8
Huneke Siṉi ia na Vua Huda Saganadi
1 Hiera gua si va dogoro nau e Zihova sa Baṉara: na huneke siṉi ia na vua huda saganadi. 2 Meke nanasa si Asa, “Emosi, nasa si dogoria goi,” gua.
“Na huneke siṉi ia na vua huda saganadi,” olaṉa gua si arau.
Meke zama se Zihova koa rau, “Sa totoso tadi na Qua tinoni pa Izireli si ele sagana; lopu kote rizu pania Arau sa dia vina kilasa.
3 Zama vura gua si Arau Zihova sa Baṉara, koasa rane asa, sari kinera pa Zelepade si kote ta iliri uui. Na soku hola tini tie matedi si kote eko pa doduru vasina! Loke tie si kaqu kulu!” gua se Zihova.
Tinahuara Tadi pa Izireli
4 Mi avosia si hie, gamu pu neti goreni saripu loke gedi
meke va mate i saripu malaṉa koasa popoa,
5 meke zama guahe,
“Totoso sa kote hola sa rane hopena pa Sidara Vaqura
pude mami holuholu huiti,
meke totoso sa kote hokoto sa Sabati
pude mami maketi huiti?”
Va hola i gamu sari pada
va sage i sari hinolu
meke sekesekei koari na sikele kokohadi,
6 meke holu ni siliva sari tie malaṉa
meke sari pu loke gedi si holu ni sadolo mo,
sari remoremo huiti ta sara vagidi ba kote holuholuni.
7 E Zihova si ele tokotokoro guahe koasa Pozana Telena: “Arau lopu kote muliṉi ni sari doduru tiṉitoṉa sapu ele taveti rini.
8 Vea, lopu kote neneqara nia sa popoa si hie,
meke talotaṉa sari doduru pu koa vasina?
Sa doduruna sa popoa si kote odu sage gua sa Ovuku Naelo;
kote sage si asa meke lodu gore pule
gua sa ovuku pa Izipi.
9 Koasa rane asa, zama vura gua si Arau Zihova Baṉara,
kote va lodu gore ia Rau sa rimata pa korapa rane
meke va huporo ia sa popoa pepeso pana rane toa.
10 Kote iliri Arau sari mia totoso inevaṉa la pa tinalotaṉa
meke doduru mia kinerakera la pa kinabo.
Kote va sageni gamu poko baika Arau si gamu doduru
meke neri i sari batu mia.
Kote tavetia Rau sa totoso asa pude guana totoso mate tanisa koburu ekeina,
meke sa vina betona si kote guana keke rane pasana.
11 Sari rane si korapa mae, zama vura gua si Arau Zihova Baṉara,
totoso kote garunu mae nia Rau sa oza koasa popoa;
lopu na oza pa ginani babe na memeha hata kolo si asa,
ba na oza pude lopu avosia sa zinama te Zihova.
12 Sari tie si kote tedeve podalae pa Kolo Matena la pa kolo Meditareniani,
meke kote hebala gua pa kali gede meke la pa kali gasa rimata,
pude hata ia sa zinama te Zihova,
ba lopu kote boka dogoria arini.
13 Koasa rane asa
sari barikaleqe vaqura leleadi meke sari koreo vaqura ṉiṉiradi
si kote mabubulu na memeha.
14 Arini pu tokotokoro pa kinurekure te Sameria,
babe zama, ‘Hinokara gua sapu toana sa mua tamasa agoi pa Dani,’
babe ‘Hinokara gua sapu toana sa tamasa pa Biasiba,’
si kote hoqa si arini,
lopu pude tekulu sage pule.”