នាវកោរាញឞ្រាសងើយនាវតឹមរាង្លាប់មហែ លូកា 9

ឞ្រាសយេឆូ ដាៈ ១២ អ៝សម៝នហាន់មឞើសនាវមហែមហានអ្វែស

(មថ ១០:៥-១៥; មក ៦:៧-១៣)

1 គែសទូនាររីឞ្រាសយេឆូ ក្វាល់អី ១២ អ៝សម៝ន ជេសរីអ៝ន់នាវទើយមាខាន់ពាង់ ទើយនត្រុតឞ្រាសអ្យើស នទ្រែលមាទើយជានឞាសឞូនុយ្សគែសនាវជីអេងៗដ៝ង់។** 2 ពាង់ដាៈខាន់ពាង់ហាន់មឞើសអ៝ន់ឞូគឹតនាវកោរាញឞ្រាសអុចម៝ត់អ្វាញ់ឞូនុយ្ស* នទ្រែលមាជានឞាសនាវជីក្វែតឞូអ៝ន់ឞាសដ៝ង់។ 3 ឞ្រាសយេឆូ លាសមាខាន់ពាង់៖ “ទោលខាន់មៃឞ្រោៈប៝នអេងៗ មោអ៝ន់អោសលែវញអោតនទើតាឆាក់ ឞ៝លលាសម៝ង់ជ្រា ទុងចែង នទើឆា ព្រាក់កាយ្ស មោលាសខ៝អាវ។ 4 ម៝សជៃខាន់មៃលាប់ គុតាជៃអីនៃហ៝ៈ នហ៝មាត៝ត់ខាន់មៃលោសឞើសប៝នអីនៃ។ 5 លាសប៝នអីនៃមោអោសរ៝មខាន់មៃ អ៝ន់លោសឞើសនតុកនៃហ៝ម់ ជេសរីរាតោសនែសមោយឞើសជ៝ង់ខាន់មៃនើម គៃមាញហើលាសប៝នអីនៃកោរាញឞ្រាសតេៈទោយ្ស”។* 6 ជេសរីមពោលអ៝សម៝ននៃហាន់មឞើសងក៝ចនាវមហែមហានអ្វែសអ៝ក់ប៝ន នទ្រែលមាជានឞាសឞូនុយ្សជីអាប់នតុកដ៝ង់។

ហេរោត ងក្ល៝ន់រាទុកមាឞ្រាសយេឆូ

(មថ ១៤:១-១២; មក ៦:១៤-២៩)

7 ត៝ត់ហេរោត-អ៝ន់តីពាស អីកោរាញម៝ត់អ្វាញ់ឞ្រីកាលីលេ នៃតាង់លឺទឹងលែៈនាវឞ្រាសយេឆូ ជានរី ពាង់អ្យាត់មោគឹត លិចមោគឹត យ៝រលាសគែសឞូនុយ្សអាបាៈងក៝ចលាស៖ “យោហាន-បាប់តែម លែៈទ៝ក់រេស”។* 8 ឞូអាបាៈអេងលាស៖ “ឞូនុយ្សនតើយ្សនាវងើយកោរាញឞ្រាសកាល់អែនើស រាញាពាង់អេលីយា លែៈញហើឆាក់អ៝ន់មាឞូឆៃ”។ ឞូអាបាៈអេងជឹតលាស៖ “គែសទូហ្វេឞូនុយ្សនតើយ្សនាវងើយកោរាញឞ្រាសឞើសកាល់អែនើស លែៈទ៝ក់រេសជេស”។ 9 ល៝ង់កាដាច់ហេរោត លាស៖ “លាសយោហាន-បាប់តែម លែៈគ៝ប់ក៝សត៝ងក៝ពាង់ជេស លាសនទ្រីឞូម៝សពាង់អីជាននាវអីរី?” ជេសរីពាង់ជ៝យនាវអុចម៝ប់ឞ្រាសយេឆូ ដ៝ង់។*

ឞ្រាសយេឆូ ឆ្យាម់ឞូនុយ្ស ៥០០០ នុយ្ស

(មថ ១៤:១៣-២១; មក ៦:៣០-៤៤; យហ ៦:១-១៤)

10 ជេសមពោលកោរាញអ៝សម៝នពាង់ឆឹតតាៈឞើសនតុកអេងៗ ខាន់ពាង់ងក៝ចឞ្រីអ៝ន់មាឞ្រាសយេឆូ ទឹងលែៈនាវខាន់ពាង់ជាន។ ជេសរីឞ្រាសយេឆូ ជាៈអេងខាន់ពាង់ហាន់តាទូប៝ន រាញាប៝នបេតឆៃដា ‌* 11 ជេសប៝នលានលែៈគឹត ខាន់ពាង់លែវឞាល់ហាន់តឹងឞ្រាសយេឆូ ។ ឞ្រាសយេឆូ រ៝មខាន់ពាង់អីនៃ ជេសរីមឞើសងក៝ចអ៝ន់ខាន់ពាង់អ្យាត់នាវកោរាញឞ្រាសអុចម៝ត់អ្វាញ់ឞូនុយ្ស† នទ្រែលមាជានអ៝ន់ឞាសឞូនុយ្សគែសនាវជីក្វែតដ៝ង់។

12 ត៝ត់ទេសនារ ១២ នុយ្សមពោលកោរាញអ៝សម៝នអីនៃហាន់តាឞ្រាសយេឆូ លាសមាពាង់៖ “ហើយកោរាញ ដាៈមៃមឞើសអ៝ន់ប៝នលានឆឹតជ៝យនតុកឞិច ជ៝យនទើឆោងឆារ៝ៈជៃរ៝ៈប៝នទាច់ៗអ៝យតាអ្យា យ៝រលាសតាអ្យានតុករាទាសងាយឞើសប៝នមោគែសអោសនទើឆា”។ 13 ឞ្រាសយេឆូ លាសមាខាន់ពាង់អីនៃ៖ “ខាន់មៃអ៝ន់ឞូឆោងឆាហែស”។ មពោលកោរាញអ៝សម៝នអើស៖ “ហេនគែសព្រាម់មល៝ម់នុមពាង់ នទ្រែលមាឞារមល៝ម់កាទើម កោរាញមេ អើមជេងត៝ង់លាស? លាសនទ្រីកើយរាវាត់មើត៝ង់មាអ៝ន់ខាន់ពាង់អីនៃឆា”។ 14 ខាន់ពាង់ងើយនទ្រី យ៝រលាសតានតុកអីនៃក្លាប់លាសគែស ៥០០០ នុយ្សឞូក្លោ។ ជេសរីឞ្រាសយេឆូ លាសមាអ៝សម៝ន៖ “ខាន់មៃដាៈឞូគុទូមពោលទូមពោលអ៝ន់គែសក្លាប់លាស ៥០ នុយ្ស”។ 15 មពោលអ៝សម៝នជានកើតនាវពាង់ដាៈ ជេសរីទឹងលែៈឞូគុទាទេ។ 16 ជេសរីឞ្រាសយេឆូ ឆ៝ៈព្រាម់មល៝ម់នុមពាង់ នទ្រែលមាឞារមល៝ម់ការី ពាង់ងគើរមាត់ជឹតលើត្រោកមឞើសឆើមនទើឆោងឆាអីនៃមាកោរាញឞ្រាស លោចជេសពាង់គិចនុមពាង់អីនៃនទឹអ៝ន់អ៝សម៝ន ដាៈខាន់ពាង់ពាៈអ៝ន់ឞូឆា។ 17 ជេសតឹមពាៈនទើឆាអីរី ទឹងលែៈឞូនុយ្សគុឆាតានៃហើមទាទេ ជេសរីរាគូមនទើរាមែសឆាអីនៃហោមគែស ១២ ឆាស ‡។

ពេត្រោស មឞើសឞ្រាសយេឆូ ពាង់ឞ្រាសក្រីស

(មថ ១៦:១៣-១៩; មក ៨:២៨-២៩)

18 គែសទូនារឞ្រាសយេឆូ មឞើសឆើមអេង តានៃគែសមពោលអ៝សម៝នទើមគុនទ្រែលពាង់ ផូងប៝នលានមោគែសអោស។ ឞ្រាសយេឆូ អោបមពោលអ៝សម៝នអីនៃ៖ “លែៈផូងប៝នលានលាសគ៝ប់ឞូម៝ស?”* 19 មពោលអ៝សម៝នអើស៖ “អាបាៈលាសមៃជេងយោហាន-បាប់តែម អីលែៈទ៝ក់រេស អាបាៈលាសជេងអេលីយា អីឞូនុយ្សនតើយ្សនាវងើយកោរាញឞ្រាសកាល់អែនើសលែៈព្លឹតាអ្យា អាបាៈជឹតលាសមៃជេងទូហ្វេឞូនុយ្សអីអេងអីនតើយ្សនាវងើយកោរាញឞ្រាសកាល់អែនើសលែៈទ៝ក់រេស”។* 20 ឞ្រាសយេឆូ អោបជឹត៖ “លាសនទ្រីខាន់មៃអែស គ៝ប់ឞូម៝សខាន់មៃលាសមេស?” ពេត្រោស អើស៖ “មៃឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់”។* 21 ឞ្រាសយេឆូ ឞ្វៃ មោអ៝ន់អោសខាន់ពាង់ងក៝ចនាវនៃមាឞូ។* 22 ពាង់លាស៖ “នារជឹតនាប់តៃ ឞ៝លលាសគ៝ប់អីក៝នឞូនុយ្សតាៈឞើសកោរាញឞ្រាស គ៝ប់មរាគែសនាវជេរជ៝ត់ទុតហោ។ មពោលឞូរាញ មពោលកោរាញជានឞ្រាស ផូងនើមនតី មអារ់លើយគ៝ប់ នហ៝មាងខឹតលើយ។ យើនមាត៝ត់ពែនារឞើសកើយនៃគ៝ប់ទ៝ក់រេស”។*

23 ជេសរីឞ្រាសយេឆូ លាសមាទឹងលែៈឞូនុយ្ស៖ “ឞូម៝សពាង់អីអុចតឹងគ៝ប់ អ៝ន់មអារ់លើយនទើឆាក់ពាង់នើមអុច ជេសរីតូយឆីតឹមរាកាង់§ពាង់នើមអ៝ន់អាប់នារ ជេងគែសនាវខ្លៃអ្យាត់ទឹងលែៈនាវកោរាញឞ្រាសដាៈ ឞ៝លលាសត៝ត់ខឹតឆាក់កាដោយ រីមើទើយតឹងគ៝ប់ងាន់។* 24 យ៝រលាសឞូម៝សអីអុចព្រាប់មានាវរេសពាង់នើម ពាង់អីនៃមោគែសអោសនាវរេសនហ៝រ៝ យើនមាឞូម៝សខឹតយ៝រមាតឹងគ៝ប់ ពាង់អីនៃគែសនាវរេសនហ៝រ៝ងាន់តានារជឹតនាប់តៃ។* 25 លាសទូហ្វេឞូនុយ្សពាង់គែសទឹងលែៈនែសនតូអ្យាជេងទ្រាប់នទើពាង់នើមទាទេ តីសមាឆាក់ពាង់នើមខឹតរ៝សហេងមោគែសអោសនាវរេសនហ៝រ៝ លាសនទ្រីម៝សនទើគែសនាវខ្លៃមាពាង់?* 26 លាសឞូម៝សអីដីតព្រេងមោឞាញ់មឞើសតឹងគ៝ប់ ដីតព្រេងនាវគ៝ប់នតី លាសនទ្រីគ៝ប់អីក៝នឞូនុយ្សតាៈឞើសកោរាញឞ្រាសដីតព្រេងមោគឹតនាល់មាពាង់អីនៃដ៝ង់ តានារគ៝ប់ព្លឹវាច់គែសនាវអ្វែសច្រេកលើបគ៝ប់នើម គែសនអ៝ប់មានាវអ្វែសច្រេកលើបឞឹគ៝ប់ នទ្រែលមានាវអ្វែសច្រេកលើបផូងតោងពារ់ក្ល៝សអ្វែស។* 27 គ៝ប់មឞើសអ៝ន់មាខាន់អៃមៃគឹតនហេលនានេៈងាន់ គែសឞូនុយ្សអាបាៈតាអ្យាពាង់មោមរាខឹតអោស ល៝រមាឆៃកោរាញឞ្រាសម៝ត់អ្វាញ់ខាន់ពាង់*”។

នាវច្រេកលើបឞ្រាសយេឆូ

(មថ ១៧:១-៨; មក ៩:២-៨)

28 ក្លាប់លាសគែសផាមនារជេសឞ្រាសយេឆូ ងើយនាវអីនៃ ជេសរីពាង់លែវពេត្រោស លែវយោហាន នទ្រែលមាយាកើ ហាវកាលើយោកគៃមាមឞើសឆើម។** 29 នោកពាង់មឞើសឆើម អីមុសមាត់ពាង់គែសរាគ៝ល់ អាវពាង់ជេងងលាងអាងច្រាតងាន់។* 30 ទោមាឆៃដ៝ង់គែសឞារហៃឞូក្លោងើយនទ្រែលពាង់មោឆេ នទ្រែលមាអេលីយា ខាន់ពាង់អីនៃជេងឞូនុយ្សនតើយ្សនាវងើយកោរាញឞ្រាសឞើសកាល់អែនើស។ 31 ឞារហៃអីនៃគែសនាវអ្វែសច្រេកលើបងាន់តាខាន់ពាង់ ខាន់ពាង់ងក៝ចមានាវឞ្រាសយេឆូ ខឹតតាប៝នក្វ៝ង់យេរូឆាលឹម ហោមដេៈនារជឹតនាប់តៃ ខឹតតឹងនាវកោរាញឞ្រាសអុច។* 32 ល៝ង់ពេត្រោស នទ្រែលមាឞារហៃឞាល់ពាង់នៃហាក់ឞិចទាទេ។ ត៝ត់កាសឞិចរីខាន់ពាង់ឆៃនាវអ្វែសនាវច្រេកលើបឞ្រាសយេឆូ នទ្រែលមាឆៃឞារហៃឞូនុយ្សគុនទ្រែលពាង់ដ៝ង់។ 33 ត៝ត់មាមោឆេ នទ្រែលមាអេលីយា ទូលោសឞើសឞ្រាសយេឆូ រី ពេត្រោស ងើយមាឞ្រាសយេឆូ ៖ “ហើយកោរាញ ឞ៝ន់គុតាអ្យាអ្វែសងាន់មេ អ៝ន់ហេនជានពែមល៝ម់ចូន ទូមល៝ម់អ៝ន់មាមៃ ទូមល៝ម់អ៝ន់មាមោឆេ ទូមល៝ម់ជឹតអ៝ន់មាអេលីយា ”។ នាវពេត្រោស ងើយអីនៃពាង់នើមមោអោសគឹតឆាក់ ពាង់ទាសមាងើយទើម។ 34 នោកពេត្រោស ហោមអែងើយនៃ គែសតុកងកុមឞើសលើខាន់ពាង់រី ខាន់ពាង់ជេងលាប់គុតាត្រោមតុកជានអ៝ន់ខាន់ពាង់ក្លាចទាទេងាន់។ 35 ជេសរីតាង់នតែសងើយតាៈឞើសតុកនៃ៖ “ពាង់អ្យាក៝នគ៝ប់ អីគ៝ប់លែៈកើយ្សពាង់† អ្យាត់នាវពាង់ទោ”។* 36 ជេសតាង់ងើយកើតនៃឆៃឞ្រាសយេឆូ ទូហ្វេអេងទើមគុតារី។ លែៈនាវអីឆៃនៃនើស ខាន់ពាង់មោអោសងក៝ចអ៝ន់មាឞូអេងគឹត ត៝ត់ជ៝ៈឞើសនាប់មើ។

ឞ្រាសយេឆូ ជានឞាសឞូនុយ្សឞ្រាសអ្យើសលើស

(មថ ១៧:១៤-១៨; មក ៩:១៤-២៧)

37 ត៝ត់អោយតៃ ឞ្រាសយេឆូ នទ្រែលមាមពោលអ៝សម៝នពាង់ជុរឞើសលើយោករី តានៃគែសអ៝ក់ឞូនុយ្សវាច់រានពាង់។ 38 ជេសរីគែសទូហ្វេឞូក្លោតាផូងឞូនុយ្សអ៝ក់អីនៃនតែរក្វាល់ឞ្រាសយេឆូ ៖ “ហើយនើមនតី! ទាន់មៃយោៈនអាចមាក៝នគ៝ប់អើ យ៝រលាសគ៝ប់គែសទូហ្វេក៝នអ្យាទើមមេ។ 39 គែសឞ្រាសអ្យើសង្វាយលើសពាង់ទូតឹទូតឹ អ៝ន់ពាង់នតែរមព៝ត់ញឆ្ល៝ង់ញឆ្លាង់ងាន់ លោសមពុញទាកទីវតាមឞូង ឆាក់ជាន់លោសឞុរលោសមោរ ត៝ត់មាពាង់លែៈហ្វារ់ងាន់ រីមើឞ្រាសអ្យើសអីរីលោសទូនហ៝ម់មេ។ 40 មពោលអ៝សម៝នមៃលែៈគ៝ប់ដាៈដ៝ង់ ខាន់ពាង់នត្រុតមោអោសទើយលោស”។ 41 ឞ្រាសយេឆូ លាសមាទឹងលែៈឞូនុយ្ស៖ “ហើយឞូនុយ្សអ្យើស ឞូនុយ្សមោអ្យាត់! ទាសហោមជ៝ៈអ៝ន់គ៝ប់ញឆ្រោយ្សគុនទ្រែលខាន់អៃមៃអីឞូនុយ្សទាង់ក៝? លែវហ៝ម់ក៝នមៃអីនៃអាអ្យា”។ 42 នោកក៝នពាង់ឞ្រោៈអេហ៝ៈត៝ត់អាឞ្រាសយេឆូ ឞ្រាសអ្យើសងក្លឹពាង់ចោតញឆ្ល៝ង់ញឆ្លាង់រ៝។ ជេសរីឞ្រាសយេឆូ មឞ្រាមឞ្រាសអ្យើសរី ជានក៝នពាង់ឞាស លែវពាង់មាឞឹពាង់នើម។ 43 លែៈឞូនុយ្សតានៃនទ្រ៝ត់ហីសរាហ៝ល់ទាទេងាន់ឆៃនាវទើយកោរាញឞ្រាសកើតនៃ។

ឞ្រាសយេឆូ ងក៝ចល៝រមានាវខឹតពាង់

(មថ ១៧:២២-២៣; មក ៩:៣០-៣២)

ទោលទឹងលែៈខាន់ពាង់តានៃហោមងក្ល៝ន់អេងតាឆាក់រីទឹងលែៈនទើទើយអីឞ្រាសយេឆូ ជានអីនៃ ជេសរីពាង់លាសមាមពោលអ៝សម៝នពាង់៖ 44 “អ៝ន់ខាន់អៃមៃញអោតអ្យាត់នាវអ្យា ងកាសឆាក់លើយច្វេលអោស ឞើយត៝ត់ឞូញជុនគ៝ប់អីក៝នឞូនុយ្សតាៈឞើសកោរាញឞ្រាសតាតីឞូនុយ្សញុប”។* 45 ជេសតាង់នាវឞ្រាសយេឆូ រីនើស មពោលអ៝សម៝នមោវ៝ត់អោសនាវពាង់លាសនៃ យ៝រលាសកោរាញឞ្រាសអេហ៝ៈអ៝ន់ខាន់ពាង់វ៝ត់អោស ខាន់ពាង់ក្លាចមោឞាញ់អោបដ៝ង់។*

ឞូនុយ្សអីក្វ៝ង់រាលាវឞូ

(មថ ១៨:១-៥; មក ៩:៣៣-៣៧)

46 គែសទូនារមពោលអ៝សម៝នគុតឹមរាលាច់ឞាល់មានាវខាន់ពាង់អុចគឹតមាមពោលខាន់ពាង់នើម ឞូម៝សពាង់អីក្វ៝ង់រាលាវឞូ។ 47 យើនមាឞ្រាសយេឆូ លែៈគឹតនាវខាន់ពាង់មឹននៃ ជេសរីពាង់លែវទូហ្វេក៝នឆែជេៈគុទាច់កេងពាង់នើម។ 48 ជេសរីពាង់លាស៖ “ឞូម៝សរ៝មទូហ្វេក៝នឆែជេៈយ៝រមាអុចអ្យាត់នាវគ៝ប់ តឹមឞានមារ៝មគ៝ប់នើមដ៝ង់។ ជេសរីឞូម៝សពាង់អីរ៝មគ៝ប់តឹមឞានមារ៝មឞឹគ៝ប់អីតើមញជ្វាល់គ៝ប់នើសដ៝ង់។ ឞូម៝សពាង់អីជេៈតាន៝ម់ឞូទឹងលែៈតាមពោលខាន់អៃមៃ ពាង់អីនៃជេងក្វ៝ង់រាលាវឞូ”។*

មពោលឞ្រាសយេឆូ

(មក ៩:៣៨-៤០)

49 ជេសរីយោហាន មឞើសមាឞ្រាសយេឆូ ៖ “ហើយនើមនតី ហេនឆៃទូហ្វេឞូនុយ្សនត្រុតឞ្រាសអ្យើសមាម៝សរាញាមៃ។ ជេសរីហេនឞ្វៃពាង់ យ៝រលាសពាង់មោគែសអោសមពោលឞ៝ន់”។ 50 ឞ្រាសយេឆូ លាសមាពាង់៖ “លើយឞ្វៃពាង់អោស ឞូម៝សពាង់អីមោតឹមរាទ៝ង់ដាសខាន់អៃមៃ ឞូនុយ្សអីនៃជេងមពោលឞាល់មពែសមាខាន់អៃមៃ”។*

ប៝នឞ្រីឆាមារី ទូប៝នមោរ៝មឞ្រាសយេឆូ

51 ត៝ត់ឞើយទីនារឞ្រាសយេឆូ ហាវឆឹតតានតុកកោរាញឞ្រាសតាកាលើ ពាង់ញឆ្រោយ្សហាន់ជឹតប៝នយេរូឆាលឹម ។ 52 ជេសរីឞ្រាសយេឆូ ហាន់ជឹតទូប៝នតាឞ្រីឆាមារី ពាង់ដាៈឞូនុយ្សអាបាៈហាន់ល៝រគៃមានទ្រាប់នតុកវើតទើនពាង់។ 53 តីសមាតាប៝នអីនៃឞូមោអោសរ៝មឞ្រាសយេឆូ គុតារី យ៝រលាសខាន់ពាង់គឹតជេសឞ្រាសយេឆូ អុចហាន់នហ៝តជឹតប៝នក្វ៝ង់យេរូឆាលឹម ។* 54 ត៝ត់ខាន់ពាង់ឆៃកើតនៃ ឞារហៃអ៝សម៝ន យាកើ នទ្រែលមាយោហាន ខាន់ពាង់លាស៖ “ហើយកោរាញមៃអុចឞើស អ៝ន់ហេនក្វាល់អុញតាៈកាលើត្រោកតុបតាប៝នអ្យា ឆូលើយផូងអីនៃ ជានកើតអេលីយា ពាង់ជានកាល់អែនើស?”* 55 ឞ្រាសយេឆូ អ្វាញ់ជឹតខាន់ពាង់នហ៝មារាអ៝ត់ខាន់ពាង់៖ [“ខាន់មៃមោគឹតម៝សហ្វេងគុតាត្រោមឆាក់ខាន់មៃ‌ 56 យ៝រលាសគ៝ប់អីក៝នឞូនុយ្ស តាៈឞើសកោរាញឞ្រាសវាច់ គៃមារាក្លាយ្សឞូនុយ្ស មោអុចអោសលើសហេងឞូនុយ្ស”។] ជេសរីលែវឞាល់នហ៝តជឹតប៝នអេងជឹត។

ឞូនុយ្សអីអុចតឹងឞ្រាសយេឆូ

(មថ ៨:១៩-២២)

57 ទោលឞ្រាសយេឆូ ឞ្រោៈរ៝ៈត្រ៝ងរី គែសទូហ្វេឞូក្លោលាសមាពាង់៖ “ហើយកោរាញ អាសនតុកមៃហាន់? គ៝ប់ហាន់តឹងមៃដ៝ង់”។ 58 ឞ្រាសយេឆូ លាសមាពាង់៖ “ល៝ង់ឆ្រ៝តគែសត្រោមនតុកពាង់គុ ឆ្យុមនារគែសរាឆ្វាន់ដ៝ង់ តីសមាគ៝ប់អីក៝នឞូនុយ្សតាៈឞើសកោរាញឞ្រាសមោគែសអោសនតុកគ៝ប់នើមងាន់មាទ៝ម់ឞោក”។* 59 ជេសរីឞ្រាសយេឆូ លាសមាទូហ្វេឞូនុយ្សអេងជឹត៖ “ហោៈ ហាន់តឹងគ៝ប់!” ឞូនុយ្សអីនៃអើស៖ “ហើយកោរាញ អ៝ន់គ៝ប់ក៝ប់ឞឹគ៝ប់ខឹត នទ្រែលមាត៝ប់ពាង់ប៝ត់”។* 60 ឞ្រាសយេឆូ លាសមាពាង់៖ “ឞូនុយ្សមោអ្យាត់នាវគ៝ប់តឹមឞានមាឞូនុយ្សលែៈខឹត អ៝ន់ខាន់ពាង់តឹមត៝ប់អេងនទ្រាង់ខាន់ពាង់នើម មៃមាហាន់មឞើសនាវកោរាញឞ្រាសអុចម៝ត់អ្វាញ់ឞូនុយ្ស‡”។ 61 គែសទូហ្វេឞូនុយ្សជឹតលាសមាពាង់ដ៝ង់៖ “ហើយកោរាញ គ៝ប់អុចតឹងមៃដ៝ង់ យើនមាអ៝ន់គ៝ប់ហាន់នតិញរានាក់វ៝ល់គ៝ប់ប៝ត់”។* 62 ឞ្រាសយេឆូ លាសមាពាង់៖ “ឞូម៝សអីក្វាន់ងគ៝ល់ច្វ៝រ់ ជេសរីងគឹលជឹតកើយ ឞូនុយ្សអីនៃមោអោសអ៝ន់កោរាញឞ្រាសម៝ត់អ្វាញ់មាពាង់§”។**

*9:1 ៩:១-៦៖ លក ១០:១-១២

*9:1 ៩:១៖ លក ៦:១២-១៦

*9:2 ៩:២៖ មោលាស «មឞើសឞ្រីកាដាច់កោរាញឞ្រាស»។

*9:5 ៩:៥៖ ការ ១៣:៥០-៥១; ១៨:៦

*9:7 ៩:៧-៨៖ លក ៩:១៩

*9:9 ៩:៩៖ មថ ១៤:៦-១១; លក ២៣:៨

*9:10 ៩:១០៖ លក ១០:១៧

†9:11 ៩:១១៖ មោលាស «មឞើសងក៝ចឞ្រីកាដាច់កោរាញឞ្រាសអ៝ន់ឞូអ្យាត់»។

‡9:17 ៩:១៧៖ ឞ៝ន់មោអោសគឹតនហេលនទើអ្យាទាសក្វ៝ង់ពាង់ យើនមាមោអីរក្វ៝ង់អីរ មោអីរជេៈអីរដ៝ង់។

*9:18 ៩:១៨៖ លក ៥:១៦

*9:19 ៩:១៩៖ លក ៩:៧-៨

*9:20 ៩:២០៖ យហ ១០:២៤-២៥; ១១:២៧

*9:21 ៩:២១៖ មក ៧:៣៦

*9:22 ៩:២២៖ លក ៩:៤៤; ១៨:៣២-៣៣

§9:23 ៩:២៣៖ ផូងរោម ងខឹតឞូតាឆីតឹមរាកាង់ ឞូនុយ្សអីខាន់ពាង់ងខឹតពាង់ដាៈតូយឆីតឹមរាកាង់ឞើសនតុកផាតទោយ្សត៝ត់តានតុកពាង់ងខឹត។

*9:23 ៩:២៣៖ លក ១៤:២៧; ១ពេ ២:២១

*9:24 ៩:២៤៖ នតម ១២:១១

*9:25 ៩:២៥៖ លក ១២:១៦-២១

*9:26 ៩:២៦៖ ២តម ១:៨; ២:១២-១៣

*9:27 ៩:២៧៖ មោលាស «ល៝រមាឆៃឞ្រីកាដាច់កោរាញឞ្រាសត៝ត់តានែសនតូអ្យា»។

*9:28 ៩:២៨-៣៦៖ ២ពេ ១:១៦-១៨

*9:28 ៩:២៨៖ លក ៨:៥១

*9:29 ៩:២៩៖ នតម ១:១៦; នង ៣៤:២៩

*9:31 ៩:៣១៖ លក ២៤:៤៤-៤៦

†9:35 ៩:៣៥៖ មោលាស «គ៝ប់រ៝ង់ហោងាន់មាពាង់»។

*9:35 ៩:៣៥៖ លក ៣:២២; នម ២:៧; នវ ១៨:១៥

*9:44 ៩:៤៤៖ លក ៩:២២; ១៨:៣២-៣៣

*9:45 ៩:៤៥៖ លក ១៨:៣៤; ២៤:៤៥

*9:48 ៩:៤៨៖ លក ១០:១៦

*9:50 ៩:៥០៖ ផល ១:១៨

*9:53 ៩:៥៣៖ យហ ៤:៩

*9:54 ៩:៥៤៖ ២កក ១:១០, ១២

*9:58 ៩:៥៨៖ ១កោ ៤:១១

*9:59 ៩:៥៩-៦០៖ លក ១៤:២៦

‡9:60 ៩:៦០៖ មោលាស «មឞើសឞ្រីកាដាច់កោរាញឞ្រាស»។

*9:61 ៩:៦១-៦២៖ ១កក ១៩:២០-២១

§9:62 ៩:៦២៖ មោលាស «ឞូនុយ្សអីនៃមោគែសនាវខ្លៃអោសតាឞ្រីកាដាច់កោរាញឞ្រាស»។

*9:62 ៩:៦២៖ ឞូនុយ្សក្វាន់ងគ៝ល់ច្វ៝រ់ងគឹលជឹតកើយនឹងមោឞ្លាវអោសច្វ៝រ់អ៝ន់ឆ៝ង់ កើតនទ្រីដ៝ង់ឞូនុយ្សអីអុចតឹងឞ្រាសយេឆូ ជេសរីអុចមានាវរេសអើមនឹងមោឞ្លាវតឹងឞ្រាសយេឆូ ងាន់អោស។

*9:62 ៩:៦២៖ ផល ៣:១៣