1 Siak, si Pablo, se simolat kani. Ininang a sogounun i Jesu Cristo pineokit te punù te Timanem egpelowà kenitadon, aw pineokit te punù i Jesu Cristo egpelimanan tadon.

2 Simolat a kamno, Timoteo. Iling ka te ontò batà ko tandà te pegpemenal no ki Cristo.

Ibeg ko, tebangan ka, aw keidowan ka, aw begayan ka te kelinaw te pedowan lekat te Amay tadon Timanem aw Pengolo tadon si Jesu Cristo.

3 Ibeg ko meg-ogpà ka pa doton te Efeso. Yan heman se impunù ko kamno kedengan te pegpesalo ko doton te Masidonya. Peg-ogpà ka pa doton, so doen menge otaw egtoladà te kebolalaw, aw keilangan megsagda ka kandan. 4 Pegpunù ka kandan te keilangan eked dan pemenal te kebolalaw ingkeliwat te menge kemonaan dan, aw keilangan eked dan salig diyà te menge indan-indan tepad te menge monà otaw, so yan se lekatan te dindil. Pineokit kenyan, eked kidon ketaga-taga aw eden se eg-inangen te Timanem, so ketegahan iyan olò pineokit te pegpemenal tadon te Timanem. 5 Yan se ipunù ko amon megpedekelay dan te pedowan. Meneng eked dan pegpedekelay te pedowan singed aw linisan te Timanem se pedowan dan lekat te salà, aw metibok se ibeg dan meg-inang te metòlid, aw melobos se pegpemenal dan te Timanem. 6 Doen menge otaw simoway lekat te pegtaking dan kenyan, aw gayed den dan egpebelaw-belaway te wedad ontong. 7 Pengkey doen ibeg dan meinang menenoladà te menge punù ingkeliwat i Moises, meneng wedà dan pa pekelabet te kedegdagan te eg-ikegiyen dan. Wedà dan ketaga-taga te kebenalan ipegtoladà dan diyà te menge doma otaw.

8 Netegahan tadon ini. Aw metòlid se peggamit tadon te menge punù ingkeliwat i Moises, mèpiya se menge punù sìyan. 9 Netegahan tadon heman te doen punù kenà amon segdahen se otaw meg-inang te metòlid, meneng amon segdahen se menge otaw kenà egtolò, aw otaw metugul, aw otaw kenà egpemasa te Timanem, aw nelegeb te salà, aw eg-inang te medaet, aw egtompuyus te mèpiya, aw otaw egpengimatay te amay aw inay dan, aw otaw egbonò. 10 Doen punù amon segdahen se otaw eglayok te kenà kandan esawa, aw bayot, aw otaw eg-agaw te doma otaw, aw bolelawun, aw otaw egkebolalaw te pegsistigos dan, aw pengkey eden se medaet inangen te otaw kenà egtaking te kebenalan ipegtoladà tadon. 11 Yan se kebenalan tepad te Mèpiya Indan insalig diyà kanak te Timanem metolos aw ipegduyun.

12 Egpesiontong a diyà te Pengolo tadon si Jesu Cristo, so binegayan a din te keseg amon mekebatog a megtoladà. Egpesiontong a diyà kandin so mig-aneng-aneng sikandin te egkeseligan a, aw ininang a din sogounun din. 13 Kedengan te wedà a pa pemenal, migtompuyus a kandin, aw nemilang a te menge sakop din, aw nebensi a kandan. Meneng neidowan a din pa, so peg-inang ko kenyan, wedà a pa pemenal kandin, aw yan wedà ko ketegahi te medaet se ininang ko sìyan. 14 Meneng songkani, ontò a tinebangan te Pengolo, so nemenal a kandin, aw dakel se pedowan ko kandin tandà te pegsebad ko diyà kandin. 15 Benal se eg-ikegiyen seini, aw keilangan ontò tadon pemenalen. Dimini si Jesu Cristo te keneyonan amon megpelowà te otaw lekat te salà sipat siak ontò medaet diyà te kedita te otaw nekesalà. 16 Meneng neidowan a te Timanem, so tod din ipetaga-taga din te ontò medalem se pedowan i Jesu Cristo te pegkeido din kanak, pengkey siak se ontò medaet diyà te kedita te otaw nekesalà. Yan se ininang din amon metaga-taga se kedita te doma otaw memenal kandin te begayan din dan heman te kaling pedowan wedad temanan. 17 Iduyun tadon se Timanem eglowan te wedad temanan. Eked palos sikandin kematay, aw eked heman sikandin kitai. Sebad din se Timanem, aw segmanen aw iduyun sikandin te wedad temanan. Metoman iyan.

18 Nayan, batà ko Timoteo, seini se ipunù ko kamno. Ikà egkelibel te inikagi te menge telekeliwat te kagi te Timanem tepad kamno kedengan. Yan ketebangan ka amon keseligan ka tomoman te impunù kamno, iling te sondalo egkeseligan tepad te eg-inangen din. 19 Yan melobos se pegsalig no diyà te Timanem, aw metibok heman se ibeg no meg-inang te metòlid. Doen menge doma otaw pengkey netegahan dan aw eden se metòlid, meneng wedà dan iyan inangi, aw migkedaet se pegpemenal dan. 20 Iling kenyan se neinang i Himeneo aw si Alejandro. Impebayà-bayà ko dan ki Satanas amon ketoledaan dan te eked kepakay se pegtompuyus dan te Timanem.