1 དེའི་ཕྱིར། སྐྱབས་མགོན་མཱ་ཤི་ཀའི་ནང་དུ་སྐུལ་མ་གང་ཞིག༌དང༌། བྱམས་པའི་སེམས་གསོ་གང༌ཞིག དམ་པའི་ཐུགས་ཉིད་ཀྱི་འབྲེལ་འདྲིས་གང༌ཞིག བྱམས་དང་སྙིང་རྗེ་གང་ཞིག་ཡོད་པ་ཡིན་ན། 2 ཁྱོད་རྣམས་ཀྱིས་བསམ་པ་གཅིག༌དང༌། བརྩེ་སེམས༌གཅིག དྲན་ཚུལ༌གཅིག བསམ་འདུན་གཅིག་ཡོད་པ་བཅས་བྱས་ནས་ངའི་དགའ་སྤྲོ་རྫོགས་པར་བྱ་འོས་སོ།། 3 སྒེར་སེམས་དང་སྙིང་པོ་མེད་པའི་གཟི་བརྗིད་ལ་འདོད་རྔམ་མི་བཅང་བར། ཁེངས་སྐྱུང་གི་བསམ་པ་བཅངས་ནས་རང་ལས་མི་གཞན་མཆོག་ཏུ་འཛིན་པར༌གྱིས། 4 མི་སུ་ཞིག་ཡིན་ཡང་རང་དོན་ཁོ་ན་མི་སེམས་པར་གཞན་དོན་ཡང་བསམ་དགོས་པ་ཡིན། 5 ཁྱོད་ཅག་གི་བསམ་པ་ནི་མཱ་ཤི་ཀ་ཡེ་ཤུའི་ཐུགས་དགོངས་བཞིན་ཡིན་དགོས་པ་འདི༌ལྟ་སྟེ།

12 དེ་བས་ན། བདག་གི་སྙིང་ཉེ་བའི་སྤུན་ཟླ༌རྣམས། ཁྱོད་ཅག་གིས་རྒྱུན་དུ་བདག་གི་གཏམ་ལ་མཉན་པ་ཡིན༌ན། ང་རང་ཁྱོད་ཅག་གི་གམ་དུ་ཡོད༌པའམ། ཡང་ན་ད་ལྟ་ཁྱོད་ཅག་གི་གམ་དུ་མེད་པའི་དུས་སུའང་ལྷག་ཏུ་བདག་གི་གཏམ་ལ་ཉན་པ༌བཞིན། ཁྱོད་ཅག་གིས་སྐྲག་སྐྲག་འདར་འདར་ངང་ནས་རང་ལ་ཐར་པ་ཐོབ་ཟིན་པའི་དོན་དེ་དང་མཐུན་པར་བསྒྲུབ་དགོས་སོ།། 13 རྒྱུ་མཚན་ནི་ཁྱོད་ཅག་གིས་ལས་གང་ཞིག་དྲན་ཞིང་སྒྲུབ་པར་བྱེད་པ་ནི་དཀོན་མཆོག་གི་ཐུགས་དགོངས་བཞིན་དུ་ཡིན་པའི་ཕྱིར། དཀོན་མཆོག་གིས་ཁྱོད་རྣམས་ཀྱི་སེམས་ནང་དུ་འཕྲིན་ལས་མཛད༌པས་སོ༎ 14 ཁྱོད་ཅག་གིས་འཁང་རའི་གཏམ་དང་རྩོད་གླེང་ཅི་ཡང་མེད་པར་ལས་ཐམས་ཅད་བསྒྲུབ་པར༌གྱིས། 15 ཅིའི་ཕྱིར་ཞེ་ན། ཁྱོད་རྣམས་ལ་སྐྱོན་བརྗོད་རྒྱུ་ཅི་ཡང་མེད་པ་དང་གཞུང་དྲང་ཟོལ་མེད་ཡིན༌པ། དཀར་ནག་གོ་ལྡོག་གི་དུས་རབས༌འདི་ལ། ཁྱོད་ཅག་ནི་སྐྱོན་གྱི་དྲི་མས་མ་གོས་པའི་དཀོན་མཆོག་གི་བུ་ཕྲུག་ཡིན་པའི་ཕྱིར༌རོ།། ཁྱོད་རྣམས་དུས་འདིར་མངོན་པ་ནི་འཇིག་རྟེན་ཀུན་ལ་འོད་ཟེར་འཕྲོས་པ་དང་མཚུངས་ཏེ། 16 ཁྱོད་ཅག་གིས་ཚེ་སྲོག་གི་བཀའ་དམ་པོར་ཟུངས་ཤིག་དང་། དེ་ནི་སྐྱབས་མགོན་མཱ་ཤི་ཀའི་ཉིན༌ལ། བདག་གི་ངལ་བ་འབྲས་མེད་དུ་མ་གྱུར་བར་བསྔགས་བརྗོད་བྱེད་པའི་ཕྱིར་ཡིན། 17 ང་རང་ནི་ཁྱོད་ཅག་གི་དད་པའི་བསྙེན་བཀུར་དང་མཆོད་རྫས་སྟེང་དུ་སྐྱེམས་མཆོད་གཏོར་བ་བཞིན་དུ་གྱུར༌ནའང༌། བདག་ནི་དགའ་ཞིང་ཁྱོད་རྣམས་དང་མཉམ་དུ༌སྤྲོ་བ་ཡིན་ནོ།། 18 ཁྱོད་རྣམས་ཀྱང་དེ་བཞིན་དུ་དགའ་ཞིང་བདག་དང་མཉམ་དུ་སྤྲོ་བར་གྱུར༌ཅིག།

19 དེ་ཡང་བདག་གིས་ཁྱོད་རྣམས་ཀྱི་གནས་ཚུལ་ཤེས་ནས་རང་ལ་སེམས་གསོ་འཐོབ་ཐུབ་པའི་ཕྱིར། བདག་གིས་གཙོ་བོ་ཡེ་ཤུར་བརྟེན་ནས་ཐི་མོ་ཐེ་མྱུར་བ་མྱུར་བར་ཁྱོད་རྣམས་ཀྱི་གམ་དུ་མངག་པའི་རེ་བ་བཅངས༌སོ།། 20 རྒྱུ་མཚན་ནི་ཁྱོད་རྣམས་ཀྱི་དོན་དུ་དངོས་གནས་སེམས་ཁྲལ་བྱེད་མཁན་ནི་བདག་དང་བློ་སེམས་མཐུན་པ་གཞན་མེད་པས༌སོ།། 21 མི་གཞན་རྣམས་ཀྱིས་རང་དོན་ཁོ་ན་ལས་མཱ་ཤི་ཀ་ཡེ་ཤུའི་དོན་དེ་མི་བསམས་མོད། 22 འོན༌ཀྱང༌། ཐི་མོ་ཐེ་ནི་བུས་ཕ་ལ་བསྙེན་བཀུར་བྱེད་པ༌བཞིན། ཁོས་ཀྱང་བདག་དང་མཉམ་དུ་འཕྲིན་བཟང་དར་སྤེལ་བྱས་མྱོང༌བས། ཁོས་ཚོད་བགམ་ཐེག་ཐུབ་པ་ཁྱོད་རྣམས་ཀྱིས་ཀྱང་ཤེས་པ་ཡིན། 23 དེའི༌ཕྱིར། བདག་གིས་རང་ལ་བྱུང་བའི་དོན་དེ་ཅི་ལྟ་བུ་ཞིག་ཏུ་འགྱུར་ངེས་པ་ཤེས་མ་ཐག ཁོ་རང་མྱུར་དུ་མངག་པར་རེ་བ་བྱེད༌ཅིང༌། 24 ང་རང་ཡང་གཙོ་བོ་ལ་བརྟེན་ནས་མྱུར་བ་མྱུར་བར་ཡོང་ཐུབ་པར་ཡིད་ཆེས་སོ།། 25 འོན༌ཀྱང༌། ད་ལྟ་བདག་གིས་ངེས་པར་ཁྱོད་རྣམས་ཀྱི་གམ་དུ་ཨེ་པབ་རོ་དི་མངག་དགོས་པར་འདོད༌དེ། ཁོ་ནི་བདག་གི་སྤུན་ཟླ་དང་ཆོས༌གྲོགས། དཔུང་གྲོགས་བཅས་ཡིན༌ལ། ཁྱོད་རྣམས་ཀྱིས་བདག་ལ་མངགས་པའི་མི༌དང༌། བདག་གི་དགོས་མཁོ་སྐོང་མཁན་ཡང་ཡིན། 26 ཁོས་ཁྱོད་རྣམས་ཤིན་ཏུ་དྲན་ཞིང་ཁྱོད་རྣམས་ཀྱིས་ཁོ་རང་ལ་ན་ཚ་བྱུང་བའི་གནས་ཚུལ་ཐོས་པས་ཁོའི་སེམས་ཤིན་ཏུ༌སྐྱོ་བ་རེད། 27 ཁོ་རང་ལ་དངོས་གནས་ན་ཚ་བྱུང་སྟེ་འཆི་ལ་ཉེ་བ་ཙམ་བྱུང་ནའང་དཀོན་མཆོག་གིས་ཁོ་རང་ལ་ཐུགས་རྗེ་གནང༌ཞིང༌། བདག་ལ་སྡུག་བསྔལ་གྱི་སྟེང་དུ་སྡུག་བསྔལ་མི་འབྱུང་བའི་ཕྱིར་ང་ལའང་ཐུགས་རྗེ་གནང༌ངོ་།། 28 དེའི༌ཕྱིར། བདག་གིས་དེ་ལས་མགྱོགས་མྱུར་ངང་ཁོ་རང་ཁྱོད་རྣམས་ཀྱི་གམ་དུ་མངགས་པ་སྟེ། ཁྱོད་རྣམས་ཀྱིས་ཁོ་རང་སླར་ཡང་མཐོང་ན་དགའ་ཞིང་སྤྲོ་བ་དང༌། བདག་གི་སེམས་ཁུར་ཡང་ཇེ་ཆུང་དུ་འགྲོ་ངེས་པའི་ཕྱིར༌ཡིན། 29 ཡང་ཁྱོད་རྣམས་ཀྱིས་གཙོ་བོའི་ནང་དུ་དགའ་དགའ་སྤྲོ་སྤྲོའི་ངང་ནས་ཁོ་རང་ལ་སྣེ་ལེན་བྱེད་དགོས༌ཤིང༌། མི་འདི་ལྟ་བུ་ལ་བརྩི་བཀུར་ཡང་བྱ་འོས་སོ།། 30 ཅིའི་ཕྱིར་ཞེ་ན། ཁོས་སྐྱབས་མགོན་མཱ་ཤི་ཀའི་ཆོས་དོན་སྒྲུབ་པའི་ཆེད་དུ་འཆི་ལ་ཉེ་བ་ཙམ་བྱུང༌ནའང༌། ཁྱོད་རྣམས་ཀྱིས་བདག་ལ་རོགས་རམ་བྱེད་མ་ནུས་པ་ཐམས་ཅད་ཁོས་རང་སྲོག་ལ་མ་འཛེམས་པར་བདག་ལ་རོགས་རམ་བྱས༌སོ།།