Filippi
Nalob̃ulat napisulan aPol totosi van hǝn alat a Filippi
Ase itos nalob̃ulat napisulan egai?
APol itosi.
APol itos nalob̃ulat napisulan egai hǝn nǝsa?
Len nalob̃ulat egai aPol esipa hǝn alat a Filippi hǝn na-lǝmas-buni-an mai naviolan salito, ale ikel mai galit nap̃isal hǝn lǝb̃itoh len nǝmauran seKristen tovoi.
APol itos nalob̃ulat egai van hǝn ase?
APol itosi van hǝn alat siYesu len nab̃iltivile Filippi len naprovens Masetonia. Len nǝyaran na-vǝha-ru-an san a m̃o, aPol evi lan naut a Filippi, ale len naut ei lubar hǝni len naim bǝbaŋis husur tohut natǝmat dan natǝbarehreh sua.
APol itos nalob̃ulat egai ŋais mai len naut a be?
Itosi pǝpadaŋ hǝn nasihau tovi A.D. 63 nǝboŋ totoh len naut a Rom len naim bǝbaŋis.
Len nalob̃ulat egai aPol idaŋ hǝn nakemkeman, na-il-b̃uri-an, nab̃onan mai nasusumaran len nǝmauran mai nadǝlomian seKristen gail. Imasil ke aPol elǝmas masuṽ hǝn alat siYesu len naut a Filippi. (1.1–4.23)
1) APol etub̃at hǝn nalob̃ulat san van hǝn alat siYesu len naut a Filippi, esipa vi tǝban aGot hǝn galito, ale isor tuṽ m̃os galito (1.1-11)
2) APol ehǝhaṽur husur nǝvanuan gail lukel ur na-kel-uri-an tovoi naut kǝmas gai totoh len naim bǝbaŋis, ivatvat viri ke nǝsa tevisi dereh tivan vǝbar navoian, naut kǝmas nǝmauran o nǝmatan san (1.12-26)
3) APol ikel mai galit ke len nǝmauran salit lehusur kitin hǝn aKristo, gol nǝsa tokele hǝn naṽide aGot tolǝŋoni b̃ip̃arp̃ar len galito (1.27–2.18)
4) APol ike tesǝvat aTimoti mai aEpafrotitus van hǝn alat a Filippi (2.19-30)
5) Ivoi ke alat a Filippi lehusur naṽide siPol, likad nadǝlomian len aKristo hǝn aGot b̃eriŋi ke linor len nǝhon. APol elǝŋoni ke nǝlolit tikad natǝm̃at (3.1–4.9)
6) APol esipa hǝn naviolan alat a Filippi lotoviol hǝni maii (4.10-20)
7) APol imaris kotov nalob̃ulat san van hǝn alat a Filippi (4.21-23)
1
Na-ke-ivoi-an van hǝn alat a Filippi
1 Ginau aPol mai aTimoti namrovi slev seKristo, aYesu. Ginau nutos nalob̃ulat napisulan egai van hǝn nǝvanuan p̃isi siGot len aKristo aYesu, len naut a Filippi.* Uman 16.12 Nutosi van hǝn naelta mai natikon gail am. 2 AGot aTǝmadato mai Nasub̃ aYesu Kristo areviol kǝmas hǝn navoian mai arigol nǝlomit tikad natǝm̃at.
Nasipaan mai na-sor-tuṽ-an
3 Nosipa vi tǝban aGot sagw len nǝboŋ p̃isi notonau tǝlmam hǝn gamito. 4 Akis len na-sor-tuṽ-an sagw m̃os gamit p̃isi, nusor tuṽ len nakemkeman 5 bathut ke mǝtutah mai ginau len na-kel-uri-an tovoi len nametǝkav, nǝmariboŋ mǝttoriŋ nǝlomit len aYesu Kristo van vǝbar damǝŋai.* Uman 16.12-40 6 Husur nunau lǝboi nategai m̃au ke, aGot totub̃at hǝn nauman tovoi sua len gamito, gai dereh tigolgole van van tihav len nǝboŋ siYesu Kristo.* 1Kor 1.8 7 Inor hǝn notonau gamit p̃isi maienan, bathut notolǝmas bun gamit len nǝlogw. Husur ke len naim bǝbaŋis notohtoh lan, mai len nǝboŋ notokel nakitinan husur na-kel-uri-an tovoi mai notoṽusan koti ke tokitin, gamit p̃isi mǝtukatǝp̃ol len navoian aGot toviol kǝmas hǝni mai ginau.* 2Kor 7.3; Flp 1.13 8 AGot elǝboi b̃ikel koti ke notolǝŋon masuṽ hǝn nǝb̃eris gamito len na-lǝmas-buni-an togǝm len nǝlon aYesu Kristo.
9 Ale nusor tuṽ maiegai ke: na-lǝmas-buni-an samit tetibau van am len nalǝboian mai na-bunus-lǝboi-an p̃isi hǝn nakitinan. 10 Imaienan dereh mǝtelǝboi mǝtb̃ekuṽol hǝn nap̃isal tovoi buni, hǝn mǝtb̃iveveu hǝn asike b̃ikad natideh tosa avan ideh tolǝboi b̃ikel husur gamito van vǝbar nǝboŋ seKristo. 11 Mǝtepul hǝn naṽit nanoran len aYesu Kristo hǝn nǝvanuan gail lǝb̃eputsan mai sal suh nǝyalyalan siGot.
Na-kel-uri-an ivan, naut kǝmas nǝ-baŋis-aPol-an
12 Bathudud nadǝlomian, nuke mǝtelǝboii ke, nǝsa tovisi hǝn ginau esusupah mai na-kel-uri-an tovoi hǝn b̃ibar nǝvanuan p̃isi. 13 Husur enan nasoltia p̃isi lotokǝtkǝta kǝkol hǝn naim seSisa, mai nǝvanuan p̃isi am, lolǝboi buni ke, nutoh len naim bǝbaŋis sil aKristo.* Uman 28.30; Efe 3.1, 4.1 14 Ale bathut natsen tobaŋis gat ginau, nǝbathudud nadǝlomian isob̃ur loil gǝgat len Nasub̃. Gagai, len na-il-b̃uri-an tosǝhor ta m̃o, lǝsamǝtahw hǝn lǝb̃ikel ur nasoruan siGot.
15 Ekitin ke galit galevis lukel ur aKristo sil lototab̃ulol bulos ginau mai lotopul hǝn naṽitṽituhan, be galevis am lukel uri len nalǝŋonian tovoi. 16 Lukel uri len na-lǝmas-buni-an husur lolǝboii ke aGot itabtabuh len ginau hǝn nǝb̃eil gǝgat, nǝb̃ikel kot na-kel-uri-an tovoi. 17 Alat lototab̃ulol lǝsakel ur kot aKristo, avil lukel uri hǝn lǝb̃ipatpat galit mǝhat husur lunau ke lemǝdas ginau gagai nǝboŋ natsen tobaŋis gat ginau. 18 Be savi natideh! Ivoi ŋai ke len nap̃isal p̃isi, naut kǝmas nagǝgǝrasan o nakitinan len nǝlolito, lukel ur aKristo. Ale husur enan nukemkem.
Dereh nikemkem tabtab, 19 husur nolǝboii ke, len na-sor-tuṽ-an samito mai na-vi-tarhǝte-an seNunun aYesu Kristo, nǝsa tovisi hǝn ginau dereh tevi p̃isal hǝn nǝb̃imakuv. 20 Len na-lǝŋon-buni-an sagw nuvatvat viri ke sǝkad natideh b̃igol nahurugw b̃isa, avil nuvatvat viri ke nǝlogw teil b̃uri gagai sum̃an akis, hǝn ke, len natit p̃isi nǝb̃igole, nisal suh a Kristo, naut kǝmas nǝmauran o nǝmatan sagw. 21 Husur len nabunusian sagw, nǝmauran sagw evi seKristo ale nǝb̃imat, ivoi masuṽ am. 22 Be nǝb̃itoh tabtab maiegai len navile eg a pan, dereh nauman sagw tiṽan am. Nilekis hǝn gǝlar ta be? Nǝmauran o nǝmatan? Nǝsǝnau lǝboii. 23 Gǝlar p̃isi arulevlev hǝn ginau. Nolǝŋon masuṽ hǝni ke neriŋ nǝmauran egai hǝn nǝb̃imat hǝn nǝb̃itoh mai aKristo, husur natenan ivoi p̃isi am hǝn ginau. 24 Be ivoi am hǝn gamito ke nitoh tabtab maiegai len nibegw. 25 Ale husur nunau lǝboi natenan, nolǝboii ke nitoh van, nitah tab mai gamit m̃os napulan samit len nadǝlomian mai nakemkeman. 26 Imagenan, nǝboŋ nǝb̃itoh mai gamit tǝtas, dereh mǝtelǝboi mǝtb̃isal suh aYesu Kristo sǝhor ta m̃o, bathut nǝsa togole hǝn ginau.
27 Be natsua, naṽide hǝn nǝmauran samit timasnor hǝn na-kel-uri-an tovoi seKristo, hǝn ke naut kǝmas nǝb̃egǝm ris gamito o nǝb̃itoh a tut dan gamito, dereh nesǝsǝloŋ hǝni ke mǝtoil gǝgat sum̃an mǝttosua ŋai ale len nǝlomit tosua mǝtub̃al tabtab m̃os nadǝlomian hǝn na-kel-uri-an tovoi. 28 Samtemǝtahw len aenemi samito gail; tah gat nǝlomito. Nǝboŋ mǝtb̃eil gǝgat, aenemi samit dereh lelǝboi sǝhoti ke aGot dereh tigol limasig buni be tilav kuv gamit dan nǝpanismen hǝn nǝmasigan enan. 29 Husur aGot eviol kǝmas hǝn nadǝlomian len aKristo mai gamito, wake eviol kǝmas hǝni am ke mǝttolǝŋon isa vǝsa m̃osi, 30 husur gagai mǝtutoh len nǝb̃alan top̃itoṽ hǝn nǝb̃alan mǝttorisi ke notodaŋ b̃uri a m̃o. Evi nǝb̃alan mǝttosǝsǝloŋ hǝni gagai ke notodaŋ b̃uri sal.* Uman 16.19-40