7
Sa Rovana Kupokupo
1 Hiera gua si va dogoro nau e Zihova sa Baṉara pa dinogodogorae: Korapa va nama rovana kupokupo si Asa, mudina sa totoso pakepakete tanisa hinia tanisa baṉara meke totoso podalae tuvulu pule sari linetelete. 2 Totoso hena beto pani ri kupokupo sari doduru linetelete koasa popoa, si kabo vura si arau, “Zihova Baṉara, taleoso ni gami! Vea meke kote boka toa se Zekopi? Nake hitekena hite mo si asa!”
3 Ke hobe binalabala se Zihova.
“Lopu kote ta evaṉa si hie,” zama gua se Zihova Baṉara.
Sa Nika
4 Hiera gua si va dogoro nau e Zihova sa Baṉara: Se Zihova sa Baṉara si korapa titioko pa korapa nika pude va kilasi sari Nana tinoni; sa lamana si va popa pania Sa meke sa nika si podalae gania sa popoa. 5 Ke kukili vura si arau, “Zihova sa Baṉara, tepa sisigiti atu si arau koa Goi pude noso si Agoi! Vea meke kote boka toa se Zekopi? Nake hitekena hite mo si asa!”
6 Ke hobe binalabala se Zihova.
“Hie ba lopu kote ta evaṉa tugo,” zama gua se Zihova sa Baṉara.
Sa Iku sapu Koa ia Mamamata
7 Hiera gua si va dogoro nau Sa si arau: Se Zihova Baṉara si korapa turu kapae Nana pa keke goba sapu toṉoto sage luli ia sa sa tinoṉoto tanisa iku koa ia mamamata, meke sa iku koa ia mamamata si koa nana pa Limana Sa. 8 Meke nanasa au e Zihova si arau, “Nasa si dogoria goi, ta Emosi?” gua si Asa.
Meke olaṉa si arau, “Na iku sapu koa ia na mamamata pude pada ia sa tinoṉoto tana goba.”
Meke zama se Zihova, “Doṉo mae, sa iku koa ia mamamata hie si veko ia Rau pa korapadi ri Qua tinoni pa Izireli; lopu kaqu poni pule ni totoso Arau si arini pude kekere.
9 Sari vasidi ululudi te Aisake si kote ta huara
meke sari vasina hopedi pa Izireli si kote na remoremo;
kote ovulu sagea Arau sa Qua vedara pude seke va matea sa butubutu baṉara te Zeroboami.”
Sari Emosi meke Amazaea
10 Meke garunu la nia e Amazaea, sa hiama pa Betolo, si keke inavoso koe Zeroboami, sa baṉara pa Izireli: “Se Emosi si korapa qoraqora nigo si agoi baṉara, pa Betolo pa kokorapana sa popoa Izireli. Lopu leana la koasa popoa sari nana zinama. 11 Ura gua hie si zama nia Emosi:
‘Se Zeroboami si kote mate pa vedara,
meke hinokara sari tie Izireli si kote ta raovo taloa,
taloa va seu pa dia popoa soti,’ gua.”
12 Meke zama se Amazaea koe Emosi, “Vura taloa, agoi na tie dodogorae! Pule la pa Ziuda. La korokorotae; mamu ta tabara vasina. 13 Lopu korokorotae pule pa Betolo, sina hie si na hope tanisa baṉara meke na zelepade tanisa butubutu baṉara pa Izireli,” guni nia sa.
14 Olaṉa ia Emosi se Amazaea, “Arau si lopu na poropita meke lopu tuna keke poropita, ba na sepati si arau, meke na tie kopu huda sikamoa tugo si arau. 15 Ba vagi pani au e Zihova koasa qua tinavete kopu sipi meke zama au Sa, ‘La, mamu la korokorotae koari Qua tinoni pa Izireli,’ gua. 16 Ego kamahire, mu avosia sa zinama te Zihova. Zama si agoi,
Lopu korokorotae la ia sa popoa Izireli,
mamu noso, lopu korokorotae si agoi koasa butubutu te Aisake,” gua si goi.
17 “Gua ke hiera gua si zama nia e Zihova:
‘Sa mua barikaleqe si kote ta evaṉae na maqota koasa vasileana lavata,
meke sari tumu koreo meke vineki si kote mate pa vedara.
Sa mua pepeso si kote ta pada meke ta hia,
meke agoi telemu si kote mate pa keke popoa tadi na tie huporo.
Meke hinokara sa butubutu Izireli si kote la pa tinaraovo,
seu taloa koasa dia popoa soti.’ ”