10
1 Ondaise ma, engʉ́ ɨnde ma ngakʉnda e ne bua ma hana-a, a ko me omaƗsalaele sia mʉkobho. Ma ngayo Ebhe pɨ uo ngánga. 2 Ma au me u akʉnda namene kulu lɨo pɨ Ebhe na paká. Engʉ́ bini, u mbɨla kpadjɨ ango-o de. 3 U mbɨla kpadjɨ lɨ Ebhe ngau kpála lɨ e bhʉ́ djila e ngbingbili-e de. U agɨlɨ nade kpadjɨ bhe gba o ngao makpe. Kaka-a, u ayala nakpata kpadjɨ lɨ Ebhe ngau kpála lɨ e bhʉ́ djila e ngbingbili-o. 4 Padhá de, anga lɨ Yesu Kilisito ago lɨe, anɨ andjia angu lɨ́lɨ gba Moidje-o . Anɨ amene mo-o ngʉbula me ndʉ okpála hana ɨnde abhuka nɨ-e kolo ngbingbili bhʉ́ djila Ebhe.
Ebhe ngakobho ndʉ okpála hana ɨnde abhuka Yesu
5 Moidje aye engʉ́ pɨndjɨ lele maka lɨ Ebhe ngau okpála lɨe bhʉ́ djila e ngbingbili ka nakpata lɨ́lɨ-o. Anɨ me: «Kpála ɨnde akpáta ndʉ lɨ́lɨ-e hana-a, adʉ́ bhadi bhʉ́ mʉkobho kaka.† 10:5 Tsia bhʉ́ Lev. 18:5.» 6 Engʉ́ bini, u papa pɨndjɨ lele maka lɨ Ebhe ngau okpála lɨe bhʉ́ djila e ngbingbili ka nabhuka me: «Mo opá lɨ bua mʉ de me: ‹A aꞌʉ́ abhʉ́lá da?† 10:6 Tsia bhʉ́ Det. 30:13.›» Padhá de, anga lɨ mʉ pa mo-o, a akʉnda napa me, mʉ ngayi lɨ bua mʉ me: «A aꞌʉ́ abhʉ́lá da ngʉ́ napa pɨ Yesu Kilisito me anɨ go bhaka nɨ́ kuto ei.» 7 Mo opá di lɨ bua mʉ de me: «A akɵ́ asatɵ da?» Padhá de, anga lɨ mʉ pa mo-o, a akʉnda napa me, mʉ ngayi lɨ bua mʉ me: «A akɵ́ asatɵ da ngʉ́ nagbegbe Yesu Kilisito bhʉ́ ká okpála ɨnde amu-o?† 10:7 Tsia bhʉ́ Det. 30:13.» 8 Bhuku gba Ebhe-e apa mangbo me:
«’Li Ebhe dengo mʉ masɨkpe.
A bhʉ́ ’bhɵ mʉ, a di lɨ bua mʉ.† 10:8 Tsia bhʉ́ Det. 30:14.»
Engʉ́ ya ngakpokpo e-e, a pɨndjɨ eli bhomʉ, a ayo me okpála bhuka eli ango-o. 9 Lɨ mʉ pa ne ’bhɵ mʉ kala ndʉ okpála hana me Yesu ne Ngámá-a, lɨ mʉ bhuka di ne bua bini me Ebhe azuku anɨ bhʉ́ ká okpála ɨnde amu-o, Ebhe kóbho mʉ. 10 Padhá de, anga nɨ́ bhuka Yesu Kilisito lɨ bua nɨ́-e, nɨ́ kólo ngbingbili bhʉ́ djila Ebhe. Nɨ́ pa ne ’bhɵ nɨ́ mbámbá me Yesu Kilisito ne Ngámá-a, Ebhe kóbho nɨ́. 11 A maka u aye lɨe bhʉ́ Bhuku gba Ebhe-e me: «Ndʉ okpála hana ɨnde abhuka anɨ-e, anɨ djí ’ngbʉ e lɨ uo ’kpɨ́ bini de.† 10:11 Tsia bhʉ́ Ɨsa. 28:16.» 12 Ka ’ngʉ́ ango-o, abana omaYuda, abana di okpála bhende ne omaYuda ade-e, u viti bha bini. Koli Ngámá gba uo bha bini. Anɨ ngaha obabadha ’ngʉ́ gba e bhelé pɨ ndʉ okpála hana ɨnde ngayo ka anɨ me anɨ teteke o-o. 13 A maka u aye lɨe bhʉ́ Bhuku gba Ebhe-e me: «Ndʉ okpála hana ɨnde ayó ka Ebhe Ngámá me anɨ teteke o-o, anɨ akóbho uo makobho.† 10:13 Tsia bhʉ́ Djl. 3:5.»
14 A moko. Engʉ́ bini, lɨ okpála bhuka anɨ de-e, u ayó anɨ lele pɨ? Lɨ okpála dje engʉ́ gba anɨ-e de-e, u abhúka anɨ lele pɨ? Lɨ kpála kpokpo ’ngʉ́ gba anɨ-e de-e, okpála adjé engʉ́ gba anɨ-e lele pɨ? 15 Lɨ anɨ tima okpála de-e, u anʉ́ nakpokpo ’ngʉ́ gba anɨ-e lele pɨ? U aye di bhʉ́ Bhuku gba anɨ-e me: «Tsitsia nga, a ko djalɨ nau okpála ɨnde ngakpokpo obabadha ngali-e nago ne kpokpokpo!† 10:15 Tsia bhʉ́ Ɨsa. 52:7.» 16 Engʉ́ bini, a ko de me ndʉ okpála hana abhuka Bádha Ngali-e de. Padhá de, anga Ɨsaya ayi nanɨ belegʉ me: «Ngámá, a abhuka ongali ya akpokpo e pɨ okpála da?† 10:16 Tsia bhʉ́ Ɨsa. 53:1.» 17 Nɨ́ mbɨla me, kpála ngabhuka nedhɨnga ɨnde anɨ adje ngali lɨe-o. Ngali bhomʉ-o, a ko bhende ngalʉ pɨ́ ’li Yesu Kilisito-o.
18 Ɨ nde lɨe mo-o, ma ngayi me, a akʉnda napa me omaYuda dje nga ngali bhomʉ-o dɨ? A mo-o ade, u adje! Bhuku gba Ebhe-e ngapa me:
«Ngbɨkpɨ ne sukpe u ngakpokpo ’li Ebhe ne ndʉ bɨlɨ hana pɨ́la doto.
’Li uo akolo ne lɨ ndʉ ’dje doto badha hana.† 10:18 Tsia bhʉ́ Ets. 19:5.»
19 Ma ngayi matá engʉ́ bini, okpála na Ɨsalaele kɵ mboli engʉ́ u adje e dɨ? A mo-o ade, u akɵ mbolimboli akɵ! Ngaɨza kalanʉ-o, Moidje apa nanɨ me:
«Ebhe apa me:
‹Ma améne engʉ́ da napa me
ngayi okpála gba ma-a yi kolo ne siti
bua pɨ okpála ɨnde ne
okpála gba ma ade-o.
Ma améne engʉ́ da napa me yi kolo ne ke ’ngʉ́ pɨ
opiga ɨnde lɨ ɨmbɨlangʉ
nde bhʉ́ ’ndjɨ o ade-o.† 10:19 Tsia bhʉ́ Det. 32:21.›»
20 Pɨpɨta-a, polofeta Ɨsaya apa belegʉ me:
«Ebhe apa me:
‹Okpála ɨnde ɨ dʉ agɨlɨ ma de-e, au ma.
Ma asuno lɨma pɨ okpála ɨnde
ɨ dʉ ayo ma de-o.† 10:20 Tsia bhʉ́ Ɨsa. 65:1.›»
21 La lɨ ’ngʉ́ gba omaƗsalaele-e, Ebhe apa me:
«Ekpɨ́ libhomu, ma ato ’kpa ma pɨ omaha ma me u gogo,
engʉ́ bini, u amene kpéke ’ndjɨ,
u ayala engʉ́ ɨnde ma adʉ napa e-o.† 10:21 Tsia bhʉ́ Ɨsa. 65:1-2.»
†10:5 10:5 Tsia bhʉ́ Lev. 18:5.
†10:6 10:6 Tsia bhʉ́ Det. 30:13.
†10:7 10:7 Tsia bhʉ́ Det. 30:13.
†10:8 10:8 Tsia bhʉ́ Det. 30:14.
†10:11 10:11 Tsia bhʉ́ Ɨsa. 28:16.
†10:13 10:13 Tsia bhʉ́ Djl. 3:5.
†10:15 10:15 Tsia bhʉ́ Ɨsa. 52:7.
†10:16 10:16 Tsia bhʉ́ Ɨsa. 53:1.
†10:18 10:18 Tsia bhʉ́ Ets. 19:5.
†10:19 10:19 Tsia bhʉ́ Det. 32:21.
†10:20 10:20 Tsia bhʉ́ Ɨsa. 65:1.
†10:21 10:21 Tsia bhʉ́ Ɨsa. 65:1-2.