1 Naapkaçxha' Saulo yu' ikhwẽena nesku yu' Jesusa's nwẽese'jsawe'sxtxi. Txãasak sacerdote npiiçthẽ'j tasxna u'j, 2 karta pẽjxya' Damasko çxhabna u'jçxa judiuwe'sx pkhaakheni yat-su Jesusa's nwẽese'jsatx pakweçxa' piçthẽ'j petx u'y tudçxa Jerusalenna preesu jxũna u'jya'. 3 Damaskote pa'jya' utxaana u'jweçpkaçxha', txajx dxi'pte uymeenusku cieluju eena'sa kweeth. 4 Aça' Saulo' weteçxa' wẽse'kh na'wẽ we'weni's:

—Saulo, Saulo, ¿kĩh yũupa'gaga adxa's ahçeçxa pkxuuya' pakwé'? jĩte', Saulo' pẽjxku:

5 —Idxa' ¿kimga? jĩna. Sa' na'wẽ we'weni'sku wẽse'j:

—Adxíi Jesusthu, idx na'wẽ ahçeçxa pkxuuya' pakwe'g txãath. Idxa' peekíiçxáa ya'kpã'yuuwa'ja's pakwena ũsgu jĩte', 6 Saulo' ũukhnite yayana na'jĩk:

—Idxa' ¿kĩhga yũu jxthãasu' adxa's? jĩte', na'wẽk pas Jesusa':

—Kiiteçxa me'j çxhabna. Kxtee pa'the ya'pta'sxina kĩh yũuwa'ja'swa jĩk.

7 Txã'wẽ yũute', Saulo yakh u'jsa' wala ũukhtxi, txã'wẽ puutx we'wetewa kimnawa uymeeçxa. 8 Txajũ' Saulo' kiiteçxawa uyya' ãjame'. Aça' pu'kisçxa jxũna u'jtx Damaskon. 9 Kxte' tekh en uyya' ãjamée, txã'wẽy kĩhwa ũ'meek u'pu'.

10 Damaskote' Jesusna nwẽese'jsa Ananias yaasesak u'pu'. Txã'sa' Jesus vxyaaçxa na'wẽk we'we:

—Ananias jĩna pa'yate', Ananias pasçxa':

—¿Kĩh kaajxa'waga? jĩte', 11 Jesus we'weçxa':

—Teeçx klxiikhun Ku'le yaasesate me'j. Kxtee pa'jçxa Judas yatte pẽyine'ga: Teeçx piçthẽ'j Tarsojuwe'sx Saulo yaasesa's peejxthu jĩna. Txãa piçthẽ'ja' Dxus yakh puutx we'wena u'pa'. 12 Sa' teeçx piçthẽ'j Ananias yaasesa pa'jçxa ki' uyya' ãjakahn txajx kakwete peekizeeçtek ksxa'w.

13 Txã'jĩna we'weni's wẽse'jçxa' Ananiasa' na'jĩk:

—Adxa's maawa wala iipta'sxta' Jerusalente idx yakh fxi'zesawe'sxtxi txã'wẽ wala pkxuusa' txãa piçthẽ'ja' jĩ'tx. 14 Sa' ãçxwa naa çxhabte yuja' sacerdote npiiçthẽ'jwe'sxtxi karta pẽjxçxa idxna yaakxsawe'sxtxi preesu jxũna u'jya' jĩte', 15 Jesus pasçxa':

—Idxa' me'jçxáa. Txãa piçthẽ'ja' adx txhitxhnisa' adx yuwe's pta'sxwa'jsa nasa vxite kiwejuwe'sxtxi, jxkaahsawe'sxtxi, sa' Israelwe'sxtxiwa pta'sxwa'jsa'. 16 Adxa' txãa piçthẽ'ja's pta'sxi'nja adxna selpiina u'jupa'ga makwe pkxuuni yuuwa'ja'swa jĩte', 17 Ananiasa' Saulo u'pni yatna u'jçxa', txajx kakwete peekizeçxa na'jĩk:

—Yakhthẽ'j Saulo, dxi'the idx yuhte Jesus vxyaane' txãak adxa's kaah idx ki' uyya' ãjaçxa Dxus Espiritu's ũuste jxuka jxpa'gakahn jĩçpkaçxha', 18 yafxte aphsa ubute', ki' uyya' ãjaçxa', kiiteçxa ya'bautisãyku. 19 Txajũ' ũ'wa'ja's ki' jxpa'gaçxa çxhãçxhak, sa' Damaskotee ũsu'k maz enwa Jesusa's nwẽese'jsawe'sx yakh.

20 Txajũ' Saulo' Dxus yuwe's pta'sxya' takhku judiuwe'sx pkhaakheni yat-su Jesusa' Dxus Nçxi'ka' jĩna. 21 Aça' wẽse'jsa jxukay kuh yajkxna na'wẽtx we'we':

—¿Naa piçthẽ'jíi txã'wẽ Jerusalente Jesusa's neewe'wesatx ikh wẽena fxi'zesameená'? Sa' ¿txã'wẽy aytewe'sxtxiwa preesu jxũna u'jçxa sacerdote npiiçthẽ'jwe'sx kusete dukhya' sũhçxa yuusa yu'çmeená'? jĩ'tx.

22 Txã'jĩçtewa Saulo yu' jweeíiçxáak çxhãçxha pta'sxi' Jesusa' Dxus tasxu yuusa Kristo yuh yu'k jĩna, sa' kxtee Damaskote judiuwe'sxtxi ma'wẽ paswa'ja's yuhwa ji'phmeek nvxiitu'.

23 Txãa e'su txaçxte', judiuwe'sxa' Saulo's ikhya' puutx we'weçxa 24 çxhabu kasehni vxitxte en kuswa yupna nestxi yuu. Aça' txã'wẽ yũuni's Saulo' jiyuk. 25 Aça' Saulo's pi'kxna u'jusawe'sxa' kusçxáa Saulo's kanasta walate akhçxa çxhab peeku'j uphnikhẽtx ekaju spajkx açesa kusejũ nwe'weya'.

26 Txãa e'su' Saulo' Jerusalente pa'jçxa', Jesusa's nwẽese'jsawe'sx yakh pkhaakhe wẽek. Nawa kxteewe'sx jxukaysa ũukhtxi Jesusa's nwẽese'jsameewáana sũhçxa. 27 Txã'wẽtewa Bernabé yu' pe'jna u'jçxa Jesus jxkaahnisawe'sx tasxte nuypa'jçxa na'wẽk pta'sx:

—Saulo's Jesus vxyaak Damasko dxi'the u'jweçte, sa' txãa yakh puutx we'wek. Aça' Saulo' Damaskote pa'jçxa Jesus kaapiya'jniçxaçxá'sku pta'sxna ũsu' jĩna pta'sxte', Saulo's ũukhmée jxpa'gatx. 28 Aça' Jerusalente ũsu'k txãawe'sx yakh pkhaakhena. 29 Sa' judiuwe'sx griego yuweju we'wesa yakh ũukhmeek puutx we'we' Jesus kaapiya'jni's pta'sxna. Nawa txãawe'sx yu' ahçeçxa ikhya'watx yu'. 30 Aça' txã'wẽ yũuni's yakhthẽ'jwe'sx jiyuçxa', Saulo's pe'jna u'jtx Cesarea çxhabna. Txajũ Tarso çxhabnatx kaah.

31 Txajũ' Dxus yakh fxi'zesa Judea, Galilea, Samariasuwe'sxa' kim yuhnawa ũukhmée jweeíiçxáatx çxhãçxhana u'j Dxusçxáana nwẽese'jna. Aça' Dxus Espiritu pu'çxte', jweeíiçxáatx pehnana u'j.

32 Txajũ' Pedro' yakhthẽ'jwe'sxtxi Dxus yuwe's pta'sxya' kasehçxa', Lida çxhabte Jesusa's nwẽese'jsawe'sxtxiwa thegya' u'kh. 33 Kxte' teeçx piçthẽ'j Eneas yaasesa oçxo anxuk ãça'na ũsu' ẽseya' ãjameeçxa. 34 Aça' Pedro' na'jĩk:

—Eneas, idxa's Jesukristo nuykatxhina. Aça' kiiteçxa iidx deeni's mkiis jĩçpkaçxha', txãa piçthẽ'ja' naa dudtey kiitek. 35 Aça' kxtee Lida çxhabte vxite' Sarón kiwete ũssa jxukaysa uyçxa', Jesusa's nwẽese'jya' utxaatx.

36 Txãn ensu' Jope çxhabte Jesusa's nwẽese'jsa teeçx u'pu'k Tabita yaasesa. Txã' griego yuwete' Dorkasku yaase yu'. Txãa u'ya' wala pu'çxna fxi'ze'k maawa peejxsatxi'. 37 Txãa ensu' Dorkasa' ãça'çxa uuk. Aça' uuníi kakwe's kpẽeu'jçxa ẽe yatgatx khikh. 38 Pedro ũsni Lida çxhaba' Jope çxhab yakh utxak yu'. Aça' Jope çxhabte Jesusa's nwẽese'jsawe'sxa' Pedro' Lida çxhabte ũsa' jĩni's jiyuçxa', e'z piçthẽ'j kaahtx Pedro's na'wẽ pta'sxya':

—Jxthẽeyuumée Jope çxhabna myuh jĩte', 39 Pedro txãawe'sx yakh u'jçxa kxte pa'the', pe'jna u'jtx uusáa ũsniga. Aça' vxiudawe'sx jxukaysa ũ'nena pkhaakheçxa pta'sxtxi Dorkas nee ĩtxiy kmiisa umçxa peesnitx. 40 Txajũ' Pedro' jxukaysatx eka kutxi'jna'wa, peejxũkweçxa Dxus yakh puutx we'wena'wa uusá's thegçxa na'jĩnak we'we:

—Tabita, mkiitewe jĩçpkaçxha', txãa uusá' thegçxa Pedro's uyna'wa kiiteçxa kaçxku. 41 Txajũ' Pedro' pu'kisçxa kxuuju'jna'wa, Dxus yakh fxi'zesawe'sx vxite' vxiudawe'sxtxi pa'yaçxa, ĩtxik dukh. 42 Txã'wẽ yũuni's Jope çxhabtewe'sx jxukaysa jiyuçxa', wala kuhsa Jesusa's nwẽese'jya' utxaatx. 43 Txajũ' Pedro' Jope çxhabte kuh enku ũsu' kha'tx weysáa Simon yatte.