1 ཉིན་མོ་དེར། དཀོན་མཆོག་ཡ་ཝཱེས་ཁོང་གི་རྣོ་ཞིང་ཆེ་བའི་རལ་གྲི་ཤུགས་ལྡན་གྱིས་ཆུ་སྲིན་ * འདིར་ཆུ་སྲིན་ཞེས་པར་མ་ཕྱི་ལས་ལེ་ཝི་ཡ་ཐན་ཞེས་བཀོད་ཡོད།ཏེ་མྱུར་སྐྱོད་དང་འཁྱོག་འགྲོ་སྦྲུལ་ལ་ཆད་པ་གཅོད་ཅིང་། རྒྱ་མཚོའི་ནང་གི་འབྲུག་ཆེན་ཡང་གསོད་པར་འགྱུར།

2 ཉིན་མོ་དེར། རྒུན་ཆང་ཐོན་པའི་རྒུན་འབྲུམ་ར་བ་དེར་དམིགས་ནས་ཁྱོད་ཚོས་གླུ་ཞིག་ལེན་པར་བྱ་སྟེ། 3 དཀོན་མཆོག་ཡ་ཝཱེ་ང་རང་ནི་རྒུན་འབྲུམ་ར་བ་དེ་སྲུང་མཁན་ཡིན། བདག་གིས་རྟག་ཏུ་དེ་ལ་ཆུ་གཏོང་ཞིང་། མི་ཡིས་དེ་ལ་གཏོར་བརླག་མི་བཟོ་བའི་ཕྱིར་བདག་གིས་ཉིན་མཚན་མེད་པར་སྲུང་བ་ཡིན། 4 བདག་ལ་ཁྲོ་བ་མེད་དེ། ཚེར་མ་དང་ཚེར་ཤིང་གིས་བདག་དང་གཡུལ་འགྱེད་ན། བདག་གིས་དེ་དག་རྡོག་བརྫིས་བཏང་ནས་ལྷན་ཅིག་ཏུ་བསྲེག་ངེས་ཡིན། 5 དེ་ཡིས་ང་ལ་འཇུས་ནས་ང་ནི་སྦས་སར་གྱུར་ཏེ། ང་དང་ཞི་མཐུན་བྱས་ན་མ་གཏོགས། ངས་དེ་བཞིན་བྱེད་ངེས་ཡིན། 6 ཕྱིས་ཀྱི་ཉིན་མོ་དག་ལ་ཡ་ཀོབ་ཀྱི་རྩ་བ་ཚུགས་པ་དང་། ཡེས་ར་ཨེལ་ལ་མྱུ་གུ་འབུས་ནས་མེ་ཏོག་བཞད་ཅིང་། དེ་དག་གི་འབྲས་བུ་ནི་ས་གཞི་ཡོངས་སུ་ཁྱབ་པར་བྱའོ། ། 7 དེ་ཡང་དཀོན་མཆོག་ཡ་ཝཱེས་ཡེས་ར་ཨེལ་ལ་རྡུང་རྡེག་བྱེད་པ་ནི་དེ་རྣམས་ལ་རྡུང་རྡེག་བྱེད་མཁན་ལ་རྡུང་རྡེག་བྱེད་པ་བཞིན་དུ་ག་ལ་ཡིན། གཙོ་བོས་ཡེས་ར་ཨེལ་པ་རྣམས་གསོད་པ་ནི་ཁོ་རྣམས་གསོད་མཁན་དག་གསོད་པ་བཞིན་དུ་ག་ལ་ཡིན། 8 ཁྱེད་ཀྱིས་རིམ་བཞིན་དེ་དག་བཙོན་དུ་ཁྲིད་པ་དང་ཕན་ཚུན་འཐབ་པ་བརྒྱུད་དེ་ཤར་རླུང་ལྡང་བའི་དུས་སུ། དྲག་རླུང་གིས་དེ་དག་དེད་པ་ཡིན། 9 དེ་བས་ཡ་ཀོབ་ཀྱི་སྡིག་པ་བསལ་བ་དང་། ཁོང་གི་སྡིག་པ་བསལ་བ་ནི་ཐམས་ཅད་འདི་ལ་རག་ལས་ཏེ། ཁོང་གིས་མཆོད་ཁྲིའི་སྟེང་གི་རྡོ་ཐམས་ཅད་རྡོ་ཐལ་དུ་མཛད་པ་དང་། ལྷ་མོ་ཨ་ཤེ་རཱའི་ཀ་བ་རྣམས་དང་སྤོས་ཁྲི་རྣམས་ལུས་པར་མ་མཛད་དོ། ། 10 མཁར་བརྟན་པོ་རྣམས་སྟོངས་ཤིང་། བསྐྱུར་ནས་དོར་བའི་སྡོད་གནས་སུ་གྱུར་པ་དང་དབེན་སྟོང་བཞིན་དུ་ལུས། བ་ཕྲུག་གིས་དེ་རུ་རྩྭ་ཟ་ཞིང་ཉལ་བར་མ་ཟད། དེའི་སྡོང་པོའི་ཡལ་ག་རྣམས་ཀྱང་བཟའ་བར་འགྱུར། 11 ཡལ་ག་སྐམ་ཚེ་གཅོད་པར་འགྱུར། དེ་ནས་བུད་མེད་རྣམས་འོངས་ནས་ཁྱེར་ཏེ་མེ་ལ་འབུད། ཅི་ལ་ཞེ་ན། འབངས་འདི་རྣམས་གླེན་རྨོངས་ཤེས་མེད་ཡིན་པས། དེ་དག་མཛད་མཁན་གྱི་གཙོ་བོས་ཁོ་ཚོ་ལ་སྙིང་རྗེ་མི་དགོངས་ཤིང་། དེ་དག་སྐྲུན་མཁན་གྱིས་དེ་དག་ལ་ཐུགས་རྗེས་མི་གཟིགས་སོ། །

12 ཉིན་མོ་དེར། ཕི་རཱད་གཙང་པོ་ནས་ཨེ་ཅིབ་ཡུལ་གྱི་གྲོག་ཆུའི་བར་དུ་དཀོན་མཆོག་ཡ་ཝཱེས་ཁོང་གི་འབྲུ་རིགས་བསྡུ་ཞིང་། ཀྱེ་ཡེས་ར་ཨེལ་གྱི་བུ་རྒྱུད། ཁྱོད་རྣམས་ཀྱང་རེ་རེ་བཞིན་བསྡུ་བར་འགྱུར། 13 ཡང་ཉིན་མོ་དེར། དུང་ཆེན་བུས་ནས་ཨ་སུར་ཡུལ་དུ་མེད་པར་འགྱུར་ལ་ཁད་ཡོད་པ་དང་། ཨེ་ཅིབ་ཡུལ་དུ་བསྐྲད་པ་ཐམས་ཅད་འོངས་ནས་ཡེ་རུ་སཱ་ལེམ་གྱི་རི་བོ་དམ་པ་རུ་དཀོན་མཆོག་ཡ་ཝཱེ་ལ་ཕྱག་འཚལ་བར་འགྱུར་རོ། །