1 Yaa Yawe Yɛnŋɛlɛ li sɔnni!

Yoro naayeri yaara, yaa Yawe Yɛnŋɛlɛ li sɔnni,

yaa li sɔnni wa naayeri lara ti ni!

2 Yoro mbele li mɛrɛgɛye, ye ni fuun yaa li sɔnni!

Yoro naayeri maliŋgbɔɔnlɔ ŋgbeleye† 148.2: Mɛrɛgɛye poro pe yɛn naayeri maliŋgbɔɔnlɔ ŋgbeleye ye. ye ni fuun, yaa Yawe Yɛnŋɛlɛ li sɔnni!

3 Yɔnlɔ naa yeŋge, yaa li sɔnni!

Yoro wɔnŋgɔlɔ ŋgele fuun ke maa yiin, yaa li sɔnni!

4 Naayeri lara to naayeri, yaa li sɔnni!

Tɔnmɔ mba pi yɛn wa naayeri wi go na, pila li sɔnni!

5 Ki yaara ti ni fuun tila Yawe Yɛnŋɛlɛ li sɔnni!

Katugu làa para ma konɔ kan, a ki yaara tì si da.

6 Lìri tɛgɛ ti tɛgɛsaga, ti koro wa fɔ sanga pyew,

lì kondɛgɛlɛ tɛgɛ ti go na, na li se ya kanŋga.

7 Yoro tara na yaara, yaa Yawe Yɛnŋɛlɛ li sɔnni!

Kɔgɔje nawa yaritugbɔɔrɔ, naa tɔnŋgbɔɔ tijuguwo pi ni, yaa li sɔnni,

8 Yɛnŋɛlɛ yɛngɛlɛmɛ naa sinndɛɛrɛ tisaga ki ni, naa nɛzhi wi ni, naa fɔɔngɔ ki ni,

konaa tisaga tifɛlɛgɛ ki ni, ko ŋga ki maa tanri li sɛnrɛ ti na we!

9 Yaa li sɔnni, yoro yanwira konaa tinndiye pe ni fuun,

naa tire nda ti maa pire sɛni konaa sɛdiri tire ti ni fuun ti ni,

10 naa woŋgaala konaa yaayoro ti ni,

naa yaara nda ti maa fulolo lara na konaa sannjɛrɛ ti ni!

11 Yaa li sɔnni, yoro dunruya wunlumbolo naa cɛngɛlɛ ke ni fuun,

naa fanŋga fɛnnɛ konaa dunruya kiti kɔnfɛnnɛ pe ni fuun,

12 naa lefɔnmbɔlɔ konaa sumbonɔ pe ni,

naa lelɛɛlɛ konaa piile pe ni!

13 Pe ni fuun paa Yawe Yɛnŋɛlɛ li mɛgɛ ki sɔnni,

katugu lo nuŋgba mɛgɛ ko ki yɛn ma gbɔgɔ,

li yawa pi yɛn naayeri wo naa tara ti go na!

14 Lì fanŋga le li woolo pe ni,

jaŋgo mbele pè pe yɛɛ kan li yeri, paa li sɔnni,

konaa Izirayɛli woolo pe ni, poro mbele pe yɛn cɛnlɛ na li wogo ki yɛn ma ŋgban li ni we.

Yaa Yawe Yɛnŋɛlɛ li sɔnni!