Bibulu Jinmiire ni YUURO 106

106

Izirayɛli woolo
pe sɛnrɛ mbalogowo
konaa Yɛnŋɛlɛ
li kagbaraga pyege

1 Yaa Yawe Yɛnŋɛlɛ li shari yaa li sɔnni,

katugu li yɛn ma yɔn;

li kagbaraga ki yɛn wa fɔ sanga pyew†.

2 Ambɔ wi mbe ya mbe Yawe Yɛnŋɛlɛ li kagbɔgɔlɔ ke yɛgɛ yo?

Ambɔ wi mbe ya mbeli sɔnmɔ kagala ke ni fuun ke yɛgɛ yo?

3 Mbele pe maa tanri kaselege ki na, konaa mbele pe maa kasinŋge piin,

fɛrɛwɛ yɛn pe woo!

4 Yawe Yɛnŋɛlɛ, na ma kaa kagbaraga piin ma woolo pe kan sanga ŋa ni, ma jatere pye na na;

ma kaa pe shoo sanga ŋa ni, mala shɔ fun,

5 jaŋgo ma woolo mbele mà wɔ, mbe pe yan pe yɛn na fɛrɛwɛ taa,

na yɔlɔgɔ ki yiri caw ma kɔrɔgɔ woolo pe sɔgɔwɔ.

6 Wè kapere pye paa we tɛlɛye pe yɛn,

we kajɔgɔrɔ pye, ma tipere pye.

7 Ma we tɛlɛye pe ta wa Ezhipiti tara, pe sila ma kafɔnŋgɔlɔ ke kɔrɔ jɛn,

kajɛŋgɛ lɛgɛrɛ ŋga màa pye pe kan, pe sila nawa to ki na,

pàa yiri ma je wa kɔgɔje wi tanla, wa Kɔgɔje yɛɛn wi tanla†.

8 Ɛɛn fɔ làa pe shɔ li yɛɛra mɛgɛ ko kala na,

mbe ta mbeli yawa pi naga.

9 Làa para ŋgbanga Kɔgɔje yɛɛn wi na, a wì waga le ki yɔngɔlɔ nuŋgba ke ni,

a lì si ti li woolo pè tanga ma toro wa lawege ki ni

ndɛɛ pe yɛn na tanri na toro wa gbinri wi ni†.

10 Làa pe shɔ pe mbɛnfɛnnɛ pe yeri,

ma pe tile ma pe shɔ pe juguye pe kɛɛ.

11 Tɔnmɔ pìla pe winfɛnnɛ pe li,

ali lere nuŋgba wo sila shɔ mbe to pe ni.

12 Kona, a pè si taga Yɛnŋɛlɛ li sɛnrɛ ti na,

ma yuuro kɔ mali sɔn†.

13 Ɛɛn fɔ sanni jɛnri, a pè si fɛgɛ li kapyegele ke na,

pe sila ya mbege kun pe yɛɛ ni, mbe kagala ŋgele lì kɔn mbe pye ke sige,

mbe ke kɔsaga ki yan.

14 Ma pe ta wa gbinri wi ni, jogo pege la yiri pe ni,

ma pe ta wa wasege ŋga tɔnmɔ woro wa ki ni, pàa Yɛnŋɛlɛ li wa ma wele.

15 A Yɛnŋɛlɛ lì si yaraga ŋga pàa yɛnri ki kan pe yeri,

ɛɛn fɔ ko puŋgo na, a lì si yambewe wa pe na†.

16 Ma pe ta wa paara yinrɛ cɛnsaga ki ni, pàa pye na yenjaga piin Moyisi wi ni,

konaa Arɔn wi ni, wo ŋa wìla pye kpoyi Yawe Yɛnŋɛlɛ li kan we.

17 Kona, a tara tì si jɛnw ma Datan wi yɔli,

tìla Abiramu naa wi pinlɛyɛɛnlɛ pe tɔn.

18 Kasɔn kìla pe gbogolomɔ woolo pe sogo,

kasɔn yinnɛ làa poro kapere pyefɛnnɛ pe sogo†.

19 Pàa napige yanlɛgɛ gbegele pe yɛɛ kan wa Horɛbu yanwiga ki tanla,

ki yarisunŋgo ŋga pàa tugurɔn yan maga gbegele,

pàa pye na fɔli ki yɛgɛ sɔgɔwɔ naga gbogo.

20 Pàa nɛgɛ yanlɛgɛ gbegele, ko ŋga ki maa yan kaa,

ma ko tɛgɛ wa Yɛnŋɛlɛ na li yɛn pe gbɔgɔwɔ li yɔnlɔ.

21 Pàa fɛgɛ Yɛnŋɛlɛ li na, pe Shɔfɔ we,

lo na làa kagbɔgɔlɔ pye wa Ezhipiti tara we;

22 lo na làa kafɔnŋgɔlɔ pye wa to nda Kamu tara ti ni,

konaa ma kagbɔgɔlɔ fyɛrɛ wogolo pye wa Kɔgɔje yɛɛn wi ni we.

23 Làa para ma yo li yaa pe tɔngɔ,

kaawɔ Moyisi wo nuŋgba, wo ŋa làa wɔ we;

wo wìla yiri ma yere lo naa poro ni pe sɔgɔwɔ,

jaŋgo mbeli naŋgbanwa gbɔɔ pi sogo li na, liga ka ta mbe pe tɔngɔ.

24 Pàa ki tara tiyɔnrɔ ti kala li tifaga,

katugu pe sila taga Yɛnŋɛlɛ li sɛnrɛ ti na.

25 Pàa pye na kɔngɔri wa pe paara yinrɛ ti ni,

pe sila logo Yawe Yɛnŋɛlɛ li yeri.

26 Kona, a Yɛnŋɛlɛ lì si kɛɛ yirige ma wugu pe kan,

ma yo li yaa ti pe ku wa gbinri wi ni†,

27 mbe ti pe setirige piile pe jaraga pe kari tara sannda pyew ti ni,

mbe ti pe ku wa cɛngɛlɛ sanŋgala ke sɔgɔwɔ†.

28 Ko puŋgo na, pàa pe yɛɛ kan na yarisunŋgo Baali Pewɔri ki gbogo,

saara nda pàa pye na woo kuulo yeri, pàa pye nari kaa.

29 Pàa Yɛnŋɛlɛ li nawa ŋgban pe kapyere ti ni,

kì pye ma, a yambewe pà si to pe na.

30 Ɛɛn fɔ Fineyasi wìla pye wa, a wo si yiri maga kala li yɛgɛ wɔ,

a yambewe pì si yere.

31 A Yɛnŋɛlɛ lì suu jate lesinŋɛ ki kapyege ki kala na,

sanga pyew fɔ tetete†.

32 Pàa Yawe Yɛnŋɛlɛ li nawa ŋgban fun wa Meriba tɔnmɔ lara ti ni,

ma ti a Moyisi wi jɔlɔgɔ ta pe kala na;

33 katugu pàa Moyisi wi jatere wi piri wi na,

maga kan a wì para wii jatere pye†.

34 Cɛngɛlɛ ŋgele Yawe Yɛnŋɛlɛ làa yo pe ke tɔngɔ,

pe sila ke tɔngɔ paa yɛgɛ ŋga na làa ki yo we.

35 Pàa pe yɛɛ pinlɛ ki cɛngɛlɛ sanŋgala ke ni,

ma pe kapyere ti fɔrɔgɔ nari piin.

36 Pàa pye na ki woolo pe yarisunndo ti gbogo,

a tì pye pɛnɛ ma pe yigi†.

37 Pàa pe pinambiile naa pe sumborombiile pe wɔ saraga

ma pe kan gboshugulo yeri†.

38 Pàa leele mbele pàa pye jɛrɛgisaga fu pe gbo,

ko kɔrɔ wo yɛn pàa pe pinambiile naa pe sumborombiile pe gbo,

ma pe wɔ saraga ma pe kan Kana tara yarisunndo ti yeri;

a ki legbogo ki tara ti tɛgɛ fyɔngɔ ni†.

39 Pe kapyere tìla pe tɛgɛ fyɔngɔ ni,

pe kapyere ti kala na, pè pye kalikalawa pyefɛnnɛ.

40 Kona, Yawe Yɛnŋɛlɛ li naŋgbanwa pì si yiri li woolo pe kɔrɔgɔ paa kasɔn yɛn,

poro mbele li woolo, a pè sili mbɛn.

41 Làa pe le cɛngɛlɛ kele yɛgɛ kɛɛ,

pe mbɛnfɛnnɛ pàa cɛn pe go na.

42 Pe juguye pàa pe jɔlɔ,

a pè go sogo pe juguye pe nɔgɔ.

43 Wagati lɛgɛrɛ na Yɛnŋɛlɛ làa pe shɔ,

ɛɛn fɔ pàa pe yɛɛ pye leele mbele pè yiri ma je,

na ka tari pe kajɔgɔrɔ ti na, na kee yɛgɛ.

44 Ɛɛn fɔ pàa pye na gbelege ŋga gbele nali yinri, naa làa kaa ki logo,

a lì si pe jɔlɔgɔ ki wele maga yan.

45 Làa li jatere wi tɛgɛ li yɔn finliwɛ pi na pe kanŋgɔlɔ,

ma pe yinriwɛ ta li kagbaraga gbɔgɔ ki kala na.

46 Mbele fuun pàa pe yigi kulolo ma kari pe ni, làa ti, a pe yinriwɛ ki woolo pe ta†.

47 E, Yawe Yɛnŋɛlɛ, we Yɛnŋɛlɛ, we shɔ!

We yirige wa cɛngɛlɛ sanŋgala ke sɔgɔwɔ ma we gbogolo,

jaŋgo waa ma shari waa ma sɔnni ma mɛgɛ kpoyi ki kala na;

konaa we yɛɛ gbɔgɔwɔ pi go ko mbe pye mbaa ma sɔnni.

48 Sɔnmɔ yɛn Yawe Yɛnŋɛlɛ, Izirayɛli woolo Yɛnŋɛlɛ li woo sanga pyew fɔ tetete!

Leele pe ni fuun pege yo fɔ: «Anmiina†.»

Yaa Yawe Yɛnŋɛlɛ li sɔnni!

†106:1 106.1: 1 Kuro 16.34; 2 Kuro 5.13; Ɛsidi 3.11; Yuuro 105; 107.1; 118.1; 136.1; Zhere 33.11

†106:7 106.7: Ɛki 14.10-12

†106:9 106.9-12: Ɛki 14.21-31

†106:12 106.12: Ɛki 15.1-21

†106:15 106.14-15: Nɔmbu 11.4-34

†106:18 106.16-18: Nɔmbu 16.1-35

†106:26 106.24-26: Nɔmbu 14.1-35

†106:27 106.27: Levi 26.33

†106:31 106.28-31: Nɔmbu 25.1-13

†106:33 106.32-33: Nɔmbu 20.2-13

†106:36 106.36: Kiti 2.1-3; 3.5-6

†106:37 106.37: 2 Wunlu 17.17

†106:38 106.38: Nɔmbu 35.33

†106:46 106.40-46: Kiti 2.14-18

†106:48 106.47-48: 1 Kuro 16.35-36