1 Nayan, seini se ontò ipunù ko. Pemoyò kaw te menge kelidoan niyo diyà te Timanem. Pegtawal-tawal kaw tepad te kedita te otaw, aw pegpesiontong kaw heman diyà kandin tepad te keido din. 2 Pegtawal-tawal kaw tepad te menge selotan aw tepad te kedita te otaw eglowan, amon mèpiya se keogpà tadon dalem te pegtolò tadon te Timanem aw peg-inang tadon te ontò metòlid. 3 Mèpiya aw iling kenyan se pegtawal-tawal tadon, so aw yan se eg-inangen tadon, meluba se Timanem egpelowà kenitadon. 4 Ibeg din kedita te otaw se mekelowà lekat te salà aw metaga-taga heman te kebenalan. 5 Olò sebad se Timanem, aw olò heman sebad se Telekagon diyà te tengà-tengà te Timanem aw otaw, aw yan si Jesu Cristo. 6 Lekat te kandin ibeg, simelilin sikandin kenitadon aw nematay amon ipelowà din se kedita te otaw. Pegdateng te aldaw pinemallì te Timanem, impetaga-taga din pineokit ki Jesu Cristo te doen ibeg din ipelowà se kedita te otaw lekat te salà. 7 Yan se doun te ininang a sogounun i Cristo megtoladà te menge otaw kenà Judiyo, amon metaga-taga dan te keilangan memenal dan te kebenalan. Kenà kebolalaw se eg-ikegiyen ko, meneng kebenalan iyan.

8 Ibeg ko megtawal-tawal se menge meama doton te kedita ogpeanan. Keilangan metòlid se eg-inangen dan. Keilangan eked dan keopal, aw eked dan heman pegdindil.

9 Ibeg ko heman, keilangan doen inenengen te menge bayi tepad te pegdagom dan. Eked dan pegpeduyun, meneng keilangan mèpiya se pegdagom dan. Eked kepakay aw megpekità-kità dan pineokit te pegtigmes te logay dan, aw pineokit te pegpalas dan te bolawan aw pirlas aw dagom meelagà. 10 Meneng keilangan iduyun dan tandà te peg-inang dan te mèpiya, so yan se keilangan inangen te menge bayi eg-ikagi te egtaking dan te Timanem. 11 Keilangan mepenek se menge bayi menenalan te otaw megtoladà. Keilangan tomolò dan te kedita itoladà kandan. 12 Eked kepakay diyà kanak aw bayi se megtoladà aw lomowan diyà te meama. Keilangan olò dan menenalan, 13 so si Adam se monà ininang te Timanem, aw penga niyan si Eva. 14 Kenà si Adam se neekalan i Satanas gebii, meneng bayi se neekalan aw yan limàpang sikandin te punù te Timanem kandan. 15 Meneng aw gayed somalig se menge bayi diyà te Timanem, aw dakel se pedowan dan, aw metòlid se eg-inangen dan, aw eked dan pegpeduyun, doen kelowaan dan pineokit te pegpemetebaw dan.