63
Turlku ngaanya Tayipirrtu mayu-mayu nyinarranytjalu walkatjunu wantingu.
Tayipirrnga Kurrurnpatarrartu Mama Kuurrku Mukurringkulanytja
1 Yuwa Mama, nyuntunya-rnanta pupakatirra marninypungkupayi.
Palunyalu-rnanku kurrurnpatarra mukurringkula.
Tjiinyakurlu-ya ngurra yayilurrungka pitjalayila
purtu mukurringkula pinalukutju kulinma, “Kapipalka ngarrima.
Nyangka-rna waarrpungkulalpi tjikila.” Palunyapirinypa.
2 Yuwa, mukurringkula-rnanta nyuntunya nyakukitjalu.
Puru-rna mukurringkula nyuntuku tili purlkanya nyakukitjalu
tjurrtjungka yirrnyaranyangka.
3 Walykumunu tjiinya wanka-rna nyinarratjaku.
Nyangka palunyangka munkarra ngarala
tjiinya-rnin mukulyanytjulu kanyiratjaku.
Palunyalangurulta-rnanta marninypungama.
4 Yuwa, nyuntunya-rnanta marninypungkulayilku ma-mirrirriku.
Puru-rnanta mara katura warlkura tjapinma.
5 Yuwa, kurrurnpa-rna pukurlpa nyinama.
Tjiinyakurlu kukatjanu parltjarringkulalpi pukurlpa nyinama, palunyapirinypa.
Palunyalu-rnanta pukurltu yinkarra marninypungama.
6 Mungangka-rnanta ngarrirra kulilpayi.
Wankalu-rnanta kulira tjirnturringkupayi.
7 Yuwa, tirtu-rnin yirringkara kanyilpayi.
Palunyangka-rnanku turlku pukurltu yinkapayi,
tjiinyamarntu-rnin yangatjura kanyiranyangka.
Tjiinyakurlu tjurlpulunku kurlunypa pirninya nyarlpilu yangatjura kanyinma.
Palunyapirinytju-rnin kanyira.
8 Lurrtju-rnanta tirtu nyinama.
Nyangka-rnin waku purlkanyalu patjurira kanyinma.
9 Yarnangu nyarra nyinarra-rniya yurakanyira pungkula tjunkukitjalu,
10 palunyanya-tjananya warrmarlalu pungku tjunku.
Nyangka ngupanulu pitjaku ngalku wiyalku.
11 Yuwa Mama, ngayulu-rnanta puurrpa purlkalu pukurltu marninypungama,
tjiinya-rnin yirringkaranyangka.
Nyangkanta-ya yarnangu nyarra nyuntunya mularrkuliranytjalu marninypungama.
Nyangka-ya mayulpayi pirninya kanmarrarriku nyinama.