No Pakpakat ta Pol tupas ira
GALESIA
Pol gate so ira lotu tano hanuo Galesia (ari diet lik bia tano uno luena hinahaan ma ari diet lik bia tano uno airuo na hinahaan). Ma kaike ra matanaiabar na Galesia diet pai Iudeia. Diet pa ga murmur ira harkurai ta Moses. Taie. Diet ga nurnur sen mon ta Jisas ma God ga halon diet. Iesen namur dahin, bia Pol gate haan laah, ari a tena harausur bisbis diet ga haan tupas ira Galesia ma diet ga hinawase diet bia pai tale bia tikai na kap no nilon hathatika ing bia i nurnur ta Jisas sen mon. I supi mah bia na mur ira harkurai ta Moses, ma tiga tamat na harkurai no magingin na kut palatamaina tunotuno wara hamines bia aie tikai ta ira matanaiabar ta God. Ma bia Pol ga ser leh iakan ra harausur ga manga ngalngaluan ma ga karup mah bia ira Galesia diet na kanan wara hanhadoda ta iakan ra harausur ing i mes harsakit tano tutun na tahut na hinhinawas ing diet ga kap usuranei mekatiga ho Pol (nes Galesia 1.6-9). Pol ga wara hamhamines ta diet bia iakano tahut na hinhinawas sen mon i tale bia na halon diet. Pol ga hamines bia no uno hinarpir i tutun kanong God at ga tibe ie bia aie tiga apostolo ma ga tar iakano hinhinawas tana (1.11–2.10). Ma no suruno tano tahut na hinhinawas, ma no suruno ta iakan ra pakpakat mah i hoken, bia God na kure bia tikai i takodas ra matmataan tana ing bia i nurnur sen mon ta Krais, ma pataie bia i murmur ira bilai na magingin ta ira harkurai ta Moses (2.16-21). Pol ga hamines bia pataie tikai pai tale bia na mur ira harkurai ta Moses, kaik God i sip bia dahat na nurnur sen mon hoing Abraham ga nurnur waing God na kure bia dahat takodas ma bia dahat na langalanga sukun kaike ra dadas na harkurai (3.1–4.31). Ma sen pai tahut bia dahat ing dahat pai kis ra hena ira harkurai bia dahat na gil ira sakena (5.1-15). Taie. Tano udahat nurnuruan dahat langalanga um wara murmur ira tahut na tintalen hoing no Halhaliana Tanuo na lamus dahat bia dahat na lon huo (5.16-26).
1
1 Iau Pol tiga apostolo. Ma ari a tunotuno mon diet pai le tibe iau bia iau tiga apostolo, ma tiga tunotuno pai le tule iau mah huo. Iesen iau te kap no kinkinis na apostolo mekatiga ho Jisas Krais ma God no adahat Sus nong ga hatut ie sukun ra minaat. 2 Io, iau tika ma ira hinsakagu ta Krais ing diet kis tika ma iau, mehet pakat iakan ukaia ho muat ira matanaiabar na lotu ta ira tamtaman aras tano hanuo Galesia. 3 Iau sasaring bia God no adahat Sus ma no Watong Jisas Krais na tar ra harmarsai ma ra malum ta muat. 4 Io, Krais ga tar se no uno nilon ga maat bia na halon dahat sukun ira sakana tintalen ta iakan ra pakana bung. Ma ga maat huo haruat tano sinisip gar ta Mama no udahat God. 5 Io, tutun sakit, dahat na pirlat God hathatikai.
Tiga tahut na hinhinawas sen mon kana.
6 Maris! No balagu i manga karup bia gasien sakit muat hanhan talur iakano nong ga tatau muat. Ma ga tatau muat hohe? Ga tabar muat ma Krais. Ai! Gasien sakit muat sisiel ta tiga mes na hinhinawas di tange bia no tahut na hinhinawas. 7 Iesen pataie bia tiga mes na hinhinawas aie no tahut na hinhinawas tutun. Ma iau tange mon huo kanong ari diet gilgil hangunguo muat ma diet sip bia diet na pukusane hagahe no tahut na hinhinawas uta Krais. 8 Ing bia mehet at bia tiga angelo at meram ra mawe naga harpir ta muat ma tiga mes na hinhinawas ta nong mehet ga harpir mei, io, iau saring God bia na haliare tun at balik ie. 9 Hoing het ga tange nalua, kaiken iau tange habalin hoken: ing bia sige tikai i harharpir ta muat ma tiga mes na hinhinawas ta nong muat ga bale leh, io, iau saring God bia na haliare tun at ie.
10 Muat lik hohe? Ing bia iau tange huo i nanaas bia iau sip bia ira tunotuno diet na haut leh iau? Taie tun at! Sen bia iau sip bia God na haut leh iau. Hohe, i nanaas bia iau wara haguama ira tunotuno? Taie. Ing bia iau gaar walwalar baak wara haguama ira tunotuno, io, pa gaar tale bia ni tiga tultulai gar ta Krais.
God at ga tibe Pol bia na apostolo, ma taie bia tiga tunotuno ga tibe ie.
11 Ira hinsakagu ta Krais, iau sip bia muat na palai bia no tahut na hinhinawas nong iau ga pirpir muat mei pai hanuat mekaia tiga tunotuno. 12 Taie ta tunotuno ga hinawase iau bia ga hausur iau utana. Iesen Jisas Krais ga hapuasnei tagu.
13 Io, muat gate hadade tar utano nugu mangana nilon nalua ing iau ga kis taar ta ira mangana nurnuruan ta mehet ira Iudeia. Iau git manga helar ta ira matanaiabar tano lotu gar ta God ma iau git walwalar bia ni haliarei. 14 Iau ga manga keskes ta diet ira halengin ta ira nugu harwis wara murmur timaan ira magingin ta mehet ira Iudeia. Ma iau ga taram ira harausur ta ira hintubugu ma ra but na gungunuama ma ra tamat na baso. 15-16 Iesen God ga gilamis leh iau tano uno harmarsai nalua tano pakana bung di ga kaha iau ma ga tatau iau wara uno. Ma ga sip bia na hapuasne no Natine tagu ma uram narako ho iau waing nigi harpir nalamin ta diet ing diet pai Iudeia. Ma ing bia God ga gil huo iau pa ga kap ta pirpir ta tiga tunotuno uta iakan ra hinhinawas. 17 Ma iau pa ga haan mah uram Ierusalem ta diet ing diet ga kap no kinkinis na apostolo nalua tagu. Iesen iau ga gasien uras Arebia ma iau ga tapukus baal uram Damaskas.
18 Io, aitul a tinahon gate sakit ma iau ga haan uram Ierusalem wara numir harnunurai ma Pita. Ma iau ga kis tika mei ra sangahul ma liman na bung. 19 Sen bia iau pa ga nes tikai ta diet ira mes na apostolo, Jemes sen mon, no tasine no Watong. 20 Io, iau sasalim ra matmataan ta God uta ira linge iau pakpakat ukaia ho muat bia pai a harabota. 21 Io, namur iau ga haan uras ta ira iruo hanuo Siria ma Silisia. 22 Ma ira lotu ta Krais aras tano hanuo Iudeia diet pa ga nunure iau. Taie. Diet pa ga tale bia diet na nes kilam mah no matmataan tagu. 23 Iesen diet git saser mon iakan ra hinhinawas nong ga tange hoken: “Aie nong ga helar baak ta dahat, kaiken i harharpir utano tahut na hinhinawas nong dahat nurnur tana. Ma nalua ga walar bia na haliare iakan ra hinhinawas.” 24 Ma diet ga pirpirlat um God wara utagu.