9
Sud Diwata bu' su ngak Pimili'en ne nga Getawan
1 Metuud suk tinalu'u; sakupu ni Christ bu' nda'u pegbalus. Su kunsinsiyau, ne gine'eman se Gispiritu Santu, mikpemetuud rema ri senaan ne nda'u pegbalus 2 seg binatiku sung melebiyan ne kegu'ul bu' genda'ik pelali ne kegeel 3 para se nga getawan'u, nek samau Judeo! Para senilan, migangutu ne mbaalu nek tuklaren ned Diwata bu' mbuwag riin ni Christ. 4 ✡ 9.4: Exodo 4.22. Getawan ilan ned Diwata; binaalen ilan ne nga gembata'en bu' pi'ita'en suk pekege'emaan tu senilan; migbaal giin ne keligenan ri senilan bu' migbegay ne Kesugu'an tu senilan; duuning metuud nek peksimba nilan; mikerawat ilan ne ngak saad ned Diwata; 5 gesalan ilan nu ngang mibantug ne gepu'an nilan ne ngag Hebreo; bu' si Christ gisip getaw neng misakup ri sek sama nek tribu neg Judeo. Sud Diwata neng midlegeseg ri se dlaunan, siya'en siya se genda'i gekteben! Metuman siya.
6 Nda'u pektalu' neng mipalunggaw suk saad ned Diwata; ay gena' dlaun ne nga getaw Israel nga getawan ned Diwata. 7 ✡ 9.7: Su Getaran se Dlaunan 21.12. Gena' rema su dlaun ne nga gesalan ni Abraham nga gembata' ned Diwata. Sud Diwata miktalu' tu se ni Abraham, “Su gesalan ma'ad ni Isaac giin su gilelaan ne gesalan mu.” 8 Mikpesabut ini ne su nga gembata' neng mi'etaw ri se kinilawan nek pebiyan, gena' ne nga gembata' ned Diwata; tumu' su nga gembata' neng mi'etaw gisip kelebu'an sek saad ned Diwata, ginilala ilan ne ngang metuud ne nga gesalan. 9 ✡ 9.9: Su Getaran se Dlaunan 18.10. Ay suk saad ned Diwata binaal seng maa' nini nek peketalu': “Se ginsaktu nek panahun, mpuli'u bu' si Sarah megbata' ne dlai.”
10 Bu' gena' daal na run nini. Ay sud duwa' neg bata' ne dlai ni Rebecca sala rai gama'en, si Isaac ne gepu'an ta. 11 ✡ 9.11: Su Getaran se Dlaunan 25.23. Ma'ad se genda' pa ngani' me'etaw su ngag bata', tinelu'an na ned Diwata si Rebecca, “Su gulangbata' menibeli ri se nguran.” 12 Tinalu'en nini se genda' ilan pa me'etaw, se genda' ilan pa mekegbaal isan landunig betang neng melengas awas melaaten; aas suk pekpili' ned Diwata pisingkal ri sek pektawagen, bu' gena' seng mibaal nilan. 13 ✡ 9.13: Malakias 1.2-3. Sumala' ri se kesulatan, “Pinetail'u si Jacob, ma'ad ginemetan'u si Esau.”
14 Landun ma rayuning metalu' ta? Gena' ba metareng sud Diwata? Gena' lai! 15 ✡ 9.15: Exodo 33.19. Ay miktalu' giin riin ni Moses, “Lelaatan'u su dliyagan'u lelaatan; petailen'u su dliyagan'u petailen.” 16 Aas su dlaunen nda' mpesingkal se keliyag ne getaw awas sek terbahu bu' ndi' se dlelaat ned Diwata. 17 ✡ 9.17: Exodo 9.16 (LXX). Ay miktalu' su kesulatan tu se gari' seg Ehipto, “Binaal'u dya'a ne gari' arun gemiten'u dya'a sek pekpe'ita' se ga'em'u, bu' sek pedlelaup sed dengeg'u ri sek tibuuk neg benwa.” 18 Aas melelaat sud Diwata se isan ta' ne dliyagaan lelaatan, bu' petegasenen su gulu se isan ta' ne dliyagaan petegasen.
Su Dlanget bu' Dlelaat ned Diwata
19 Ma'ad sala ri seniyu mektalu' ri senaan, “Bu' maa' nini, lama pesela'en run ned Diwata su nga getaw? Ta' maing mekepegeng ri se keliyag ned Diwata?” 20 ✡ 9.20: Isaias 29.16. Ma'ad ta'a ma, dya'a ne getaw neng meksembagsembag ri sed Diwata? Su gulen ndi' mekesaak tu se getaw neng migbaal run nini, “Tuma ma binaal mau neng maa' nini?” 21 Nda' bai ketenged neng menggegulen sek peddiyun seng melengket ne dlupa' sumala' se dliyagaan, bu' sek peddiyun sed duwa' ne kelasi ne nga gulen buwat sek sama neg bugel neng melengket ne dlupa'—suk sala para sek pinain nek pedlegamit bu' suk sala para sed yanu nek pedlegamit?
22 Maa' niin sug binaal ned Diwata. Liyagaan pe'ita' su dlangeten bu' pe'ilelaan su ga'emen. Ma'ad melipelugbaken giin gupiya riin sek pegantus se nga getaw nek pinlengetan run, neng mekpagaw na se kelaatan, 23 arun mpe'ita' su gembagel ne kepiyaan tu se nga getaw ne dlinelaataan, ne ginendamaan na daan neng mekerawat sek pesiddengegen. 24 Ay gita su nga getaw nek tinawagen, gena' na run su ngag Judeo ma'ad su nga gena' Judeo rema. 25 ✡ 9.25: Hoseas 2.23. Giin nini sung misulat ri se dlibru ni Hoseas:
“Su nga getaw ne gena' naan
tuwagen'u na ne ‘nga Getawan'u.’
Su ngang nasud ne nda'u petailay nud diin
tuwagen'u na nek ‘Pinetail'u.’
26 ✡ 9.26: Hoseas 1.10. Bu' se nga dlugar ne gilan tinelu'an nud diin, ‘Gena' amu ne nga getawan'u,’
ritu tuwagen ilan ne nga gembata' neng mektetubu' ned Diwata.”
27 ✡ 9.27-28: Isaias 10.22-23 (LXX). Si Isaias miktalu' metendeng seg Israel: “Isan bu' su nga getaw Israel maa' kelaun se gelis ri sed dagat, tumu' miika' raing meluwas ri senilan; 28 ay su Ginu'u meksilut gaid seng merali' se nga getaw ri seg benwa.” 29 ✡ 9.29: Isaias 1.9 (LXX). Si Isaias sung miktalu' run nud diin, “Bu' su Ginu'u neng Mekegega'em nda' pa siya pegbilin senita nek santa' ne nga gesalan, mbaal ita siya neng maa' sek Sodoma bu' se Gomora.”
Sug Israel bu' su Gempiya ne Gesuyen
30 Aas, meketalu' ita ne su nga gena' Judeo, ne genda' penantu sek pekpekemetareng ri se gegulingen nilan duma sed Diwata, pimetareng duma ri seniin pebiyan sek pektu'u; 31 sinegay su nga getawan ned Diwata neng minantu ne gembaal neng metareng duma sed Diwata pebiyan sek pektuman se kesugu'an, nda' mekaapet run nini. 32 Tuma ma? Tendeng ay suk penantu nilan nda' mpesingkal ri sek pektu'u bu' ndi' seng mibaal nilan. Aas miseknu ilan ri seg “batu neng mekeseknu,” 33 ✡ 9.33: Isaias 28.16 (LXX). sumala' sek tinalu' ri se kesulatan:
“Enlengay niyu, binetang'u riin sek Sion sug batu
neng mekeseknu se nga getaw,
sala neg batu neng mekepeterukpa' ri senilan.
Ma'ad su isan ta' sung mektu'u ri seniin ndi' gaid mpiiran.”
✡9:4 9.4: Exodo 4.22.
✡9:7 9.7: Su Getaran se Dlaunan 21.12.
✡9:9 9.9: Su Getaran se Dlaunan 18.10.
✡9:11 9.11: Su Getaran se Dlaunan 25.23.
✡9:13 9.13: Malakias 1.2-3.
✡9:15 9.15: Exodo 33.19.
✡9:17 9.17: Exodo 9.16 (LXX).
✡9:20 9.20: Isaias 29.16.
✡9:25 9.25: Hoseas 2.23.
✡9:26 9.26: Hoseas 1.10.
✡9:27 9.27-28: Isaias 10.22-23 (LXX).
✡9:29 9.29: Isaias 1.9 (LXX).
✡9:33 9.33: Isaias 28.16 (LXX).