9
Ebhe ngamene ndʉ ’ngʉ́ hana bhʉ́ ngʉ e
1 Ma ne kpála gba Yesu Kilisito ! Engʉ́ ma adji apa e ɨnde-e, a ko kʉkʉlʉ ’ngʉ́, ma pa eu de. Bu Bhobua ngasuno mʉma me ’li ma-a, a ko paká, bua nakpokpo kú ’ngʉ́ gba ma la bhadi ngazɨzɨba moko me a ko paká. 2 A ko paká me bua ma ne lɨkabhu naali, lɨkabhu ɨnde lɨ bua ma-a ndjindjia di-i de. 3 Lɨ kpadjɨ dʉ́ uu-o, ngama makpe, ma de ayó me Ebhe tʉ pɵdjɵ lɨ ma, amba anɨ gbo bhʉsʉ ya ne Yesu Kilisito ɨ dʉ me a nde tɨ da nateteke ondaise ma omaYuda u-o, anga a ko ondaise ma na piga. 4 A ko okpála na piga gba Ɨsalaele. Ebhe abhʉ uo me u kolo ongɨsɨ gba nɨ, anɨ aha pɨ uo me u u sangu gba nɨ-o, anɨ akodho gandja ne uo bhʉtsibhʉtsi, anɨ aha lɨ́lɨ gba e pɨ uo, anɨ asuno lele nayo pɨ uo, anɨ apa me nɨ améne obabadha ’ngʉ́ pɨ uo. 5 A ko odi Abalahama ne ongɨsɨ gba e-o. La di-e Yesu Kilisito ngae makpe lɨ pápá na kʉte-e, a ko kpála na piga gba uo. Ngaanɨ, a ko Ebhe ɨnde pɨ́ ’ndjɨ ndʉ ’he hana-o. A ayo me okpála toko anɨ dʉdʉma ne dʉdʉma. A adʉ moko.
6 Ma pa de me engʉ́ lɨ Ebhe apa me nɨ améne e, aneke de. Nɨ́ mbɨla hana me a ko de me ndʉ odi Ɨsalaele hana bha ne ongɨsɨ gba anɨ makpe-e de. 7 La di-e, ndʉ odi Abalahama hana bha ne ndʉ ongɨsɨ gba anɨ makpe ade. Padhá de, anga Ebhe apa pɨ Abalahama me: «Odi mʉ akóto lɨ kpadjɨ gba Ɨsaka.† 9:7 Tsia bhʉ́ Dje. 21:12.» 8 A akʉnda napa me ndʉ ongɨsɨ lɨ Abalahama azu o hana ne ongɨsɨ gba Ebhe ade. Pɨ Ebhe-e, kʉkʉlʉ odi Abalahama bha bini ne ongɨsɨ ɨnde anɨ azu o nakpata lele maka lɨ Ebhe apa nanɨ lɨe me nɨ ahá pɨ anɨ-o. 9 Padhá de, anga Ebhe apa nanɨ engʉ́ na ongɨsɨ ango-o pɨ anɨ me: «Bhʉ́ kalanga na sidi-e, bhʉ́ ngua onedhɨnga ɨnde-e, ma agíe matá lɨma, ma abháka me Sala nde azu ndɨlɨ na bhobhoko.† 9:9 Tsia bhʉ́ Dje. 18:10-14.»
10 A viti bhadi bini ne bhe gba Lebeka-o. Ndʉ ongɨsɨ gba anɨ-e bhisi hana, koli ’dyɨ uo bha bini, ogbi nɨ́ Ɨsaka. 11-12 La-a, kala napa me u zu uo-o, Ebhe apa me: «Bhebhele-e adʉ́ kpála na kulu gba ndɨndɨlɨ-o.† 9:11-12 Tsia bhʉ́ Dje. 25:23.» Ebhe apa ’ngʉ́ bhomʉ-o kala me sʉka uo mene bádha ’ngʉ́, ɨ dʉ di-e siti ’ngʉ́. Lebeka nde zu nga uo de. Ebhe amene mo-o ngʉ́ nasuno me nɨ memene bha bini engʉ́ maka nɨ akʉnda lɨe. Anɨ ngabhʉ okpála bha bhʉ́ ngʉ e. Anɨ tsia de me kpála ango-o amene bádha ’ngʉ́ ne me anɨ amene siti ’ngʉ́-o de. 13 A maka u aye lɨe bhʉ́ bhuku gba Ebhe-e me Ebhe apa me:
«Ma ne mʉkʉnda pɨ Yakobho, ma ayala Esau.† 9:13 Tsia bhʉ́ Mal. 1:2-3.»
14 Ɨ dʉ me a nde mo-o, nɨ́ pá me ngbili ’ngʉ́ bhʉ́ Ebhe adɨ? Belegʉ de bini! 15 Padhá de, anga Ebhe apa pɨ Moidje me:
«Ma kʉnda namene bádha ’ngʉ́ pɨ kpála-a,
ma méne.
Ɨ dʉ di me ma nde akʉnda nadje ndjinga kpála-a,
ma djé.† 9:15 Tsia bhʉ́ Ekɨ. 33:19.»
16 Bhobhomʉ-o akʉnda napa me, lɨ Ebhe mene bádha ’ngʉ́ pɨ kpála-a, anɨ amene bha pɨ anɨ anga anɨ adje ndjinga anɨ. A ko de me anɨ amene pɨ anɨ anga kpála ango-o akʉnda ngae, ne me anɨ amene tété kulu-o de. 17 A maka engʉ́ ɨnde anɨ apa nanɨ e bhʉ́ Bhuku gba e pɨ ’ngbé ngámá na Edjipito me: «Ma aꞌo mʉ ’ngbé ngámá ngʉbula me ngama Ebhe-e ma pana angu gba ma bhʉ́ mʉ, di ne ngʉbula me ndʉ okpála na pɨ́la doto libhomu mbɨla me ma ne da-ie.† 9:17 Tsia bhʉ́ Ekɨ. 9:16.» 18 Kaka-a, nɨ́ ngau me lɨ Ebhe kʉnda nadje ndjinga kpála-a, anɨ djé, anɨ kʉnda nato kpéke ’ndjɨ bhʉ́ ’ndjɨ kpála-a, anɨ tó.
Nɨ́ tɨ da nadjidji ’ngʉ́ sa ’li Ebhe de
19 Nedhɨnga koko-o, kpála bini tɨ da nayi ma me: «Lɨ Ebhe dʉ́ nabhʉ okpála maka anɨ akʉnda lɨe, ka nɨ anɨ nde lɨe ngaꞌo ’ngʉ́ pɨ́ okpála, u nde bha ngamene bhomʉ-o bhende anɨ akata uo me u mene e?» 20 Ngamʉ kpála ɨnde ngayi ma mo-o, mʉ ne da ngʉ́ nadjidji ’ngʉ́ sa ’li Ebhe? Madakpa tɨ da nayi kpála ɨnde apo anɨ-e uu me: «Mo omene ma me-e ka nɨ?» Belegʉ de bini!† 9:20 Tsia bhʉ́ Ɨsa. 29:16, 45:9. 21 Bhʉlʉ napo lʉsa tɨ da namene engʉ́ ɨnde anɨ akʉnda e ne doto na lʉsa-a hana. Anɨ tɨ da nagbo bhʉsʉ doto na lʉsa-a bhisi. Anɨ há bhe bini-e, anɨ méne tété lʉsa na kpéke mase, anɨ há bhe koko-o, anɨ méne tété lʉsa u amemene kulu ne e ndʉ ’kpɨ́ hana.
22 Lɨ Ebhe kʉnda nadʉ maka bhʉlʉ napo lʉsa-a, naamʉ bhʉ́bhʉ́ ne nɨ? Anɨ amene mo-o ngʉbula nasuno ke ’ngʉ́ gba e, di ne me a bhʉ́ nɨ ne angu. La-a, anɨ akibila nanɨ ne ’ndjá bua okpála ɨnde a ayo nanɨ me u sia ke ’ngʉ́ gba anɨ-o, ɨnde adʉ nako masɨkpe de napa me anɨ bhili o-o. 23 Ebhe amene mo-o ngʉbula me okpála mbɨla me sangu abedhe bhʉ́ nɨ bedhe pɨ okpála ɨnde nɨ nde ne ndjinga pɨ o-o. Anɨ aleke uo kalanʉ me u sia sangu gba nɨ-o. 24 Nɨ́ di ne okpála ɨnde anɨ aꞌɨ o pɨ e. Anɨ bhʉ bha bini okpála anɨ aꞌɨ o pɨ e bhʉ́ ká omaYuda de, anɨ abhʉ di uo bhʉ́ ká opiga ɨnde ne omaYuda ade-e uu. 25 A bhomʉ-o engʉ́ anɨ apa e bhʉ́ bhuku gba polofeta Oze me:
«Okpála ɨnde nanɨ ɨ dʉ okpála ka ma de-e,
ma aꞌɨ́ uo me a ko okpála ka ma.
Okpála ɨnde nanɨ ma dʉ ne mʉkʉnda pɨ o de-e,
ma apá me ma ne mʉkʉnda pɨ uo.† 9:25 Tsia bhʉ́ Oz. 2:25.
26 Lɨ bɨlɨ nako ma apa pɨ uo lɨe me:
‹Ngayi-e, yi ne okpála ka ma ade-e›,
bha lɨ bɨlɨ bini bhomʉ-o, ma apá pɨ uo me:
‹Yi ne ongɨsɨ gba ma, Ebhe na mʉkobho-o.† 9:26 Tsia bhʉ́ Oz. 2:1.›»
27 La pɨ okpála na Ɨsalaele-e, polofeta Ɨsaya agama di ’ngʉ́ lɨ ’ngʉ́ gba uo-o. Anɨ atsia apa me: «Abana lɨ omaƗsalaele dʉ bha bhelé maka sike abhʉ́ ’ngbé ’ngu-o, yi mbɨla me obhe lɨ Ebhe akóbho o-o bhelé ade. 28 Padhá de, anga engʉ́ lɨ Ebhe apa me nɨ améne e pɨ́la doto-o, anɨ améne bha hana má kpɵkɵbhɵ! Anɨ améne la di má gala!† 9:28 Tsia bhʉ́ Ɨsa. 10:22-23.» 29 A di maka polofeta Ɨsaya apa matá nanɨ lɨe me:
«Lɨ Ebhe Ngámá Apɨ́ ’Kpɨ́ bhíli nanɨ
ongɨsɨ gba nɨ́-e hana-a,
nɨ́ de andjʉlʉ maka okpála na Sodomo ne Gomolo
andjʉlʉ nanɨ lɨe-o.† 9:29 Tsia bhʉ́ Ɨsa. 1:9.»
Okpála koko bhʉ́ ká omaƗsalaele bhuka de
30 Ɨ dʉ mo-o, nɨ́ tɨ da nabu tata pɨ? Engʉ́ ɨnde ya akʉnda nabu tata ne e ngae ɨnde, okpála ɨnde bhʉ́ piga gba omaƗsalaele ade-e, gɨlɨ nako nadʉ ngbingbili kala Ebhe de. La-a, Ebhe au uo me a ko okpála na ngbingbili bhʉ́ djila e ka u abhuka nɨ lɨe-o. 31 La-a, okpála na Ɨsalaele ɨnde adʉ agɨlɨ me o kolo ngbingbili bhʉ́ djila Ebhe lɨ kpadjɨ namene lɨ́lɨ-e, kolo nedi alɨ soso de. 32 U kolo nedi alɨ soso de ka nɨ? U kolo de, anga u adʉ abhundja me o kólo ngbingbili bhʉ́ djila Ebhe ka okulu gba o-o. U dʉ abhuka de me kpála ngakolo ngbingbili bhʉ́ djila Ebhe ka nabhuka gba e de. U atsia ado ’dhʉ o lɨ teme ɨnde ngagbo ꞌi kpála-o. 33 Bhuku gba Ebhe-e ngapa ’ngʉ́ na teme ango-o me:
«Yi gbo ’dje yi!
Ma ngaꞌo bhʉ́ gʉdhʉ na Siona teme bini ɨnde
lɨ okpála ngado ’dhʉ o lɨe.
A ko teme ɨnde ngagbo ꞌi kpála.
La-a, kpála abhuka anɨ-e,
anɨ djí ’ngbʉ e lɨ anɨ ’kpɨ́ bini de.† 9:33 Tsia bhʉ́ Ɨsa. 8:14-15, 28:16.»
†9:7 9:7 Tsia bhʉ́ Dje. 21:12.
†9:9 9:9 Tsia bhʉ́ Dje. 18:10-14.
†9:11-12 9:11-12 Tsia bhʉ́ Dje. 25:23.
†9:13 9:13 Tsia bhʉ́ Mal. 1:2-3.
†9:15 9:15 Tsia bhʉ́ Ekɨ. 33:19.
†9:17 9:17 Tsia bhʉ́ Ekɨ. 9:16.
†9:20 9:20 Tsia bhʉ́ Ɨsa. 29:16, 45:9.
†9:25 9:25 Tsia bhʉ́ Oz. 2:25.
†9:26 9:26 Tsia bhʉ́ Oz. 2:1.
†9:28 9:28 Tsia bhʉ́ Ɨsa. 10:22-23.
†9:29 9:29 Tsia bhʉ́ Ɨsa. 1:9.
†9:33 9:33 Tsia bhʉ́ Ɨsa. 8:14-15, 28:16.