នាវកោរាញឞ្រាសងើយនាវតឹមរាង្លាប់មហែ លូកា 17

ញជ្រាង់លើយលែវឞូជានតីស

(មថ ១៨:៦-៧, ២១-២២; មក ៩:៤២)

1 គែសទូនារឞ្រាសយេឆូ លាសមាមពោលអ៝សម៝នពាង់៖ “គែសអ៝ក់នតីលជានអ៝ន់ឞូនុយ្សគែសជានតីស។ តីសមារេសរាញាល់ងាន់មាឞូម៝សអីលែវឞូជានតីស កោរាញឞ្រាសតេៈទោយ្សទុតក្វ៝ង់ងាន់មាឞូនុយ្សអីនៃ។ 2 អ្វែសរាលាវលាសឞូឆ៝ៈមពាល់លុក៝ត់តាត៝ងក៝ពាង់ ជេសរីងក្លាច់ពាង់តាទាកវាច់ទាកវារ់រី មាដាសអ៝ន់រ៝ងពាង់រេសលែវទូហ្វេឞូនុយ្សញឆីងជេៈជានតីស។ 3 អ៝ន់ខាន់អៃមៃញជ្រាង់ឆាក់ខាន់អៃមៃនើម។ លាសគែសអ៝សនោជានតីស អ៝ន់ខាន់អៃមៃលាសនតុមពាង់ លាសពាង់រាគ៝ល់លើយនូយ្សនហ៝ម់អ្យើស អ៝ន់ខាន់អៃមៃយោៈមាពាង់។* 4 លាសពាង់ជានតីសមាខាន់អៃមៃពើសតឹតាទូនារ ជេសរីពាង់ព្លឹងើយមាខាន់អៃមៃពើសតឹដ៝ង់តាទូនារ ពាង់លាស៖ «លែៈលាន់គ៝ប់ជានតីសនើសមេ» អ៝ន់ខាន់អៃមៃយោៈមាពាង់រ៝”។

នាវញឆីង

5 មពោលកោរាញអ៝សម៝នលាសមាឞ្រាសយេឆូ ៖ “ទាន់មៃអ៝ន់នាវញឆីងមាហេនលើមាជ្រូជឹតអើ”។ 6 ឞ្រាសយេឆូ លាសមាខាន់ពាង់៖ “លាសខាន់មៃគែសនាវញឆីងជេៈតឹមឞានមាទូគារ់នតីលទុតជេៈ ជេសរីខាន់មៃលាសមាតើមឆីក្វ៝ង់អ្យា៖ «រោករាយែសមៃហ៝នតាងក្លាងទាកវាច់ទាកវារ់រី» ពាង់មរាអ្យាត់នាវខាន់មៃងាន់រ៝”។*

នាវជានការអ៝សម៝ន

7 “តាមពោលខាន់មៃ លាសគែសទូហ្វេឞូនុយ្សពាង់គែសទឹកហាន់ជានការតាមីរ មោលាសច្យាប់ឞែឞ្យាប់ ត៝ត់ពាង់ព្លឹឆឹតឞើសមីររី អីកោរាញរីងើយមាទឹកអីនៃ៖ «គុឆោងឆាប៝ត់» នទ្រីឞើស? 8 មោនទ្រីអោស កោរាញអីនៃមរាលាសមាពាង់កើតនអារ៝៖ «នទ្រាប់ព្យាង់ត្រាវអ៝ន់មាគ៝ប់ ជេសរីមៃតើសខ៝អាវរាក់អ៝ន់គ៝ប់ឆោង ក៝ប់ជេសគ៝ប់ឆោងទឹងមៃឆោងឞើសកើយ»។ 9 អាសកោរាញលាសអ្វែសមាទឹកអីនៃឞើស ឆៃពាង់ជានតឹងនាវកោរាញដាៈ? មោអោស! 10 ខាន់មៃតឹមឞានដ៝ង់ ទោលខាន់មៃជានការតឹងនាវកោរាញឞ្រាសដាៈអាប់លែៈផ្យៅជេស អ៝ន់ខាន់មៃលាស៖ «ហេនជេងទឹកកោរាញឞ្រាសទើម ហេនជានការម៝សនទើអីហេនទីជានទើម»”។*

ឞ្រាសយេឆូ ជានឞាសជឹតនុយ្សឞូនុយ្សផុងឆា

11 ទោលឞ្រាសយេឆូ ហាន់ជឹតប៝នក្វ៝ង់យេរូឆាលឹម ពាង់ហាន់រ៝ៈនហារ់ឞ្រីឆាមារី ដាសឞ្រីកាលីលេ ។* 12 ជេសរីឞ្រាសយេឆូ ហាន់លាប់រ៝ៈទូប៝ន គែសមពោលផុងឆាជឹតនុយ្សហាន់ម៝ប់ពាង់។ តឹងនាវវៃ ឞ្វៃខាន់ពាង់មោអ៝ន់គុទាច់មាឞូនុយ្សអេង នទ្រីទឹងខាន់ពាង់គុឞើសងាយនតែរក្វាល់៖* 13 “ហើយកោរាញយេឆូ ទាន់យោៈនអាចជានឞាសមាហេនបាៈអើ”។ 14 ឞ្រាសយេឆូ អ្វាញ់ជឹតខាន់ពាង់ ជេសរីលាស៖ “ហាន់ញហើឆាក់ខាន់មៃនៃអ៝ន់មាមពោលជានឞ្រាសអ្វាញ់*អារី គៃមាគឹតនាល់ឞាសនាវជី”។ ខាន់ពាង់លោសឞើសឞ្រាសយេឆូនៃ ទោលខាន់ពាង់ហាន់រ៝ៈត្រ៝ង នាវជីផុងឆាលែៈខាន់ពាង់រីនើសទោមាឞាសក្ល៝សទាទេរ៝។* 15 ត៝ត់មាឆៃឆាក់ខាន់ពាង់នើមឞាសក្ល៝សលែៈផ្យៅកើតនៃ គែសទូហ្វេតាមពោលអីនៃពាង់ព្លឹជឹតកើយអ្យា ងក្រែមារានេមាកោរាញឞ្រាសទុតនតែសៗងាន់។ 16 ត៝ត់តានៃពាង់ពាន់តាជ៝ង់ឞ្រាសយេឆូ រី កុញឞោកជឹតនែស ជេសរីលាសអ្វែសមាកោរាញឞ្រាស។ ឞូនុយ្សអីនៃមពោលឞ្រីឆាមារី មោអោសទីផូងអីឆ្រាអែល ។* 17 ជេសរីឞ្រាសយេឆូ លាស៖ “មោទីមពោលអីជឹតនុយ្សឞាសទាទេ លាសនទ្រីមពោលអីមឞ៝ល់តោរឆឹននុយ្សអាសជឹតគុ? 18 គែសទូហ្វេមពោលឞ្រីអេងអ្យាទើមឞើស ព្លឹរានេមាកោរាញឞ្រាស?” 19 ជេសរីពាង់លាសមាឞូនុយ្សអីនៃជឹត៖ “មៃទ៝ក់ហាន់រីហ៝ម់ នាវមៃញឆីងជានឞាសនាវជី†មៃ”។*

នាវគឹតមឞេនមានាវកោរាញឞ្រាសម៝ត់អ្វាញ់ឞូនុយ្ស

(មថ ២៤:២៣-២៨, ៣៧-៤១)

20 គែសទូនារផូងផារីឆី អោបឞ្រាសយេឆូ ទាសជ៝ៈនាវកោរាញឞ្រាសម៝ត់អ្វាញ់វាច់។ ឞ្រាសយេឆូ អើសមាខាន់ពាង់៖ “នាវកោរាញឞ្រាសម៝ត់អ្វាញ់វាច់មោគែសអោសនាវឆៃមាមាត់ឞូនុយ្ស។* 21 មោគែសអោសឞូនុយ្សទើយលាស៖ «នាវកោរាញឞ្រាសម៝ត់អ្វាញ់តានតុកអ្យា» មោលាស «តានតុករី»។ អ៝ន់ខាន់មៃគឹតលាស នាវកោរាញឞ្រាសម៝ត់អ្វាញ់គែសតានូយ្សនហ៝ម់ឞូនុយ្ស”។* 22 ឞ្រាសយេឆូ លាសមាអ៝សម៝នពាង់៖ “ជឹតនាប់តៃ ខាន់អៃមៃអុចឆៃនារគ៝ប់អីក៝នឞូនុយ្សតាៈឞើសកោរាញឞ្រាសព្លឹវាច់ គៃមាម៝ត់អ្វាញ់ខាន់អៃមៃតានាវទើយកោរាញឞ្រាស តីសមាខាន់អៃមៃមោឆៃអោស។ 23 នោកនៃគែសឞូមឞើសមាខាន់អៃមៃលាស៖ «កោរាញឞ្រាសតានតុកអ្យា» មោលាស «តានតុករី» ខាន់អៃមៃលើយអោសអ្យាត់ខាន់ពាង់ លើយអោសហាន់អ្វាញ់។* 24 យ៝រលាសនារគ៝ប់អីក៝នឞូនុយ្សតាៈឞើសកោរាញឞ្រាសព្លឹវាច់ តឹមឞានមាលើបងលាយ្សអាងច្រាតឞើសជ៝ង់ត្រោកទូទីងត៝ត់មាជ៝ង់ត្រោកទូទីង កើតនៃដ៝ង់លាមនែសនតូមរាគឹតឆៃនារគ៝ប់ព្លឹវាច់។ 25 យើនមាអេល៝រមាត៝ត់នារអីនៃនើស គ៝ប់អីក៝នឞូនុយ្សតាៈឞើសកោរាញឞ្រាសមរាគែសនាវជេរជ៝ត់ទុតហោល៝រ ជេសរីឞូនុយ្សតារានោកអាបៃអ្យាមអារ់លើយគ៝ប់ដ៝ង់។* 26 តានោកគ៝ប់អីក៝នឞូនុយ្សតាៈឞើសកោរាញឞ្រាសព្លឹវាច់នៃ ជេងតឹមឞានមារានោកនោអេ កាល់អែនើសដ៝ង់។* 27 រានោកនៃឞូនុយ្សគុញេតឆោងឆា នអាប់អូរឆាយលើសមីរជានឞា ឞាៈអ៝សឞាៈក៝ន នហ៝មាត៝ត់នារនោអេ លាប់តាត្រោមទូកក្វ៝ង់រី ជេសរីទាកលេងទាកទើងឞុកលើសហេងខាន់ពាង់លែៈផ្យៅ។*

28 នារគ៝ប់អីក៝នឞូនុយ្សតាៈឞើសកោរាញឞ្រាសព្លឹវាច់ ជេងតឹមឞានមារានោកលុត កាល់អែនើសដ៝ង់។ រានោកនៃឞូនុយ្សគុញេតឆោង តាច់រាគ៝ល់ទ្រាប់នទើ តូចតាម់ នទ្រែលមាជានញីសជានជៃអាប់នារអាប់នារ។* 29 នហ៝មាត៝ត់នារលុត ទូលោសឞើសប៝នឆោដុម នៃ គែសអុញ នទ្រែលមាលុហីតអុញតាៈឞើសកាលើត្រោកតីតឹមឞានមាតុបមីសងាន់ ជានហេងលែៈផ្យៅឞូនុយ្សតាប៝នឆោដុម អីនៃ។ 30 នារគ៝ប់អីក៝នឞូនុយ្សតាៈឞើសកោរាញឞ្រាសព្លឹវាច់ញឆោសឆាក់ ជេងតឹមឞានមាកើតនៃដ៝ង់។ 31 តានារអីនៃ លាសឞូម៝សគុកាលើច៝រជៃល៝ង់‡ លាសពាង់គែសទ្រាប់នទើតាត្រោមជៃលើយអោសជុរលាប់ឆ៝ៈ អ៝ន់ពាង់ជុរទូញច្វាត់ហ៝ៈ។ ឞូម៝សអីគុតាមីរតឹមឞានកើតនៃដ៝ង់ លើយអោសព្លឹតាជៃមាឆ៝ៈនទើ អ៝ន់ទូញច្វាត់ហ៝ៈ។ 32 អ៝ន់កាសគឹតនាវត៝ត់មាអីអូរលុត ពាង់ខឹតយ៝រលាសពាង់ងគឹលជឹតកើយនោកខាន់ពាង់ទូឞើសប៝នឆោដុម ។* 33 យ៝រលាសឞូម៝សអីអុចព្រាប់មានាវរេសពាង់នើម ពាង់អីនៃមោអោសគែសនាវរេសនហ៝រ៝ យើនមាឞូម៝សរ៝សនាវរេសយ៝រមាតឹងគ៝ប់§ ពាង់អីនៃគែសនាវរេសនហ៝រ៝ងាន់តានារជឹតនាប់តៃ*។* 34 គ៝ប់មឞើសមាខាន់អៃមៃ តានារនៃលាសគែសឞារហៃឞូនុយ្សឞិចតាទូមល៝ម់គ្រែទើមតានោកមាង់ ទូហ្វេកោរាញឞ្រាសឆ៝ៈអ៝ន់គុតាប៝នអ្វែសតាកាលើ ហោមរ៝ងទូហ្វេមាតេៈទោយ្ស។ 35 គែសឞារហៃឞូអូរពែសតឹមរាប់ ទូហ្វេកោរាញឞ្រាសឆ៝ៈអ៝ន់គុតាប៝នអ្វែសតាកាលើ ហោមរ៝ងទូហ្វេមាតេៈទោយ្ស។ 36 [លាសឞារហៃឞូក្លោគុតាមីរ ទូហ្វេកោរាញឞ្រាសឆ៝ៈហោមរ៝ងទូហ្វេ]”។ 37 អ៝សម៝នអោបឞ្រាសយេឆូ ៖ “ហើយកោរាញ អាសនតុកគែសនាវអីនៃមេស?” ឞ្រាសយេឆូ អើសមាខាន់ពាង់៖ “អាសនតុកគែសនទើខឹត គ្រ៝ត់មរារាគូមឞាល់មពារ់នទាច់តានតុកអីនៃដ៝ង់ កើតនទ្រីនទើអីនៃអ៝ន់មពើលមាឞូនុយ្សឆៃឞើសងាយ”។†

*17:3 ១៧:៣-៤៖ មថ ១៨:២១-២២

*17:6 ១៧:៦៖ មថ ២១:២១

*17:10 ១៧:១០៖ ១កោ ៩:១៦-១៧

*17:11 ១៧:១១៖ លក ៩:៥១

*17:12 ១៧:១២៖ កល ១៣:៤៥-៤៦

*17:14 ១៧:១៤៖ នោកនៃគែសមពោលជានឞ្រាសទើមទើយមឞើសលាសលែៈឞាសនាវជីអីនៃ។ ផូងអីឆ្រាអែល ឞូកើបពាង់មោក្ល៝ស ត៝ត់មាមពោលកោរាញជានឞ្រាសមឞើសលាសពាង់លែៈឞាសជេស។

*17:14 ១៧:១៤៖ កល ១៤:២-៣២

*17:16 ១៧:១៦៖ លក ៩:៥២-៥៣; យហ ៤:៩

†17:19 ១៧:១៩៖ មោលាស «នាវមៃញឆីងលែៈរាក្លាយ្សមៃជេស»។

*17:19 ១៧:១៩៖ មក ៥:៣៤

*17:20 ១៧:២០៖ លក ១៩:១១

*17:21 ១៧:២១៖ លក ១១:២០

*17:23 ១៧:២៣៖ លក ២១:៨

*17:25 ១៧:២៥៖ លក ៩:២២, ៤៤; ១៨:៣២-៣៣

*17:26 ១៧:២៦-២៧៖ នន ៦:១១-១៣; ៧:៧-១៣

*17:27 ១៧:២៧៖ នន ៧:៧-២៣

*17:28 ១៧:២៨-២៩៖ នន ១៩:១៤, ២៤-២៥

‡17:31 ១៧:៣១៖ តាឞ្រីអីឆ្រាអែល ជៃគែសច៝រល៝ង់ គៃមាជានការ គុរាលូ មោលាសអីសនទើ ជេសរីគូងហាវតាឞើសទីសជៃ។

*17:32 ១៧:៣២៖ នន ១៩:២៦

§17:33 ១៧:៣៣៖ តានាវងើយគ្រែក មោគែសអោសញចីស «យ៝រមាតឹងគ៝ប់» តីសមាតា ៩:២៤ គែស។

*17:33 ១៧:៣៣៖ មោលាស «ឞូម៝សជ៝យគៃមាក្លាយ្សនាវរេសតានែសនតូអ្យា ពាង់មរាខឹតនហ៝រ៝ យើនមាឞូម៝សអីរ៝សនាវរេសពាង់នើមយ៝រមាគ៝ប់ ពាង់មរារេសនហ៝រ៝»។

*17:33 ១៧:៣៣៖ លក ៩:២៤

†17:37 ១៧:៣៧៖ គែសឞូនុយ្សគឹតអេងឞាល់មានាវខ្លៃតាត្រ៝ងអីអ្យា គែសពែនតីល ១. នារព្លឹវាច់ឞ្រាសយេឆូ មោនតុងអោស ទឹងលែៈឞូនុយ្សទើយឆៃ តឹមឞានមាឆៃឆ្យុមគ្រ៝ត់ឞើសងាយ ២. នោកនាវអ្យើសឞូនុយ្សទុតក្វ៝ង់ នាវអ្យើសអីនៃអូយ្សមផ៝ក់នាវតេៈទោយ្សកោរាញឞ្រាស តឹមឞានមានទើខឹតអូយ្សមផ៝ក់ឆ្យុមគ្រ៝ត់ ៣. នាវគឹតមឞេនតានែសនតូមរាញហើនារអីនៃឞើយមាត៝ត់ កើតឆ្យុមគ្រ៝ត់តាត្រោក ញហើគែសនទើខឹតតានតុកអីនៃ។