105
Yɛnŋɛlɛ li yɛn sɛnrɛ nuŋgba yofɔ
li yɔn finliwɛ pi kanŋgɔlɔ
li yɔn finliwɛ pi kanŋgɔlɔ
(1 Kuro 16.8-22)
1 Yaa Yawe Yɛnŋɛlɛ li sɔnni, yaa li mɛgɛ ki yinri!
Yaa li kagbɔgɔlɔ pyewe pi sɛnrɛ yuun cɛngɛlɛ sanŋgala ke sɔgɔwɔ!
2 Yaa yuuro koo li kan, yaa sɔnmɔ yuuro koo yaa li gbogo;
yaa li kagbɔgɔlɔ ke ni fuun ke yari!
3 Yaa ye yɛɛ gbogo li mɛgɛ kpoyi ki kala na,
mbele fuun pe yɛn na Yawe Yɛnŋɛlɛ li lagajaa, paa yɔgɔri!
4 Yaa wele Yawe Yɛnŋɛlɛ lo yeri, yaa li fanŋga ki lagajaa,
yaa li lagajaa sanga pyew!
5 Yaa ye yɛɛ nawa tuun kajɛŋgɛ kagbɔgɔlɔ ŋgele lì pye ke na,
yaa ye yɛɛ nawa tuun li kafɔnŋgɔlɔ naa li kiti kɔnkagala ke na,
6 yoro Abirahamu setirige piile, yoro mbele li tunmbyeele wele,
yoro Zhakɔbu setirige piile, yoro mbele lì wɔ we!
7 Lo li yɛn Yawe Yɛnŋɛlɛ, we Yɛnŋɛlɛ le.
Lo li yɛn fanŋga ki na tara ti lagapyew ki ni.
8 Li jatere wi yɛn li yɔn finliwɛ pi na sanga pyew,
li sɛnrɛ nda lì kan setirige piile yirisaga lɛgɛrɛ yeri we.
9 Làa ki yɔn finliwɛ pi le Abirahamu wi ni,
ma wugu pi wogo na ma Izaki wi kan† 105.9: Zhenɛ 12.7; 17.8; 26.3.
10 Làa ki yɔn finliwɛ pi gbegele maa le naa Zhakɔbu wi ni, maa pye kondɛgɛlɛ wi kan,
maa pye yɔn finliwɛ mbakɔɔ wo ŋa Izirayɛli wi kan.
11 Làa yo fɔ: «Mi yaa Kana tara ti kan ye yeri,
ti yaa pye ye kɔrɔgɔ ŋga ki kan ye yeri† 105.10-11: Zhenɛ 28.13.»
12 Ki wagati wi ni, pàa pye jɛgɛlɛ, pe sila lɛgɛ,
pàa pye nambanmbala ma cɛn wa tara ti ni.
13 Pàa pye na yanri cɛngɛlɛ ke sɔgɔwɔ na toro,
pe ma yiri wunluwɔ tara ta ni mbe kari ta ni.
14 Ɛɛn fɔ Yɛnŋɛlɛ li sila yere ki na lere wa mbege kan pe na mbe pe jɔlɔ,
làa para wunlumbolo pele na pe kala na.
15 Làa pe pye fɔ: «Mbele mì wɔ na yɛɛ kan, yaga ka jiri pe na,
yaga ka kapege pye na yɔn sɛnrɛ yofɛnnɛ pe na† 105.15: Zhenɛ 20.3-7.»
16 Làa fuŋgo wa wa tara ti ni,
a yarilire tì kɔ leele pe yeri pew† 105.16: Zhenɛ 41.53-57.
17 Làa lere wa torogo wa pe yɛgɛ,
wo wi yɛn Zhozɛfu we, wo ŋa pàa pɛrɛ, a wì pye kulo† 105.17: Zhenɛ 37.28; 45.5.
18 Pàa wi tɔɔrɔ ti pɔ yɔngɔwɔ ni,
ma tugurɔn ŋgbɛɛrɛ le wa wi yɔlɔgɔ,
19 fɔ ma saa gbɔn pilige ŋga ni sɛnrɛ nda wìla yo, a tì saa ti yɛɛ yɔn fili;
a Yawe Yɛnŋɛlɛ li sɛnrɛ tì tanga kan wi yeri† 105.18-19: Zhenɛ 39.20–40.23.
20 Kì pye ma, a wunlunaŋa wì si konɔ kan ma yo poo wa,
wo ŋa tara ti kundigi wì sho fɔ poo wɔ wa kaso† 105.20: Zhenɛ 41.14.
21 A wunlunaŋa wì suu tɛgɛ to wi go ki go na,
maa tɛgɛ wi kɛɛ yaara ti ni fuun ti go na† 105.21: Zhenɛ 41.39-41;
22 jaŋgo wila wunlunaŋa wi legbɔɔlɔ pe nari, mbe yala wi yɛɛra nandanwa kala li ni,
wila lelɛɛlɛ pe nari kajɛnmɛ ni.
23 Ko puŋgo na, a Izirayɛli wì si kari wa Ezhipiti tara,
wo ŋa Zhakɔbu, a wì si saa cɛn wa to nda ti yɛn Kamu tara ti ni† 105.23: Zhenɛ 46.6; 47.11. Ezhipiti tara to pe maa yinri fun Kamu tara..
24 Yɛnŋɛlɛ làa ti, a li woolo pè se ma lɛgɛ fɔ jɛŋgɛ,
mɛɛ fanŋga kan pe yeri ma wɛ pe juguye pe na.
25 Puŋgo na, a lì si kaa Ezhipiti tara fɛnnɛ pe jatere wi kanŋga pe na,
ma ti a Yɛnŋɛlɛ li woolo pe kala li pe mbɛn;
a paa poro mbele Yɛnŋɛlɛ li tunmbyeele pe java† 105.25: Ɛki 1.7-14.
26 Kona, a lì sili tunmbyee Moyisi wi tun wa pe yeri,
konaa Arɔn ni, wo ŋa làa wɔ we† 105.26: Ɛki 3.1–4.17.
27 Pàa kacɛn kagbɔgɔlɔ pye Yɛnŋɛlɛ li fanŋga na wa Ezhipiti tara fɛnnɛ pe sɔgɔwɔ,
ma kafɔnŋgɔlɔ pye wa to nda ti yɛn Kamu tara ti ni.
28 Yɛnŋɛlɛ làa diwi wi leŋge wa tara ti ni, a diwi wì ye tara ti lagapyew ki ni;
lere kpɛ sila je li sɛnrɛ ti na† 105.28: Ɛki 10.21-23.
29 Làa pe lɔrɔ tɔnmɔ pi kanŋga kasanwa,
ma pe ŋgbanra ti gbo† 105.29: Ɛki 7.17-21.
30 Pe tara tìla yin ŋgbeye pe ni lagapyew,
fɔ ma saa ye wa pe wunlumbolo pe wɔnlɔ yinrɛ ti ni† 105.30: Ɛki 7.26–8.1.
31 Yɛnŋɛlɛ làa para, a nakɔɔnrɔ nda ti yɛn shɔnrɔ ni to naa namara pan,
ma tara ti tɔn lagapyew† 105.31: Ɛki 8.12-13,16-20.
32 Làa ti, a sinndɛɛrɛ tisaga pan tisaga jɛŋgɛ ki yɔnlɔ,
ma ti a yɛnŋɛlɛ gbanlaga kasɔn ki to wa tara ti ni.
33 Làa pe ɛrɛzɛn tiire naa figiye tire ti jɔgɔ,
ma pe tara tire ti kaari kaari† 105.32-33: Ɛki 9.22-25.
34 Làa para, a kambɛɛrɛ pan,
a gbatɔ lɛgɛrɛ pan, ŋa wi saa ya mbe jiri;
35 tìla pe tara yan ki ni fuun ki ka,
ma pe tara yarilire ti ka pew† 105.34-35: Ɛki 10.12-15.
36 Làa pe pinambiile koŋgbanmbala pe ni fuun pe gbo,
poro mbele pàa pye pe fanŋga ki ni fuun ki yaraga koŋgbanŋga ye† 105.36: Ɛki 12.29.
37 Làa ti, a li woolo pè yiri wa Ezhipiti tara warifuwe naa tɛ ni,
pe cɛngɛlɛ ke ni, wa kpɛ sila te mbe koro puŋgo na.
38 Pe yinriwɛ wa tara ti ni kìla yɔgɔrimɔ kan Ezhipiti tara fɛnnɛ pe yeri,
katugu pe kala làa sunndo kɔngɔ wa Ezhipiti tara fɛnnɛ pe na† 105.37-38: Ɛki 12.33-36.
39 Yɛnŋɛlɛ làa kambaaga yirige ma li woolo pe tɔn,
ma kasɔn mu na yanwa yinrigi pe kan† 105.39: Ɛki 13.21-22.
40 Pàa li yɛnri kara ni, a lì si siriŋgbangala torogo pe kan,
ma yaakara kan pe yeri ma yiri wa yɛnŋɛlɛ na, a pè ka ma tin† 105.40: Ɛki 16.2-15.
41 Làa walaga ki yɔn yɛngɛ, a tɔnmɔ pì yiri na fuun,
pìla yiri na fuun paa gbaan yɛn wa gbinri† 105.41: Ɛki 17.1-7; Nɔmbu 20.2-13 wi ni.
42 Katugu li jatere wìla pye li sɛnrɛ kpoyi nda làa yo ti na,
konaa li tunmbyee Abirahamu wi na.
43 Làa li woolo pe yirige wa tara ti ni yɔgɔrimɔ ni,
poro mbele li woolo làa pe yirige nayinmɛ gbɔɔ ni.
44 Làa cɛngɛlɛ kele yɛgɛ tara kan pe yeri,
ma leele pele yɛgɛ kɛɛ tunŋgo tɔnli kan pe yeri† 105.44: Zhozu 11.16-23,
45 jaŋgo paa tanri li kondɛgɛŋgɛlɛ ke na
konaa pe lasiri sɛnrɛ ti lɛ paa tanri ti na.
Yaa Yawe Yɛnŋɛlɛ li sɔnni!
†105:9 105.9: Zhenɛ 12.7; 17.8; 26.3
†105:11 105.10-11: Zhenɛ 28.13
†105:15 105.15: Zhenɛ 20.3-7
†105:16 105.16: Zhenɛ 41.53-57
†105:17 105.17: Zhenɛ 37.28; 45.5
†105:19 105.18-19: Zhenɛ 39.20–40.23
†105:20 105.20: Zhenɛ 41.14
†105:21 105.21: Zhenɛ 41.39-41
†105:23 105.23: Zhenɛ 46.6; 47.11. Ezhipiti tara to pe maa yinri fun Kamu tara.
†105:25 105.25: Ɛki 1.7-14
†105:26 105.26: Ɛki 3.1–4.17
†105:28 105.28: Ɛki 10.21-23
†105:29 105.29: Ɛki 7.17-21
†105:30 105.30: Ɛki 7.26–8.1
†105:31 105.31: Ɛki 8.12-13,16-20
†105:33 105.32-33: Ɛki 9.22-25
†105:35 105.34-35: Ɛki 10.12-15
†105:36 105.36: Ɛki 12.29
†105:38 105.37-38: Ɛki 12.33-36
†105:39 105.39: Ɛki 13.21-22
†105:40 105.40: Ɛki 16.2-15
†105:41 105.41: Ɛki 17.1-7; Nɔmbu 20.2-13
†105:44 105.44: Zhozu 11.16-23