1 Pomwe idapita ntsiku ya malinkhuma ya Ajuda, Maliya wa ku Magadala, na Maliya, mai wa Tiyagu, ndipombo Salome wadagula mafuta yakununcira kuti akaswingisire citanda ca Jezu. 2 Macibese-bese pa ntsiku ya mdzinga, wadayenda kuthenje, dzuwa liri kucoka. 3 Akhambabvundzana kuti, “Kodi mbani an'katicosera cimwala ca pa msuwo pa thenje pale?” 4 Ndipo wadanyan'gana adawana cimwala cire cikhadagwinyiridwa pa mbali; pakuti cikhali cikulu. 5 Adapita mtenje wadawona mulumbwana akhadakhala mbali ya ku boko ladidi, akhadabvala cakubvala cicena. Azimai wale adadzidzimuka. 6 Ndipo mulumbwana ule adawauza kuti, “Lekani kudzidzimuka. Muli kufuna Jezu wa ku Nazalee, omwe akhadakhomeredwa pa mtanda ule. Wamuka, ali lini muno. Onani, pambuto pomwe akhadamuikha mphapa. 7 Tsono imwe ndokoni mukauze wakupfundzira wace na Pedru, kuti:‘Iye watsogola kale kuyenda ku Galileya. Mun'kamuwona kumweko, ninga momwe adakuuzirani.’ ” 8 Iwo wadacoka mwa kakulumize wacithawa kuthenjeko, thangwe la kuti wadabva mantha, wacimbatetemera. Ndipo thangwe ra manthayo walibe kuuza munthu ali-yentse. Mk. 14.28.

9 [Jezu pomwe adamuka kwa wakufa, macibese ntsiku ya mdzinga ya Majuda, pakuyamba adawonekera kwa Maliya wa ku Magadala, omwe adam'cosa mizimu yakuipa minomwe ule. 10 Maliyayo adayenda kukauza omwe akhambakhala na Jezu wale. Iwo akhada sunama ndipo akhambalira. 11 Napo adabva kuti Jezu ana moyo, ndipo Maliya akhadamuwona, iwo alibe kubvuma.

12 Patsogolo pace Jezu, adawonekera na mawonekedwe yanango, kwa wakupfundzira wace awiri, pomwe iwo akhali pakati pa ulendo. 13 Wakupfundzirawo adabwerera kukauza andzawo, tsono iwo alibe kubvuma.

14 Pakumalizira Jezu adawonekera kwa wakupfundzira khumi na m'bodzi wale akhambadya. Adawatsimula thangwe ra kusaya kubvuma na kuwuma mtima kwawo, nakuti akhabvuma lini bzomwe akhalewa andzawo omwe akhadamuwona Iye kuti wamuka kwa wakufa. 15 Ndipo adawauza kuti, “Ndokoni pa dziko lentse lapantsi, mukafokotozere wanthu wentse Mafala Yabwino. 16 Omwe an'bvuma acibatizidwa, an'dzapulumuka, tsono omwe an'bvuma lini, an'dzapasidwa nyathwa. 17 Wakukhulupirika adzacita bzizindikiro ibzi: an'dzacosa mizimu yakuipa na dzina langu, an'dzalewa bzirewedwe bzacirendo, 18 ndipo an'dzaphata nyoka ayai kumwa bzakumwa bzakupha, an'dzacitiwa lini kuipa. andzaikha manja pa wakudwala an'dzalimba.”

19 Pomwe adandomala kulewa nawo mbuya Jezu, adatengedwa kuyenda Kudzulu, acikhala ku boko ladidi la Mulungu. 20 Ndipo wakupfundzira wale adayenda acifokotoza mafala yabwino kwentse-kwentse. Mbuya akhaphata basa pabodzi nawo, ndipo akhambatsimikiza mafalayo na bzizindikiro bzomwe wakhacita.]