1 Yaa Yawe Yɛnŋɛlɛ li sɔnni!

Ye yurugo fɔnŋgɔ kɔ Yawe Yɛnŋɛlɛ li kan,

ye yurugo shɔ yeli sɔn wa mbele pè pe yɛɛ kan li yeri pe gbogolomɔ woolo pe sɔgɔwɔ!

2  Izirayɛli woolo, yaa yɔgɔri ye dafɔ wi kala na,

Siyɔn ca woolo, ye yin yɔgɔrimɔ ni ye wunlunaŋa wi kala na!

3 Yaa wi mɛgɛ ki sɔnni yɔrɔ ni,

yaa yuuro koo yaa wi sɔnni, yaa pimbigile naa juruye gbɔɔn!

4 Katugu Yawe Yɛnŋɛlɛ li woolo pe yɛn mali ndanla,

li maa mbele pè pe yɛɛ tirige pe jate mbe pe shɔ.

5 Mbele pè pe yɛɛ kan Yawe Yɛnŋɛlɛ li yeri, paa yɔgɔri li gbɔgɔwɔ pi kala na;

paa jɔrɔgi yɔgɔrimɔ ni, ali mbe pe ta wa pe sinlɛyaara ti na!

6 Yɛnŋɛlɛ li sɔnmɔ yuuro to mbe pye wa pe yɔn,

tokobi yɔn shyɛn taan woo mbe pye wa pe kɛɛ;

7 jaŋgo mbe kayaŋga wɔ cɛngɛlɛ sanŋgala ke ni,

mbe jɔlɔgɔ wa cɛngɛlɛ ke na;

8 mbe pe wunlumbolo pe pɔ yɔngɔwɔ ni,

mbe pe fanŋga fɛnnɛ pe le tugurɔn ŋgbɛɛrɛ na!

9 Kiti kɔngɔ ŋga kìla yɔnlɔgɔ pe mɛgɛ ni, mbe ki kiti wi kɔn pe na mbe yala ki ni!

Ko yaa gbɔgɔwɔ kan mbele fuun pè pe yɛɛ kan li yeri pe yeri.

Yaa Yawe Yɛnŋɛlɛ li sɔnni!