10
1 Nga kepeteran'u, gangut'u gaid ne su gegulingen'u ne nga getawan meluwas bu' migampu'u tu sed Diwata para senilan. 2 Ay mpemetuuran'u ini ri seniyu neng metuges ilan menibeli ri sed Diwata. Ma'ad su ketuges nilan menibeli gena' pisingkal riin seng metuud nek sinuunan; 3 ay nda' ilan ma mekesuun sek pebiyan ned Diwata sek pekpemetareng ri se nga getaw duma seniin. Tumu', miktinguha' ilan sek pekpe'imetang ri se gegulingen nilan nek pebiyan. Nda' nilan sunuray suk pebiyan ned Diwata sek pekpemetareng se nga getaw; 4 Ay si Christ giin sung middala' se dlaga' se Kesugu'an, arun isan ta' sung mektu'u pemetarengen ned Diwata.
Su Keluwasan para se Dlaunan
5 ✡ 10.5: Levitico 18.5. Si Moses miksulat run nini metendeng sek pekpemetareng ned Diwata ri se getaw pebiyan sek pektuman ri se Kesugu'an: “Isan ta' sung mektuman se ngak sugu' ri se Kesugu'an metubu'.” 6 ✡ 10.6-8: Deuteronomio 30.12-14. Ma'ad giin nini suk tinalu' ri se kesulatan metendeng sek pekpemetareng se getaw pebiyan sek pektu'u: “Ndi'a meksaak ri se gegulingen mu, Ta' maing menaik tu se dlangit?” (be'et pesabut, mekpepenaug riin ni Christ). 7 “Awas ndi'a meksaak, Ta' maing menaug tu seg benwa ne ngang mimatay?” (be'et pesabut, sek pekpetubu' riin ni Christ buwat se ngang mimatay). 8 Landun suk tinalu' ne kesulatan, giin nini: “Sung minsahi ned Diwata megaud ra riin seniyu. Inasuy na niyu bu' riin na se gena'ena' niyu.” Giin nini sung minsahi sek pektu'u neg winali nami, 9 ne bu' asuy mu tu se ngad duma ne si Jesus giin su Ginu'u bu' mektu'u ne sud Diwata mikpetubu' ri seniin buwat se kemetain, meluwas'a. 10 Ay pebiyan sek pektu'u ta pemetarengen ita ned Diwata; bu' pebiyan sek pegasuy ta tu se ngad duma meluwas ita. 11 ✡ 10.11: Isaias 28.16 (LXX). Ay tinalu' ri se kesulatan, “Su isan ta' neng mektu'u ri seniin ndi' mpiiran.” 12 Para ini ri se dlaunan, tendeng ay ndairuni kelainan se ngag Judeo bu' se nga gena' Judeo; sud Diwata giin ra su Ginu'u se dlaunan, bu' megbegay neng melaun ne kepiyanan tu se dlaun neng meksabi ri seniin. 13 ✡ 10.13: Joel 2.32. Sumala' sek tinalu' ri se kesulatan, “Su dlaun neng mektawag ri se ngalan ne Ginu'u meluwas.”
14 Ma'ad gendunen ma nilan sek pektawag ri seniin bu' nda' ilan pektu'u? Bu' gendunen ma nilan sek pektu'u bu' nda' nilan merengeg sung minsahi? Bu' gendunen ma nilan sek pekerengeg bu' nda' asuy sung minsahi? 15 ✡ 10.15: Isaias 52.7. Bu' gendunen ma sek pegwali seng minsahi bu' nda'irunik sinugu' ne ngang mengwawali? Sumala' ri se kesulatan, “Pekelengas sek peddateng nu ngang mengwawali sek pegwali se Gempiya ne Gesuyen!” 16 ✡ 10.16: Isaias 53.1 (LXX). Ma'ad gena' su dlaunan sud dinumawat ri se Gempiya ne Gesuyen! Si Isaias mismu miktalu', “Ginu'u, ta' maing miktu'u ri seg winali nami?” 17 Aas suk pektu'u megbuwat sek pekpenginengeg seng minsahi, bu' sung minsahi megbuwat sek pegwali metendeng riin ni Christ.
18 ✡ 10.18: Ngak Salmo 19.4 (LXX). Ma'ad meksaaku: Metuud ba ne genda' ilan mekerengeg seng minsahi? Wa'a mikerengeg ilan—ay sumala' sek tinalu' ri se kesulatan:
“Midlelaup sek tibuuk neg benwa sung minsahi nilan;
Mirepet se ginekteban seg benwa su ngak talu' nilan.”
19 ✡ 10.19: Deuteronomio 32.21. Bu' meksaaku puli': Nda' ba mekesabut su nga getaw seg Israel? Si Moses giin mismu su guna nek sinumembag:
“Baalen'u neng mesinaku amu
tu se nga getawan ne genda'ik paluun;
baalen'u neng medlanget
amu seng nasud neg buralburalen.”
20 ✡ 10.20: Isaias 65.1 (LXX). Bu' se genda'i gendek, si Isaias miktalu',
“Mibaanganu nu genda' penengaw ri senaan;
mikpe'ita'u tu se genda' peksaak metendeng ri senaan.”
21 ✡ 10.21: Isaias 65.2 (LXX). Ma'ad metendeng seg Israel, miktalu' si Isaias, “Sek tibuuk ne gendaw minantuu ne mpeseguli' su getawan neng melisupaken bu' mesungal ri senaan.”
✡10:5 10.5: Levitico 18.5.
✡10:6 10.6-8: Deuteronomio 30.12-14.
✡10:11 10.11: Isaias 28.16 (LXX).
✡10:13 10.13: Joel 2.32.
✡10:15 10.15: Isaias 52.7.
✡10:16 10.16: Isaias 53.1 (LXX).
✡10:18 10.18: Ngak Salmo 19.4 (LXX).
✡10:19 10.19: Deuteronomio 32.21.
✡10:20 10.20: Isaias 65.1 (LXX).
✡10:21 10.21: Isaias 65.2 (LXX).