91
Mama Kuurrtu-rni Yangatjura Kanyinma
1 Ngayulu-tjinguru-rna Mama Kuurrnga tjiinya yayirninytjulu palyalpayingka ngamu nyinama.
Nyangka-rni yangatjura kanyinma.
2 Nyangkalta-rna Mama Kuurrta watjalku,
“Nyuntulu-rnin tjarapirinytju yangatjura kanyilpayi.
Nyangka-rnanta nyuntunyakutju pupakatirra marninypungama.
Palunyalu-rnanta mula-mularringkula kulinma.”
3 Kulila. Kutjupalu-tjingurunta punkatjingalku.
Wiya, Mama Kuurrtunta katulku.
Nyangka-tjinguru-ya pirninya pika purlkanyatjarra ngarrima.
Nyangkanta Mama Kuurrtu wankarura kanyinma mirrirritjakutarra.
4 Yuwa, Mama Kuurrtunta yangatjura kanyinma.
Tjiinyakurlu tjurlpulunku kurlunypa pirninya nyarlpilu yangatjura kanyinma, palunyapirinytju.
Mama Kuurrtunta watjarnu wantinytjatjanulu kanyinma.
Tjiinyanta tjurlpu nyarlpipirinytju yangatjura kanyinma.
5 Wiya, nyaakun ngurlurringkula
mamulunta mungangka pitjala pungkutjaku?
Wiya, Mama Kuurrtunta miranykanyinma.
Nyaakunykan ngurlurringkula
karlarla-ya kurlarta warnirranyangka?
Wiya, Mama Kuurrtunta yangatjura kanyinma.
6 Nyaakun ngurlurringkula mungangka pikatjarrarritjaku?
Wiya, Mama Kuurrtunta miranykanyinma.
Nyaakun ngurlurringkula
kutjupa-kutjupa karlarla yutirringkulanyangka?
Wiya, Mama Kuurrtunta yangatjura kanyinma.
7 Tjinguru yarnangu pirninya nyuntula yitingkartu punkalku mirrirriku.
Nyangkan kutjuwanka ngarama.
8 Palunyalun nyaku
Mama Kuurrtu-tjananya palyamunu pirninya ngaparrtjika pungku wiyannyangka.
9 Yuwa, kurrurnpa rapalun kulira Mama Kuurrtunta purlkanya nyinarranytjalu yangatjura kanyiratjaku.
10 Palunyangka kutjupa-kutjupalu pikanku nintilkitjamunu.
Nyangka nyuntuku ngurrangka palyamunu ngarakitjamunu.
11 Nyangka Mama Kuurrtunku palunyaku yayintjulpa pirninya witulku
miranykanyiranta-ya kanyiratjaku,
tjiinyan ngurra kutjupa-kutjupakutu yankulanyangka.
12 Nyangka yayintjulpa pirnilunta-ya maralu katura kanyinma
yapulunta tjina pikarntankutjakutarrartu.
13 Purun layinpa nganyirri purlkanyawana lirruwanatarrartu parrangarama.
Nyangkanta-ya patjalkitjamunu.
14 Yuwa, Mama Kuurrtu watjarnu,
“Nyuntulu-tjun mukulyanytju nyinarranyangka
ngayulu-rnanta wankarura kanyinma.
Ngayulu-rnanta yangatjura kanyinma
nyuntulu-rnin puurrpa warlkuranyangka.
15 Nyangka-tjingurunku palyamunu yartakarrinyangka
ngayula-rni tjapinma.
Nyangka kuliralpi-rnanta yampura kanyinma.
Palunyalu-rnanta walykumunura kanyinma wanka nyinarratjaku.
16 Ngayulu-rnanta wankarura kanyinma.
Palunyangkan rawa nyinarrayilku ma-mirrirriku.”