1 ‑Tɛ dɛ a 'mʋ, ɛ ‑hi, ‑ɛ ‑bɩ ‑Yusu 'kukue 'a ‑nagbopʋ nɩ ‑pu ꞊tu 'ʋ 'hʋɛn lɛ, 'ɛ ‑nyi ꞊nʋ 'klɩ, 'kɩ bʋ bla 'kuo ‑hʋɩn* lɛ, ‑ʋ nɩ 'ʋ nyibli ke', kɔ, bʋ nu꞊o, nyibli a 'kʋɛ bʋ ‑wɛ, 2 'ɛ lee ꞊nʋ, ‑ɛ mɔ, bʋ na 'dɩɩ klɛ, bʋ hla꞊a, ‑tɛ Nyɩsʋa di nyibli a win a kɩkɔɔlɛ nu, ɛ kɔ, bʋ nu꞊o, nyibli a 'kʋɛ bʋ ‑wɛ. 3 Kɛ‑ ɛ pɩ, 'ɛ yɩ ꞊nʋ ‑lee ‑nɩ, ɛ wɛn: «'Bʋ mɔ, 'ba yɩ 'dɩɩ kɩ nɩ nɛ, a 'nɩ 'gbaa 'lɩ ꞊dedede, a 'nɩ 'gbaa 'lɩ kotu* 9.3 ‑Yusu a ti 'yri, nyibli nɛɛ la kotio. Dɛ a 'mʋ, ɛ mɔ la 'waa 'blidɛ ꞊nɩɔ., kɔ blɔ, kɔ dididɛ, kɔ 'wliyɛ, kɔ, a 'nɩ 'gbaa 'lɩ wlawlʋ a 'hʋɛn a dɛ. 4 'A ‑nɛ 'dɩɔ ‑kɔ 'kwli a di 'lɩ nyre, 'kayu ‑mʋ', ‑ɛ kɔ bʋ ʋ di 'lɩ 'a mʋ 'lɩ ‑paa ‑nɩ, 'kɩ ba nɩ 'lɩ bʋ ‑nɩnɩ, 'aan mumuti 'mʋ 'ʋ nyre. 5 'Dɩɔ ‑kɔ 'kwli a di 'lɩ mu, 'kɩ ʋ 'yɛ nɩ di 'a mʋ kʋa nɩ 'ble, ba ‑hɔn 'lɩ 'dɩɔ a 'mʋ 'kwli. 'Ba yɩ nɩ mi, ba bʋbla 'aan bʋɩ, ‑ɛ di꞊e nu, 'waa ‑tʋtʋ a 'pupu 'mʋ 'a mʋ bʋɩ lɛ ‑hɔn, a 'mʋ꞊ʋ nyibli a 'mʋ ‑tɔɔ ‑nɩ, ‑ɛ mɔ, Nyɩsʋa a yrʋ 'bʋ klɔ ꞊nʋ, 'waa ꞊gbɛtʋ nu꞊o 'waa dɩɔnʋ ‑mɔ.»

6 ‑Tɛ ɛ ‑wɛ 'waa titie ‑mɔ, ‑ɛ ‑bɩ 'a ‑nagbopʋ bi 'hru wlɔn, 'ʋ nɛ nyibli yrɛ, 'ʋ pɩ ꞊nʋ Nyɩsʋa a ꞊haantitie. 'A ‑nɛ ‑tɩtɛ, ʋ di 'ʋ nyre, ʋ kɔ bʋ nu꞊o, 'hʋɩhrennyʋ a 'hʋɩ bʋ ‑wɛ.

7 Ti a 'mʋ 'yri, Galileblʋgba a ‑gʋlʋnʋma, ‑ɛ kɔ 'nyrɛ mɔ Helɔdɩ, ɛ 'wɩn ‑tɛblɩ a pɛpɛ ‑mʋ' nɩ, ‑Yusu ni. Dɛ bʋ di 'lu ‑mɔ lɛ ‑hie, 'kɩ 'ʋ ‑Yusu a ‑ta', ɛ 'yɩ꞊ɩ ‑yi, ‑ɛ nu꞊o, kɛ‑ nyibli ‑bɩ pɩ: «Ɛ mɔ Saan Batisɩ ꞊nɩɔ. ‑Tɛ ɛ 'kʋ la, ɛ 'hrɩ 'klɔ de.» 8 Kɛ‑ ‑ʋ ‑bɩ pɩ: «Eli*, ‑ɛ mɔ la Nyɩsʋa a winwlɔn‑hanyɔ*, ɛ nɔ‑ 'hrɩ 'klɔ.» ‑Ʋ ‑bɩ wɛn 'nɩ: «Nyɩsʋa a winwlɔn‑hanyɔ ‑bɩ, ‑ɛ 'kʋ la, ɛ nɔ‑ 'hrɩ 'klɔ.» 9 ‑Ɛ ‑bɩ kɛ‑ Helɔdɩ ‑mɔ ‑bɩ, ɛ pɩ 'kɩ: «'N lee la nyibli, bʋ 'bɛ la 'ʋ Saan a 'lu. 'A ‑tɩ, nyiblo ‑bʋ, ‑ɛ kɔ 'nyrɛ 'n yɩ 'wɩn, ‑ɛ ni ‑tɛblɩ a pɛpɛ ‑bʋ, nyiblo a 'dɩ ‑bɩ ɛ pa 'mʋ 'lɩ?» Ɛ nɔ‑ nu꞊o, 'ɛ ꞊mʋɛ ‑Yusu a 'yiye lɛ.

10 ‑Tɛ ‑Yusu lee la 'a ‑mɔnanyʋ*, 'kɩ bʋ na la 'dɩɩ klɛ, ‑tɛ ʋ ‑mɛ kle, ‑ɛ ‑bɩ ʋ lee ‑Yusu ‑tɛblɩ a pɛpɛ ‑mʋ', ʋ ‑nu, 'ɛ gba ꞊nʋ, 'ʋ mu 'lɩ ‑tɩtɛ ‑mʋ', 'dʋ bi 'lɩ yɩ, 'kɩ 'ʋ 'dɩɔ ‑mʋ', ʋ dɛɛ Bɛtɩsaida ꞊hlɔn. 11 Kɛɛ, nyibli ‑mʋ', ʋ hie wɛn 'ʋ bʋ, ʋ 'wɩn nɩ, ‑ɛ mɔ, ‑Yusu kɔ 'a ‑nagbopʋ* 'hʋɛn‑, ʋ mi 'lɩ ‑tɩtɛ ‑bɩ. Ɛ nɔ‑ nu꞊o, 'ʋ kʋɛ ꞊nʋ ꞊wien. Nyibli a pɛpɛ a 'mʋ, ‑ʋ ‑di, ‑Yusu 'ble ꞊nʋ kʋa ‑tɛɛ, kɔ, 'ɛ tɔɔ ꞊nʋ, ‑tɛ Nyɩsʋa di nyibli a win a kɩkɔɔlɛ nu, kɔ, nyibli, ‑ʋ kɔ kɩkladɛ, 'ɛ nu꞊o, 'waa 'kʋɛ 'ɛ ‑wɛ.

12 ‑Tɛ 'tɔ yɩ nɩ ‑wɛn, ‑ɛ ‑bɩ ‑nagbopʋ nɩ ‑pu ꞊tu 'ʋ 'hʋɛn ‑mʋ', ʋ 'yɩya 'ʋ ‑Yusu 'hʋɩ bʋ, ʋ wɛn: «Lee nyibli ‑bʋ, 'kɩ bʋ mu 'lɩ 'dɩɩ kɔ ‑yrigbi ‑mʋ' klɛ, ‑ʋ ꞊glaa 'lɩ ‑a mʋ lɛ, ‑ɛ di꞊e nu, ʋ 'mʋ 'lɩ bʋpɛɛlɛ kɔ diidɛ 'hʋɛn‑ lɛ ꞊mʋɔ ‑nɩ, ‑kɔtɩ ‑tɩtɛ ‑bʋ, ‑a nɩ 'nɛ‑, 'dʋ bii 'nɛ‑ yɩ.» 13 ‑Ɛ ‑bɩ ‑Yusu wɛn: «'Aan ꞊gbɛtʋ, ba ‑nyi ꞊nʋ diidɛ.» Ʋ wɛn: «'Flɔɔkui nɩ ꞊hun kɔ ‑hrin.yɔ gbi nɩ 'hʋɛn‑, nʋ‑ nɩ mɔ. 'Bʋ mɔ, ꞊ba 'yɩ dididɛ ‑tɔ mɔ ‑mu, 'kɩ 'ʋ nyibli a pɛpɛ ‑bʋ ‑mɔ, ‑a 'yɩ 'lɩ꞊ɩ 'lɩ ‑wɛ, ‑ba ‑nyi ꞊nʋ dididɛ.» 14 'Kɩ 'lɩ nyibli a 'mʋ 'nyɩ, nyɩbɛpʋ a 'miliwɩ nɩ ꞊hun, nʋ‑ nɩ 'lɩ.

‑Ɛ ‑bɩ kɛ‑ ‑Yusu pɩ 'a ‑nagbopʋ yɩ, ɛ wɛn: «Ba lee ꞊nʋ, bʋ nu dui, bʋ nɩ blɛ, du nɩ ‑do 'bʋ nɩ 'ʋ, bʋ nu nyibli a (50) ‑wlɩ nɩ 'hʋɛn ꞊tu 'ʋ ‑pu.» 15 Dɛ a 'mʋ, ‑Yusu lee ꞊nʋ, ɛ nɔ‑ ʋ ‑nu, 'ʋ lee nyibli, 'kɩ bʋ nɩ blɛ. 16 ‑Tɛ ʋ nɩ 'kɩ blɛ, ‑ɛ ‑bɩ ‑Yusu 'du 'flɔɔkui nɩ ꞊hun kɔ ‑hrin.yɔ nɩ 'hʋɛn a 'mʋ ye', 'ɛ 'du 'lu ye', 'ɛ ta 'lɩ yɔ' lɛ, 'ɛ ‑nyi Nyɩsʋa 'wio, 'kɩ 'ʋ dididɛ a 'mʋ a ‑ta', 'ɛ 'bɛ꞊ɛ ꞊tɩɔ lɛ, 'ɛ ‑nyi꞊e 'a ‑nagbopʋ, 'kɩ bʋ ꞊gla꞊a nyibli a 'mʋ lɛ, 17 ‑tonyibli a 'mʋ, 'ʋ di dɛ ‑didi, 'waa pɛpɛ 'ʋ ꞊mla. ‑Tɛ ʋ ‑wɛ dɛ lɛ, dididɛ a 'mʋ, 'a dɛ ‑bɩ ‑hie bʋ, 'a ‑nagbopʋ 'ʋ 'kukue꞊e lɛ, 'ʋ 'yii 'lɩ ‑tʋgbɩwɩ nɩ ‑pu ꞊tu 'ʋ 'hʋɛn.

18 ‑Nyrɔwɔ ꞊dʋ 'kwli, ‑Yusu bii la yɩ, 'ɛ dɛ la Nyɩsʋa. ‑Ɛ ‑bɩ 'a ‑nagbopʋ* mu 'ʋ꞊ʋ 'hʋɩ, 'ɛ ‑tʋa 'waa lɛ'bɛtilɛ, ɛ wɛn: «Nyibli wɛn 'nɩ, nyiblo a 'dɩ ‑bɩ 'n pa 'mʋ 'lɩ?» 19 ‑Ɛ ‑bɩ ʋ ꞊tu꞊o ‑wɔn, ʋ wɛn: «‑Ʋ ‑bɩ wɛn 'nɩ, ‑mɔ mɔ Saan Batisɩ, ‑ɛ pɩ la nyibli 'nie 'lu lɛ. ‑Ʋ ‑bɩ wɛn 'nɩ, ‑mɔ Nyɩsʋa a winwlɔn‑hanyɔ Eli ꞊nɩɔ. ‑Ʋ ‑bɩ wɛn 'nɩ, ‑mɔ Nyɩsʋa a winwlɔn‑hanyɔ ‑bɩ ꞊nɩɔ, ‑ɛ 'kʋ la, ti ‑hi la a ti 'yri, 'tɩ‑ ‑ɛ 'hrɩ 'klɔ de.» 20 ‑Ɛ ‑bɩ ɛ 'bɛti ꞊nʋ nɩ de, ɛ wɛn 'nɩ: «'A mʋ ‑mɔ ‑bɩ, a wɛn 'nɩ, nyiblo a 'dɩ ‑bɩ 'n pa 'mʋ 'lɩ?» ‑Ɛ ‑bɩ Piɛlɩ bi 'ʋ nɩ, ɛ wɛn: «‑Mɔ mɔ Wanyɔ ‑mʋ', Nyɩsʋa pʋ la lɛ, ɛ di la ya.»

21 ‑Yusu lee ꞊nʋ nɩ ‑tɛɛ, ɛ wɛn: «A 'nɩ 'lee 'lɩ nyiblo ꞊dʋ, nyiblo a 'dɩ ‑bɩ 'n pa 'mʋ.» 22 ‑Ɛ ‑bɩ kɛ‑ ɛ pɩ ꞊nʋ yɩ de: «'Mɔ ‑bʋ, ‑ɛ mɔ ‑tonyibli a pɛpɛ a Nyiblo, 'n kɔ ꞊bʋ 'ye ꞊hɩʋɛn dɩakɩ. 'Blʋ a nyibli, kɔ Nyɩsʋa a ‑cɔhlʋnpinyʋ* gbagbɩ, kɔ Nyɩsʋa a tetetɔɔnyʋ 'hʋɛn‑, ʋ kɔ bʋ yraa 'mʋ, ʋ 'mʋ 'mʋ 'la. 'Bʋ mɔ, 'nɩ 'kʋ, ‑nyrɔwɩ nɩ 'hʋɛn, ta a ‑nyrɔwɔ, Nyɩsʋa di ‑ha 'mʋ 'klɔ.»

23 Nyibli a pɛpɛ, ‑ʋ nɩ 'ʋ, kɛ‑ ɛ pɩ ꞊nʋ yɩ: «Nyiblo 'bʋ nɩ 'ʋ, 'bʋ yɩ꞊ɩ nɩ ‑hʋɛ, bʋ kʋɛ 'mʋ ꞊wien lɛ, ɛ 'nɩ 'kʋɛɛ 'lɩ 'a dɩɔnʋ a 'lulɛ‑hihie ꞊wien lɛ, kɛɛ, ‑tɩ ‑bʋ, 'n di꞊e ‑lee ‑nɩ, ɛ nɔ‑ bʋ nu 'a ‑nɛ ‑nyrɔwɔ, 'ye ꞊bɩɩ nyibli bʋ pʋ lɛ, ʋ 'mʋ꞊ʋ 'la, ‑tɛ ɛ pa 'ʋ, 'ɛ mɔ 'na nyiblo a ‑tɩ. 24 Nyiblo 'bʋ pʋ lɛ, ɛ 'nɩ ‑hʋa꞊a lɩ bʋ 'waan nɛ 'a dɩɔnʋ a ‑hʋnhlʋn, 'kɩ 'nɛ‑ ‑tʋtʋ kɩ, 'kɩ 'ʋ 'na ‑ta', nyiblo a 'mʋ, 'bʋ mɔ, 'bʋ 'kʋ, ɛ di 'a 'klɔ yrayrʋ 'nɩ 'waan ‑nɩ, 'kɩ 'lɩ Nyɩsʋa yɩ. Kɛɛ, nyiblo 'bʋ ‑wɛn, 'kɩ 'a dɩɔnʋ a ‑hʋnhlʋn bʋ 'wan, 'kɩ 'nɛ‑ ‑tʋtʋ kɩ, ‑tɛ ɛ nʋɛ 'mʋ a ‑tɩ, ‑ɛ ‑bɩ nyiblo a 'mʋ, 'bʋ mɔ, 'bʋ 'kʋ, ɛ di kɔ 'klɔ yrayrʋ ‑mʋ', ‑ɛ 'yɛ nɩ ‑wɛ 'lɩ, 'kɩ 'lɩ Nyɩsʋa yɩ. 25 Nyiblo 'bʋ kɔ 'klɔ ‑bʋ a kʋkɔ‑tɛblɩ a pɛpɛ, 'tɩ‑ 'bʋ 'waan nɛ 'a dɩɔnʋ a 'klɔ yrayrʋ, 'kɩ 'lɩ Nyɩsʋa yɩ, kɔ, Nyɩsʋa a ‑bati bʋ klɔ꞊ɔ, kʋkɔ‑tɛblɩ a 'mʋ, ɛ 'nɩ ‑pʋ꞊ʋ 'ʋ꞊ʋ ꞊dedede nɩ. 26 'Bʋ mɔ, 'ba yɩ ‑tʋɩ nɩ pie, 'kɩ 'ʋ nyibli a 'mʋ ye', 'kɩ ꞊bʋ di 'aan Kʋkɔnyɔ' pa, kɔ, 'kɩ ba di 'ʋ 'na win 'ʋ ꞊tuu ‑nɩ, ‑ɛ ‑bɩ 'mɔ ‑bʋ, ‑ɛ mɔ ‑tonyibli a pɛpɛ a Nyiblo, ti ‑mʋ' ‑kɔ 'yri 'n di 'ʋ ‑dii ‑nɩ de, 'kɩ 'lɩ 'na 'Baɩ a ‑tɩ a 'yi'bʋalɛ 'kwli, 'n kɔ 'a lɛlenyʋ 'hʋɛn‑, ti a 'mʋ 'yri, 'na 'mumu, 'n di pie ‑tʋɩ ‑wɛ, 'kɩ 'ʋ Nyɩsʋa ye', 'kɩ ꞊bʋ hla꞊a, ‑ɛ mɔ, a mɔ 'na nyibli. 27 'N yɩ 'a mʋ 'nɩ ‑lee ‑nɩ, ‑ɛ mɔ, 'kɩ 'lɩ 'a mʋ 'nyɩ, nyibli ‑bɩ nɩ 'lɩ, ʋ 'mʋ ‑hʋan꞊a 'ye, ‑tɛ Nyɩsʋa di nyibli a win a kɩkɔɔlɛ nu, 'tɩ‑ ɛ 'mʋ ‑hʋan nyibli a 'mʋ, 'waa 'kʋkʋʋ a ti kɩ yɛ.»

28 ‑Yusu bʋ ‑wɛ 'kɩ ‑tɩ a 'mʋ, 'a hɩhla ‑mɔ, 'a 'wee nɩ ‑do bʋ ‑hi, ‑ɛ ‑bɩ ɛ gba Piɛlɩ, kɔ Saan, kɔ Sakɩ 'hʋɛn‑ nɩ, 'ʋ 'ya 'lɩ dʋgba ꞊dʋ 'lu, ʋ 'mʋ Nyɩsʋa da. 29 Ʋ nɩ 'lɩ Nyɩsʋa a dɩda 'kwli, ‑ɛ ‑bɩ ‑Yusu a yigbakla 'cɩcɩ nɩ, kɔ, 'a wlawlʋ 'ɛ ‑tʋa 'pʋplɛ, 'tɩ‑ 'ɛ yɩ wlɩn dɩakɩ. 30 Ti nɩ ‑do a ti 'yri, ‑ɛ ‑bɩ ʋ 'ye nyibli nɩ 'hʋɛn, ʋ kɔ ‑Yusu 'hʋɛn‑ ‑ʋ pɩ toto. Nyibli a 'mʋ, ʋ nʋ‑ mɔ Nyɩsʋa a winwlɔn‑hanyɔ Moise kɔ Eli 'hʋɛn‑. Nyibli nɩ 'hʋɛn a 'mʋ, ʋ 'kʋ la nɩ, 31 'ʋ 'hrɩɩ 'ʋ ‑Yusu 'hʋɩ, 'kɩ 'lɩ ‑tɩ a 'yi'bʋalɛ ‑mʋ', Nyɩsʋa ‑nyi ꞊nʋ 'kwli. ‑Tɛ Nyɩsʋa ‑hʋɛ ‑Yusu bʋ nu 'kʋkʋʋ, 'kɩ 'lɩ Jrusrɛdɩɔ 'kwli, ɛ nɔ‑ kɔ ‑tɩ ʋ hlɛ. 32 ‑Tɛ dɛ a 'mʋ, ɛ yɩ 'lu ‑mɔ nɩ mi, ‑ɛ ‑bɩ Piɛlɩ kɔ 'a 'bio 'hʋɛn‑, ʋ hlɛ 'lɩ ŋmena' bʋ. Kɛɛ, ‑tɛ ʋ ꞊wlɛɛ 'yii, ‑ɛ ‑bɩ ʋ 'ye ‑tɩ a 'yi'bʋalɛ a 'mʋ nɩ, 'ɛ ꞊glaa 'lɩ ‑Yusu kɔ nyibli nɩ 'hʋɛn ‑nɩ wɛn nɩ. 33 'Tɩ‑ Moise kɔ Eli 'hʋɛn‑, ʋ 'mʋ 'ʋ ‑Yusu 'hʋɩ ‑hɔn mɔ mu, ‑ɛ ‑bɩ kɛ‑ Piɛlɩ pɩ 'kɩ ‑Yusu yɩ, ɛ wɛn: «Tɔɔnyɔ o, ɛ nu ‑tɛɛ, 'kɩ ‑ba nɩ 'nɛ‑ ‑tɩtɛ ‑bʋ bʋ. ‑Ba pʋ papʋɩ nɩ ta, ‑nɛ pʋpa, Moise a ‑nɛ, kɔ Eli a ‑nɛ.» ‑Tɩ bʋ di hla, ɛ 'yɩ꞊ɩ ‑yi. Ɛ nɔ‑ kɔ ‑tɩ 'ɛ ni 'pʋplɛ lɛ.

34 Piɛlɩ nɩ 'lɩ 'pʋplɛ 'kwli, ‑jru 'ɛ 'hrɩɩ 'ʋ, 'ɛ ‑hli ‑Yusu kɔ Moise kɔ Eli 'hʋɛn‑. ‑Tɛ Piɛlɩ kɔ 'a 'bio 'hʋɛn‑, ʋ 'ye dɛ a 'mʋ, ‑ɛ ‑bɩ hʋannʋ bi 'lɩ ꞊nʋ 'kwli. 35 'Kɩ 'lɩ ‑jru a 'mʋ 'kwli, 'kɩ Nyɩsʋa a win ‑hʋɛn 'lɩ ‑wlu, 'ɛ pɩ lɛ: «Nyiblo ‑bʋ, ɛ nɔ‑ mɔ 'na 'Yu. Ɛ nɔ‑ 'n ‑ha, 'kɩ 'ʋ 'na ‑kʋan a ‑ta'. Ba pʋ꞊ʋ nʋa yɩ bʋ.» 36 Bʋ 'wɩn win a 'mʋ, ‑ɛ ‑bɩ ‑Yusu nɩ ‑do 'a ‑nagbopʋ* yɩ 'kɩ 'ye. ‑Tɛ ʋ ꞊tɩ 'lɩ dʋgba a 'mʋ 'lu, dɛ a 'mʋ, ‑Yusu a ‑nagbopʋ 'ye, ʋ 'yɩ꞊ɩ nyiblo ꞊dʋ ‑lee ‑nɩ, 'ɛ gba ti ‑hʋɔhʋɩ.

37 ‑Tɛ ‑nyrɛ ‑nyɛ, ‑ɛ ‑bɩ ‑Yusu kɔ 'a ‑nagbopʋ* nɩ ta ‑mʋ' 'hʋɛn, ʋ ꞊tɩ dʋgba. ‑Tɛ ʋ ꞊tɩ 'kɩ dʋgba, ‑ɛ ‑bɩ nyibli ‑hʋɔhʋɩ di ‑Yusu ye' 'bɛ mɔ. 38 'Kɩ 'lɩ nyibli ‑hʋɔhʋɩ a 'mʋ 'nyɩ, 'kɩ nyiblo ꞊dʋ nɩ 'lɩ, 'ɛ 'yɛɛ 'lɩ win, 'ɛ pɩ lɛ: «Tɔɔnyɔ o, 'n nyaa ‑mʋ lɛ, 'ye 'na 'yu nyɩbɛhɩan. Ɛ nɔ‑ mɔ 'na 'yu nɩ ‑do. 39 Ɛ kɔ ti, 'ku ‑hʋan 'ɛ 'yɛ꞊ɛ klɛ, 'ɛ ni꞊e, 'ɛ 'gbugbe lɛ, 'ɛ bʋblɛ꞊ɛ blɛ dɩakɩ, 'ɛ ni꞊e, hɩʋnplu 'ɛ nyrɛ꞊ɛ wien bʋ, 'ɛ ꞊tui꞊e ꞊hɩʋɛn. Ɛ gbɛ ti ‑hʋɔhʋɩ, 'tɩ‑ 'ɛ ‑hʋɛn 'ʋ꞊ʋ ke'. 40 'N nyaa ‑na ‑nagbopʋ lɛ, 'kɩ bʋ bla 'ku ‑hʋan a 'mʋ lɛ, kɛɛ, ʋ 'yɩ 'lɩ꞊ɩ 'lɩ ‑wɛ.» 41 Kɛɛ, kɛ‑ ‑Yusu pɩ, 'ɛ yɩ 'a ‑nagbopʋ ‑lee ‑nɩ, ɛ wɛn: «A mɔ nyibli ꞊nɩɔ, ‑ʋ 'yɩ Nyɩsʋa ꞊wlʋ yɩ ‑kuo ‑nɩ ‑tɛɛ, 'tɩ‑, ‑ʋ 'yɩ ꞊haandɛ kɔ dɛ ‑hʋan a 'yilɛ‑hɩhɩalɛ ‑yi. Ti nɩ ‑tie 'n di 'nɛ‑ 'a mʋ 'nyɩ ‑hii ‑nɩ, 'tɩ‑ a 'mʋ Nyɩsʋa ꞊wlʋ yɩ ‑kuo ‑nɩ 'lɩ? ꞊Bɩ kɛ‑ 'n di nu 'a ‑nɛ ti, 'mʋ 'a mʋ lɛ ‑kikle ‑nɩ nɩ ‑do? Ya 'mʋ ‑na 'yu a 'mʋ yɩ.»

42 ‑Tɛ 'yu a 'mʋ, ɛ 'yɩyɛ 'ʋ ‑Yusu 'hʋɩ bʋ, ‑ɛ ‑bɩ 'ku ‑hʋan a 'mʋ, ɛ pʋ꞊ʋ ꞊hlɔn, 'ɛ ‑tʋa 'a blɛ‑huhlilɛ. Ɛ nɔ‑ mɔ ‑Yusu bʋ hlee 'lɩ 'ku ‑hʋan a 'mʋ ‑mɔ, 'kɩ 'lɩ win 'yaklɩ 'kwli, 'tɩ‑ 'ku ‑hʋan 'a mʋ, 'ɛ ‑hɔn la 'ʋ 'yu a 'mʋ ke'. Kɛ‑ ‑Yusu ‑nu, 'tɩ‑ 'yu a 'mʋ, 'a 'kʋɛ 'ɛ ‑wɛ. 43 Nyibli a pɛpɛ ‑mʋ', ‑ʋ nɩ la 'ʋ ‑tɩtɛ a 'mʋ, ɛ kɛɛ la 'waa ꞊wlɩ lɛ, 'kɩ 'ʋ Nyɩsʋa a 'klɩ a kɩnɩnɩɩ a ‑ta'.

‑Tɛblɩ ‑mʋ', ‑Yusu ‑nu, ɛ 'tɩɛ kɛɛ nyibli a ꞊wlɩ lɛ. ‑Ɛ ‑bɩ kɛ‑ ‑Yusu pɩ 'a ‑nagbopʋ* yɩ, ɛ wɛn: 44 «Ba pʋ 'mʋ nʋa yɩ bʋ ‑tɛɛ, ‑tɩ ‑mʋ', 'n di 'a mʋ ‑lee ‑nɩ, a 'mʋ꞊ʋ kʋa 'ble ‑tɛɛ: 'Mɔ ‑bʋ, ‑ɛ mɔ ‑tonyibli a pɛpɛ a Nyiblo, ʋ kɔ bʋ pʋ 'mʋ nyibli ‑jɩ'.» 45 ‑Tɩ a 'mʋ, ‑Yusu ‑hla, 'a ‑nagbopʋ 'yɩ꞊ɩ lɛ ‑yru. Kɛɛ, ʋ yɩ pie hʋannʋ, 'kɩ bʋ 'bɛti꞊e, dɛ‑ windɛ a 'mʋ, ɛ ꞊hɛn 'nyrɛ.

46 ‑Tɛ dɛ a 'mʋ, ɛ ‑hi, ‑ɛ ‑bɩ ‑Yusu a ‑nagbopʋ* pɩpɩ꞊ɩ' lɛ, nyiblo a 'dɩ ‑bɩ ‑bʋ di 'ʋ 'a 'bɩ 'lu yɩ nɩ, 'kɩ 'lɩ ꞊nʋ 'nyɩ. 47 Dɛ a 'mʋ, ʋ yɩ 'lu ‑mɔ lɛ ‑hie, ‑Yusu yi꞊e nɩ. Ɛ nɔ‑ mɔ bʋ da 'hɩangbe, bʋ ꞊tu꞊o 'ʋ 'a dɩɔnʋ 'hʋɩ bʋ, 48 ɛ wɛn: «'A ‑nɛ nyiblo 'bʋ nɩ 'ʋ, ‑tɛ 'hɩangbe ‑bʋ ɛ nɩ 'mʋ, 'bʋ 'ble 'a nyɔ kʋa ‑tɛɛ, 'kɩ 'ʋ 'na 'nyrɛ a ‑ta', ‑ɛ ‑bɩ 'mɔ ɛ 'ble kʋa. Ɛ kɔ, nyiblo, ‑ɛ 'ble 'mʋ kʋa, ɛ 'ble Nyɩsʋa kʋa ‑wɛ, ‑ɛ lee 'nɛ‑ 'mʋ ‑tʋtʋ kɩ. Nyiblo ‑mʋ', ‑ɛ 'yɩ nyiblo ꞊dʋ 'pa‑, 'kɩ 'lɩ 'a mʋ 'nyɩ, sɛyɩ‑sɛyɩ, ɛ nɔ‑ mɔ nyiblo, ‑ɛ nɩ 'ʋ 'a 'bio 'lu yɩ.»

49 ‑Ɛ ‑bɩ Saan, ‑ɛ mɔ ‑Yusu a ‑nagbopi* ‑bɩ, ɛ wɛn: «Tɔɔnyɔ o, ‑a 'ye nyiblo ꞊dʋ, 'ɛ blɛ 'kuo ‑hʋɩn* lɛ, 'kɩ 'lɩ ‑na 'nyrɛ 'kwli. ‑A mʋ ‑mɔ ‑bɩ, ‑a lee ꞊nɛ nɩ, ‑ɛ mɔ, bʋ 'kee nɛ 'a nunuo, ‑ɛ nu꞊o, ɛ 'nɩ ‑kʋɛ꞊ɛ mɔ ‑a mʋ ꞊wien lɛ.» 50 ‑Ɛ ‑bɩ ‑Yusu wɛn: «A 'nɩ 'lee 'lɩ꞊ɩ, ‑ɛ mɔ, bʋ 'kee nɛ 'a nunuo, ‑ɛ nu꞊o, nyiblo 'bʋ nɩ 'ʋ, 'bʋ 'yɛ nɩ ‑wɔn 'a mʋ yɩ, ɛ kɔ 'a mʋ 'hʋɛn‑, 'a mʋ ‑pɛ.»

51 Ti ‑mʋ' ‑kɔ 'yri Nyɩsʋa di꞊e nu, ‑Yusu 'mʋ 'lɩ yakɔ 'kwli mu, ti a 'mʋ, ɛ 'mʋɛ yrɛ. Ɛ nɔ‑ kɔ ‑tɩ 'ɛ ‑yra꞊a, 'kɩ bʋ mu 'lɩ Jrusrɛdɩɔ 'kwli, 52 'ɛ lee nyibli, bʋ 'nyɛɛ 'hru, nyibli a 'mʋ 'ʋ ‑mu, 'ʋ nyre 'lɩ Samaliblʋgba a 'dɩɔ ‑bɩ 'kwli, ‑ɛ di꞊e nu, ʋ 'mʋ 'kayu lɛ ꞊mʋɔ, ‑ɛ kɔ bʋ ‑Yusu di 'lɩ pa. 53 Kɛɛ, 'dɩɔ a 'mʋ, 'a nyibli hɩa nɩ, 'kɩ bʋ 'ble ‑Yusu kʋa, ‑ɛ nu꞊o, ɛ mi 'lɩ Jrusrɛdɩɔ 'kwli. 54 ‑Tɛ ‑Yusu a ‑nagbopʋ* Sakɩ kɔ Saan 'hʋɛn‑, ʋ 'wɩn, ‑ɛ ‑bɩ ʋ wɛn: «Kʋkɔnyɔ, ꞊bɩ ‑hʋɛ꞊ɛ nɩ, 'kɩ ‑ba nu꞊o, ‑tɛyɛ bʋ ‑hɔn 'lɩ yakɔ 'kwli, bʋ ꞊tɩ, ɛ 'mʋ nyibli ‑bʋ bʋ ‑wɛ?» 55 ‑Ɛ ‑bɩ ‑Yusu ꞊hɩan ‑mɔ, 'ɛ 'plɛ ꞊nʋ ‑mɔ, 'kɩ 'ʋ ‑tɩ a 'mʋ, ʋ ‑hla a ‑ta'. 56 ‑Tɛ dɛ a 'mʋ, ɛ ‑hi, ‑ɛ ‑bɩ ʋ mu 'lɩ 'dɩɔ ‑bɩ 'kwli.

57 ‑Tɛ ʋ nɩ 'hru wlɔn, ‑ɛ ‑bɩ nyiblo ꞊dʋ lee ‑Yusu nɩ, ɛ wɛn: «'A ‑nɛ ‑tɩtɛ, ‑di 'ʋ mu, 'n di kʋɛ ‑mʋ ꞊wien.» 58 ‑Ɛ ‑bɩ ‑Yusu ꞊tu꞊o ‑wɔn, ɛ wɛn: «'Wan 'kwli a mamʋɩ kɔ bʋpɛɛlɛ, nʋblɩ 'ʋ kɔ 'lʋɛ, kɛɛ, 'mɔ ‑bʋ, ‑ɛ mɔ ‑tonyibli a pɛpɛ a Nyiblo, 'n 'yɩ bʋpɛɛlɛ ꞊dʋ ‑kɔ, ‑tɛ 'n di 'ʋ ke lɛ ‑haa ‑nɩ.» 59 ‑Ɛ ‑bɩ kɛ‑ ‑Yusu pɩ nyiblo ‑bɩ yɩ, ɛ wɛn: «Kʋɛ 'mʋ ꞊wien, ꞊mʋ 'na ‑nagbopi* ‑hɛ.» ‑Ɛ ‑bɩ nyiblo a 'mʋ, ɛ ꞊tu꞊o ‑wɔn, ɛ wɛn: «Tɔɔnyɔ o, 'tɩ‑ 'mʋ ‑mʋ ꞊wien kʋɛ, ‑ha 'mʋ mɛ lɛ, ꞊bʋ mu, ꞊bʋ ‑ha 'ʋ 'na 'baɩ, ‑ɛ 'kʋ, 'tɩ‑ 'mʋ di, 'mʋ ‑mʋ ꞊wien kʋɛ.» 60 ‑Ɛ ‑bɩ ‑Yusu wɛn: «Ɛ 'yɩ ‑na ‑kʋan 'pa‑, 'kɩ ‑bʋ ‑ha 'ʋ 'kʋkʋkui lɛ. Kɛɛ, mu ‑bʋ lee nyibli, ‑ɛ mɔ, Nyɩsʋa ‑hʋɛ bʋ kɔɔ ꞊nʋ win kɩ.» 61 Nyiblo ‑bɩ nɩ 'ʋ, ɛ wɛn: «Tɔɔnyɔ o, 'n di kʋɛ ‑mʋ ꞊wien, 'mʋ ‑na ‑nagbopi ‑hɛ. Kɛɛ, ‑ha 'mʋ mɛ lɛ, ꞊bʋ ti 'na 'dʋkʋɛ, 'tɩ‑ 'mʋ 'lɩ di, 'mʋ ‑mʋ ꞊wien kʋɛ.» 62 Kɛ‑ ‑Yusu pɩ, 'ɛ yɩ꞊ɩ ‑lee ‑nɩ: «꞊Wɩ nyiblo ‑mʋ' yɩ, ‑ɛ klɔ ‑ci, 'tɩ‑ ‑ɛ 'kee nɛ 'a ‑cicie. Nyiblo 'bʋ yɩ ‑kʋan a nunuo lɛ nɩ ni, ‑ɛ ‑bɩ Nyɩsʋa 'yɩ 'lɩ꞊ɩ 'lɩ ‑wɛ, bʋ nu꞊o 'a ‑kʋannunyɔ ‑mɔ'.»