1 ‑Tɛ dɛ a 'mʋ, ɛ ‑hi, ‑ɛ ‑bɩ Kʋkɔnyɔ ‑Yusu ‑ha 'lɩ nyibli a ‑wlɩ nɩ ta ꞊tu 'ʋ ‑pu ꞊tu 'ʋ 'hʋɛn ‑bɩ, 'ɛ nu 'waa 'hʋnhʋɛn.yo, 'ɛ lee ꞊nʋ, 'kɩ bʋ 'nyɛɛ 'hru, bʋ mu 'lɩ 'dɩɩ a pɛpɛ ‑mʋ', ‑ɛ kɔ 'kwli 'a ꞊gbɛtʋ, ɛ di 'lɩ mu. 2 Kɛ‑ ɛ pɩ, 'ɛ yɩ ꞊nʋ ‑lee ‑nɩ, ɛ wɛn: «‑Kʋbʋ, ‑ɛ ꞊hlu, ɛ ‑hʋ nɩ, kɛɛ, 'a 'cɩcɛnyibli 'yɩ ‑hʋ. 'A ‑tɩ, ba nyaa ‑cikɔnyɔ lɛ, bʋ lee nɛ 'a ‑kʋannunyibli ‑bɩ, bʋ bi 'a mʋ kɩ, a 'mʋ ‑kʋbʋ 'cɛ. (Ɛ ꞊hɛn 'nyrɛ, ‑ɛ mɔ, ba nyaa Nyɩsʋa lɛ, ɛ 'mʋ 'a nyibli ‑bɩ ‑lee ‑nɩ, 'kɩ bʋ ‑hɛɛ nɛ 'a mʋ, a 'mʋ nyibli ‑bɩ lɛ 'kukue ‑nɩ, ʋ 'mʋ 'waa 'klɔ Nyɩsʋa ‑nyi.) 3 Ba mu. 'N yɩ tɛ 'a mʋ bʋ, ꞊wɩ yɩ 'blayonʋ, ʋ yɩ bʋ tɛ, 'kɩ 'lɩ ‑jio 'nyɩ. 4 'Ba yɩ nɩ mi, a 'nɩ 'gbaa 'lɩ 'wliyɛ, a 'nɩ 'gbaa 'lɩ blɔ ‑wɛ, kɔ 'suin 'hʋɛn‑, kɔ, a 'nɩ 'wlɛɛn 'lɩ 'hru wlɔn, nyibli a 'wiolɛ‑nyi‑tɩ.

5 'A ‑nɛ 'kayu, a di 'lɩ bʋ pa, yɩ‑hɛdɛ, a di nu, kɛ‑ ba pʋ: Nyɩsʋa bʋ nɩ 'ʋ 'a mʋ ‑mɔ. 6 Nyiblo 'bʋ nɩ 'lɩ 'kayu a 'mʋ bʋ, 'bʋ ‑hʋɛ꞊ɛ, 'kɩ Nyɩsʋa bʋ nɩ 'ʋ꞊ʋ ‑mɔ, bʋ nu꞊o ꞊haandɛ ‑mɔ, ‑ɛ ‑bɩ Nyɩsʋa kɔ bʋ nɩ 'ʋ꞊ʋ ‑mɔ. Kɛɛ, 'bʋ 'yɛ nɩ ‑hʋa꞊a, ‑ɛ ‑bɩ Nyɩsʋa 'yɩ 'lɩ꞊ɩ 'lɩ ‑wɛ, bʋ nɩ 'ʋ꞊ʋ ‑mɔ, kɔ, ɛ 'yɩ 'lɩ꞊ɩ 'lɩ ‑wɛ, bʋ nu꞊o ꞊haandɛ ‑mɔ. 7 'Kayu ‑mʋ', ‑ɛ kɔ bʋ ʋ di 'lɩ 'a mʋ kʋa 'blee ‑nɩ, 'kɩ ba nɩ 'lɩ bʋ. A 'nɩ 'naa 'lɩ 'kayo blɛ. Dididɛ ‑mʋ', ʋ di 'a mʋ ‑nyi, ɛ nɔ‑ ba di, 'nie, ʋ di 'a mʋ ‑nyi, ɛ nɔ‑ ba 'na, ‑ɛ nu꞊o, nyiblo ‑bʋ, ‑ɛ ni ‑kʋan, ɛ blɛɛ 'pɛɛlɛ yɩ.

8 'A ‑nɛ 'dɩɔ ꞊dʋ, a di 'lɩ 'kwli pa, 'bʋ 'ble 'a mʋ kʋa, dididɛ ‑mʋ', ʋ di 'a mʋ ‑nyi, ba di꞊e, 9 ɛ kɔ, ba da Nyɩsʋa, ‑ɛ di꞊e nu, ɛ 'mʋ꞊ʋ nu, 'dɩɔ a 'mʋ, 'a nyibli a 'kʋɛ 'mʋ ‑wɛ, ɛ kɔ, ba lee ꞊nʋ, ‑ɛ mɔ: Ti ‑mʋ' ‑kɔ 'yri Nyɩsʋa di 'ʋ 'a mʋ win kɩ ‑kɔɔ ‑nɩ, ɛ 'mʋɛ yrɛ. 10 'Dɩɔ ‑kɔ 'kwli a di 'lɩ pa, 'kɩ ʋ 'yɛ nɩ di 'a mʋ kʋa nɩ 'ble, ba mu 'lɩ 'dɩɔ a 'mʋ, 'a 'dika. Kɛ‑ ba pʋ: 11 'Aan 'dɩɔ a 'pupu ‑bʋ, ‑ɛ nɩ ‑a mʋ bʋɩ lɛ a ‑tɩ, ‑a di ‑aan bʋɩ 'nɩ ‑bʋbla ‑nɩ, ‑a 'mʋ 'a mɔ꞊ɔ yɩ ‑tɔɔ ‑nɩ, ‑ɛ mɔ, Nyɩsʋa a yrʋ 'bʋ klɔ 'a mʋ, 'a mʋ nu꞊o 'aan dɩɔnʋ ‑mɔ. Kɛɛ, ba kɔ 'a yiyie, ‑ɛ mɔ: Ti ‑mʋ' ‑kɔ 'yri Nyɩsʋa di nyibli win kɩ ‑kɔɔ ‑nɩ, ɛ 'mʋɛ yrɛ. 12 'N yɩ 'a mʋ 'nɩ ‑lee ‑nɩ, ‑nyrɔwɔ ‑mʋ', ‑ɛ kɔ 'kwli Nyɩsʋa di 'ʋ nyibli ‑bati lɛ ‑pʋʋ ‑nɩ, ɛ di ꞊tu 'dɩɔ a 'mʋ 'a nyibli ꞊hɩʋɛn, ɛ 'mʋ 'ʋ Sodɔmʋkʋɛ 'ʋ ‑hi, ‑ʋ kɔ nunuklɔ ‑nyre la yɩ.»

13 (Kɛ‑ ‑Yusu pɩ 'a ‑nagbopʋ* yɩ, ɛ wɛn:) «‑Juukʋɛ* ‑mʋ', ‑ʋ nɩ 'lɩ Kolasɛdɩɔ, kɔ Bɛtɩsaidadɩɔ 'kwli, 'jrɔ 'kɩ 'ʋ ꞊nʋ ‑mɔ, ‑ɛ nu꞊o, ꞊wlɩlɛkɛɛ‑tɛblɩ ‑mʋ', 'n nuu 'lɩ ꞊nʋ ‑mɔ, 'bʋ mɔ, 'nɩ nuu wɛn 'lɩ꞊ɩ nyibli ‑mʋ', ‑ʋ 'yɩ ‑Juukʋɛ 'pa‑ ‑mɔ, ‑ʋ nɩ 'lɩ Tilɩdɩɔ kɔ Sidɔdɩɔ 'hʋɛn‑ 'kwli, see la, nyibli a 'mʋ, ʋ 'mʋ la nyaɩŋmlɩ lɛ nu, ʋ 'mʋ la ‑tɛblɩ ‑hʋɩn 'hʋɩ lɛ pʋ, ʋ 'mʋ la 'waa dɩɔnʋ 'tɔpupu 'ŋmlɛ, ‑ɛ di꞊e nu, ʋ 'mʋ꞊ʋ nyibli yɩ ‑tɔɔ ‑nɩ, ‑ɛ mɔ, ʋ ‑hʋɛ bʋ hie 'ʋ dɛ 'kuku a nunuo bʋ, ʋ 'mʋ 'waa 'klɔ Nyɩsʋa ‑nyi. 14 'Ɛ mɔ ꞊han‑tɩ, ‑nyrɔwɔ ‑mʋ', ‑ɛ kɔ 'kwli Nyɩsʋa di 'ʋ nyibli ‑bati lɛ ‑pʋʋ ‑nɩ, nyibli ‑mʋ', ‑ʋ nɩ 'lɩ Kolasɛdɩɔ kɔ Bɛtɩsaidadɩɔ a 'mʋ 'kwli, 'waa ‑bati di nɩ 'klɩ kɩ, ɛ 'mʋ 'ʋ Tilɩdɩɔ kɔ Sidɔdɩɔ a ‑nɛ 'ʋ ‑hi. 15 'Tɩ‑ nyibli ‑mʋ', ‑ʋ nɩ 'lɩ Kapɛnaɔdɩɔ 'kwli, ʋ 'nɩ 'hie 'lɩ꞊ɩ 'lu ‑mɔ lɛ, ‑ɛ mɔ, Nyɩsʋa di 'lɩ ꞊nʋ 'nɩ 'yaa ‑nɩ ‑yaya, ʋ 'mʋ mu ‑mumu, ʋ 'mʋ yakɔ yɩ kʋɛ. Kɛɛ, ɛ di 'lɩ ꞊nʋ 'nɩ ꞊tɩɔ ‑nɩ ‑tɩɔtɩɔ, ʋ 'mʋ 'lɩ ‑tʋtʋ bʋ nyre.»

16 Kɛ‑ ɛ pɩ 'a ‑nagbopʋ yɩ, ɛ wɛn: «Nyiblo 'bʋ yɩ 'a mʋ nʋa yɩ bʋ nɩ pɩ, ‑ɛ ‑bɩ ɛ ꞊hɛn 'nyrɛ 'mɔ ɛ pɩ nʋa yɩ bʋ, ɛ kɔ, nyiblo 'bʋ hɩa nɛ 'a mʋ yɩ, ɛ ꞊hɛn 'nyrɛ, 'mɔ ɛ hɩa yɩ, kɔ, nyiblo 'bʋ hɩa 'mʋ yɩ, ɛ 'wɩ yɩ, Nyɩsʋa, ‑ɛ lee 'nɛ‑ 'mʋ ‑tʋtʋ kɩ, ɛ nɔ‑ ɛ hɩa yɩ.»

17 ‑Tɛ ti gbi ‑hi, ‑ɛ ‑bɩ ‑nagbopʋ a (72) ‑wlɩ nɩ ta ꞊tu 'ʋ ‑pu ꞊tu 'ʋ 'hʋɛn, ‑Yusu lee la, 'kɩ bʋ mu la Nyɩsʋa a ꞊haantitie pʋ, ‑tɛ ʋ ꞊hɩan ‑mɔ, ‑ɛ ‑bɩ dɔdʋ ni ꞊nʋ nɩ dɩakɩ, ʋ wɛn: «Kʋkɔnyɔ o, 'ye kɛ, 'bʋ mɔ, ꞊ba yɩ ‑na 'nyrɛ nɩ ni, ꞊ba yɩ 'lɩ 'kuo ‑hʋɩn* ‑mɔ nɩ ‑hlee ‑nɩ, 'ʋ ꞊tui 'ʋ ‑aan win nɩ, 'ʋ ‑hʋɛn 'ʋ nyibli ke' lɛ.»

18 ‑Ɛ ‑bɩ ‑Yusu wɛn: «‑Tɛ 'n ta 'lɩ yakɔ 'kwli lɛ, ‑ɛ ‑bɩ 'n 'ye Satan nɩ, ‑ɛ mɔ 'kuo ‑hʋɩn a nyiblo gbagbʋ, 'ɛ ble 'lɩ yakɔ 'kwli, ꞊wɩ yɩ ‑tɛ bʋ 'yɛ nɩ ꞊tɩ wɛn. 19 Ba 'ye kɛ, 'n ‑nyi 'a mʋ 'klɩ, 'kɩ ba na hro kɔ ‑ji‑kayɩ 'hʋɛn‑ klɛ, ɛ kɔ, ba ‑wɛ Nyɩsʋa a yraanyɔ Satan a 'klɩ bʋ. ꞊Dedede 'yɩ 'lɩ꞊ɩ 'lɩ ‑wɛ bʋ nu 'a mʋ dɛ ‑hʋan ‑mɔ. 20 Kɛɛ, a 'nɩ 'nuo 'lɩ dɔdʋ, ‑tɛ 'kuo ‑hʋɩn ꞊tui 'ʋ 'a mʋ 'ʋ a ‑tɩ. Kɛɛ, dɛ ‑kɔ dɔdʋ ba nu, ɛ nɔ‑ mɔ ‑tɛ Nyɩsʋa ‑nu, 'ɛ 'crɩ 'aan 'nyrɛ, 'kɩ 'lɩ yakɔ 'kwli.»

21 Ti nɩ ‑do a 'mʋ 'yri, ‑ɛ ‑bɩ Nyɩsʋa a ‑Hihiu* nu꞊o nɩ, dɔdʋ 'ɛ ‑hi ‑Yusu wlɔn dɩakɩ. Kɛ‑ ɛ pɩ Nyɩsʋa yɩ, ɛ wɛn: «'Na 'Baɩ o, ‑mɔ mɔ yakɔ kɔ ‑tʋtʋ 'hʋɛn‑ a Kʋkɔnyɔ. 'N pɩ ‑mʋ 'nyrɛ lɛ, ‑tɛ ‑nu, ꞊nɩ ‑hli ‑na nunu‑tɛblɩ ꞊tɔkɔnyʋ, kɔ 'crɩɛn.yinyʋ 'yi kɩ, 'tɩ‑ ꞊nɩ tɔɔ ꞊nʋ nyibli ‑bʋ, ‑ʋ 'yɩ ꞊dedede ‑yi. 'N pɩ ‑mʋ 'nyrɛ lɛ, ‑ɛ nu꞊o, kɛ‑ ‑nu 'a ‑hʋhʋa.

22 'Na 'Baɩ, ‑nyi 'mʋ 'klɩ, 'kɩ 'ʋ ‑tɛblɩ a pɛpɛ kɩ. Nyiblo a 'dɩ ‑bɩ 'n pa 'mʋ, nyibli 'yɩ꞊ɩ ‑yi, 'bʋ 'yɩ 'na 'Baɩ nɩ ‑do 'pa‑. Ʋ 'yɩ꞊ɩ ‑yi ‑wɛ, nyiblo 'na 'Baɩ pa 'mʋ, 'bʋ 'yɩ 'mɔ nɩ ‑do ‑bʋ 'pa‑, ‑ɛ mɔ 'a 'Yu. 'A ‑nɛ nyiblo, 'n di ‑hʋa ꞊bʋ tɔɔ ꞊nɛ, ɛ yi꞊e nɩ ‑wɛ, nyiblo a 'dɩ ‑bɩ 'na 'Baɩ pa 'mʋ.»

23 ‑Tɛ ‑Yusu kɔ 'a ‑nagbopʋ nɩ ‑do 'hʋɛn‑, ʋ nɩ bʋ, ‑ɛ ‑bɩ kɛ‑ ɛ pɩ ꞊nʋ yɩ, ɛ wɛn: «'A mʋ ‑mʋ', ‑ʋ yɩ ‑tɛblɩ a pɛpɛ ‑bʋ 'ye, ba kɔ plɔ a bleelɛ. 24 'N yɩ 'a mʋ 'nɩ ‑lee ‑nɩ, ti ‑hi la a ti 'yri a Nyɩsʋa a winwlɔn‑hanyʋ* kɔ bodɩɔpʋ ‑hʋɔhʋɩ 'hʋɛn‑, ʋ ꞊mʋɛ la꞊a lɛ, 'kɩ bʋ 'ye la ‑tɛblɩ gbagbɩ ‑bʋ, a yɩ kɛ 'ye, kɛɛ, ʋ 'yɩ꞊ɩ 'ye, kɔ, 'ʋ ꞊mʋɛ la꞊a lɛ, 'kɩ bʋ 'wɩn la ‑tɛblɩ gbagbɩ ‑bʋ, a yɩ kɛ 'wɩn, kɛɛ, ʋ 'yɩ꞊ɩ 'wɩn.»

25 ‑Yusu bʋ pʋ 'kɩ lɛ, ‑ɛ ‑bɩ Nyɩsʋa a tetetɔɔnyɔ ‑bɩ, ‑ɛ nɩ 'ʋ, ɛ 'du ye', 'ɛ mu 'ʋ ‑Yusu lɛ ꞊tɛɛ mɔ, ‑ɛ di꞊e nu, ɛ 'mʋ꞊ʋ 'ye, 'bʋ mɔ, 'bʋ di ‑tɩ ꞊dʋ hla, ‑ɛ 'yɩ 'ʋ yɩ 'sii ‑nɩ. Ɛ nɔ‑ mɔ bʋ 'bɛti꞊e, ɛ wɛn: «Tɔɔnyɔ o, dɛ a 'dɩ ‑bɩ 'n kɔ ꞊bʋ nu, 'tɩ‑ 'mʋ Nyɩsʋa a 'klɔ yrayrʋ ‑mʋ' kɔ, ‑ɛ 'yɛ nɩ ‑wɛ 'lɩ 'lɩ?» 26 ‑Ɛ ‑bɩ ‑Yusu wɛn: «Dɛ a 'dɩ ‑bɩ ʋ 'crɩɩ 'lɩ Nyɩsʋa a tetecrɩɛn 'kwli? Dɛ a 'mʋ, ʋ 'crɩ, ꞊nɩ yɩ꞊ɩ nɩ ‑hre, ‑bɩ' ‑ni 'a 'wɩnwɩɩn 'lɩ?» 27 ‑Ɛ ‑bɩ ɛ wɛn: «‑Blɛɛ yɩ, ‑bʋ nʋɛ ‑na Kʋkɔnyɔ Nyɩsʋa, 'kɩ 'lɩ ‑na ꞊wlʋ a pɛpɛ kɩ, ɛ kɔ, 'kɩ 'lɩ ‑na 'lulɛ‑hihie a pɛpɛ 'kwli, kɔ, 'kɩ 'lɩ ‑na 'klɩ a pɛpɛ 'kwli, ɛ kɔ, ‑blɛɛ yɩ, ‑bʋ nʋɛ ‑na 'bɩhɩan ‑tonyiblo, ꞊wɩ yɩ, ‑tɛ ‑nu ‑dɩɔnʋ a nʋɛlɛ.» 28 ‑Ɛ ‑bɩ ‑Yusu wɛn 'nɩ: «'A ‑tɛɛ, nɔ‑ ꞊nɩɔ. 'A ‑tɩ o, dɛ a 'mʋ, ɛ nɔ‑ ‑bʋ nu, ꞊mʋ 'klɔ yrayrʋ a 'mʋ kɔ.»

29 Kɛɛ, tetetɔɔnyɔ a 'mʋ, ɛ ‑hʋɛ bʋ ‑nyi 'a dɩɔnʋ ꞊wɔn. Nɔ‑ kɔ ‑tɩ 'ɛ 'bɛti ‑Yusu, ɛ wɛn: «Nyiblo a 'dɩ ‑bɩ ‑mɔ 'kɩ 'na 'bɩ ‑tonyiblo 'lɩ?» 30 ‑Ɛ ‑bɩ ‑Yusu wɛn: «Ɛ kɔ la nyɩbɛyu ꞊dʋ. Ɛ nɔ‑ ‑hɔn 'lɩ Jrusrɛdɩɔ 'kwli, 'ɛ mi 'lɩ Selikodɩɔ 'kwli. ‑Tɛ ɛ mu ‑mumu, ‑ɛ ‑bɩ, ɛ bi 'lɩ ‑balʋnyibli 'nyɩ, 'ʋ ‑hɛ꞊ɛ wlawlɩ, ‑ɛ di꞊e nu, ʋ 'mʋ 'a ‑tɛblɩ 'yri, 'ʋ bi꞊e ‑bibi, 'ʋ dʋa꞊a 'lɩla, 'tɩ‑ 'ʋ hie 'ʋ꞊ʋ bʋ, 'ʋ ‑mu. 31 Bʋ pɛ 'kɩ 'ʋ bʋ, ‑ɛ ‑bɩ Nyɩsʋa a ‑cɔhlʋnpinyɔ* ꞊dʋ yɩ 'lɩ 'nɩ di. ‑Tɛ ‑cɔhlʋnpinyɔ a 'mʋ, ɛ 'ye꞊e, ɛ nɔ‑ mɔ bʋ 'bɛɛ kɩ, bʋ na 'lɩ 'hru a 'kɩbɩa ‑bɩ kɩ, bʋ ‑hi. 32 ‑Tɛ ɛ ‑hi, ‑ɛ ‑bɩ Lefipi ꞊dʋ, ‑ɛ mɔ Nyɩsʋa a ‑cɔhlʋnpinyɔ a ‑kʋannunyɔ ꞊dʋ, ɛ nɔ‑ nyre 'ʋ ‑tɩtɛ a 'mʋ. ‑Tɛ ɛ nyre 'kɩ 'ʋ, ɛ 'ye꞊e, ‑ɛ ‑bɩ 'kɩ ɛ na 'lɩ 'hru a 'kɩbɩa ‑bɩ kɩ, 'ɛ ‑hi. 33 ‑Tɛ ɛ ‑hi 'kɩ, ‑ɛ ‑bɩ Samalikʋɛyu ꞊dʋ, ‑ɛ mɔ hɩapʋdakɔ ‑bɩ a nyiblo, nɔ‑ yɩ 'lɩ di, ('ɛ nɩ 'ʋ 'kasra kɩ. Samalikʋɛ kɔ ‑Juukʋɛ* 'hʋɛn‑, ʋ nyinyre lɛ.) ‑Tɛ Samalikʋɛyu a 'mʋ, ɛ nyre 'ʋ nyiblo a 'mʋ 'hʋɩ, ɛ 'ye꞊e, ‑ɛ ‑bɩ 'a nyaɩ ‑tʋa 'a nunuo dɩakɩ, 34 'ɛ 'yɩya 'ʋ꞊ʋ 'hʋɩ bʋ ‑tɛɛ, 'ɛ nu 'nyra kɔ ‑wiin, 'ɛ nu 'a ꞊ji a ‑kʋan, 'tɩ‑ 'ɛ mʋa ꞊nɛ lɛ. ‑Tɛ ɛ ‑wɛ 'a ꞊ji a ‑kʋan a nunuo ‑mɔ, ‑ɛ ‑bɩ ɛ 'yaa 'ʋ꞊ʋ 'a 'kasra kɩ, 'ʋ mu 'lɩ Selikodɩɔ 'kwli, 'kɩ 'lɩ 'dagbɩ a 'kayu ‑bɩ bʋ, 'ɛ pʋ 'a ꞊tɔ. 35 ‑Tɛ ‑nyrɛ ‑nyɛ, ‑ɛ ‑bɩ ɛ ‑ha 'lɩ 'wliyɛ, 'ɛ ‑nyi꞊e 'kayukɔnyɔ, ɛ wɛn: ꞊Tu 'na nyiblo ‑bʋ 'yie ‑tɛɛ. Ti ‑kɔ 'yri 'n di ‑mɔ ꞊hɩan, 'n di 'ʋ ‑dii ‑nɩ, 'bʋ mɔ, dɛ 'bʋ bi 'ʋ 'wliyɛ ‑bʋ 'lu, 'n di ‑mɔ꞊ɔ 'nɩ 'pɛɛ ‑nɩ.»

36 'Tɩ‑ ‑Yusu 'mʋ ‑yrɛ, kɛ‑ ɛ pɩ tetetɔɔnyɔ a 'mʋ yɩ, 'ɛ yɩ꞊ɩ 'bɛti ‑nɩ, ɛ wɛn: «'Kɩ 'lɩ ‑mʋ 'yi, 'kɩ 'lɩ nyibli nɩ ta a 'mʋ 'nyɩ, nyiblo a 'dɩ ‑bɩ ‑ɛ nu dɛ, ‑ɛ tʋɛ ꞊nɛ yɩ, ‑ɛ mɔ, ɛ nɔ‑ mɔ nyiblo ‑mʋ', ‑balʋnyibli ‑bi a 'bɩhɩan 'lɩ?» 37 ‑Ɛ ‑bɩ tetetɔɔnyɔ a 'mʋ, ɛ wɛn: «Nyiblo ‑mʋ', ‑ɛ nu꞊o ꞊haandɛ 'yi ꞊hlɔn lɛ, ɛ nɔ‑ ꞊nɩɔ.» ‑Ɛ ‑bɩ ‑Yusu wɛn: «‑Na 'mumu, ꞊nɩ ‑mu, dɛ nɩ ‑do a 'mʋ, ɛ nɔ‑ ‑bʋ nu.»

38 ‑Tɛ dɛ a 'mʋ, ɛ ‑hi, ‑ɛ ‑bɩ ‑Yusu kɔ 'a ‑nagbopʋ* 'hʋɛn‑, ʋ bi 'hru wlɔn de, 'ʋ pa 'lɩ 'dɩɔ ‑bɩ 'kwli. 'Kɩ 'lɩ 'dɩɔ a 'mʋ 'kwli, 'kɩ nʋgba ꞊dʋ nɩ 'lɩ. 'A 'nyrɛ mɔ Matɩ. Ɛ nɔ‑ 'ble ‑Yusu kʋa, 'kɩ 'lɩ 'a 'kayu bʋ. 39 Matɩ a 'mʋ, ɛ kɔ 'dɩayɩ nyrɔyu ꞊dʋ. 'A 'nyrɛ mɔ Mari. ‑Tɛ ‑Yusu nɩ bʋ, ɛ ‑tʋa 'waa tɔɔlɛ, Mari a 'mʋ 'ɛ nɩ 'ʋ꞊ʋ 'hʋɩ bʋ, ‑ɛ di꞊e nu, ɛ 'mʋ 'a tɔɔwin nʋa yɩ bʋ pʋ. 40 Matɩ ‑mɔ ‑bɩ, 'kayu a ‑kʋan a gblegble ‑mʋ', ɛ nɔ‑ kɔ ‑tɩ ꞊yɛɛ ꞊nɛ 'kla ‑wliye. Ɛ nɔ‑ mɔ bʋ 'yɩya 'ʋ ‑Yusu 'hʋɩ bʋ, bʋ lee ꞊nɛ, ‑ɛ mɔ: «Kʋkɔnyɔ o, ꞊bɩ ɛ 'nɩ 'yaa lɩ ‑mʋ 'kla ‑wliye, 'kɩ 'na 'dɩayɩ nyrɔyu bʋ ‑ha 'mɔ nɩ ‑do mɛ lɛ, ꞊bʋ nu ‑kʋan a pɛpɛ? 'A ‑tɩ, lee ꞊nɛ bʋ ‑hɛɛ 'mʋ.» 41 ‑Ɛ ‑bɩ Kʋkɔnyɔ ꞊tu꞊o ‑wɔn, ɛ wɛn: «Matɩ o, ꞊yɛɛ ‑dɩɔnʋ 'kla ‑wliye, ɛ kɔ, ꞊nɩ nɛɛ ꞊wlɩ lɛ dɩakɩ, 'kɩ 'ʋ ‑tɛblɩ ‑hʋɔhʋɩ kɩ. 42 Kɛɛ, ɛ kɔ dɛ nɩ ‑do, ‑ɛ mɔ yɩnɔdɛ. Dɛ a 'mʋ, ɛ nɔ‑ Mari ‑ha 'lɩ. 'Tɩ‑ nyiblo ꞊dʋ 'yɩ 'lɩ꞊ɩ 'lɩ ‑wɛ, bʋ ‑ha ꞊nɛ꞊ɛ ‑jɩ'.»