1 Tavástaraꞌ, huánamuaj nyaj quee tyiꞌtɨ́j jɨn áꞌɨtzeereꞌ,

pajta aꞌyan huárɨnyij jeꞌej nyaj tyíꞌmuahuaviij,

tyámuaꞌ tyuꞌnamuaj jeꞌej nyaj aꞌ jimi tyáꞌhuoo,

jiꞌnye capu tyenyij jitze éejnyinyii tɨ tyíꞌhueꞌtacaa.

2 ¡Cheꞌ muéetzij jimi joꞌvéꞌmeꞌen ɨ maj jɨn náꞌxɨjtyeꞌen

jiꞌnye muáaj paj jamuaꞌreej jeꞌej tɨ tyíꞌxaꞌpuɨꞌɨn!

3 Muáaj paj períj jamuaꞌreej jeꞌej nyaj tyíꞌmuaꞌtzej,

tɨ́caꞌ paj mujoꞌvéꞌmej pej pij náachaꞌɨɨn,

tyámuaꞌ paj períj huápuɨꞌɨj naa tyinaatyéesej,

pajta quee tyiꞌtɨ́j huátyoj tɨ jeꞌej puaꞌaj een.

Canu tyiꞌtɨ́j huataxájtacaꞌ tɨ quee aꞌyan tyiꞌjaꞌyájnatacaꞌaj,

4 aꞌyájna matɨꞌɨj ɨ séecan rɨcɨj,

nuꞌríj ajtáraa aꞌɨ́ɨjma jimi ɨ maj jéehua junyoꞌsiꞌtyeꞌ,

aꞌyájna patɨꞌɨj muáaj tyuꞌtaꞌíjtacaꞌ aꞌnyúucaa jitze.

5 Tyámuaꞌ nu naa tyuꞌméj aꞌ juyéj jitze,

canu aꞌnáj ajtáraa aꞌɨ́jcɨ jitze aꞌnyúucaa ɨ paj jɨn tyuꞌtaꞌíjtacaꞌ.

6 Dios, muéetzij nu jimi huatyényuusij,

jiꞌnye muáaj paj nyanamuaj,

pataꞌaj náanamuaj, huánamuaj jeꞌej nyaj tyíꞌxaj.

7 Tyámuaꞌ paj naa tyinaataséjratyeꞌen ɨ paj jɨn nyaxɨeꞌveꞌ,

muáaj, ɨ paj huaꞌ japua huatányuusij aꞌɨ́ɨjma jimi ɨ maj huaꞌajchaꞌɨɨreꞌ

aꞌɨ́ɨmaj ɨ maj jahuoo paj aꞌɨ́jna jɨn huoꞌtyáhuɨɨreꞌen ɨ paj néijmiꞌi jɨn putyíꞌuurej.

8 Aꞌyaa paj tyináachaꞌɨɨn tɨꞌɨj aꞌyóoj paj huápuɨꞌɨj jaxɨeꞌveꞌ,

micheꞌ aꞌɨ́ɨmaj tyámuaꞌ tyináachaꞌɨɨn ɨ maj aꞌ jimi tyíꞌhuɨɨreꞌ

9 aꞌɨ́ɨjma jimi ɨ maj nyéetzij nyenyoꞌsiꞌtyeꞌej,

¡ɨ maj nyéjchaꞌɨɨreꞌ majta tyíꞌtyacuiꞌcaa aꞌɨ́ɨ mu meríj nyajná!

10 Aꞌɨ́ɨ mu óotzaahuatyeꞌ, majta tyíꞌxaj mahuaꞌxáahuataj ɨ séecan,

11 aꞌɨ́ɨ mu véjriꞌ nyacújtaꞌ naavájraj

aꞌyaa mu tyeꞌejchóꞌveꞌ mej mij nɨeꞌtárɨeenyij aꞌ chóotaꞌ.

12 Aꞌyaa mu huaséꞌrin matɨꞌɨj ɨ muajyéj, muajyéj maj huápuɨꞌɨj nyinyuꞌcacuj

aꞌáa mu mij tyámuaꞌ jéꞌeen joꞌmaj jóoꞌavaꞌtacaa

majta huápuɨꞌɨj aꞌɨ́jna jɨn tyiꞌijchóꞌveꞌ mej mij ootátzunaxɨꞌɨn.

13 Ájchesij, Tavástaraꞌ, ¡pataꞌaj huoꞌtanyóꞌsiꞌtyeꞌen aꞌɨ́ɨjma!

¡Aꞌyaa paj huóꞌuurej mej mij tyítunutaxɨꞌɨn!

Aꞌ chúun jɨmeꞌ, aꞌɨ́j paj jɨn nyajapuáj huatányuunyij aꞌɨ́jcɨ jimi ɨ tɨ jeꞌej puaꞌaj tyiꞌtyúuchaꞌɨj,

14 aꞌɨ́jna ɨ paj jɨn néijmiꞌi putyíꞌuurej, Tavástaraꞌ, aꞌɨ́j paj jɨn nyajapuáj huatányuunyij,

¡huiꞌrájhuaꞌxɨj aꞌíjcɨ jitze ɨ cháanacaj,

ɨ maj jitzán jahuoo ɨ tɨ tyihuáꞌcɨꞌtyij!

Tyuꞌtáꞌ mej mij aꞌɨ́ɨmaj huoochíjtyaanyiꞌtaj,

mej mij ɨ huaꞌyojmuaꞌ tyúꞌcuaꞌnyij ꞌasta manaꞌaj quee jóꞌvetyij,

ajta tɨꞌij aꞌyan ajta tyáꞌraꞌnyij aꞌɨ́ɨjma jimi ɨ huaꞌ yaaxújmuaꞌ.

15 Ajta aꞌyan tyiꞌjɨꞌréꞌcan jɨmeꞌ, nyej nyáaj nyaxáahuaj séeriaꞌaj naꞌmej

aꞌɨ́jcɨ jɨmeꞌ nyaj aꞌ nyéerimij huaséj,

¡nyaj muéetzij jimi séjreꞌej nyatɨꞌɨjta huájɨstij!