1 Cesarea çxhabte teeçx soldau kpiitan Kornelio yaasesa u'pu'k. Txã' Italiajuwe'sx soldautx jxkaahsak yu'. 2 Txãa piçthẽ'ja' Dxusna weçxana fxi'zesak yu', txajx yattewe'sx jxukaysa yã'jçxa. Sa' Dxus yakh pu'vxituméek puutx we'wena fxi'ze', txã'wẽy vxyuuwa wala pu'çxhi'k judiuwe'sxtxi. 3 Teeçx ente kusuçte las treste' Dxus angel txajx tasxte u'kaçxa na'jĩna we'weçtek uy:

—¡Kornelio! jĩna pa'yate', 4 txãa piçthẽ'ja' wala ũukhna Dxus angela's thegçxa' na'wẽk pas:

—¿Kĩh pẽjxga? jĩte', Dxus angel we'weçxa':

—Idxa' txã'wẽ peejisaatx pu'çxna Dxus yakh pu'vxitumée puutx we'wena fxi'zeni's Dxusa' wẽse'kh. 5 Aça' idxa' Pedro's pe'jya' mkaah Jope çxhabna. 6 Txãa Pedro' kha'tx weysáa Simon yatte paadehna ũsa' ĩkh wala pukate. Aça' Pedro pa'jçxa pta'sxina idx ma'wẽ yũuwa'ja'swa jĩte', 7 txãa angel u'jweçpkaçxha' Kornelio' e'z selpisáa vxite' teeçx soldau Dxus dxi'pte ew fxi'zesa txãawe'sxtxi pa'yaçxa, 8 jxuka pta'sxna'wa Jope çxhabna kaakh.

9 Txãawe'sxa' kuskuskhẽ Jope çxhabte utxaana pa'jaçpkaçxha', ẽepxãh yuuçte' Pedro' tejkak ẽe yat pwa'te Dxus yakh puutx we'weya'. 10 Sa' Pedro' wala wẽek, aça' txajx ũ'wa'j pheu'juçtxi yu'. 11 Naapkaçxha' Pedro' uyku cielukhẽ tela wala na'wẽsa puutx vxiçte tudçxa nuykĩjaçte. 12 Kxte yu' niimal yu'kh eçx, ul, vxiçxakwe kazxsatx jxuka ãsxnisak ji'phu'. 13 Txajũ' na'wẽ we'weni'sku wẽse'j:

—Pedro, kiiteçxa naa niimaltxi' ikhçxa mẽ' jĩte', 14 Pedro pasçxa':

—Adxa' bagaçxte yuhwa na'wẽ niimal kazxsa yuutxi' ũ'wa'jsameeth jĩk.

15 Aça' ki' we'weni wẽse'kh:

—Dxus yaatenisatxi' idxa' kazxsata' jĩwa'j ji'phmeeg ãçxha'.

16 Txã'wẽ tekh uswa vxyaaçxak, txãa tela wala na'wẽsa' ki' cieluníi pu'kisni yuu. 17 ¿Kĩh yũukahnki'k txã'wẽ vxyaa? sũhna Pedro u'ppkaçxha', Kornelio kaahnisa' pa'jtx Simon yata's paapẽjxna. 18 Sa' sustxi pa'yana kũh:

—¿Naa yatte paadeesa Simon Pedro yaasesa ũsmeená'? jĩna.

19 Pedro' txã'wẽ uyni's ũus yajkxna u'piyna, Dxus Espiritu' we'wek:

—Tekh piçthẽ'j idxa's paapẽjxna ũsta'. 20 Aça' kiiteçxa txãawe'sx yakh me'j kuh yajkxmée. Txã'wẽme', txãawe'sxa' adx kaahni yuhta' jĩte', 21 Pedro sa'jçxa Kornelio kaahnisawe'sxtxi pẽjxku:

—¿Ma'jĩya'kwe yuwé'? I'kwe'sx pakwenisa' adxthu jĩte', 22 txãawe'sxa' pta'sxtxi:

—Soldau kpiitan Kornelio kaahni yuhtha'w. Txãa piçthẽ'ja' wala ew zhiçxkwe fxi'ze'k Dxusna nwẽese'jna, aça' txã'sa' judiuwe'sx jxukaysa wala wedxi'tx. Sa' teeçx ente' Dxus angel vxyaaçxa' idxa's pa'yakahn yuwe nvxihtga. Kxah Kornelio' jiyuna kĩh pta'sxwa'j ji'phne'ga txã'sna.

23 Txã'jĩte', Pedro' txajx deenite ka'ga'jçxa, kxte dehçxa kuskuskhẽ' Pedro' u'kh txãawe'sx yakh, aça' kxte Jope çxhabte yakhthẽ'jwe'sxwa u'jtx pi'kxna.

24 Kuskuskhẽ' Cesarea çxhabte pa'jtx, aça' kxte' Kornelio' ũythasnak ũsu' txajx nwe'sx vxite' txajx namiku yakh pkhaakheçxa. 25 Pedro pa'jaçpkaçxha', Kornelio' jxpa'gaya' kasehçxa Pedro tasxte peejxũkwek weçxana. 26 Nawa Pedro' pu'kisçxa na'wẽk we'we:

—Adxa's peejxũkwenu. Adxa' idx na'wẽysa íiçxáath jĩçxa', 27 Kornelio yakh puutx we'wena dxiite u'kaççxa', kxte yu' wala kuh pkhaakheçxa ũstek uyna kũh. 28 Sa' Pedro' na'jĩk:

—I'kwe'sxa' jiine'kwe, judiuwe'sxa' pkhaakhena puutx we'wewa'jsameeta' vxite nasa judiumeesa yakha'. Nawa Dxusa' adxa's pta'sxçxa', kim yuhnawa açekaahme'. 29 Txãa pa'gath pa'yaçpkaçxha', wa'lmée yuwé'. Ãçxha' adxa's mpeeta'sxwe kĩya'kwe yuukaah jĩte', 30 Kornelio' pta'sxku:

—Ãçxha' pahz en yuuça' naapkaçxha' naa oratey las treste naa yattey kĩhwa ũ'mée Dxus yakhçxáa puutx we'wena u'pu'th. Naapkaçxha' teeçx piçthẽ'j athni ropa kwentetesa ji'phsa vxyaak. 31 Sa' na'wẽk we'we: Kornelio, idxa' txã'wẽ peejisaatx pu'çxna Dxus yakh puutx we'wena fxi'zeni's Dxusa' wẽse'kh. 32 Aça' Jope çxhabna mkaah, Simon Pedro yaasesa's pe'jya'. Txãa Pedro' kha'tx weysáa Simon yatte paadehna ũsa' ĩkh wala pukate. Aça' txã' ayte pa'jçxa puutx we'wena idx yakh jĩnak we'we. 33 Txã'wẽ jxkaah yã'the', jxthẽeyuumée pakweya' kaath. Aça' weçx yuwe'ne'ga. Ãçxha' ayte Dxus dxi'pte jxukaysa pkhaakheçxa ũstha'w, sa' wẽse'jya'watha'w ma'wẽne' Dxus we'wekaah txã'sna.

34 Txajũ' Pedro' pta'sxku:

—Ãçxha' jiyuth Dxusa' kim yuhnawa ahçemée, 35 maa kiwejuwe'sxçxawa txã'sna nwẽese'jna ew yũuna fxi'zesa yuutxi' jxpa'ga'çxáak. 36 Dxusa' Israelwe'sx ji'jtx yuwe kaakh Dxus yakh fxi'zewa'ja's Jesukristo yuuçxáa ũsuna sa' txãaíiçxáa naa kiwetewe'sx jxukaysatx jxkaajana jĩna. 37 I'kwe'sxa' jiine'kwe na'wẽk yuu: Galileajũ takhçxa judiuwe'sx kiwete jxuka tuuthe'jnik yuu, Juan Dxus yuwe's pta'sxçxa yu'te bautisãynijũ. 38 Dxusa' Nasarethuwe'sx Jesusa's txajx Espiritu's ũste', Jesusa' kĩhtewa nuykatxhinak fxi'ze eçxthẽ'j kusete ũssatx. Dxusa' txãa yakhku ũsu' naa pa'gak txã'wẽ yũu. 39 Jesusa' txã'wẽ Judea kiwesu vxite' Jerusalente kĩhtewa ew yũuna fxi'zeni's kwe'sxa' jxuka uysaatha'w. Txã'sa' kluuskhẽ a'kxçxa ikhtxi. 40 Nawa Dxusa' tekh ente ki' ĩtxi vxitçxa kaavxya'ja'kh kwe'sxçxáatx, nasa jxukaysatx yu' mée. 41 Dxusa' maaçxahtxne' kwe'sxtxi txhitxh txãaçxáatxku vxyaa. Aça' kwe'sxa' txãa yakh pkhaakhena ũ'na fxi'zesatha'w uuçxa ki' ĩtxi yuunijũ. 42 Txajũ' txã' kwe'sxtxi kaakh txajx yuwe's nasatx na'wẽ pta'sxkahn: Dxusa' txãa Jesusa's txãaçxaçxáa kastigãywa'jsak vxitçxa ki'p naa kiwete ĩtxisa ma'tx yuu uusáa ma'tx yuu nawa jxukaysatx. 43 Txã'wẽy Dxus yuwe pta'sxsawe'sxwa yaçkhẽy we'wetx Jesusa' na'wẽ yũuwa'jsa' jĩna: Maawa jxukay txã's nwẽese'jsa' txãawe'sx pkaltxi peltunãyni yuutxna jĩnatx we'we.

44 Pedro' txã'wẽ pta'sxna ũsiyna, kxte wẽse'jna ũssawe'sx kakwete Dxus Espiritu kĩhte', jxukaysa jxpa'gatx. 45 Aça' Jesusna nwẽese'jsawe'sx judiu Pedro yakh yuusá' wala kuh yajkxna neeyũutx txã'wẽ judiuwe'sxmée vxite nasawa Dxus Espiritu's jxpa'gaçxa, 46 txã'wẽ vxite yuweju we'wena Dxusa's tuuthe'jna ũste.

47 Txajũ' Pedro' na'jĩk:

—Naa nasawa kwe'sx na'wẽy Dxus Espiritu's jxpa'ga yã'the', yu'te bautisãywa'ja's ¿kimçxá' yupxa' ãjama'k? jĩçxa', 48 ya'bautisãy kaakh Jesukristo yasete. Txajũ' Pedro's neevxisxatx txãawe'sx yakh maz en kxtee ũskahn.