1 ¡Nyéetzij náachaꞌɨj, Dios, jiꞌnye muéetzij nu jimi jahuoo pej pij naatyáhuɨɨreꞌen!

2 Nyáaj nu aꞌyan tyimuaatéꞌexaaj tɨjɨn:

“Muáaj paj nyavástaraꞌ puéꞌeen, ɨ tɨ néijmiꞌi nye jimi tyámuaꞌ tyíꞌuurej,

capu tyiꞌtɨ́j ajtáhuaꞌaj séejreꞌ tɨ aꞌyan een patɨꞌɨj muáaj.”

3 Aꞌɨ́ɨmaj ɨ huaꞌ dioosijtyamuaꞌ jéehua mu uhuájcaꞌnyej,

aꞌyaa mu tyíꞌxaj aꞌɨ́ɨmaj ɨ maj huaꞌ jimi tyáꞌtzaahuatyeꞌ,

4 aꞌɨ́ɨmaj ɨ maj huaꞌ muiꞌrej ɨ jusáanturistyamuaꞌ

majta jéehua huaꞌ jitze tyíꞌcaꞌnyej.

¡Canu aꞌnáj tyiꞌtɨ́j aꞌyan uuren matɨꞌɨj aꞌɨ́ɨmaj rɨcɨj ɨ xúureꞌej jɨmeꞌ!

¡Canu aꞌnáj huoꞌtaxájta jeꞌej maj aꞌɨ́ɨmaj ántyaꞌruj!

5 Muáaj, Tavástaraꞌ, muéetzij jimi nu néijmiꞌi tyíꞌijchaꞌɨj,

muáaj paj néijmiꞌi jɨn tyámuaꞌ tyinaatyátoosij,

nyajúuricamej nu muéetzij jimi jaatyátoosij.

6 Aꞌɨ́j nu tyuꞌmuéꞌtɨj aꞌáa tɨ tyejéꞌsejreꞌ joꞌtɨj huápuɨꞌɨj naa tyojoꞌséꞌrin,

¡naa pu tyuꞌséꞌrin aꞌɨ́jna ɨ nyéetzij tɨ tyinaacɨ́ꞌɨj!

7 Nyetyaatatyójtziꞌreꞌej ɨ Tavástaraꞌ, jiꞌnye aꞌɨ́ɨ pu tyámuaꞌ tyinuꞌcájuyetyej,

ajta néijmiꞌqueꞌ ɨ nyatzájtaꞌ aꞌɨ́ɨ pu tɨ́caꞌ tyámuaꞌ tyinuꞌcámuaꞌriityee.

8 Aꞌnáj tɨnaꞌaj nu tyámuaꞌ tyáꞌmuaꞌreej tɨ ɨ Tavástaraꞌ nye jimi yésejreꞌ,

aꞌɨ́ɨ pu nyamuácaꞌtaꞌ pujmuaꞌ séejreꞌ, canu nyij tyiꞌtɨ́j jɨn ootyáꞌɨtzeereꞌej.

9 Aꞌɨ́j pu jɨn, ɨ nyatzájtaꞌ,

jéehua pu ɨ nyaxɨéjnyuꞌcaa jutyamuaꞌveꞌ.

Néijmiꞌi pu ɨ nye tyévij juxáahuaj séeriaꞌaj jaꞌmej,

10 jiꞌnye capáj tyuꞌtáꞌsij nyaj aꞌáa jaꞌséeriaꞌaj náꞌraꞌnyij joꞌmaj tyityajáꞌavaꞌtacaa,

¡capáj tyuꞌtáꞌsij tɨ aꞌɨ́jna ɨ tɨ tyámuaꞌ aꞌ jimi tyíꞌsejreꞌ huatyéjpetyej joꞌtɨj jaꞌtyácun!

11 Panaataséjratyeꞌsij ɨ juyéj tɨ jitzán séejreꞌ ɨ júuricamej.

Jéehua pu tyámuaꞌviꞌraꞌaj séejreꞌ aꞌájna joꞌpaj muáaj jáꞌsejreꞌ,

tyámuaꞌ pu jusén jɨmeꞌ tyíꞌeen muéetzij jimi.