan si Jacob aw kedita te batà din. 36 Minikagi se amay dan diyà kandan, “Pineokit kenyo, eg-ebaten se kedita te batà ko lekat kanak. Wedad den si Jose, wedad den heman si Simeon, aw ibeg niyo ebaten heman si Benjamin lekat kanak. Ontò a egdetengan te kelimahan.”

37 Minikagi si Ruben diyà te amay din, “Seligi si Benjamin diyà kanak, aw iolì ko sikandin dini kamno. Aw eked ko sikandin keolì, imetayi se dowa batà ko meama.” 38 Meneng minikagi si Jacob, “Eked kepakay diyà kanak aw tomaking si Benjamin kenyo, so nematay se kakay din, aw sikandin olò se nesamà. Ontò a den temoay. Megmeno a aw detengan sikandin te medaet diyà te dalan? Aw matay sikandin, matay a heman tandà te lano ko kandin.”