4
Kuyezedwa kwa Jezu
1 Pamwepo Jezu adatengedwa na Mzimu Wakucena aciyenda kucidambo kuti akayezedwe na Dyabu. 2 Ndipo atamala kubzimana kudya ntsiku makumi manai masikati na usiku, adabva njala. 3 Pamwepo wakumuyezayo adafendera kuna Iye acimuuza kuti: “Penu ndiwe Mwana wa Mulungu, uza minyalayi isanduke pau”.
4 Tsono Jezu adatawira aciti: “Bzidanembedwa kuti: ‘Munthu an'dzakhala lini na moyo thangwe ra pau yokha, koma na mafala yentse yomwe yan'coka pa mulomo wa Mulungu’* Deu 8:3”.
5 Pamwepo Dyabu adam'tenga, aciyenda naye kuJerusalema, mzinda wakucena, adamuimisa pa cipande citali ca padzaulu pa Nyumba ya Mulungu, 6 acimuuza kuti: “Penu ndiwe Mwana wa Mulungu, bzithuse pantsi. Nakuti bzidanembedwa:
“ ‘Iye an'dzauza anju wace bza iwe,
ndipo na manja iwo an'dzakuphata,
kuti napo ndzayo zako zireke
kudzapwetekeka pa mwala’† Mas 91:11-12”.
7 Jezu adam'tawira aciti: “Bzidanembedwa pomwe kuti: ‘Leka kuyeza Mbuya, Mulungu wako’‡ Deu 6:16”.
8 Patsogolo pace, Dyabu adam'tenga aciyenda naye paphiri litali kwene-kwene ndipo adamuwonesa umambo bwentse bwa padziko la pantsi na ulemerero wabwene. 9 Ndipo adamuuza aciti: “Bzentsenebzi nin'kupasa, ungandigodamira ucindipemba”.
10 Pamwepo Jezu adamuuza kuti: “Coka, Sathani! Pakuti bzidanembedwa: ‘Pemba Mbuya, Mulungu wako, ndipo tumikira Iye yekha’§ Deu 6:13”.
11 Na tenepo Dyabu adamusiya, ndipo anju adabwera acimutumikira.
Kuyamba basa kwa Jezu
12 Pomwe Jezu adabva kuti Juwau adaikhidwa m'kawoko, adabwerera kuGalireya. 13 Ndipo adacoka kuNazareta, acikakhala kuKafaranawumi, yomwe ikhali pafupi na nyandza, kumphimpha ya Zebuloni na Nafitali, 14 kuti bzikwanirise bzomwe bzidalewedwa na m'polofita Izaiya kuti:
15 “Dziko la Zebuloni na dziko la Nafitali,
njira yakunyandza, ng'ambu ya Jolodani,
Galireya ya omwe ni aJuda lini,** Uku ni kulewa kuti omwe ni aJuda lini.
16 Mbumba yomwe ikhakhala mum'dima idawona ceza cikulu,
na omwe akhakhala m'mbuto ya mdima wa impfa ceza cidawatoya”.†† Iza 9:1-2
17 Kuyambira pamwepo, Jezu adayamba kupalidza aciti: “Khumbulani bzakuphonya bzanu, nakuti Umambo bwa kudzulu buli pafupi”.
Wakupfundzira wakuyamba
(Mko 1:16-20; Luk 5:1-11; Juw 1:35-42)
18 Pomwe akhafamba m'phepete mwa nyandza ya Galireya, Jezu adawona wathu awiri ubale bwawo: Simau, wakucemeredwa Pedru, na m'bale wace Andereya. Iwo akhathusa bwazi munyandza, nakuti akhali akhombwe. 19 Ndipo Jezu adati: “Nditewereni, ndipo Ine nin'kusandusani akhombwe wa wanthu”. 20 Panthawe imweyo letu, iwo adasiya bwazi bwawo acitewera Jezu.
21 Atayenda patsogolo pang'ono, adawona pomwe anango awiri paubale bwawo: Tiyago na m'bale wace Juwau, wana wa Zebedeu. Iwo akhali m'bote na baba wawo Zebedeu, akhambakondza bwazi bwawo. Jezu adawacemera, 22 ndipo pamwepo letu iwo adasiya baba wawo na bote, acimutewera.
Jezu an'palidza na kupolesa
23 Jezu akhafamba muGalireya mwentse acimbapfundzisa munyumba za mapembo, acimbapalidza Mafala Yabwino ya Umambo, acimbapoza wakuduwala na matenda yali-yentse pakati pambumba. 24 Ndipo mbiri yace idabvekera kuSiriya kwentse, ndipo mbumba idam'bweresera wentse omwe akhabonera na kuwawidwa na matenda yakusiyana-siyana, ninga wa mizimu yakuipa, wa khunyu, wakujejera bziwalo, ndipo Iye adawapolesa. 25 M'thithi ukulu udam'tewera, kucokera kuGalireya, Dekapoli‡‡ Dekapoli: Ni kulewa kuti mizinda khumi., Jerusalema, Judeya na wambali ya ng'ambu ya mkulo wa Jolodani.