Filem̃on
Nalob̃ulat napisulan aPol totosi van hǝn aFilem̃on
Ase itos nalob̃ulat napisulan egai?
APol itosi.
APol itosi hǝn nǝsa?
Nalob̃ulat napisulan egai eus aFilem̃on hǝn b̃ikad tas naslev san togam yav dani. Naslev enan, nahǝsan aOnesimus, egǝm vi nǝvanuan nadǝlomian tia, evi naKristen sua.
APol itosi van hǝn ase?
APol itos nalob̃ulat napisulan egai van hǝn naKristen sua, nahǝsan aFilem̃on.
APol itos nalob̃ulat napisulan egai ŋais mai len naut a be?
Itosi van hǝn aFilem̃on pǝpadaŋ hǝn nasihau tovi A.D. 63 nǝboŋ totoh len naim bǝbaŋis aRom.
Ahai pispisul, aPol itos nalob̃ulat napisulan egai, van hǝn nabubur san, aFilem̃on. Eus aFilem̃on hǝn b̃ikad tas naslev san togam yav dani, nahǝsan aOnesimus. Nǝboŋ aOnesimus totoh a tut hǝn aFilem̃on, aPol evi tarhǝt san hǝn b̃egǝm vi nǝvanuan nadǝlomian len aYesu. Ŋa aOnesimus, b̃etǝlmam hǝn aFilem̃on, dereh tevi naslev san tǝtas, be dereh tevi aṽan am len nadǝlomian.
Golǝboi gǝb̃epǝpehun nalob̃ulat egai len nahudhut tovat. (1.1-25)
1) APol mai aTimoti arukel nahǝhaṽuran sǝlaru mai aFilem̃on (1-3)
2) APol esipa vi tǝban aGot hǝn aFilem̃on, ale isor tuṽ m̃osi (4-7)
3) APol eus aFilem̃on hǝn b̃ilav tǝlmam hǝn aOnesimus, naslev san togam yav dani (8-22)
4) Nǝvanuan galevis am lukel nahǝhaṽuran salit mai aFilem̃on (23-25)
1
Na-ke-ivoi-an van hǝn aFilem̃on
1 Ginau, aPol, nutos nalob̃ulat napisulan egai; ginau, lotobaŋis gat ginau husur aYesu Kristo, mai aTimoti tovi aṽadat len nadǝlomian. Nutosi van hǝn gaiug, aFilem̃on, gotovi aṽanamǝru len nadǝlomian namrtolǝmas bun gaiug mai gotoum m̃os aKristo hum ginamǝru.* Flm 13, 22-23 2 Nutosi van hǝn aApfia am, tovi aṽavinenamǝru len nadǝlomian, mai aArkippus* Kol 4.17 tovi nasoltia seKristo hum ginamǝru, mai alat siYesu am len naim sam̃. 3 AGot aTǝmadat mai Nasub̃, aYesu Kristo areviol kǝmas hǝn navoian mai gamito, arigol nǝlomit tikad natǝm̃at tabtab.
Nasipaan mai na-sor-tuṽ-an
4 Nǝboŋ notosor husur gaiug len na-sor-tuṽ-an sagw, nosipa vi tǝban aGot akis, 5 husur nosǝsǝloŋ ke gukad nadǝlomian sal len Nasub̃, aYesu mai golǝmas bun nǝvanuan san p̃isi. 6 Nusor tuṽ ke nadǝlomian gotokade mai gidato togol nǝlodat togǝm vi sua, dereh tevi mǝhat len nalǝboian sam̃, gol gǝb̃elǝboi navoian p̃isi lotovi sidato len aKristo. 7 Na-lǝmas-buni-an sam̃ enan igole tia ke nukemkem masuṽ mai nolǝŋon ivoi am len nǝlogw husur, len gaiug, Wawa, nǝlon alat siGot, ivoi habat am.
APol isor mai aFilem̃on husur aOnesimus
8 Imaienan, naut kǝmas len aKristo nukad na-il-b̃uri-an hǝn nǝb̃ikel mai gaiug nǝsa gǝb̃imasgole, nǝsakǝmaienan. 9 Noŋir gaiug bathut na-lǝmas-buni-an sidaru. Ginau boh aPol, notovi haṽut tia mai lotobaŋis gat ginau m̃os aKristo aYesu. 10 Ginau, noŋir gaiug m̃os anatugw, aOnesimus, togǝm vi natugw ulum̃an len nadǝlomian nǝboŋ nototoh len nǝ-baŋis-gati-an sal.* Kol 4.9 11 A m̃o Onesimus sagol natideh savoi hǝn gaiug, savi tarhǝt sam̃ wake gagai gai elǝboi b̃igol natit p̃isi b̃ivoi, evi tarhǝt sidar p̃isi.* Len nasoruan ta Kris, nǝhes Onesimus namilen ike elǝboi b̃igol natit p̃isi b̃ivoi.
12 Nosǝvat atenan tǝlmam van hǝn gaiug, gai tovi nǝlogw kitin. 13 A m̃o, nolǝŋon ke netǝgau gati hǝn b̃eum esagw len namilem̃ nǝboŋ nototoh len nǝ-baŋis-gati-an m̃os na-kel-uri-an tovoi. 14 Avil nolǝŋon nǝb̃igol nǝsa gǝb̃idam̃ hǝni ŋai. Nomǝtahun gǝb̃igol nǝsa tovoi husur notokele ŋai be nolǝŋon ke dereh gigole husur nalǝŋonian sam̃ ŋai.
15 Hum ma aOnesimus totoh a tut dan gaiug kǝkereh tia hǝn ke dereh gǝb̃ikade vi sutuai, 16 asike evi slev am. Dereh tivoi sǝhor naslev, tesum̃an aṽam̃ gǝb̃elǝmas buni. Ginau nolǝmas buni, avil gaiug golǝmas masuṽ hǝni sǝhor ginau notolǝmas buni. Dereh gelǝmas buni hum naslev sam̃, be savi naslev ŋai, dereh gelǝmas buni husur evi aṽam̃ len Nasub̃.
17 Imaienan, gǝb̃inau ke gidaru dartob̃on len nauman, givoi hǝn gai sum̃an gǝb̃ivoi hǝn ginau. 18 Avil len natideh gai b̃igol b̃isa hǝn gaiug o b̃ikabut sam̃, geriŋi len nǝkabut sagw. 19 Ginau, aPol, nutos nategai hǝn navǝlagw sǝb̃ogw: ginau nisar gele. Nolǝboi nǝb̃ikele mai gaiug ke, gaiug sǝb̃om̃, nǝmauran sam̃ vi sutuai evi nǝkabut gotokade len ginau. 20 Evoi, Wawa, aFilem̃on, nuke gevi tarhǝt sagw bathut nadǝlomian dartokade len Nasub̃ aKristo; gigol nelǝŋon tivoi am len nǝlogw.
21 Husur nolǝboi buni ke dereh gigol nǝsa notousi nǝboŋ nototos napisulan egai van hǝn gaiug. Evoi, nolǝboii ke dereh gigole tesǝhor habat hǝn nǝsa notousi. 22 Ikad natsual am: utaut hǝn narum̃ tesua vir ginau. Husur nuvatvat viri ke aGot dereh tisor var na-sor-tuṽ-an sam̃ gail ale tidam̃ hǝni ke netǝlmam van varis gamit tǝtas.
Nasudǝlam̃ian
23 AFilem̃on, nasoruan namǝkot sagw imaiegai: AEpafras totoh mai ginau len nǝ-baŋis-gati-an husur nauman togole m̃os aKristo aYesu, gai ike, “Ivoi,” van hǝn gaiug.* Kol 1.7, 4.12 24 Ale aMak, aAristarkus, aTemas mai aLuk lotoum mai ginau, galit lokǝmaienan van hǝn gaiug.† Mak: 2Tim 4.11; Aristarkus: Uman 19.29, 27.2; Kol 4.10; Temas: Kol 4.14; 2Tim 4.10; Luk: Kol 4.14; 2Tim 4.11
25 Nasub̃, aYesu Kristo m̃au teviol kǝmas hǝn navoian mai nanunumito.