នាវកោរាញឞ្រាសងើយនាវតឹមរាង្លាប់មហែ លូកា 10

ឞ្រាសយេឆូ ដាៈអ៝សម៝ន ៧២ នុយ្ស

1 ជេសឞើសកើយនៃ ឞ្រាសយេឆូ កើយ្សដ៝ង់អ៝សម៝ន ៧២ នុយ្ស *ជឹត ជេសរីដាៈខាន់ពាង់ហាន់ល៝រ ហាន់ឞារហៃឞារហៃ អាប់ប៝ន អាប់នតុកអីឞ្រាសយេឆូ អុចនទ្រាប់ហាន់។* 2 ឞ្រាសយេឆូ លាសមាខាន់ពាង់៖ “ហើយអ៝សម៝ន គែសអ៝ក់ឞូនុយ្សអុចអ្យាត់នាវមហែមហានអ្វែស ខាន់ពាង់តឹមឞានមាឞាលែៈទុមអីអ៝ក់ងាន់ ឞូនុយ្សមឞើសងក៝ចនាវមហែមហានអ្វែសតឹមឞានមាឞូនុយ្សរែក តីសមាឞូនុយ្សអីនៃដេៈទើម។ លាសនទ្រីទាន់កោរាញឞ្រាសនើមអីតើមឞានៃញជ្វាល់ឞូនុយ្សអាអេងជឹត កើលរែកឞាទុមអីនៃ។ 3 អ៝ន់ខាន់មៃហាន់ហ៝ម់ គ៝ប់ដាៈខាន់មៃហាន់តឹមឞានមាអ៝ន់ក៝នឞែឞ្យាប់គុតាងក្លាងផូងឆ៝ឞ្រី។ 4 គ៝ប់ដាៈខាន់មៃហាន់ឆាក់ទើម លើយញអោតព្រាក់ លើយចែងទុង លើយញអោតនតោជ៝ត លាសម៝ប់ឞូរ៝ៈត្រ៝ងលើយងក៝ចឞ្រីជ៝ៈដ៝ង់។ 5 ម៝សជៃអីខាន់មៃលាប់រី អ៝ន់ខាន់មៃលាសកើតនអាល៝រ៖ «ទាន់កោរាញឞ្រាសអ៝ន់នាវអ្វែសលាង់ដាប់មពាន់មាឞូនុយ្សគុតាជៃអ្យា»។* 6 លាសឞូនុយ្សតាជៃអីនៃរ៝មខាន់មៃអុចនាវដាប់មពាន់ នាវដាប់មពាន់អីខាន់មៃទាន់នើសគុតាជៃពាង់នៃរ៝។ លាសពាង់មោអុច នាវដាប់មពាន់អីនៃមោហោមអោសគុតាជៃពាង់នៃ។ 7 ជេសរីគុតាជៃពាង់អីនៃហ៝ៈ លើយអោសនត្រើនជៃអេង។ ញេតឆោងលែៈនទើអីឞូអ៝ន់មាខាន់មៃ យ៝រលាសនទើអីនៃជេងនទើឞូងខោមមាខាន់មៃ ឞូនុយ្សនតុមនតីឞូតឹមឞានមាគែសជានការមាឞូដ៝ង់។* 8 ម៝សប៝នអីខាន់មៃហាន់នៃ លាសគែសឞូរ៝ម លែៈនទើអីឞូអ៝ន់ឆា ខាន់មៃឆារ៝‌ 9 នហ៝មាជានឞាសនាវជីឞូ។ ជេសរីមឞើសងក៝ចមាប៝ននៃ៖ «នាវកោរាញឞ្រាសម៝ត់អ្វាញ់ខាន់អៃមៃ†លែៈទាច់មាខាន់អៃមៃងាន់រ៝»។* 10 លាសឞូមោអោសរ៝ម ប៝នអីខាន់មៃលាប់រី លោសហ៝ម់ឞើសនតុកនៃ ហាន់រ៝ៈប៝នខាន់មៃលាសកើតនអា៖* 11 «ឞ៝លលាសគែសនែសមោយនតុកប៝នខាន់អៃមៃក្រេបតាជ៝ង់ហេន ហេនរាតោស‡លើយមាខាន់អៃមៃនើមដ៝ង់ យើនមាអ៝ន់ខាន់អៃមៃគឹតនាវអ្យា នាវកោរាញឞ្រាសម៝ត់អ្វាញ់ខាន់អៃមៃលែៈទាច់ងាន់រ៝§»។ 12 ខាន់មៃគុអ្យាត់នាវគ៝ប់ប៝ត់ ឞូនុយ្សតាប៝នឆោដុម អីជានតីសទុតហោកាល់អែនើស នទ្រីកោរាញឞ្រាសទែលើសហេងខាន់ពាង់មាអុញឞើសកាលើត្រោក ខាន់ពាង់អីនៃហោមអែគែសទោយ្សថើលមាដាសឞូនុយ្សតាប៝នអីនៃ តានារកោរាញឞ្រាសផាតទោយ្សលាមនែសនតូ”។*

នទុយ្សមាផូងទាង់ក៝

(មថ ១១:២០-២៤)

13 ជេសរីឞ្រាសយេឆូ លាសជឹត៖ “រេសរាញាល់ងាន់មាឞូនុយ្សគុតាប៝នខោរាឆីន នទ្រែលមាប៝នបេតឆៃដា យ៝រលាសខាន់ពាង់លែៈឆៃទឹងលែៈនទើអ្វែសនទើខ្លៃគ៝ប់ជាន តីសមាមោអោសរាគ៝ល់លើយនូយ្សនហ៝ម់អ្យើស។ ឞូនុយ្សតាប៝នតីរុស នទ្រែលមាតាប៝នឆីដោន ជេងផូងមោគឹតនាល់កោរាញឞ្រាស លាសខាន់ពាង់ឆៃនាវខ្លៃអីនៃ ខាន់ពាង់រាគ៝ល់លើយនូយ្សនហ៝ម់អ្យើសរ៝ ជេសរីគៃមាញហើនាវខាន់ពាង់លែៈរាគ៝ល់លើយនូយ្សនហ៝ម់អ្យើស ខាន់ពាង់ញឆ៝សងគូតបាវច្យាត់ គុតាអុញឞុស។* 14 នទ្រីតានារកោរាញឞ្រាសផាតទោយ្សលាមនែសនតូតៃ ឞូនុយ្សតាប៝នក្វ៝ង់តីរុស នទ្រែលមាតាប៝នក្វ៝ង់ឆីដោន ខាន់ពាង់គែសទោយ្សថើលតាន៝ម់ឞូនុយ្សគុតាប៝នខោរាឆីន ប៝នបេតឆៃដា ។ 15 ឞូនុយ្សគុតាប៝នកាពើនិម អីប៝នគ៝ប់គុជ៝ៈខៃ នទ្រែលមាគ៝ប់លែៈនតីលែៈជាននទើនាវខ្លៃ

លើយអោសនអោនលាសឆាក់ខាន់អៃមៃនើមលែៈជេងឞូនុយ្សអ្វែសហាវតាប៝នអ្វែសកាលើ‌

មោអោស ខាន់អៃមៃតៃតុបតានតុករេសរាញាល់តានទ្រូងអុញរីរ៝”។

16 ជេសរីឞ្រាសយេឆូ លាសមាមពោលអ៝សម៝នពាង់ដ៝ង់៖ “ឞូម៝សពាង់អីអ្យាត់នាវខាន់មៃ តឹមឞានមាអ្យាត់នាវគ៝ប់ដ៝ង់។ ឞូម៝សអីមោអ្យាត់អោសនាវខាន់មៃ តឹមឞានមាមោអ្យាត់នាវគ៝ប់ដ៝ង់ ឞូម៝សមោអ្យាត់នាវគ៝ប់ តឹមឞានមាមោអ្យាត់ដ៝ង់នាវកោរាញឞ្រាសនើមអីញជ្វាល់ដាៈគ៝ប់ហាន់តាអ្យានើស”។*

មពោលអ៝សម៝នព្លឹឆឹតតាឞ្រាសយេឆូ

17 ជេសរីមពោលអ៝សម៝នអី ៧២ នុយ្សនៃព្លឹឆឹតឞើសរីរាម់រាហើន ខាន់ពាង់ងក៝ចនាវមាឞ្រាសយេឆូ ៖ “ហើយកោរាញ យ៝រមាម៝សរាញាឆាក់មៃ ឞ៝លលាសឞ្រាសអ្យើសអ្យាត់នាវហេនដ៝ង់”។ 18 ឞ្រាសយេឆូ លាសមាខាន់ពាង់៖ “គ៝ប់លែៈឆៃឆាតាង់ អីកោរាញមពោលឞ្រាសអ្យើសតុបតាៈឞើសកាលើត្រោកតឹមឞានមាលើបងលាយ្សងាន់។* 19 អ្យាគ៝ប់លែៈអ៝ន់នាវទើយមាខាន់មៃ ខាន់មៃទើយដាសមាឆាតាង់ អីកោរាញមពោលឞ្រាសអ្យើស នទ្រែលមាលែៈមពោលអ្យើសពាង់ដ៝ង់ ទើយឞ្រោៈជ៝តឞេស នទ្រែលមានទើរវីង មោគែសអោសទូនតីលនទើជានអ្យើសអ៝ន់មាខាន់មៃ។* 20 លើយតារាម់អោសយ៝រមាឆៃឞ្រាសអ្យើសអ្យាត់នាវខាន់មៃនៃទើម យើនមាអ៝ន់ខាន់មៃរាម់មអាកកោរាញឞ្រាសលែៈគែសញចីសឆាក់ខាន់មៃតាកាលើត្រោកនតុកពាង់នើមគុរីហ៝ៈ នទ្រីនារជឹតនាប់តៃខាន់មៃគុនទ្រែលកោរាញឞ្រាសនហ៝រ៝”។*

ឞ្រាសយេឆូ គែសនូយ្សនហ៝ម់រាម់មអាក

(មថ ១១:២៥-២៧; ១៣:១៦-១៧)

21 នោកនៃឞ្រាសហ្វេងអ្វែសអីក្ល៝សអ្វែសជានអ៝ន់ឞ្រាសយេឆូ គែសនូយ្សនហ៝ម់រាម់មអាកងាន់ ឞ្រាសយេឆូ លាសកើតនអា៖ “ហើយឞឹ អីកោរាញមាត្រោក នទ្រែលមានែសនតូ គ៝ប់រានេមៃហោងាន់ យ៝រលាសមៃលែៈញហើនាវមៃនតើមម៝ត់អ្វាញ់ឞូនុយ្សអ្យាអ៝ន់មាឞូនុយ្សរាលូកម៝ល់មោវ៝ត់តឹមឞានមាក៝នឆែ ជេសរីពោននទ៝ប់លើយនទើអីនៃមាឞូនុយ្សអីកើបអេងឆាក់ខាន់ពាង់នើមជេងឞូនុយ្សគឹតឞូនុយ្សឞ្លាវ។ ហើយឞឹ នូយ្សនហ៝ម់មៃអុចកើតនអារ៝”។* 22 ជេសរីពាង់លាសជឹត៖ “ទឹងលែៈនតីលនទើ លែៈឞឹជាវមាគ៝ប់ទាទេជេស។ មោគែសអោសឞូនុយ្សគឹតនាល់គ៝ប់លាសអីក៝នកោរាញឞ្រាស គែសឞឹគ៝ប់នើមទើមគឹតនាល់ មោគែសអោសឞូនុយ្សគឹតនាល់ឞឹងាន់គ៝ប់ គែសគ៝ប់អីក៝នពាង់ទើមគឹតនាល់ នទ្រែលមាទឹងលែៈឞូនុយ្សអីគ៝ប់អុចអ៝ន់គឹតនាល់ ទូរីទើម”។* 23 នោកមោគែសអោសឞូនុយ្សអាអេងគុតារី ឞ្រាសយេឆូ ងើយដាសមពោលអ៝សម៝នទើម ពាង់លាស៖ “អ្វែសមអាកងាន់មាខាន់អៃមៃ យ៝រលាសមាត់ខាន់អៃមៃឆៃទឹងលែៈនាវគ៝ប់លែៈជាន។ 24 គ៝ប់មឞើសមាខាន់អៃមៃ គែសអ៝ក់ឞូនុយ្សនតើយ្សនាវងើយកោរាញឞ្រាសកាល់អែនើស នទ្រែលមាអ៝ក់កាដាច់ផូងអីឆ្រាអែល កាល់អែនើសអុចឆៃងាន់ទឹងលែៈនាវអីខាន់អៃមៃលែៈឆៃអាបៃអ្យា តីសមាមោឆៃអោស ខាន់ពាង់អុចតាង់ងាន់នាវអីខាន់អៃមៃលែៈតាង់អ្យា តីសមាមោតាង់ដ៝ង់”។*

នាវងើយនតឹតមាទូហ្វេឞូនុយ្សឆាមារី

25 នោកនៃគែសទូហ្វេនើមនតីនាវវៃផូងអីឆ្រាអែល ពាង់ទ៝ក់អុចអោបរាល៝ងឞ្រាសយេឆូ ៖ “ហើយនើមនតី មើមអ៝ន់គ៝ប់ជានគៃមាគែសនាវរេសនហ៝រ៝មេស?”* 26 ឞ្រាសយេឆូ អើសមាពាង់៖ “ម៝សបាៈគែសនាវមោឆេ ញចីសតាឆ៝ម់បុតនាវវៃកាល់អែនៃនើស? ទោលមៃអ្វាញ់ ម៝សបាៈមៃវ៝ត់?” 27 ឞូនុយ្សអីនៃអើសមាឞ្រាសយេឆូ ៖ “«អ៝ន់រ៝ង់មាកោរាញឞ្រាសអីឞ្រាសខាន់អៃមៃនើមមាលែៈនូយ្សនហ៝ម់ មាលែៈហ្វេង មាលែៈនហ៝ម់ឆ្វាន នទ្រែលមាលែៈនាវមឹន»† ជេសរី «រ៝ង់មាឞូច្យៅមែងកើតរ៝ង់មាឆាក់មៃនើមដ៝ង់»†”។ 28 ឞ្រាសយេឆូ លាសមាពាង់៖ “នាវមៃអើសអីនៃជេងទីងាន់ អ៝ន់មៃជានកើតនាវនៃបាបើ នទ្រីមើនារជឹតនាប់តៃមៃមរាគែសនាវរេសនហ៝រ៝”។* 29 យើនមាឞូនុយ្សអីនៃអុចញហើនាវអោបពាង់នើមជេងនាវអោបទី មោអោសអោបរាល៝ងទើម* ជេសរីអោបឞ្រាសយេឆូ ជឹត៖ “លាសនទ្រីឞូម៝សជេងឞូច្យៅមែងគ៝ប់មេស?” 30 ឞ្រាសយេឆូ អើសមាពាង់មានាវងើយនតឹត៖ “គែសទូហ្វេឞូក្លោលោសឞើសប៝នក្វ៝ង់យេរូឆាលឹម ហាន់ជឹតប៝នយេរីខោ រី។ រ៝ៈត្រ៝ងនៃពាង់ម៝ប់មាមពោលនតុង ឞូលើសពាង់ត៝ត់ខឹតយើស ឆ៝ៈលែៈទ្រាប់នទើឆ៝ៈខ៝អាវពាង់ដ៝ង់ ជេសរីលែវឞាល់ញច្វាត់លែៈរាងាត់ នត្លើយអេងអោឞាល់តារី។ 31 ជេសរីគែសទូហ្វេតាមពោលជានឞ្រាសហាន់រ៝ៈត្រ៝ងនៃ មពោលអីនៃឞ្លាវងាន់តានាវវៃផូងឞ៝ន់។ ត៝ត់មាឆៃឞូនុយ្សរាមាញអីនៃ ពាង់ហាន់ទែរ។* 32 ជេសរីគែសដ៝ង់ទូហ្វេមពោលលេវី មពោលអីនៃជេងនើមនតីនាវវៃផូងឞ៝ន់ ពាង់ហាន់ត៝ត់តានៃឆៃឞូនុយ្សរាមាញអីនៃ នហ៝មាហាន់ទែរដ៝ង់។ 33 ងខេបងាន់គែសទូហ្វេមពោលឞ្រីឆាមារី ហាន់រ៝ៈត្រ៝ងនៃដ៝ង់ ជេងឞូនុយ្សអីផូងឞ៝ន់មឺចរាម៝តហោងាន់ មពោលពាង់មោអោសឞ្លាវតានាវវៃផូងឞ៝ន់។ ត៝ត់មាឆៃឞូនុយ្សរាមាញអីនៃ ហោងាន់ពាង់គែសនាវយោៈគែសនាវនអាចមាឞូនុយ្សអីនៃ។* 34 ពាង់ហាន់ទាច់ជឹតឞូនុយ្សរាមាញនៃ ពាង់ឆ៝ៈទាកងី ឆ៝ៈនទ្រាញ់ពាង់នើមឞើសអ្យាត៝ៈកាលើឆោតឞូនុយ្សអីនៃ ឆើមពូតឆោតពាង់រី ជេសរីពឺតេៈកាលើឆែសលៀពាង់ញច៝រី លែវហាន់តាជៃវែសឞិចឞូនាច់។ ត៝ត់តានៃពាង់ម៝ត់អ្វាញ់ឞូនុយ្សអីនៃជឹត។ 35 កាសអោយតៃពាង់អ៝ន់ឞារមល៝ម់ព្រាក់កាក់†មាតើមជៃនៃ ងក្រែមានតិញពាង់៖ «ដាៈមៃឆើមម៝ត់ឆាម់ឞូនុយ្សអ្យា លាសលែៈទ៝ង់រាលាវឞើសព្រាក់គ៝ប់អ៝ន់អ្យា ត៝ត់គ៝ប់ព្លឹតៃ គ៝ប់កើយអ៝ន់រឹងមាមៃ»។

36 លាសនទ្រីលែៈពែនុយ្សខាន់ពាង់អីនៃ ឞូម៝សមៃមឹនជេងឞូនុយ្សច្យៅមែងដាសមាឞូនុយ្សមពោលនតុងនៃលើសមេស?” 37 នើមនតីនៃអើស៖ “ជេងឞូនុយ្សអីគែសនាវយោៈនអាចមាពាង់អីនៃ”។ ឞ្រាសយេឆូ លាសមាពាង់៖ “អ៝ន់មៃហាន់ជានតឹងកើតពាង់អីទូហ្វេនៃ”។‡*

ឞ្រាសយេឆូ គុតាជៃមាថា នទ្រែលមារី

38-39 ជេសរីឞ្រាសយេឆូ នទ្រែលមាអ៝សម៝នពាង់ហាន់ជឹត លាប់តាទូប៝ន តាប៝ននៃគែសឞារហៃអ៝សនូររាញាខាន់ពាង់មាថា នទ្រែលមាមារី ជេសរីមាថា ជាៈឞ្រាសយេឆូ លាប់គុតាជៃពាង់។ ត៝ត់តាជៃនៃមារី អីអ៝សរីគុអ្យាត់នាវឞ្រាសយេឆូ នតី ពាង់គុកេងជ៝ង់ឞ្រាសយេឆូ រី។* 40 ល៝ង់មាថា ឞ៝ប់ហោងាន់មានទ្រាប់ព្យាង់ត្រាវ ជេសរីពាង់ហាន់មឞើសមាឞ្រាសយេឆូ ៖ “ហើយកោរាញមៃមោគឹតឞើស អ៝សគ៝ប់ប៝ង់អេងគ៝ប់ជានការទូហ្វេអេងទើម? មៃមឞើសដាៈពាង់កើលគ៝ប់បាៈហែស”។ 41 ឞ្រាសយេឆូ អើសមាពាង់៖ “អើអ៝សមាថា អ៝សមាថា អើយ! អៃរាង៝តរាវៃមានទើអេងៗអ៝ក់ងាន់‌* 42 យើនមាគែសទូនាវការទើមគែសនាវខ្លៃ អ៝សអៃលែៈកើយ្សជេសការនាវខ្លៃអីនៃ ជេងពាង់អ្យាត់នាវគ៝ប់នតី។ នាវអីនៃឞូមោអោសឞ្លាវឆ៝ៈឞើសពាង់”។

*10:1 ១០:១៖ ឆ៝ម់បុតអើមញចីសមាតីអាបាៈគែស «៧០»នុយ្ស។

*10:1 ១០:១-១២៖ លក ៩:១-៦

*10:5 ១០:៥-៦៖ លក ២:១៤

*10:7 ១០:៧៖ ១កោ ៩:៤, ១៤; ១តម ៥:១៨

†10:9 ១០:៩៖ មោលាស «ឞ្រីកាដាច់កោរាញឞ្រាស»។

*10:9 ១០:៩៖ មថ ៣:២; ៤:១៧

*10:10 ១០:១០-១១៖ ការ ១៣:៥១; ១៨:៦

‡10:11 ១០:១១៖ ខាន់ពាង់រាតោសលើយ យ៝រលាសខាន់ពាង់អុចញហើផូងអីនៃមោទីមាកោរាញឞ្រាស ជេសរីខាន់ពាង់មោអុចអោសគែសនទើតាៈឞើសផូងអីនៃ ឞ៝លលាសនែសមោយមោអុចដ៝ង់។

§10:11 ១០:១១៖ មោលាស «ឞ្រីកាដាច់កោរាញឞ្រាសឞើយត៝ត់ជេស»។

*10:12 ១០:១២៖ នន ១៩:២៤-២៥

*10:13 ១០:១៣-១៤៖ អេឆា ២៣:១-១៦; យោន ៣:៦-៩

*10:16 ១០:១៦៖ យហ ៥:២៣; ១តេ ២:១៣; ៤:៨

*10:18 ១០:១៨៖ អេឆា ១៤:១២; យហ ១២:៣១; នតម ១២:៨-៩

*10:19 ១០:១៩៖ មក ១៦:១៨

*10:20 ១០:២០៖ នតម ១៣:៨

*10:21 ១០:២១៖ ១កោ ១:១៨-២៩

*10:22 ១០:២២៖ យហ ១:១៨

*10:24 ១០:២៤៖ ហេឞ ១១:១៣; ១ពេ ១:១០-១២

*10:25 ១០:២៥៖ លក ១៨:១៨

†10:27 ១០:២៧៖ នវ ៦:៥

†10:27 ១០:២៧៖ កល ១៩:១៨

*10:28 ១០:២៨៖ រម ១០:៥

*10:29 ១០:២៩៖ មោលាស «ឞូនុយ្សអីនៃអុចឞ្រាសយេឆូ លាសមាពាង់ ពាង់លែៈជានទីជេសតឹងនាវវៃពាង់»។

*10:31 ១០:៣១-៣២៖ កល ២១:១

*10:33 ១០:៣៣៖ លក ៩:៥២-៥៤; យហ ៤:៩

†10:35 ១០:៣៥៖ «ឞារមល៝ម់ព្រាក់កាក់» មោលាស «ឞារដេនារី »។ ទូកាក់ដេនារី តឹមឞានមាខ្លៃឞូងខោមជានការទូនារ។

‡10:37 ១០:៣៧៖ តានាវវៃផូងអីឆ្រាអែល កោរាញឞ្រាសនតីអ៝ក់មានទើក្ល៝សមានទើមោក្ល៝ស នតឹតលាសពាសឆាក់ឞូនុយ្សខឹតជានអ៝ន់ឞូនុយ្សមោហោមក្ល៝សអោសជ៝ៈត៝ត់ពើសនារ។ យើនមាផូងឞូនុយ្សជានឞ្រាសកោរាញឞ្រាសមោអ៝ន់ពាសឆាក់ឞូនុយ្សខឹត តារានាក់វ៝ល់ទើមអ៝ន់ពាស តីសមាមោហោមក្ល៝សអោស។ លាសឞូអេងមោអ៝ន់ពាសងាន់រ៝។ ពាង់ដាៈរ៝ង់មាឞូនុយ្សច្យៅមែងដ៝ង់។ ផូងជានឞ្រាស នទ្រែលមាផូងលេវី ខាន់ពាង់កើបនទើក្ល៝សមោក្ល៝សជេងនាវវៃអីខ្លៃរាលាវមានាវរ៝ង់ (កល ២១:១-៣; នក ១៩:១៦)។

*10:37 ១០:៣៧៖ លក ៦:៤៧-៤៨

*10:38-39 ១០:៣៨-៣៩៖ យហ ១១:១-២; ១២:១-៣

*10:41 ១០:៤១-៤២៖ មថ ៦:៣១-៣៣